ലോക്സഭാ തെരഞ്ഞെടുപ്പുമായി ബന്ധപ്പെട്ട് രൂപീകരിച്ച ഫ്ളെയിഗ് സ്‌ക്വാഡ് തിരുവമ്പാടി മണ്ഡലത്തില്‍ നിന്നും 1,00,000 രൂപയും സ്റ്റാറ്റിക് സര്‍വ്വയലന്‍സ് ടീം തിരുവമ്പാടി മണ്ഡലത്തില്‍ നിന്ന് 2,25,000 രൂപയും കോഴിക്കോട് മണ്ഡലത്തില്‍ നിന്നു 1,76,710 രൂപയും ഉള്‍പ്പെടെ ആകെ മൂന്ന് കേസുകളിലായി 5,01,710 രൂപ പിടിച്ചെടുത്തിട്ടുണ്ട്.

സായുധ സേന പതാക നിധിയിലേക്കായി ജില്ല സൈനിക ക്ഷേമ ഓഫീസ് മുഖാന്തിരം വിവിധ ഓഫീസുകള്‍, സര്‍ക്കാര്‍, എയ്ഡഡ്, അണ്‍എയ്ഡഡ്, സി.ബി.എസ്.ഇ സ്‌കൂളുകള്‍, കോളേജുകള്‍, എന്‍.സിസി യൂണിറ്റുകള്‍ എന്നിവിടങ്ങളില്‍ ജില്ല കലക്ടറുടെ നിര്‍ദ്ദേശപ്രകാരം വിതരണം ചെയ്ത പതാകകള്‍ വിറ്റതിന്റെ തുക ചില സ്ഥാപനങ്ങള്‍ ഇനിയും അടച്ചിട്ടില്ല. മാര്‍ച്ച് 27 നകം പ്രസ്തുത തുക പഴയ കുടിശ്ശിക സഹിതം എല്ലാ ഓഫീസ്/സ്ഥാപനങ്ങള്‍ എന്നിവയില്‍ ജില്ല സൈനിക ക്ഷേമ ഓഫീസ്, കോഴിക്കോടില്‍ അടച്ചു രസീത് കൈപ്പറ്റാന്‍ ജില്ല കലക്ടര്‍ നിര്‍ദ്ദേശിച്ചു.  നിര്‍ദ്ദേശം പാലിക്കാന്‍ വീഴ്ച വരുത്തുന്നവര്‍ക്കായി ജില്ല കലക്ടര്‍ പ്രത്യേക യോഗം നടത്തും. 

മോട്ടോര്‍ തൊഴിലാളി ക്ഷേമനിധി ബോര്‍ഡ് സംയുക്ത മോട്ടോര്‍ തൊഴിലാളി ട്രേഡ് യൂണിയനുകളുമായി സഹകരിച്ച് ജില്ലയിലെ മോട്ടോര്‍ തൊഴിലാളികള്‍ക്കായി രജിസ്ട്രേഷന്‍ ക്യാമ്പ് ഇന്ന് (മാര്‍ച്ച് 26)   രാവിലെ 10 മുതല്‍ രണ്ട് മണി വരെ ഉള്ള്യേരി കമ്മ്യൂണിറ്റി ഹാള്‍,  നാളെ (മാര്‍ച്ച് 27) കല്ലാച്ചി (നാദാപുരം പഞ്ചായത്തിനു സമീപം) മേപ്പയ്യൂര്‍ ടാക്സി സ്റ്റാന്റിനു സമീപം എന്നിവിടങ്ങളില്‍ സംഘടിപ്പിക്കുന്നു. പുതുതായി അംഗത്വമെടുക്കാനും കുടിശ്ശിക അടവാക്കാനും സൗകര്യം ഉണ്ടായിരിക്കുന്നതാണെന്ന് ജില്ലാ എക്സിക്യുട്ടീവ് ഓഫീസര്‍ അറിയിച്ചു.

കോഴിക്കോട് താലൂക്ക് സപ്ലൈ ഓഫീസില്‍ പുതിയ റേഷന്‍കാര്‍ഡിനു വേണ്ടി ഓണ്‍ലൈനില്‍ അപേക്ഷ സമര്‍പ്പിച്ചവര്‍ക്കുള്ള പുതിയ റേഷന്‍ കാര്‍ഡ് 28,29,30 തീയതികളില്‍ രാവിലെ 10 നും 03 മണിക്കുമിടയില്‍ സിവില്‍ സ്റ്റേഷനിലുള്ള താലൂക്ക് സപ്ലൈ ഓഫീസില്‍ വിതരണം ചെയ്യും.  ടോക്കണ്‍ നം. 3000 മുതല്‍ 4000 വരെ - മാര്‍ച്ച് 28. 4001 മുതല്‍ 4500 വരെ- മാര്‍ച്ച് 29, 4501 മുതല്‍ 5000 വരെ- മാര്‍ച്ച് 30.
അപേക്ഷകര്‍ പഴയ റേഷന്‍ കാര്‍ഡ്, റേഷന്‍കാര്‍ഡിന്റെ വില, ആധാര്‍ കാര്‍ഡ് എന്നിവ സഹിതം എത്തണം.  ന്യൂനതകള്‍ കാരണം അപേക്ഷ നിരസിച്ചവര്‍ക്കുള്ള കാര്‍ഡ് വിതരണ തീയ്യതി പിന്നീട് അറിയിക്കും.

സംസ്ഥാന ന്യൂനപക്ഷ കമ്മീഷന്‍ കലക്ട്രേറ്റ് കോണ്‍ഫറന്‍സ് ഹാളില്‍ നാളെ (മാര്‍ച്ച് 27) രാവിലെ 11 ന് നടത്താനിരുന്ന സിറ്റിംഗ് മാറ്റി. പുതുക്കിയ തീയതി പിന്നീട് അറിയിക്കും. 

ജില്ലയിലെ മാസ്റ്റര്‍ ട്രെയിനര്‍മാര്‍ക്കുള്ള  പരിശീലനം  മാര്‍ച്ച് 26, 27 തീയതികളിലായി  മലപ്പുറം കലക്ടറേറ്റ് കേണ്‍ഫറന്‍സ് ഹാളില്‍  െനടക്കും

2019 ലോക്‌സഭാ തെരഞ്ഞെടുപ്പുമായി ബന്ധപ്പെട്ട്  മാതൃകാ പെരുമാറ്റച്ചട്ടം നടപ്പിലാക്കുന്നതിന്റെ ഭാഗമായി രൂപീകരിച്ചിട്ടുള്ള ഫ്‌ളൈയിങ് സ്‌ക്വാഡുകള്‍, ആന്റി ഡിഫേസ് മെന്റ് സ്‌ക്വാഡുകള്‍ എന്നിവയുടെ ലീഡര്‍മാരുടെ യോഗം  മാര്‍ച്ച് 26 രാവിലെ  10 ന് മലപ്പുറം ജില്ലാ പ്ലാനിങ്  സെക്രട്ടറിയേറ്റ് കോണ്‍ഫറന്‍സ് ഹാളില്‍ നടക്കും.

ലോക ക്ഷയരോഗ ദിനാചരണത്തിന്റെ ഭാഗമായി ആരോഗ്യ വകുപ്പിന്റെ ആഭിമുഖ്യത്തില്‍ വിവിധ പരിപാടികള്‍ നടത്തി. മലപ്പുറത്ത് നടന്ന പരിപാടി ജില്ലാ കലക്ടര്‍ അമിത് മീണ ഉദ്ഘാടനം ചെയ്തു. പരിപാടിയുടെ ഭാഗമായി നടന്ന സന്ദേശ റാലി ഡി.എംഒ ഡോ. കെ സക്കീന ഫ്‌ളാഗ് ഓഫ് ചെയ്തു.
ആയുര്‍വേദ ഡിഎംഒ ഡോ. സുശീല, ഹോമിയ ഡിഎംഒ ഡോ. ഷീബാ ബീഗം, ജില്ലാ പ്രോഗ്രാം മാനേജര്‍ ഡോ. എ ഷിബുലാല്‍, ജില്ലാ ടിബി ഓഫീസര്‍ സിബി പ്രദീഷ്, ഡെപ്യൂട്ടി ഡി.എം.ഒമാരായ ഡോ. മുഹമ്മദ് ഇസ്മയില്‍, ഡോ. മുഹമ്മദ് അഫ്‌സല്‍, ഐസിഡിഎസ് ജില്ലാ പ്രോഗ്രാം ഓഫീസര്‍ കെ കൃഷ്ണമൂര്‍ത്തി, മഞ്ചേരി മെഡിക്കല്‍ കോളേജ് പ്രിന്‍സിപ്പല്‍ ഡോ. എംപി ശശി തുടങ്ങിയവര്‍ പങ്കെടുത്തു.