ലൈഫ് മിഷന്‍ മാവേലിക്കര കുടുംബസംഗമം വികസന കാര്യങ്ങളില്‍  സര്‍ക്കാരിന്റേത്് രാഷ്ട്രീയത്തിന് അതീതമായ പ്രവര്‍ത്തനങ്ങള്‍: ആര്‍.രാജേഷ് എം.എല്‍.എ

ലൈഫ് മിഷന്‍ മാവേലിക്കര കുടുംബസംഗമം

വികസന കാര്യങ്ങളില്‍  സര്‍ക്കാരിന്റേത്് രാഷ്ട്രീയത്തിന് അതീതമായ പ്രവര്‍ത്തനങ്ങള്‍: ആര്‍.രാജേഷ് എം.എല്‍.എ

മാവേലിക്കര: വികസന പദ്ധതികള്‍ നടപ്പാക്കുന്ന കാര്യത്തില്‍ സംസ്ഥാന സര്‍ക്കാര്‍ സ്വീകരിക്കുന്നത് കക്ഷിരാഷ്ട്രീയത്തിന് അതീതമായ നടപടികളെന്ന് ആര്‍.രാജേഷ് എം.എല്‍.എ. സാധാരണക്കാരന്റെ ഉന്നമനത്തിനായുള്ള പ്രവര്‍ത്തനങ്ങളില്‍ അര്‍ഹതയും മനുഷ്യത്വവുമാണ് സര്‍ക്കാര്‍ മാനദണ്ഡമാക്കുന്നത്. സര്‍ക്കാരിന്റെ ഇത്തരം പ്രവര്‍ത്തനങ്ങളുടെ ഫലമായി ലൈഫ് മിഷന്‍ പോലെയുള്ള പദ്ധതികള്‍ യാതൊരു വിവേചനവുമില്ലാതെ സമൂഹത്തിന്റെ എല്ലാ വിഭാഗങ്ങളിലേക്കും തുല്യതയോടെ എത്തിക്കാനായെന്നും എം.എല്‍.എ പറഞ്ഞു. മാവേലിക്കര ബ്ലോക്ക് പഞ്ചായത്ത് തല ലൈഫ് മിഷന്‍ കുടുംബ സംഗമവും അദാലത്തും ഉദ്ഘാടനം ചെയ്യുകയായിരുന്നു എം.എല്‍.എ. ഗ്രാമപഞ്ചായത്തുകളെയും പദ്ധതി നിര്‍വഹണത്തിന് മേല്‍നോട്ടം വഹിച്ച  ഉദ്യോഗസ്ഥരെയും സമ്മേളനത്തില്‍  എം.എല്‍.എ ആദരിച്ചു.

മാവേലിക്കര ബ്ലോക്ക് പഞ്ചായത്തിന്റെ പരിധിയിലുള്ള ചെട്ടികുളങ്ങര,  ചെന്നിത്തല,  മാന്നാര്‍,  തെക്കേക്കര,  തഴക്കര പഞ്ചായത്തുകളില്‍, ലൈഫ് പദ്ധതിയില്‍ പെടുത്തി വീട് നിര്‍മ്മിച്ച് നല്‍കിയ  ഗുണഭോക്താക്കളുടെ കുടുംബ സംഗമവും അദാലത്തുമാണ് ബ്ലോക്ക് പഞ്ചായത്ത് അങ്കണത്തില്‍ നടന്നത്. ബ്ലോക്ക് പഞ്ചായത്ത് വഴി തെരഞ്ഞെടുക്കപ്പെട്ട 789 ഗുണഭോക്താക്കളില്‍ 616 പേര്‍ക്കും വീട് നിര്‍മിച്ചു നല്‍കിക്കൊണ്ട്  മാവേലിക്കര ബ്ലോക്ക് വലിയ മുന്നേറ്റമാണ് ലൈഫ് മിഷനില്‍ നടത്തിയത്.  ഒന്നാം ഘട്ടത്തില്‍ തെരഞ്ഞെടുക്കപ്പെട്ട 235 ല്‍ 233 കുടുംബങ്ങള്‍ക്കും രണ്ടാം ഘട്ടത്തില്‍ തെരഞ്ഞെടുക്കപ്പെട്ട 381 ല്‍ 327 കുടുംബങ്ങള്‍ക്കും വീട് നിര്‍മിച്ചു നല്‍കി. ഇതിന് പുറമേ പിഎം എവൈയില്‍ 20, റീബില്‍ഡില്‍ 36 വീടുകളും പൂര്‍ത്തീകരിച്ചു.

ലൈഫ് ഗുണഭോക്താക്കള്‍ക്ക് തദ്ദേശ സ്വയംഭരണ സ്ഥാപനങ്ങള്‍ സിവില്‍ സപ്ലൈസ്, കൃഷി വകുപ്പ്, സാമൂഹ്യനീതി വകുപ്പ്, കുടുംബശ്രീ, ഐടി, ലീഡ് ബാങ്ക്,  ഫിഷറീസ്, മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി എന്നിവ വഴി ലഭ്യമാകുന്ന  അന്‍പതോളം സൗജന്യ സേവനങ്ങളുടെ ഉറപ്പാക്കലും, വീടനിര്‍മ്മാണത്തിനാവശ്യമായ പെയിന്റ്, ടൈല്‍സ്, സാനിറ്ററി, ഇലക്ട്രിക്കല്‍ സാമഗ്രികള്‍ സബ്സിഡി നിരക്കില്‍ വിതരണം ചെയ്യുന്നതിനുള്ള  സ്റ്റാളുകളും അദാലത്തുമായി ബന്ധപ്പെട്ട് ക്രമീകരിച്ചിരുന്നു.

ബ്ലോക്ക് പഞ്ചായത്ത് പ്രസിഡന്റ് കെ രഘുപ്രസാദ് സമ്മേളനത്തില്‍  അധ്യക്ഷനായി. ജില്ലാ പഞ്ചായത്ത്് വൈസ് പ്രസിഡന്റ് മണി വിശ്വനാഥ്, ബ്ലോക്ക് പഞ്ചായത്ത് വൈസ് പ്രസിഡന്റ് ശശികല രഘുനാഥ്,  ജില്ലാ പഞ്ചായത്ത് അംഗം ജേക്കബ്ബ് ്ഉമ്മന്‍ , ഗ്രാമപഞ്ചായത്ത് പ്രസിഡന്റുമാരായ ഇ.എന്‍ നാരായണന്‍, സുനിലാ സതീഷ്, ഷൈലാ ലക്ഷ്മണന്‍, സി.കൃഷ്ണമ്മ, ബ്ലോക്ക് പഞ്ചായത്ത് സെക്രട്ടറി എസ്.ജ്യോതിലക്ഷ്മി എന്നിവര്‍ സംസാരിച്ചു.