ജില്ലയിലെ മൂന്ന് തദ്ദേശ സ്വയംഭരണ സ്ഥാപനങ്ങളില്‍ ഇന്ന് (ഫെബ്രുവരി 14) ഉപതെരഞ്ഞെടുപ്പ് നടക്കും. ഇലക്‌ട്രോണിക് വോട്ടിങ് മെഷീനുകളും മറ്റ് ഇലക്ഷന്‍ സാമഗ്രികളും കലക്ടറേറ്റില്‍ വിതരണം ചെയ്തു. മൂന്ന് വാര്‍ഡുകളിലായി ക്രമീകരിച്ചിരിക്കുന്ന 30 ബൂത്തകളിലേക്ക് 46 വോട്ടിങ് മെഷീനുകളാണ് വിതരണം ചെയ്തത്. തിരൂര്‍ ബ്ലോക്കില്‍ പുറത്തൂര്‍, വണ്ടൂര്‍ ബ്ലോക്ക് പഞ്ചായത്തിലെ പാണ്ടിക്കാട് ചെമ്പ്രശ്ശേരി, കാവന്നൂര്‍ ഗ്രാമപഞ്ചായത്തില്‍ ഇളയൂര്‍ തുടങ്ങിയ മൂന്ന് വാര്‍ഡുകളിലാണ് ഉപതെരഞ്ഞെടുപ്പ് നടക്കുന്നത്. മൂന്നു വാര്‍ഡുകളിലായി 28,494 പേര്‍ ഇന്ന് വോട്ട് രേഖപ്പെടുത്തും.

സര്‍ക്കാരിന്റെ ആയിരം ദിന പരിപാടിയില്‍ ഉള്‍പ്പെടുത്തി പെരിന്തല്‍മണ്ണ നഗരസഭയിലെ ബയോശക്തി വൈദ്യുതി ഉത്പ്പാദന പ്ലാന്റിന്റെയും ഖരമാലിന്യ നവീകരണ പദ്ധതിയുടെയും ശിലാസ്ഥാപനവും 11 വാര്‍ഡുകളെ  സീറോ വേസ്റ്റ് വാര്‍ഡുകളായി  പ്രഖ്യാപിക്കുന്ന ചടങ്ങും സ്വച്ഛതാ എക്‌സലന്‍ഡ് അവാര്‍ഡ് നേടിയതിന്റെ അനുമോദന സദസ്സും ഫെബ്രുവരി 18 രാവിലെ 11.30ന് നഗരസഭാങ്കണത്ത വൈദ്യുത വകുപ്പ് മന്ത്രി എം.എം മണി ഉദ്ഘാടനം ചെയ്യും. മഞ്ഞളാം കുഴി അലി എം എല്‍ എ അധ്യക്ഷനാകും.

സര്‍ക്കരിന്റെ ആയിരം ദിനാഘോഷങ്ങളുടെ ഭാഗമായി തൊഴില്‍ നൈപുണ്യ പരിശീലനം പൊതുസമൂഹത്തിനു കൂടി പ്രാപ്തമാക്കുന്നതിനും അന്താരാഷ്ട്ര നിലവാരത്തിലുള്ള തൊഴില്‍ നൈപുണ്യം ഉറപ്പുവരുത്തുന്നതിനുമായി സംസ്ഥാന സര്‍ക്കാര്‍ ആരംഭിക്കുന്ന അസാപ് കമ്യൂണിറ്റി സ്‌കില്‍ പാര്‍ക്ക് പാണ്ടിക്കാട്ട് പ്രവര്‍ത്തന സജ്ജമായി. പാണ്ടിക്കാട് ഗവ. ഹയര്‍ സെക്കന്‍ഡറി സ്‌കൂളിന് സമീപം സ്ഥാപിച്ച പാര്‍ക്കിന്റെ ഉദ്ഘാടനം മാര്‍ച്ച് ഒന്നിന് ഉന്നത വിദ്യാഭ്യാസ വകുപ്പ് മന്ത്രി ഡോ. കെ.ടി ജലീല്‍ നിര്‍വഹിക്കും. രാവിലെ 10.30 ന് നടക്കുന്ന ചടങ്ങില്‍ അഡ്വ. എം. ഉമര്‍ എംഎല്‍എ അധ്യക്ഷത വഹിക്കും.

സര്‍ക്കാരിന്റെ ആയിരം ദിനഘോഷത്തിന്റെ ഭാഗമായി ജില്ലയില്‍ വാടക കെട്ടിടത്തില്‍ പ്രവര്‍ത്തിക്കുന്ന നിലമ്പൂര്‍, എടവണ്ണ, പെരിന്തല്‍മണ്ണ സബ് ട്രഷറികള്‍ക്ക് സ്വന്തമായി ഭൂമിയും ആധുനിക രീതിയില്‍ കെട്ടിടങ്ങളും നിര്‍മ്മിക്കുന്നതിന് സര്‍ക്കാര്‍ അനുമതിയായി. സര്‍ക്കാരിന്റെ അടിസ്ഥാന വികസന പദ്ധതിയില്‍ ഉള്‍പ്പെടുത്തി ഇന്‍കലാണ് ആധുനിക രീതിയില്‍ പുതിയ കെട്ടിടങ്ങള്‍ നിര്‍മ്മിക്കുന്നത്. സംസ്ഥാന സര്‍ക്കാര്‍ ആയിരം ദിനങ്ങള്‍ പിന്നിടുമ്പോള്‍ സര്‍ക്കാരിന്റെ ദൈനംദിന സാമ്പത്തിക ഇടപാടുകളില്‍ മുഖ്യ പങ്ക് വഹിക്കുന്ന ധനകാര്യ വകുപ്പിന് കീഴിലുള്ള ട്രഷറി വകുപ്പിനിത് നേട്ടങ്ങളുടെ സുവര്‍ണകാലം.

വേങ്ങരി നഗര കാര്‍ഷിക മൊത്ത വിപണന കേന്ദ്രത്തില്‍ ഒഴിവു വന്നിട്ടുളള സ്റ്റാളുകള്‍ കാര്‍ഷിക ഉത്പ്പന്നങ്ങള്‍ വ്യാപാരം നടത്തുന്നതിന് 11 മാസ കാലയളവിലേക്ക് ലൈസന്‍സിന് അനുമതി നല്‍കും. ക്വട്ടേഷനുകള്‍ ഫെബ്രുവരി 19 ന് രാവിലെ 11  മണി വരെ സ്വീകരിക്കും. കൂടുതല്‍ വിവരങ്ങള്‍ക്ക് 0495 2376514 എന്ന നമ്പറില്‍ ബന്ധപ്പെടുക. 

പേരാമ്പ്ര-ചെമ്പ്ര-കൂരാച്ചുണ്ട് റോഡില്‍ കലുങ്കിന്റെ വീതികൂട്ടലും ഫുട്ട്പാത്ത് നിര്‍മ്മാണവും നടക്കുന്നതിനാല്‍ ഇന്ന് (ഫെബ്രുവരി 14) മുതല്‍ പ്രവൃത്തി കഴിയുന്നതുവരെ ഈ റോഡ് വഴിയുളള ഗതാഗതം പൂര്‍ണ്ണമായും നിയന്ത്രിച്ചതായി എക്സിക്യൂട്ടീവ് എഞ്ചിനീയര്‍ അറിയിച്ചു. പേരാമ്പ്ര നിന്ന് ചെമ്പ്ര ഭാഗത്തേക്കും തിരിച്ചും പോകേണ്ട വാഹനങ്ങള്‍ പേരാമ്പ്ര-പൈതോത്ത് റോഡ് വഴി എളമ്പിലാശ്ശേരി മുക്ക് - ചെമ്പ്ര റോഡിലേക്ക് പ്രവേശിക്കണം.
.