കോടഞ്ചേരി ഗ്രാമപഞ്ചായത്തിലെ അതിദരിദ്രരുടെ ലിസ്റ്റിൽ ഉൾപ്പെട്ട അർഹരായ 77 കുടുംബങ്ങൾക്ക് ഓണ സമ്മാനമായി നൽകുന്ന ഭക്ഷ്യ കിറ്റിന്റെ വിതരണ ഉദ്ഘാടനം ഗ്രാമപഞ്ചായത്ത് പ്രസിഡന്റ് അലക്സ് തോമസ് ചെമ്പകശ്ശേരി നിർവഹിച്ചു. വൈസ് പ്രസിഡന്റ് ചിന്നാ അശോകൻ അധ്യക്ഷത വഹിച്ചു. 

ഗ്രാമപഞ്ചായത്തിന്റെ വാർഷിക പദ്ധതിയിൽ ഉൾപ്പെടുത്തി അർഹരായ കുടുംബങ്ങൾക്ക് നൽകുന്ന ഭക്ഷ്യ കിറ്റിൽ വെളിച്ചെണ്ണ, ഉഴുന്ന്, പരിപ്പ്, പഞ്ചസാര എന്നിവ ഉൾപ്പെടെ 14 വിഭവങ്ങൾ ഉൾപ്പെടുന്നു. തുണി സഞ്ചികളിൽ പാക്ക് ചെയ്ത് സപ്ലൈകോയിൽ നിന്നും 750 രൂപയുടെ ഭക്ഷ്യധാന്യങ്ങളുടെ കിറ്റാണ് ഓണസമ്മാനമായി അർഹമായ കുടുംബങ്ങൾക്ക് നൽകിയത്. 

ഓണത്തോടനുബന്ധിച്ച്‌ കിടപ്പുരോഗികൾക്ക് ആശ്വാസമേകാൻ അവശ്യ സാധനങ്ങളടങ്ങിയ കിറ്റുകൾ വിതരണം ചെയ്ത് ചേളന്നൂർ ഗ്രാമപഞ്ചായത്ത്. ഗ്രാമപഞ്ചായത്ത് പരിധിയിലെ 60 ഓളം കിടപ്പുരോഗികളുടെ വീടുകളിലേക്കാണ്  പ്രസിഡന്റ് പി.പി. നൗഷീറിന്റെ നേതൃത്വത്തിൽ  സാന്ത്വനയാത്ര നടത്തിയത്.

ഗ്രാമപഞ്ചായത്ത് വൈസ് പ്രസിഡന്റ് ഗൗരി പുതിയോത്ത്, സ്ഥിരംസമിതി ചെയർമാന്മാരായ സി.പി. നൗഷീർ, പി.കെ. കവിത, ആരോഗ്യകേന്ദ്രം മെഡിക്കൽ ഓഫീസർ ശ്രീജിത്ത്, പാലിയേറ്റീവ് നഴ്‌സ് സുലോചന പള്ളിപ്പൊയിൽ തുടങ്ങിയവർ പങ്കെടുത്തു.

ഐക്യമാണ് ഓണത്തിന്റെ സങ്കൽപ്പമെന്ന് ആലങ്കോട് ലീലാകൃഷ്ണൻ

ജില്ലാതല ഓണാഘോഷ പരിപാടികളുടെ ഭാഗമായി സംസ്ഥാന വിനോദ സഞ്ചാര വകുപ്പും ജില്ലാ ഭരണകൂടവും ജില്ലാ ടൂറിസം പ്രെമോഷൻ കൗൺസിലും ചേർന്ന്  ടൗൺഹാളിൽ സംഘടിപ്പിച്ച സാഹിത്യോത്സവത്തിലെ കവിസമ്മേളനം ശ്രദ്ധേയമായി. സാഹിത്യകാരൻ ആലങ്കോട് ലീലാകൃഷ്ണൻ കവിസമ്മേളനം ഉദ്ഘാടനം ചെയ്തു. ഐക്യമാണ് ഓണത്തിന്റെ പ്രധാന സങ്കൽപ്പമെന്ന് ആലങ്കോട് ലീലാകൃഷ്ണൻ പറഞ്ഞു. 
ഓണത്തെ ഒന്നായി കാണണമെന്നും
മലയാളിയുടെ സംസ്കൃതി ഏകത്വത്തിൻ്റേതാണെന്നും അദ്ദേഹം പറഞ്ഞു. നാനാജാതി മതസ്ഥരായ മലയാളികളെ ഓണം ഒന്നിപ്പിക്കുന്നതായും അദ്ദേഹം കൂട്ടിച്ചേർത്തു.

വിനോദസഞ്ചാര വകുപ്പും ജില്ലാ ഭരണകൂടവും ഡി.ടി.പി.സിയും സംയുക്തമായി ജില്ലയിൽ സംഘടിപ്പിക്കുന്ന ഓണാഘോഷ പരിപാടികള്‍ മികച്ച രീതിയില്‍ റിപ്പോര്‍ട്ട് ചെയ്യുന്ന മാധ്യമ പ്രവര്‍ത്തകര്‍ക്ക് അവാര്‍ഡ് നല്‍കുന്നു. അച്ചടിമാധ്യമം വിഭാഗത്തിൽ മികച്ച റിപ്പോർട്ടർ, മികച്ച ന്യൂസ് ഫോട്ടോഗ്രാഫർ എന്നിവർക്കും ദൃശ്യമാധ്യമ വിഭാഗത്തിൽ മികച്ച റിപ്പോർട്ടർ, മികച്ച ക്യാമറാമാൻ എന്നിവർക്കുമാണ് അവാര്‍ഡ്. 
റിപ്പോർട്ടുകൾ ആഗസ്റ്റ് 20 മുതൽ സെപ്റ്റംബർ രണ്ടുവരെ പ്രസിദ്ധീകരിച്ചതോ സംപ്രേഷണം ചെയ്തതോ ആയിരിക്കണം. onamdtpc2023@gmail.com എന്ന ഇ-മെയിൽ വഴിയാണ് എൻട്രികൾ അയക്കേണ്ടത്. ഒരാൾക്ക് ഒരു എൻട്രി അയക്കാം.

ഓണക്കാലം മുന്നിൽക്കണ്ട്  മൂടാടി ഗ്രാമപഞ്ചായത്ത് ഒരുക്കിയ പൂ കൃഷിയിലൂടെ  കടലോരം പൂവാടിയായി. കോടിക്കൽ കടലോരത്തെ മജീദും ഭാര്യ ബുഷ്റയും ചേർന്നാണ് കടപ്പുറത്തെ പൂഴിമണലിൽ പൂകൃഷി നടത്തിയത്.  ഗ്രാമപഞ്ചായത്തും കൃഷിഭവനും കൂടെ നിന്നപ്പോൾ പദ്ധതി വൻ വിജയമായി.

ഓണാഘോഷത്തിന്റെ ഭാഗമായി പാഴ് വസ്തുക്കളിൽ നിന്നും അലങ്കാര വസ്തുക്കൾ നിർമിക്കുന്നതിനായി ജില്ലാ ശുചിത്വമിഷൻ സംഘടിപ്പിക്കുന്ന മത്സരങ്ങളിൽ പങ്കെടുക്കുന്നവർ സെപ്റ്റംബർ രണ്ടിനകം അലങ്കാര വസ്തുക്കൾ പഞ്ചായത്ത് തലത്തിലും സെപ്റ്റംബർ 10 നകം ജില്ലാ തലത്തിലും സമർപ്പിക്കണമെന്ന് ശുചിത്വ മിഷൻ ജില്ലാ കോർഡിനേറ്റർ അറിയിച്ചു.

മത്സരത്തിൽ  ജില്ലയിലെ കുടുംബശ്രീ, ഹരിത കർമ്മസേനാ പ്രവർത്തകർക്ക്
പങ്കെടുക്കാം.

ആയഞ്ചേരി ഗ്രാമപഞ്ചായത്ത് കൃഷിഭവന്റെ ആഭിമുഖ്യത്തിൽ 'ഓണസമൃദ്ധി' കർഷക ചന്ത തുടങ്ങി. ജൈവ കാർഷിക ഉൽപ്പന്നങ്ങൾ മാർക്കറ്റ് വിലയേക്കാൾ 30 ശതമാനം വിലക്കുറവിലാണ് ചന്തയിൽ നിന്ന് ലഭ്യമാക്കുന്നത്. മാർക്കറ്റ് വിലയേക്കാൾ 10 ശതമാനം കൂടുതൽ വിലയ്ക്കാണ്  കർഷകരിൽ നിന്നും കാർഷിക ഉൽപ്പന്നങ്ങൾ സംഭരിക്കുന്നത്.

സംസ്ഥാന വിനോദസഞ്ചാര വകുപ്പും ജില്ലാ ഭരണകൂടവും ജില്ലാ ടൂറിസം പ്രെമോഷൻ കൗൺസിലും സംയുക്തമായി സംഘടിപ്പിക്കുന്ന ഓണാഘോഷ പരിപാടികളുടെ ഭാഗമായി കോഴിക്കോട് ബീച്ചിൽ സംഘടിപ്പിച്ച പട്ടം പറത്തൽ ആവേശമായി. 

 കോർപ്പറേഷൻ ഡെപ്യൂട്ടി മേയർ സി.പി മുസാഫർ അഹമ്മദ് പട്ടം പറത്തൽ ഉദ്ഘാടനം ചെയ്തു. തുടർന്ന് അവധിദിനം ആഘോഷിക്കാൻ ബീച്ചിൽ എത്തിയവരുടെ ആരവങ്ങളോടൊപ്പം വൈവിധ്യങ്ങളുടെ നിരവധി പട്ടങ്ങൾ ഉയർന്നു. വൺ ഇന്ത്യ കൈറ്റ് ടീമിന്റെ നേതൃത്വത്തിലായിരുന്നു  പട്ടം പറത്തൽ സംഘടിപ്പിച്ചത്.

എല്ലാവര്‍ക്കും സന്തോഷം നല്‍കുന്ന രീതിയില്‍ കേരളത്തിലെ ഓണാഘോഷം മാറിയെന്ന് തുറമുഖം മ്യൂസിയം പുരാവസ്തു പുരാരേഖ വകുപ്പ് മന്ത്രി അഹമ്മദ് ദേവര്‍കോവില്‍. വിനോദസഞ്ചാര വകുപ്പിന്റെയും ജില്ലാ ഭരണകൂടത്തിന്റെയും ജില്ലാ ടൂറിസം പ്രെമോഷന്‍ കൗണ്‍സിലിന്റെയും സംയുക്താഭിമുഖ്യത്തില്‍ ജില്ലയില്‍ സംഘടിപ്പിക്കുന്ന ഓണാഘോഷ പരിപാടികളുടെ ഭാഗമായുള്ള  കായിക മത്സരങ്ങളുടെ ഉദ്ഘാടനം നിര്‍വഹിക്കുകയായിരുന്നു മന്ത്രി.

അപകടത്തിൽ പരിക്കേറ്റ ആളെ എസ്കോർട്ട് വാഹനത്തിൽ  ആശുപത്രിയിലെത്തിച്ച് തുറമുഖം മ്യൂസിയം പുരാവസ്തു പുരാ​രേഖ വകുപ്പ് മന്ത്രി അഹമ്മദ് ദേവർകോവിൽ. കല്ലൂത്താങ്കടവ് സ്വദേശി കുമാറിനാണ് മന്ത്രിയുടെ സമയോചിത ഇടപെടലിൽ ചികിത്സ ലഭ്യമായത്.