ലോക കായിക ദിനത്തോടനുബന്ധിച്ച് കൊയിലാണ്ടി നഗരസഭ കുടുംബശ്രീ ബാലസഭ കുട്ടികൾക്കായി സംഘടിപ്പിച്ച ഫുട്ബോൾ മേളയുടെ സമ്മാന വിതരണം നടത്തി. പരിപാടിയുടെ ഉദ്ഘാടനം നഗരസഭ ചെയർപേഴ്സൺ സുധ കിഴക്കേപാട്ട് നിർവഹിച്ചു. ക്ഷേമകാര്യ സ്റ്റാൻഡിങ് കമ്മിറ്റി ചെയർമാൻ കെ ഷിജു അധ്യക്ഷത വഹിച്ചു. കുടുംബശ്രീ ജില്ലാ മിഷൻ ഡി പി എം ബിജേഷ് മുഖ്യാതിഥിയായി. മുൻ ഫുട്ബോൾ താരം സർവീസസ് കുഞ്ഞികണാരൻ സമ്മാനദാനം നടത്തി.

ചടങ്ങിൽ  വാർഡ് കൗൺസിലർ വി രമേശൻ, സ്പോർട്സ് കൗൺസിൽ കൺവീനർ ഋഷിദാസ് കല്ലാട്ട് എന്നിവർ സംസാരിച്ചു. നോർത്ത് സി ഡി എസ് ചെയർപേഴ്സൺ ഇന്ദുലേഖ സ്വാഗതവും സൗത്ത് സിഡിഎസ്  ചെയർപേഴ്സൺ വിബിന നന്ദിയും പറഞ്ഞു.

വിനോദസഞ്ചാര വകുപ്പും ജില്ലാ ഭരണകൂടവും ഡി.ടി.പി.സിയും സംയുക്തമായി ജില്ലയിൽ സംഘടിപ്പിക്കുന്ന ഓണാഘോഷ പരിപാടികള്‍ മികച്ച രീതിയില്‍ റിപ്പോര്‍ട്ട് ചെയ്യുന്ന മാധ്യമ പ്രവര്‍ത്തകര്‍ക്ക് അവാര്‍ഡ് നല്‍കുന്നു. അച്ചടിമാധ്യമം വിഭാഗത്തിൽ മികച്ച റിപ്പോർട്ടർ, മികച്ച ന്യൂസ് ഫോട്ടോഗ്രാഫർ എന്നിവർക്കും ദൃശ്യമാധ്യമ വിഭാഗത്തിൽ മികച്ച റിപ്പോർട്ടർ, മികച്ച ക്യാമറാമാൻ എന്നിവർക്കുമാണ് അവാര്‍ഡ്. 
റിപ്പോർട്ടുകൾ ആഗസ്റ്റ് 20 മുതൽ സെപ്റ്റംബർ രണ്ടുവരെ പ്രസിദ്ധീകരിച്ചതോ സംപ്രേഷണം ചെയ്തതോ ആയിരിക്കണം. onamdtpc2023@gmail.com എന്ന ഇ-മെയിൽ വഴിയാണ് എൻട്രികൾ അയക്കേണ്ടത്. ഒരാൾക്ക് ഒരു എൻട്രി അയക്കാം.

തലശേരി ഹെറിറ്റേജ് പ്രൊജക്ടിന്റെ ഭാഗമായി വടകര താഴെ അങ്ങാടിയുടെ നവീകരണ പ്രവൃത്തിക്കുള്ള രൂപകൽപന തയ്യാറാക്കാൻ വിനോദസഞ്ചാര വകുപ്പ് ഉദ്യോഗസ്ഥർ കെ.കെ രമ എം.എൽ.എയുടെ നേതൃത്വത്തിൽ സ്ഥലം സന്ദർശിച്ചു.

തലശേരി ഹെറിറ്റേജ് പ്രൊജക്ടിന്റെ ഭാഗമായി 2016ൽ അനുവദിച്ചതാണ്  താഴെ അങ്ങാടി നവീകരണ പദ്ധതി. തലശേരി ഹെറിറ്റേജ് പ്രൊജക്ടിൽ തച്ചോളി മാണിക്കോത്ത് ക്ഷേത്ര നവീകരണത്തിന് 2.03 കോടിയും താഴെഅങ്ങാടി നവീകരണത്തിന് 1.43 കോടിയുമാണ് വകയിരുത്തിയിരിക്കുന്നത്. ഇതിൽ തച്ചോളി മാണിക്കോത്ത് ക്ഷേത്ര നവീകരണ പ്രവർത്തനങ്ങൾ ആരംഭിച്ചുകഴിഞ്ഞു.

കോഴിക്കോടിന് ഇനി മൂന്ന് ദിനം ഉത്സവനാളുകള്‍. കോഴിക്കോടിന്റെ ഓണാഘോഷം 'പൊന്നോണം 2023' ന്റെ ഉദ്ഘാടനം നാളെ (സെപ്റ്റംബർ 1)  വൈകീട്ട് 6 മണിക്ക് ബീച്ചിലെ ഫ്രീഡം സ്‌ക്വയറില്‍ പൊതുമരാമത്ത് ടൂറിസം വകുപ്പ് മന്ത്രി പി.എ മുഹമ്മദ് റിയാസ് നിര്‍വ്വഹിക്കും. പ്രശസ്ത ചലച്ചിത്ര താരങ്ങളായ പത്മശ്രീ ജയറാം, റിമ കല്ലിങ്കൽ എന്നിവർ മുഖ്യാതിഥികളാവും.

സെപ്റ്റംബര്‍ 1,2,3 തിയതികളിലായി കോഴിക്കോട് ബീച്ച് ഫ്രീഡം സ്‌ക്വയര്‍, ഭട്ട് റോഡ്, കുറ്റിച്ചിറ, തളി, ബേപ്പൂര്‍ മിനി സ്റ്റേഡിയം, മാനാഞ്ചിറ, ടൗണ്‍ ഹാള്‍ എന്നീ വേദികളില്‍ 'പൊന്നോണം 2023' എന്ന പേരില്‍  കലാകായിക സംഗീതനാടക സാഹിത്യ പരിപാടികള്‍ അരങ്ങേറും.

ജില്ലാതല ഓണാഘോഷ പരിപാടികളുടെ ഭാഗമായി കോഴിക്കോട് ബീച്ചിൽ ഫൂട് വോളി സംഘടിപ്പിച്ചു. ഫുട്ബോളിനെ സ്നേഹിക്കുന്ന കോഴിക്കോട്ടുകാര്‍ക്ക് ഫൂട് വോളി വേറിട്ട അനുഭവമായി. കളി കാണാൻ നൂറുകണക്കിന് ആളുകളാണ് ബീച്ചിലെത്തിയത്.

ബീച്ചിൽ ഒരുക്കിയ വോളിബോൾ കോർട്ടിൽ നടന്ന ഫൂട് വോളി മേയർ ഡോ. ബീന ഫിലിപ്പ് ഉദ്ഘാടനം ചെയ്തു. സ്പോർട്സ് ആന്റ് മാർഷൽ ആർട്സ് കമ്മിറ്റി കൺവീനർ ഷൈജു അധ്യക്ഷത വഹിച്ചു. മത്സരത്തിൽ നാല് ക്ലബുകൾ മാറ്റുരച്ചു. കുന്നമംഗലം ഫൂട് വോളി ക്ലബ്  കടലുണ്ടി ഫൂട് വോളി ക്ലബ്ബിനെ ഒന്നിനെതിരെ 2 സെറ്റിന് പരാജയപ്പെടുത്തി ചാമ്പ്യന്മാരായി.

ഓണം വാരാഘോഷത്തിന്റെ ഭാഗമായി സംഘടിപ്പിക്കുന്ന കലാ പരിപാടികൾക്ക് മാറ്റുകൂട്ടാൻ ഫോക് ആർട്സും. മാനാഞ്ചിറയിൽ സെപ്റ്റംബർ ഒന്നുമുതൽ മൂന്ന് വരെയാണ്  കലാവിരുന്ന് അരങ്ങേറുക. തമിഴ്നാട്ടുകാരൻ പി.മണിയുടെ പ്രകടനത്തോടെയാണ്  ഫോക് ആർട്സിന് തിരിതെളിയുക. എസ്.എസ്.കെ നടത്തിയ ദേശീയ കലോത്സവത്തിൽ അവാർഡ് നേടിയ തെയ്യം കലാരൂപവുമായാണ് 17 കാരനായ മണി കാണികൾക്ക് മുന്നിലേക്കെത്തുന്നത്. ചലചിത്ര പിന്നണിഗായകൻ ഗിരീഷ് ആമ്പ്ര നയിക്കുന്ന പാട്ടുകൂട്ടം കോഴിക്കോടിന്റെ "വാമൊഴിത്താളം " നാടൻപാട്ടുകളും ഓട്ടൻ തുള്ളലും അന്നേദിവസം ഉണ്ടായിരിക്കും.

ജില്ലാതല ഓണാഘോഷ പരിപാടി 'പൊന്നോണം 2023' ന്റെ ഭാഗമായി സംഘടിപ്പിക്കുന്ന നാടകോത്സവം നാളെ (ആഗസ്റ്റ് 31) ടൗൺഹാളിൽ ആരംഭിക്കും. വൈകുന്നേരം ആറ് മണിക്ക് കെ.എം സച്ചിൻദേവ് എം.എൽ.എ പരിപാടി ഉദ്ഘാടനം ചെയ്യും. സംസ്ഥാന വിനോദസഞ്ചാരവകുപ്പും ജില്ലാ ഭരണകൂടവും ജില്ലാ ടൂറിസം പ്രെമോഷൻ കൗൺസിലും ചേർന്നാണ് ഓണാഘോഷ പരിപാടികൾ സംഘടിപ്പിക്കുന്നത്.

ചലച്ചിത്ര താരങ്ങളായ ജയറാമും റിമ കല്ലിങ്കലും മുഖ്യാതിഥികളാവും

വിനോദ സഞ്ചാര വകുപ്പും ജില്ലാ ഭരണകൂടവും ജില്ലാ ടൂറിസം പ്രെമോഷൻ കൗൺസിലും സംയുക്തമായി സംഘടിപ്പിക്കുന്ന ഓണാഘോഷ പരിപാടി പൊന്നോണം 2023 ന്റെ ഉദ്ഘാടനം സെപ്റ്റംബർ ഒന്നാം തിയ്യതി പൊതുമരാമത്ത് ടൂറിസം വകുപ്പ് മന്ത്രി പി.എ മുഹമ്മദ്‌ റിയാസ് നിർവഹിക്കുമെന്ന്  ഓണാഘോഷം വർക്കിംഗ് ചെയർമാൻ തോട്ടത്തിൽ രവീന്ദ്രൻ എം എൽ എ വാർത്താ സമ്മേളനത്തിൽ അറിയിച്ചു.  
സെപ്റ്റംബർ ഒന്നിന് വൈകിട്ട് ആറ്  മണിക്ക് ബീച്ചിലെ ഫ്രീഡം സ്ക്വയറിൽ നടക്കുന്ന പരിപാടിയിൽ പ്രശസ്ത ചലച്ചിത്ര താരങ്ങളായ പത്മശ്രീ ജയറാം, റിമ കല്ലിങ്കൽ എന്നിവർ മുഖ്യാതിഥികളാവും.