ഭരണിക്കാവ് ബ്ലോക്ക് പഞ്ചായത്ത് ലൈഫ് കുടുംബ സംഗമം ഇന്ന്   (11/1/2020)

ആലപ്പുഴ: ഭരണിക്കാവ് ബ്ലോക്ക് പഞ്ചായത്തിലെ ലൈഫ് മിഷന്‍ ഗുണഭോക്താക്കളുടെ കുടുംബ സംഗമവും അദാലത്തും ഇന്ന്(11/1/2020) രാവിലെ 9 മണി മുതല്‍ ചാരമൂട് മജസ്റ്റിക് സെന്ററില്‍   നടക്കും. കുടുംബ സംഗമം ആര്‍. രാജേഷ് എംഎല്‍എ ഉദ്ഘാടനം ചെയ്യും. യു. പ്രതിഭ എംഎല്‍എ താക്കോല്‍ ദാനം നിര്‍വഹിക്കും. ബ്ലോക്ക് പഞ്ചായത്ത് പ്രസിഡന്റ് രജനി ജയദേവ് അധ്യക്ഷത വഹിക്കും. ബ്ലോക്ക് പഞ്ചായത്തിനു കീഴില്‍ 734 വീടുകളാണ് ലൈഫ് മിഷന്‍ പദ്ധതിയില്‍ ഉള്‍പ്പെടുത്തി നിര്‍മിച്ചത്. 

ഇരുപതോളം വകുപ്പുകളുടെ സേവനവം അദാലത്തില്‍ ലഭ്യമാകും. തദ്ദേശ സ്വയംഭരണ സ്ഥാപനങ്ങള്‍, സിവില്‍ സപ്ലൈസ്, കൃഷി, സാമൂഹ്യനീതി, കുടുംബശ്രീ, ഐ.ടി., ഫിഷറീസ്, മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി, വ്യവസായ, പട്ടികജാതി പട്ടികവര്‍ഗം, ക്ഷീരവികസനം, ആരോഗ്യം, റവന്യൂ, ശുചിത്വമിഷന്‍, വനിതാ ശിശു വികസനം, ഗ്രാമവികസനം, ഇന്‍ഫര്‍മേഷന്‍ പബ്ലിക് റിലേഷന്‍സ്, ലീഡ് ബാങ്ക് തുടങ്ങി വിവിധ വകുപ്പുകളുടെ സേവനം അദാലത്തില്‍ ലഭിക്കും. വീട് നിര്‍മ്മാണത്തിനാവശ്യമായ പെയിന്റ്, ടൈല്‍സ്, സാനിറ്ററി, ഇലക്ട്രിക്കല്‍ സാമഗ്രികള്‍ എന്നിവ സബ്സിഡി നിരക്കില്‍ വിതരണം ചെയ്യുന്നതിനുള്ള സ്റ്റാളുകളും അദാലത്തുമായി ബന്ധപ്പെട്ട് ക്രമീകരിച്ചിട്ടുണ്ട്. അദാലത്തില്‍ പങ്കെടുക്കുന്ന ഗുണഭോക്താക്കള്‍ക്ക് അപേക്ഷ എഴുതി നല്‍കാനായി പ്രത്യേക കൗണ്ടറും സജ്ജീകരിച്ചിട്ടുണ്ട്. പങ്കെടുക്കാനെത്തുന്നവര്‍ ബന്ധപ്പെട്ട രേഖകള്‍ ഹാജരാക്കണം. പദ്ധതി നിര്‍വഹണ ഉദ്യോഗസ്ഥരെ ചടങ്ങില്‍ ആദരിക്കും. 

കുട്ടനാട്ടില്‍ ആദ്യമായി യന്ത്രവല്‍ക്കരണ ഞാറുനടീല്‍ പരിശീലനം

ആലപ്പുഴ: ചമ്പക്കുളം ബ്ലോക്ക് പഞ്ചായത്തിന്റേയും ആലപ്പുഴ നോര്‍ത്ത് മഹിളാ കിസാന്‍ സശാക്തീകരണ്‍ പരിയോജന ഫെഡറേഷന്റെയും ആഭിമുഖ്യത്തില്‍ വനിതകള്‍ക്കായി യന്ത്രവല്‍ക്കരണ ഞാറുനടീല്‍ പരിശീലനം ആരംഭിച്ചു. കൈനകരി പഞ്ചായത്തിലെ കൂലിപുരയ്ക്കല്‍ പാടശേഖരത്തില്‍ ആരംഭിച്ച പരിശീലനം ബ്ലോക്ക് പഞ്ചായത്ത് പ്രസിഡന്റ് ബിജു പാലത്തിങ്ങല്‍ ഉദ്ഘാടനം ചെയ്തു. വെള്ളപ്പൊക്കത്തിന് ശേഷം അമിതമായ കൂലി ചെലവും കൃഷിക്ക് ആളെ കിട്ടാത്ത സാഹചര്യത്തിലും കര്‍ഷകര്‍ക്ക് ആശ്വാസമേകാനാണ് പദ്ധതി നടപ്പാക്കുന്നത്. നിലവില്‍ ഒരു ഏക്കര്‍ പാടത്ത് കൃഷിയിറക്കുന്നതിന്റെ പകുതി ചെലവ് മാത്രമേ ശാസ്ത്രീയമായി ഈ കൃഷിരീതി നടപ്പിലാക്കുമ്പോള്‍ ആകുന്നുള്ളൂ എന്നത് ഇതിന്റെ പ്രത്യേകതയാണ്. 

ഒരേക്കറിന് 40 കിലോ നെല്ല് വിതയ്ക്കാനുള്ള നിലവിലെ സാഹചര്യത്തില്‍ 20 കിലോ മാത്രമേ യന്ത്രവത്കൃതമായി നടുമ്പോള്‍ ആവശ്യം വരുന്നുള്ളൂ. 

നെല്ല് വിളവെടുക്കാനായാല്‍ യന്ത്ര സംവിധാനത്തിലൂടെ കൊയ്തുമറിച്ച് കറ്റ കെട്ടി ലഭിക്കുകയും നെല്ല് വേര്‍തിരിച്ച് ലഭിക്കുകയും ചെയ്യുന്നു. എം.കെ.എസ്.പി നോര്‍ത്ത് ഫെഡറേഷന്‍ ഇവര്‍ക്കാവശ്യമായ യന്ത്ര സംവിധാനം നല്‍കും. ഇതിലൂടെ വനിതകള്‍ക്ക് സ്ഥിര വരുമാനവും കര്‍ഷകര്‍ക്ക് കൃഷി ലാഭവും ഉറപ്പാക്കാം.

നിയമസഭാസമിതി - തെളിവെടുപ്പ്  ജനുവരി 14-ന്

ആലപ്പുഴ: സര്‍ക്കാര്‍ നല്കുന്ന ഉറപ്പുകള്‍ സംബന്ധിച്ച, നിയമസഭയുടെ സമിതി  ചൊവ്വാഴ്ച  രാവിലെ 10.30ന് ജില്ലാ കളക്ടറേറ്റ് കോണ്‍ഫറന്‍സ് ഹാളില്‍  തെളിവെടുപ്പ്  നടത്തും. ജില്ലയിലെ വിനോദസഞ്ചാര കേന്ദ്രങ്ങളിലെ മാലിന്യ സംസ്‌കരണത്തിനും നിയന്ത്രണത്തിനുമായി നടപ്പാക്കുന്ന പദ്ധതികളെ സംബന്ധിച്ച് വിനോദസഞ്ചാരം, തദ്ദേശ സ്വയം ഭരണം, തുറമുഖം, പരിസ്ഥിതി എന്നീ വകുപ്പുകളിലെ ജില്ലാതല ഉദ്യോഗസ്ഥരില്‍ നിന്നും തെളിവെടുക്കും. സമിതിയംഗങ്ങള്‍ തെളിവെടുപ്പിന് ശേഷം സമിതി ജില്ലയിലെ വിനോദസഞ്ചാര കേന്ദ്രങ്ങള്‍ സന്ദര്‍ശിച്ച് തെളിവെടുപ്പ് നടത്തും.