കാലവര്‍ഷക്കെടുതിയില്‍ കോട്ടയം, പാല, പുലിയന്നൂര്‍-മീനച്ചില്‍ - അകല ക്കുന്നം, അയര്‍ക്കുന്നം-കൂരോപ്പട-പാമ്പാടി ശുദ്ധ ജലവിതരണ പദ്ധതികളില്‍ വെള്ളം പമ്പു ചെയ്യുന്നതിന് നാല് ദിവസമായി നേരിട്ട തടസ്സം നീക്കി പമ്പിംഗ്         പുനരാരംഭിച്ചു. വിവിധ പമ്പു ഹൗസുകളില്‍ വെള്ളം കയറിയതുമായി ബന്ധപ്പെട്ട് 14.5 ലക്ഷം രൂപ നഷ്ടം കേരള വാട്ടര്‍ അതോറിറ്റിക്ക് സംഭവിച്ചിട്ടുണ്ട്. 

കനത്ത മഴയെ തുടര്‍ന്ന് വെള്ളക്കെട്ടുണ്ടായ പ്രദേശങ്ങളില്‍ പകര്‍ച്ചവ്യാധികള്‍ പടരുവാന്‍ സാധ്യതയുള്ളതിനാല്‍ ക്യാമ്പുകളില്‍ എല്ലാവരും മുന്‍കരുതല്‍ എടുക്കേണ്ടതാണ്. ക്യാമ്പ് പരിസരം വൃത്തിയായി സൂക്ഷിക്കുവാന്‍ എല്ലാവരും സഹകരിക്കണമെന്ന് ജില്ലാ മെഡിക്കല്‍ ഓഫീസര്‍ ഡോ: ജേക്കബ് വര്‍ഗീസ് അറിയിച്ചു.

സ്ഥലം ഉറപ്പായാല്‍ കയാക്കിങ് മത്സരം സംഘടിപ്പിക്കാനാവശ്യമായ അന്താരാഷ്ട്ര തലത്തിലുള്ള സെന്റര്‍ ഒരുക്കുന്നതിനുള്ള നടപടി സ്വീകരിക്കാന്‍ സര്‍ക്കാര്‍ സന്നദ്ധമാണെന്ന് ഗതാഗത മന്ത്രി എ കെ ശശീന്ദ്രന്‍ പറഞ്ഞു. മലബാര്‍ റിവര്‍ ഫെസ്റ്റിവല്‍ സമാപന സമ്മേളനവും സമ്മാനദാനവും ഉദ്ഘാടനം ചെയ്യുകയായിരുന്നു മന്ത്രി. ഈ വര്‍ഷത്തെ മത്സരത്തോട്കൂടി മലബാര്‍ റിവര്‍ ഫെസ്റ്റിവലും ലോക വൈറ്റ് വാട്ടര്‍ കയാക്കിങ് ചാമ്പ്യന്‍ഷിപ്പും ലോക കായിക ഭൂപടത്തില്‍ രേഖപ്പടുത്തപ്പെട്ടുകഴിഞ്ഞു.