വെളിയനാട് ബ്ലോക്ക്‌ പഞ്ചായത്തിലെ ലൈഫ് മിഷൻ കുടുംബ സംഗമം നാളെ (13/1/2020)

ആലപ്പുഴ : വെളിയനാട്  ബ്ലോക്ക് പഞ്ചായത്തിലെ ലൈഫ് മിഷൻ ഗുണഭോക്താക്കളുടെ കുടുംബ സംഗമവും അദാലത്തും നാളെ (11/1/2020 ) രാവിലെ 10.30 മുതൽ കുട്ടനാട് വികസന സമിതി ഹാളിൽ നടക്കും. കുടുംബ സംഗമത്തിന്റേയും അദാലത്തിന്റേയും ഉദ്ഘാടനം ഭക്ഷ്യ പൊതുവിതരണ വകുപ്പ് മന്ത്രി പി. തിലോത്തമൻ  നിർവഹിക്കും. ബ്ലോക്ക് പഞ്ചായത്ത് പ്രസിഡന്റ് ലൈല രാജു  അധ്യക്ഷത വഹിക്കും. കൊടിക്കുന്നിൽ സുരേഷ് എംപി മുഖ്യാതിഥിയാകും. ഐഎസ്ഒ സർട്ടിഫിക്കേഷൻ പ്രഖ്യാപനം ജില്ല പഞ്ചായത്ത് പ്രസിഡന്റ്‌ ജി. വേണുഗോപാൽ നിർവഹിക്കും.
 ബ്ലോക്ക് പഞ്ചായത്ത് പരിധിയിലുള്ള 6 ഗ്രാമ പഞ്ചായത്തുകളിലായി 352 വീടുകളാണ് പദ്ധതിയിൽ ഉൾപ്പെടുത്തി നിർമിച്ചിരിക്കുന്നത്. അദാലത്തിൽ ഇരുപതോളം വകുപ്പുകളുടെ സേവനവും ലൈഫ് ഗുണഭോക്താക്കൾക്ക് ലഭ്യമാക്കും. തദ്ദേശ സ്വയംഭരണ സ്ഥാപനങ്ങൾ, സിവിൽ സപ്ലൈസ് വകുപ്പ്, കൃഷി വകുപ്പ് ,സാമൂഹ്യനീതി വകുപ്പ്, കുടുംബശ്രീ, ഐ.ടി., ഫിഷറീസ്, മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി, വ്യവസായ വകുപ്പ് ,പട്ടികജാതി പട്ടികവർഗ വകുപ്പ് ,ക്ഷീരവികസന വകുപ്പ്, ആരോഗ്യ വകുപ്പ് ,റവന്യൂ, ശുചിത്വമിഷൻ, വനിതാ ശിശു വികസനം, ഗ്രാമവികസന വകുപ്പ്, പബ്ലിക് റിലേഷൻസ് വകുപ്പ് ,ലീഡ് ബാങ്ക് തുടങ്ങിയ വകുപ്പുകളുടെ സേവനം അദാലത്തിൽ ലഭിക്കും. അദാലത്തിൽ പങ്കെടുക്കുന്ന ഗുണഭോക്താക്കൾക്ക് അപേക്ഷ എഴുതി നൽകാനായി പ്രത്യേക കൗണ്ടറും സജ്ജീകരിച്ചിട്ടുണ്ട്. പങ്കെടുക്കാനെത്തുന്നവർ ബന്ധപ്പെട്ട രേഖകളെല്ലാം ഹാജരാക്കണം. ഗുണഭോക്താക്കളുടെ പരാതികൾ അദാലത്തിൽത്തന്നെ പരമാവധി തീർപ്പാക്കാൻ ശ്രമിക്കും. പരിഹാരമാകാത്ത പരാതികൾ ബന്ധപ്പെട്ട വകുപ്പുമേധാവികൾക്ക് കൈമാറും. ജനുവരി 26 ന് സംസ്ഥാന തല പ്രഖ്യാപനം നടക്കുന്നതിനു മുന്നോടിയായാണ് വെളിയനാട്  ബ്ലോക്ക് പഞ്ചായത്തുതല കുടുംബ സംഗമവും അദാലത്തും സംഘടിപ്പിക്കുന്നത്.