വിനോദസഞ്ചാര വകുപ്പും ജില്ലാ ഭരണകൂടവും ഡി.ടി.പി.സിയും സംയുക്തമായി ജില്ലയിൽ സംഘടിപ്പിക്കുന്ന ഓണാഘോഷ പരിപാടികള്‍ മികച്ച രീതിയില്‍ റിപ്പോര്‍ട്ട് ചെയ്യുന്ന മാധ്യമ പ്രവര്‍ത്തകര്‍ക്ക് അവാര്‍ഡ് നല്‍കുന്നു. അച്ചടിമാധ്യമം വിഭാഗത്തിൽ മികച്ച റിപ്പോർട്ടർ, മികച്ച ന്യൂസ് ഫോട്ടോഗ്രാഫർ എന്നിവർക്കും ദൃശ്യമാധ്യമ വിഭാഗത്തിൽ മികച്ച റിപ്പോർട്ടർ, മികച്ച ക്യാമറാമാൻ എന്നിവർക്കുമാണ് അവാര്‍ഡ്. 
റിപ്പോർട്ടുകൾ ആഗസ്റ്റ് 20 മുതൽ സെപ്റ്റംബർ രണ്ടുവരെ പ്രസിദ്ധീകരിച്ചതോ സംപ്രേഷണം ചെയ്തതോ ആയിരിക്കണം. onamdtpc2023@gmail.com എന്ന ഇ-മെയിൽ വഴിയാണ് എൻട്രികൾ അയക്കേണ്ടത്. ഒരാൾക്ക് ഒരു എൻട്രി അയക്കാം.

ചക്കിട്ടപാറ ഗ്രാമപഞ്ചായത്തിൽ കരിയർ ഗൈഡൻസ്‌ സെന്റർ ആരംഭിക്കുന്നു. എളമരം കരീം എം.പി യുടെ ഫണ്ടിൽ നിന്നും 50 ലക്ഷം രൂപയും ഗ്രാമപഞ്ചായത്തിന്റെ 25 ലക്ഷം രൂപയും ചെലവഴിച്ചാണ് പദ്ധതി നടപ്പിലാക്കുക. 

പഞ്ചായത്തിലെ പട്ടിക വർഗ വിഭാഗത്തിൽപ്പെട്ട വിദ്യാർത്ഥികൾക്ക് ഉന്നത പഠനത്തിന് ദിശാബോധം നൽകുക എന്ന ഉദ്ദേശത്തോടെയാണ് നരേന്ദ്രദേവ്‌ ആദിവാസി കോളനിയിൽ പദ്ധതി നടപ്പിലാക്കുന്നതെന്ന് പഞ്ചായത്ത് പ്രസിഡന്റ് കെ സുനിൽ പറഞ്ഞു.

ജില്ലാ ഭരണകൂടത്തിന്റേയും സാമൂഹ്യ ക്ഷേമ വകുപ്പിന്റേയും നേതൃത്വത്തിൽ പ്രവർത്തിക്കുന്ന ഉദയം ഹോമിൽ  ഓണമാഘോഷിച്ചു. തുറമുഖം മ്യൂസിയം പുരാവസ്തു പുരാരേഖ വകുപ്പ് മന്ത്രി അഹമ്മദ് ദേവർകോവിൽ പരിപാടി ഉദ്ഘാടനം ചെയ്തു.

കേരളീയർ ഒന്നിച്ച് ആഘോഷിക്കുന്ന ഓണം മലയാളികളുടെ തനത്  ഉത്സവമാണെന്നും ആരും മാറ്റിനിർത്തപ്പെടാൻ പാടില്ലെന്ന ചിന്താഗതിയാണ് മനസ്സിലുണ്ടാകേണ്ടതെന്നും മന്ത്രി പറഞ്ഞു. ഉദയത്തിലെ അന്തേവാസികൾക്കൊപ്പം ഓണം ആഘോഷിക്കാൻ സാധിച്ചത് ഏറെ സന്തോഷകരമാണെന്നും
ഏവർക്കും ഓണാശംസകൾ നേരുന്നതായും മന്ത്രി പറഞ്ഞു. 

കാരശ്ശേരി ഗ്രാമപഞ്ചായത്തിലെ രണ്ടാമത്തെ വയോജന പാർക്കിൻ്റെ നിർമാണം പുരോഗമിക്കുന്നു. വല്ലത്തായിപ്പാറ മുട്ടോളിയിൽ പാർക്കിൻ്റെ നിർമാണം നാലു മാസത്തിനുള്ളിൽ പൂർത്തിയാക്കുകയാണ് ലക്ഷ്യം. 2023 മെയ് മാസമാണ് കുറ്റിപറമ്പിൽ കുന്ദമംഗലം ബ്ലോക്ക് പഞ്ചായത്തിന്റെ പദ്ധതിയിൽ ഒരു വയോജന പാർക്ക് തുറന്നത്. ഇതിനടുത്തുതന്നെ കഴിഞ്ഞ വർഷം ഒരു സീനിയർ സിറ്റിസൺസ് റിക്രിയേഷൻ സെന്ററും തുറന്നിട്ടുണ്ട്. കൂടാതെ, തേക്കുംകുറ്റിയിൽ കോവിഡ് കാലത്ത് അടച്ചിടേണ്ടിവന്ന പകൽവീടും തുറന്നു കൊടുത്തു.

ജില്ലാതല ഓണാഘോഷ പരിപാടികളുടെ ഭാഗമായി സംഘടിപ്പിക്കുന്ന ഫൂട് വോളി നാളെ (ആഗസ്റ്റ് 30) വൈകീട്ട് അഞ്ച് മണിക്ക് കോഴിക്കോട് ബീച്ചിൽ നടക്കും. 

സംസ്ഥാന വിനോദസഞ്ചാര വകുപ്പും, ജില്ലാ ഭരണകൂടവും, ജില്ലാ ടൂറിസം പ്രെമോഷൻ കൗൺസിലും സംയുക്തമായാണ് ഓണാഘോഷ പരിപാടികൾ സംഘടിപ്പിക്കുന്നത്.

ഓണാഘോഷത്തിന്റെ ഭാഗമായി സെപ്റ്റംബർ മൂന്ന് വരെ ജില്ലയിൽ വിപുലമായ പരിപാടികളാണ് സംഘടിപ്പിക്കുന്നത്.

ഓണനാളുകളെ ആഘോഷമാക്കാനൊരുങ്ങി കോഴിക്കോട്. ഓണം വാരാഘോഷത്തിന്റെ ഭാഗമായി  സെപ്റ്റംബര്‍ മൂന്ന് വരെ വിപുലമായ പരിപാടികളാണ് ജില്ലയിൽ ഒരുക്കിയിട്ടുള്ളത്. നഗരത്തിന്റെ വീഥികളിലെങ്ങും ദീപാലങ്കാരങ്ങള്‍ ഒരുക്കിയാണ് സമൃദ്ധിയുടെ ദേശീയോത്സവത്തെ കോഴിക്കോട് വരവേല്‍ക്കുന്നത്‌. 

ജില്ലാതല ഓണാഘോഷ പരിപാടികളുടെ ഭാഗമായി 'വാക്കിന്റെ നൈതികതയും എഴുത്തിലെ രാഷ്ട്രീയ ശരികളും' എന്ന വിഷയത്തിൽ ടൗൺഹാളിൽ സാഹിത്യ സംവാദം സംഘടിപ്പിച്ചു. സംസ്ഥാന വിനോദസഞ്ചാരവകുപ്പും ജില്ലാ ഭരണകൂടവും ജില്ലാ ടൂറിസം പ്രെമോഷൻ കൗൺസിലും ചേർന്ന് സംഘടിപ്പിച്ച   സാഹിത്യ സംവാദം കവിയും എഴുത്തുകാരനുമായ പി.എൻ ഗോപീകൃഷ്ണൻ  ഉദ്ഘാടനം ചെയ്തു.

എസ്.എസ്.കെ ജില്ലാ പ്രൊജക്ട് കോർഡിനേറ്റർ ഡോ.എ.കെ.അബ്ദുൾ ഹക്കീം മോഡറേറ്ററായി.  സംവാദത്തിൽ ഷീല ടോമി, കെ.വി.സജയ്, സോണിയ.ഇ.പ എന്നിവർ സംസാരിച്ചു. കെ.വി ശശി സ്വാഗതം പറഞ്ഞു.

അമ്പെയ്ത്ത് മത്സരത്തിന്റെ ആവേശ ലഹരിയിൽ മതിമറന്ന് മാനാഞ്ചിറ മെെതാനം. ജില്ലാതല ഓണാഘോഷ പരിപാടികളുടെ ഭാഗമായാണ് സംസ്ഥാന വിനോദസഞ്ചാരവകുപ്പും ജില്ലാ ഭരണകൂടവും ജില്ലാ ടൂറിസം പ്രെമോഷൻ കൗൺസിലും സംയുക്തമായി അമ്പെയത്ത് മത്സരം സംഘടിപ്പിച്ചത്. മത്സരത്തിൽ എരവട്ടൂർ പാറപ്പുറം ടീം വിജയികളായി.

കോർപ്പറേഷൻ വിദ്യാഭ്യാസ, സ്പോർട്സ് സ്റ്റാന്റിങ് കമ്മിറ്റി ചെയർപേഴ്സൺ സി രേഖ മത്സരാർത്ഥികളെ പരിചയപ്പെട്ടു. സ്പോർട് കൗൺസിൽ വെെസ് പ്രസിഡന്റ് റോയി ജോൺ, അം​ഗം മൂസ ഹാജി, സാബിറ തുടങ്ങിയവർ പങ്കെടുത്തു.

കൊടിയത്തൂർ ഗ്രാമപഞ്ചായത്തിൻ്റെയും കുടുംബശ്രീ സി ഡി എസിൻ്റെയും നേതൃത്വത്തിൽ നടന്ന ഈ വർഷത്തെ ഓണാഘോഷ പരിപാടികൾ 'ഉത്രാടപ്പാച്ചിൽ' സമാപിച്ചു. മൂന്ന് ദിവസങ്ങളിലായി പന്നിക്കോടാണ് പരിപാടികൾ നടന്നത്. കുടുംബശ്രീയുടെയും കൃഷി വകുപ്പിൻ്റെയും ചന്തകൾ, വിവിധങ്ങളായ കലാപരിപാടികൾ, ഓണസദ്യ എന്നിവയാണ് ഓണാഘോഷങ്ങളുടെ ഭാഗമായി സംഘടിപ്പിച്ചത്.

ഗ്രാമപഞ്ചായത്ത് പ്രസിഡന്റ് ദിവ്യ ഷിബു, മെമ്പർ ബാബു പൊലുകുന്ന്, മെഡിക്കൽ ഓഫീസർ ഡോ. മനു ലാൽ എന്നിവർ നയിച്ച ഗാനവിരുന്ന് വ്യത്യസ്ത അനുഭവമായി. ചെറുവാടി സി.എച്ച്.സി യുടെ ആഭിമുഖ്യത്തിൽ ജീവിത ശൈലി രോഗ പരിശോധനയും നടന്നു.

കൊടുവള്ളി നിയോജക മണ്ഡലത്തിൽ ഡോ.എം.കെ. മുനീർ എം എൽ എ നടപ്പാക്കി വരുന്ന ഉന്നതി ജനകീയ വിജ്ഞാന മുന്നേറ്റം പദ്ധതിയുടെ ഭാഗമായി  മണ്ഡലത്തിലെ സ്കൂളുകളിൽ നടത്തിയ ടാലന്റ് ഹണ്ട് ക്വിസ് പ്രോഗ്രാമിന്റെ മണ്ഡലം തല ഫൈനൽ മത്സരം സമാപിച്ചു. സ്വാതന്ത്ര്യ ദിനത്തോടനുബന്ധിച്ച് സ്കൂളുകളിൽ നടന്ന ക്വിസ് മത്സരത്തിൽ മണ്ഡലത്തിലെ മുഴുവൻ സ്കൂളുകളും പങ്കെടുത്തു. 
സ്കൂൾ തല മത്സരത്തിന് ശേഷം പഞ്ചായത്ത് / മുനിസിപ്പാലിറ്റി തലത്തിൽ നടന്ന മത്സരത്തിൽ ഒന്നാം സ്ഥാനം ലഭിച്ചവരാണ് മണ്ഡലം തല മത്സരത്തിൽ പങ്കെടുത്തത്.