പ്രമേഹവും ബിപിയും ഭാവിയില്‍ പണി തരുമോ? 360 ഡിഗ്രിയില്‍ പരിശോധിച്ചറിയാന്‍ ജനറല്‍ ആശുപത്രിയിലുണ്ട് മെറ്റബോളിക് സെന്റർ

*സേവനം ഇതുവരെ പ്രയോജനപ്പെടുത്തിയത് 21,626 പേര്‍

പ്രമേഹവും ബിപിയും കൊളസ്ട്രോളുമടക്കമുള്ള ജീവിതശൈലീ രോഗങ്ങൾ ഭാവിയില്‍ പണിതരുമെന്ന ആശങ്കയുണ്ടോ..? എങ്കില്‍ ആലപ്പുഴ ജനറൽ ആശുപത്രിയിലെ പുതിയ ഒ പി കെട്ടിടത്തിൽ ഒരുക്കിയ 360 ഡിഗ്രി മെറ്റബോളിക് സെന്ററിലേക്ക് വരൂ. ആശങ്കകള്‍ അകറ്റി മടങ്ങാം. കഴിഞ്ഞ ഒക്ടോബറില്‍ ആലപ്പുഴ ജനറൽ ആശുപത്രിയിലെ പുതിയ ഒ പി കെട്ടിടത്തിൽ ആരംഭിച്ച 360 ഡിഗ്രി മെറ്റബോളിക് സെന്ററിന്റെ സേവനം ഇതുവരെ പ്രയോജനപ്പെടുത്തിയത് 21,626 പേര്‍.  

ജീവിതശൈലി രോഗങ്ങൾ കൂടി വരുന്ന സാഹചര്യത്തില്‍ പ്രമേഹം, രക്തസമ്മർദം, കൊളസ്ട്രോൾ എന്നിവയ്ക്ക് പുറമേ വൃക്കകളുടെ കാര്യക്ഷമത, കണ്ണുകളെയും കാലുകളെയും ബാധിക്കുന്ന പ്രമേഹ സങ്കീര്‍ണതകളുടെ പരിശോധന, പൾമണറി ഫങ്ഷൻ ടെസ്റ്റ്, ഡയറ്റ് കൗൺസലിങ് തുടങ്ങിയ എല്ലാ സേവനങ്ങളും ഒരു കുടക്കീഴിൽ ലഭ്യമാക്കുകയാണ് 360 ഡിഗ്രി മെറ്റബോളിക് സെന്ററിലൂടെ. പ്രമേഹത്തിന്റെ സങ്കീർണതകളായ ഡയബറ്റിക് റെറ്റിനോപ്പതി, ഡയബറ്റിക് നെഫ്രോപ്പതി, പെരിഫറൽ ന്യൂറോപ്പതി തുടങ്ങിയ രോഗങ്ങൾ മുൻകൂട്ടി കണ്ടെത്തി നിയന്ത്രിക്കുകയാണ് ഇതിലൂടെ ലക്ഷ്യമിടുന്നത്. ജീവിതശൈലി രോഗങ്ങൾ മൂലമുണ്ടാകാൻ സാധ്യതയുള്ള ഗുരുതര രോഗങ്ങളെ ഇതുവഴി നിയന്ത്രിക്കാൻ സാധിക്കും. 

ഡയബറ്റിക് റെറ്റിനോപ്പതി കണ്ടുപിടിക്കുന്നതിന് നോണ്‍ മിഡ്‌റിയാട്രിക് കാമറകള്‍ സെന്ററില്‍ സ്ഥാപിച്ചിട്ടുണ്ട്. രക്താതിമര്‍ദ്ദം, പ്രമേഹം, ബോഡി മാസ് ഇന്‍ഡക്‌സ് തുടങ്ങിയ അടിസ്ഥാന പരിശോധനകള്‍ക്കായി മുറിയെ വിവിധ കാബിനുകളായി തിരിച്ചിട്ടുണ്ട്. ഡോപ്ലർ, ബയോതെസിയോ മീറ്റർ, ബോഡി ഫാറ്റ് ഇംപെഡൻസ് മെഷീൻ, കാർബൺ മോണോക്സൈഡ് ബ്രത്ത് അനലൈസർ, സ്പൈറോമീറ്റർ എന്നീ ഉപകരണങ്ങളിലൂടെയാണ് പരിശോധന. അഞ്ചുവർഷത്തില്‍ കൂടുതലായി പ്രമേഹമുള്ളവരാണെങ്കിൽ കണ്ണ്, ഞരമ്പ്, തൊലി എന്നീ ഭാഗങ്ങളെ പ്രമേഹം ബാധിച്ചിട്ടുണ്ടോ എന്നറിയുന്നതിന് ബയോതെസിയോ മീറ്റർ വഴി നെർവ് കണ്ടക്ഷൻ സ്റ്റഡി നടത്തും. ഇതോടൊപ്പം ഡോപ്ലർ ഉപയോഗിച്ച് ഞരമ്പുകളിൽ ബ്ലോക്കുണ്ടോ എന്നും കണ്ടെത്താം. രോഗ തീവ്രത അനുസരിച്ച് ആവശ്യമെങ്കിൽ ന്യൂറോളജിസ്റ്റിന്റെയും ഒഫ്താൽമോളജിസ്റ്റിന്റെയും സേവനം രോഗികൾക്ക് ലഭ്യമാക്കും. 

കാർബൺ മോണോക്സൈഡ് ബ്രത്ത് അനലൈസറിലൂടെ ശ്വാസകോശത്തിലുള്ള കാർബൺ മോണോക്സൈഡിന്റെ അളവ് മനസ്സിലാക്കുവാനും സ്പൈറോ മീറ്ററിലൂടെ ശ്വാസകോശത്തിന്റെ കപ്പാസിറ്റി അറിയുവാനും സാധിക്കും. 30 വയസ്സിന് മുകളിലുള്ള സ്ത്രീകൾക്കും പുരുഷന്മാർക്കും സ്തന രോഗ കാൻസർ നിർണയം, വായിലെ കാൻസർ നിർണയം എന്നീ പരിശോധനകളും ഇവിടെ നടത്തുന്നുണ്ട്. അനിയന്ത്രിതമായ പ്രമേഹമുള്ള രോഗികൾക്ക് ക്ഷയരോഗ ലക്ഷണങ്ങളുണ്ടെങ്കിൽ കഫം എ എഫ് ബി ടെസ്റ്റ്‌ ചെയ്യുന്നതിന് ജില്ലാ ടി ബി സെൻ്റർ ലബോറട്ടറിയിലേക്ക് അയക്കും.

ആദ്യമായി ആശുപത്രിയിൽ എത്തുന്ന വ്യക്തികൾക്ക് ഒ പി ടിക്കറ്റ് എടുത്ത ശേഷം 360 ഡിഗ്രി മെറ്റബോളിക് സെന്ററിൽ എത്താം. ആദ്യം രജിസ്ട്രേഷൻ നടത്തും. തുടർന്ന് പ്രമേഹം, രക്തസമ്മർദ്ദം എന്നിവയുടെ പരിശോധനകള്‍ നടത്തും. ശേഷം ഡയറ്റീഷ്യന്റെ നിർദ്ദേശപ്രകാരം ജീവിതശൈലിയിൽ മാറ്റം വരുത്താൻ നിർദ്ദേശിക്കുകയോ മരുന്നുകൾ നൽകുകയോ ചെയ്യും. എല്ലാ രോഗികളും മരുന്ന് ആവശ്യമുള്ളവരല്ല. ജീവിതശൈലിയിൽ വരുത്തുന്ന മാറ്റങ്ങളിലൂടെ മരുന്നില്ലാതെതന്നെ അവർക്ക് രോഗങ്ങളിൽ നിന്നും രക്ഷ നേടാം. രോഗനിർണയത്തിലെ കാലതാമസവും രോഗ ലക്ഷണങ്ങൾ തിരിച്ചറിഞ്ഞ് ചികിത്സ തുടങ്ങാൻ വൈകുന്നതും അതിന്റെ സങ്കീർണതകളെ കുറിച്ചുള്ള അജ്ഞതയുമാണ് ജീവിതശൈലി രോഗങ്ങളെ അപകടകാരിയാക്കുന്നത്. ചിട്ടയായ വ്യായമത്തിലൂടെയും ആഹാര നിയന്ത്രണത്തിലൂടെയും ജീവിതശൈലി രോഗങ്ങളെ ഒരു പരിധിവരെ തടയാമെന്ന അവബോധം ജനങ്ങളിൽ എത്തിക്കുന്നതിനും 360 ഡിഗ്രി മെറ്റബോളിക് സെന്ററിലൂടെ സാധിക്കുന്നുണ്ട്.

(പിആര്‍/എഎല്‍പി/2157)