വായന പക്ഷാചരണം: ഉദ്ഘാടനം ജൂണ്‍ 19-ന് -വിവിധ പരിപാടികള്‍ സംഘടിപ്പിക്കും
വായന പക്ഷാചരണത്തിന്റെ ജില്ലാതല ഉദ്ഘാടനം ജൂണ്‍ 19-ന് രാവിലെ 10-ന് മാവേലിക്കര എ.ആര്‍. രാജരാജവര്‍മ്മ സ്മാരകത്തില്‍ എം.എസ്. അരുണ്‍കുമാര്‍ എം.എല്‍.എ. നിര്‍വഹിക്കും. ഗ്രന്ഥശാല പ്രസ്ഥാനത്തിന് നേതൃത്വം നല്‍കിയ പി.എന്‍. പണിക്കരുടെ ചരമദിനമായ ജൂണ്‍ 19 മുതല്‍ സംസ്ഥാന ലൈബ്രറി കൗണ്‍സിലന്റെ പ്രഥമ സെക്രട്ടറിയായിരുന്ന ഐ.വി. ദാസിന്റെ ജന്മദിനമായ ജൂലൈ ഏഴ് വരെയാണ് വിവിധ കലാ-സാഹിത്യ- സാംസ്‌കാരിക പരിപാടികളോടെ വായന പക്ഷാചരണം സംഘടിപ്പിക്കുന്നത്.
ജില്ല ഭരണകൂടം, ലൈബ്രറി കൗണ്‍സില്‍, വിദ്യാഭ്യാസ വകുപ്പ്, ഇന്‍ഫര്‍മേഷന്‍ പബ്ലിക് റിലേഷന്‍ വകുപ്പ്, ജില്ല സാക്ഷരതാ മിഷന്‍, പി.എന്‍. പണിക്കര്‍ ഫൗണ്ടേഷന്‍ എന്നിവയുടെ ആഭിമുഖ്യത്തിലാണ് പരിപാടികള്‍. ജി. ശങ്കരപ്പിള്ള, പൊന്‍കുന്നം വര്‍ക്കി, വൈക്കം മുഹമ്മദ് ബഷീര്‍, എന്‍.പി. മുഹമ്മദ്, പി. കേശവദേവ്, ഇടപ്പള്ളി രാഘവന്‍പിള്ള, സി. സാംബശിവന്‍ തുടങ്ങിയവരുടെ അനുസ്മരണം, സ്‌കൂളുകളില്‍ പുസ്തക പ്രദര്‍ശനം, അനുസ്മരണ പരിപാടികള്‍, വായനക്കുറിപ്പ് തയ്യാറാക്കല്‍ മത്സരം, എസ്.എസ്.എല്‍.സി., പ്ലസ്ടു പരീക്ഷയില്‍ ഉന്നത വിജയം നേടിയവര്‍ക്ക് ആദരം, ഗ്രന്ഥശാലകളില്‍ പുസ്തക പ്രദര്‍ശനം, ലഹരി വിരുദ്ധ സദസ്, ഗ്രന്ഥലോകം കാമ്പയിന്‍, അമ്മ വായന പദ്ധതിക്ക് തുടക്കം കുറിക്കല്‍ തുടങ്ങിയ വിവിധ പരിപാടികള്‍ സംഘടിപ്പിക്കും.
ജില്ലാതല ഉദാഘ്ടനച്ചടങ്ങില്‍ ലൈബ്രറി കൗണ്‍സില്‍ പ്രസിഡന്റ് അലിയാര്‍ എം. മാക്കിയില്‍ അധ്യക്ഷനാകും. ജില്ല പഞ്ചായത്ത് പ്രസിഡന്റ് കെ.ജി. രാജേശ്വരി പി.എന്‍. പണിക്കര്‍ അനുസ്മരണ പ്രഭാഷണം നടത്തും. ജില്ല കളക്ടര്‍ ഹരിത വി. കുമാര്‍ വായനാദിന സന്ദേശം നല്‍കും. മാവേലിക്കര നഗരസഭ ചെയര്‍മാന്‍ കെ.വി. ശ്രീകുമാര്‍, മാവേലിക്കര ബ്ലോക്ക് പഞ്ചായത്ത് പ്രസിഡന്റ് ഇന്ദിര ദാസ്, ലൈബ്രറി കൗണ്‍സില്‍ സംസ്ഥാന എക്സി. അംഗം ജി. കൃഷ്ണകുമാര്‍ എന്നിവര്‍ മുഖ്യപ്രഭാഷണം നടത്തും.
ജില്ല ലൈബ്രറി കൗണ്‍സില്‍ സെക്രട്ടറി ടി. തിലകരാജ്, ജില്ല ഇന്‍ഫര്‍മേഷന്‍ ഓഫീസര്‍ കെ.എസ്. സുമേഷ്, ജില്ല ലൈബ്രറി ഓഫീസര്‍ എന്‍.എസ്. ടോജോ സെബാസ്റ്റിയന്‍, വാര്‍ഡ് കൗണ്‍സിലര്‍ സുജാത ദേവി, മാവേലിക്കര ഡി.ഇ.ഒ. പി.ഡി. അന്നമ്മ, സാക്ഷരത മിഷന്‍ ജില്ല കോ-ഓര്‍ഡിനേറ്റര്‍ കെ.വി. രതീഷ്, പി.എന്‍. പണിക്കര്‍ ഫൗണ്ടേഷന്‍ ജില്ല ചെയര്‍മാന്‍ രവി പാലത്തിങ്കല്‍, എ.ആര്‍. സ്മാരക സമിതി ചെയര്‍മാന്‍ ആര്‍.ആര്‍.സി. വര്‍മ, താലൂക്ക് ലൈബ്രറി കൗണ്‍സില്‍ പ്രസിഡന്റ് ബി. ഷാനവാസ്, സെക്രട്ടറി രവി സിത്താര തുടങ്ങിയവര്‍ പങ്കെടുക്കും.
- Log in to post comments