Skip to main content
എ.കെ. 47, മെഷീൻ ഗൺ; അടിച്ചാൽ തിരിച്ചടിക്കാനുള്ള അടവുകൾ, അടിപൊളിയാണ് കേരള പോലീസ് സ്റ്റാൾ

എ.കെ. 47, മെഷീൻ ഗൺ; അടിച്ചാൽ തിരിച്ചടിക്കാനുള്ള അടവുകൾ, അടിപൊളിയാണ് കേരള പോലീസ് സ്റ്റാൾ

മുൻകാലങ്ങളിൽ പോലീസ് സേന ഉപയോഗിച്ചിരുന്ന ആയുധങ്ങൾ മുതൽ അത്യാധുനിക യന്ത്രത്തോക്കുകളും വനിതകൾക്ക് സ്വയം സുരക്ഷ ഒരുക്കുന്നതിനുള്ള ആയോധന മുറകളുടെ പരിശീലനവും ഉൾപ്പെടുന്നതാണ് എൻറെ കേരളം മേളയിലെ കേരള പോലീസിൻറെ സ്റ്റാൾ. രണ്ടാം പിണറായി സർക്കാരിന്റെ രണ്ടാം വാർഷികത്തോടനുബന്ധിച്ച് ഏപ്രിൽ 23 വരെ ആലപ്പുഴ ബീച്ചിൽ നടക്കുന്ന എന്റെ കേരളം പ്രദർശന വിപണന മേളയിലാണ് പോലീസ് വകുപ്പിൻറെ സ്റ്റാൾ സജ്ജീകരിച്ചിട്ടുള്ളത്. മേളയിലെ പ്രധാന ആകർഷണം കൂടിയാണ് ഈ പരിശീലന പരിപാടി. സ്ത്രീ സുരക്ഷയ്ക്ക് പ്രത്യേക പരിഗണന നൽകിയാണ് സ്റ്റാൾ തയ്യാറാക്കിയിട്ടുള്ളത്.

പൊതുഇടങ്ങളിലും വീടകങ്ങളിലും സ്ത്രീകൾ നേരിടുന്ന അതിക്രമങ്ങളെ പ്രതിരോധിക്കാനും സ്വയം സുരക്ഷ ഉറപ്പു വരുത്താനും ലക്ഷ്യമിട്ടാണ് പരിശീലനം നൽകുന്നത്. നിരവധി സ്ത്രകളാണ് ഇതിനോടകം ഇവിടം സന്ദർശിച്ചത്. അതിക്രമം നേരിടുന്ന സാഹചര്യങ്ങളിൽ എങ്ങനെ പ്രതികരിക്കണമെന്നും ദേഹോപദ്രവം ഏൽപ്പിച്ചാൽ രക്ഷപ്പെടുന്നതിനുള്ള മാർഗങ്ങളും പ്രത്യേകം വിശദീകരിച്ച് നൽകും. ആലപ്പുഴ സെൽഫ് ഡിഫൻസ് ടീം അംഗങ്ങളായ ലിസി മത്തായി, ജാൻസി, രത്നമണി തുടങ്ങിയവരുടെ നേതൃത്വത്തിലാണ് പരിശീലനം നൽകുന്നത്.  

ഇതിനു പുറമേ കേരള പോലീസ് ജനങ്ങൾക്ക് നൽകുന്ന സേവനങ്ങളെല്ലാം സ്റ്റാളിലെത്തിയാൽ അടുത്തറിയാൻ സാധിക്കും. സെൽഫ് ഡിഫൻസ്, ആയുധങ്ങൾ, സ്ത്രീ സുരക്ഷ, ഡിജിറ്റൽ പ്ലാറ്റ്ഫോം, ടെലി കമ്മ്യൂണിക്കേഷൻ, ഫിംഗർ പ്രിന്റ് ബ്യൂറോ, ഫോറൻസിക് സയൻസ് ലാബ് തുടങ്ങി ഏഴ് മേഖലകളായി തിരിച്ചാണ് പോലീസ് വകുപ്പിൻറെ സ്റ്റാൾ ഒരുക്കിയിട്ടുള്ളത്. 

കേരള പോലീസ് സേന നിലവിൽ ഉപയോഗിച്ചുകൊണ്ടിരിക്കുന്ന ആയുധങ്ങളും സ്റ്റാളിൽ പ്രദർശിപ്പിച്ചിട്ടുണ്ട്. അത്യാധുനിക 7.62 എം.എം. സ്നൈപ്പർ റൈഫിൾ, ഒരു മിനിറ്റിൽ 600 റൗണ്ട് വരെ വെടിവയ്ക്കാൻ കഴിയുന്ന ഇസ്രായേൽ നിർമ്മിത 9 എം.എം.എസ്.എം.ജി തോക്കുകൾ, എ.കെ. 47 തോക്കുകൾ, ഇൻസാസ് റൈഫിൾ, അമേരിക്കൻ നിർമ്മിത ഗ്ലോക്ക് പിസ്റ്റൽ, ലൈറ്റ് മെഷീൻ ഗൺ, ഒരേസമയം 6 ഗ്രനേഡുകൾ നിറയ്ക്കാൻ കഴിയുന്ന മൾട്ടീ ഷെൽ ലോഞ്ചർ, 5.52 എം.എം. ഗൺ മെഷീൻ, റൈഫിൾ, പമ്പ് ആക്ഷൻ ഗൺ, ഷെൽ ലോഞ്ചർ, സ്നൈപ്പർ തുടങ്ങിയ ആയുധങ്ങളാണ് ഇവിടെ പ്രദർശിപ്പിച്ചിട്ടുള്ളത്. ആർമർ വിഭാഗത്തിലെ എസ്.ഐ. കെ.യു. അനിൽ കുമാർ, സി.പി.ഒ. സുനീഷ് കുമാർ എന്നിവരാണ് ആയുധങ്ങളെക്കുറിച്ച് വിവരിച്ച് നൽകാനായി സ്റ്റാളിലുള്ളത്. 

സ്ത്രീ സുരക്ഷയ്ക്കായി കേരള പൊലീസ് തയ്യാറാക്കിയിട്ടുള്ള നിർഭയ ആപ്ലിക്കേഷന്റെ വിവരണവും പോൽ ആപ്പ്, യോദ്ധാവ് തുടങ്ങിയവയുടെ ബോധവത്ക്കരണ വീഡിയോകളുടെ പ്രദർശനവും സ്റ്റാളിൽ ഒരുക്കിയിട്ടുണ്ട്. കുറ്റകൃത്യങ്ങൾ കണ്ടുപിടിക്കുന്നതിനായി ഫിംഗർ പ്രിന്റ് ബ്യൂറോ ഉപയോഗിക്കുന്ന പൊടികൾ, ബ്രഷുകൾ, ലെൻസുകൾ, അൾട്രാവയലറ്റ് ലൈറ്റുകൾ, മഷികൾ എന്നിവ കാണാനും സ്റ്റാളിലെത്തിയാൽ സാധിക്കും. മേള 23ന് സമാപിക്കും. പ്രവേശനം സൗജന്യമാണ്.
 

date