റേഷന്‍കാര്‍ഡുകളുമായി ബന്ധപ്പെട്ട ഓണ്‍ലൈന്‍ അപേക്ഷകള്‍ സ്വീകരി ക്കുന്നതിന് ജില്ലയിലെ അക്ഷയ സംരംഭകര്‍ക്ക്  സിവില്‍ സപ്ലൈസ്  വകുപ്പിന്റെ  നേതൃത്വത്തില്‍ പരിശീലനം നല്‍കി.  പുതിയ റേഷന്‍കാര്‍ഡിനുളള അപേക്ഷ, അംഗങ്ങളെ ചേര്‍ക്കല്‍, തെറ്റ് തിരുത്തല്‍ തുടങ്ങി റേഷന്‍ കാര്‍ഡുമായി ബന്ധപ്പെട്ട 15 തരം സേവനങ്ങള്‍ ഓണ്‍ലൈനില്‍ നല്‍കുന്നതിനുള്ള പരിശീലനമാണ് നല്‍കിയത്.  സംസ്ഥാനത്തെ എല്ലാ അക്ഷയ കേന്ദ്രങ്ങള്‍ വഴിയും അപേക്ഷകള്‍ ഓണ്‍ലൈനായി  സ്വീകരിക്കുന്നതിനുള്ള നടപടികളുടെ മുന്നോടിയായാണ് പരിശീലനം. 

സൗജന്യ തൊഴില്‍ പരിശീലന പദ്ധതിയായ  ഡിഡിയുജികെവൈ പദ്ധതിയിലേക്ക്  യുവതിയുവാക്കളെ തെരഞ്ഞെടുക്കുന്ന മൊബലൈസേഷന്‍ ക്യാമ്പ്  അഴിയൂര്‍  കമ്മ്യൂണിറ്റി  ഹാളില്‍ നടന്നു. 50 പേര്‍ ക്യാമ്പില്‍ പങ്കെടുത്തു. അഴിയൂര്‍ ഗ്രാമപഞ്ചായത്ത് വൈസ്  പ്രസിഡന്റ്  റീന രയരോത്ത് സംസാരിച്ചു. കുടുംബശ്രീ ബ്ലോക്ക് കോ-ഓര്‍ഡിനേറ്റര്‍  രാധിക.എന്‍.എംപദ്ധതി  വിശദീകരിച്ചു. തിങ്ക്‌സ്‌കി ല്‍സ്, യു.എല്‍.സി.സി.എസ് എന്നീ  പരിശീലക സ്ഥാപനങ്ങളുടെ  പ്രതിനിധികളായ  ജിതിന്‍, വിജേഷ് എന്നിവര്‍ കോഴ്‌സുകള്‍ പരിചയപ്പെടുത്തി.

    അയ്യങ്കാളി മെമ്മോറിയല്‍ ടാലന്റ് സെര്‍ച്ച് ആന്റ് ഡവലപ്‌മെന്റ് സ്‌കോളര്‍ഷിപ്പിന് പട്ടികജാതി വിദ്യാര്‍ത്ഥികളില്‍ നിന്ന് അപേക്ഷ ക്ഷണിച്ചു.    സര്‍ക്കാര്‍, സര്‍ക്കാര്‍ എയ്ഡഡ് സ്‌കൂളുകളില്‍ നാലാം ക്ലാസിലും ഏഴാം ക്ലാസിലും പഠിച്ച്   വാര്‍ഷാന്ത പരീക്ഷയില്‍ എല്ലാ വിഷയങ്ങള്‍ക്കും എ ഗ്രേഡ്  ലഭിച്ച വിദ്യാര്‍ഥികള്‍ക്ക് അപേക്ഷിക്കാം. നായാടി, വേടന്‍, ചക്ലിയന്‍, അരുദ്ധതിയാര്‍, കള്ളാടി എന്നീ വിഭാഗത്തില്‍പ്പെട്ട  എല്ലാ വിഷയങ്ങള്‍ക്കും ഇ പ്ലസ് ഗ്രേഡ് എങ്കിലും നേടിയിട്ടുള്ളവര്‍ക്കും അപേക്ഷിക്കാം. കുടുംബ   വാര്‍ഷിക വരുമാനം ഒരു ലക്ഷം രൂപയില്‍ കവിയരുത്. 

പേരാമ്പ്ര ഇ.എം.എസ് സ്മാരക സഹകരണ ആശുപത്രിക്ക് പ്രമുഖ വ്യവസായി ഡോ. വി.ടി.വിനോദ് സൈലന്റ്‌വാലി സംഭാവന ചെയ്ത മൊബൈല്‍ ഐ.സി.യു ആംബുലന്‍സിന്റെ താക്കോല്‍ദാനം സഹകരണ ടൂറിസം ദേവസ്വം വകുപ്പ് മന്ത്രി കടകംപള്ളി സുരേന്ദ്രന്‍ നിര്‍വഹിച്ചു.                                        ആശുപത്രിയില്‍  നടന്ന ചടങ്ങില്‍ ആശുപത്രി പ്രസിഡന്റ് എ.കെ.പത്മനാഭന്‍ അധ്യക്ഷത വഹിച്ചു. പുരുഷന്‍ കടലുണ്ടി എം.എല്‍.എ, മുന്‍ എം.എല്‍.എ കെ.കുഞ്ഞമ്മദ്, ജില്ലാ പഞ്ചായത്ത് അംഗം എ.കെ.ബാലന്‍, പേരാമ്പ്ര പഞ്ചായത്ത് പ്രസിഡന്റ് കെ.എം.റീന, ആശുപത്രി സെക്രട്ടറി സി.രജി, വെങ്കല്ലില്‍ രാമചന്ദ്രന്‍ തുടങ്ങിയവര്‍ സംസാരിച്ചു. 
 

കേരള പബ്ലിക് സര്‍വ്വീസ് കമ്മീഷന്‍ കോഴിക്കോട് ജില്ലാ മേഖലാ ഓഫീസുകളില്‍ നടപ്പാക്കുന്ന ഇ ഓഫീസിന്റെ ഉദ്ഘാടനം പി.എസ്.സി ചെയര്‍മാന്‍ അഡ്വ എം.കെ സക്കീര്‍ ഇന്ന് ( ജൂലായ് 20) രാവിലെ 11 ന് നിര്‍വഹിക്കും. കമ്മീഷന്‍ അംഗങ്ങളായ ഡോ പി.സുരേഷ്‌കുമാര്‍, പി.എച്ച് മുഹമ്മദ് ഇസ്മയില്‍ എന്നിവര്‍ പങ്കെടുക്കും. 

ആവേശപെരുമഴയില്‍ ആറാമത് മലബാര്‍ റിവര്‍ ഫെസ്റ്റിന്റെയും ആദ്യ അന്താരാഷ്ട്ര വൈറ്റ് വാട്ടര്‍ കയാക്കിങ്ങിന്റെയും ഒദ്യോഗിക ഉദ്ഘാടനം സഹകരണ വിനോദ സഞ്ചാര-ദേവസ്വം വകുപ്പ് മന്ത്രി കടകംപള്ളി സുരേന്ദ്രന്‍ പുലിക്കയത്ത് നിര്‍വഹിച്ചു. മലബാറിലെ ടൂറിസം മേഖലകളിലെ വികസന സാധ്യതകള്‍ പരാവധി പ്രയോജനപ്പെടുത്തുന്ന ശ്രമങ്ങളാണ് സര്‍ക്കാര്‍ സ്വീകരിക്കുന്നതെന്ന് മന്ത്രി പറഞ്ഞു. 

    കേരളത്തിലെ എ.ഐ.സി.റ്റി.എ അംഗീകാരമുള്ള വിദ്യാഭ്യാസ സ്ഥാപനങ്ങളിലെ 2018 -19 അധ്യയന വര്‍ഷത്തെ മാസ്റ്റര്‍ ഓഫ് കമ്പ്യൂട്ടര്‍ ആപ്ലിക്കേഷന്‍സ് (എം.സി.എ) ലാറ്ററല്‍ എന്‍ട്രി കോഴ്‌സിലേക്കുള്ള പ്രവേശനത്തിനായുള്ള റാങ്ക് ലിസ്റ്റ് www.lbscentre.kerala.gov.in എന്ന വെബ്‌സൈറ്റില്‍ പ്രസിദ്ധീകരിച്ചു. അപേക്ഷകര്‍ കോളേജ് ഓപ്ഷനുകള്‍ ജൂലൈ 23നകം സമര്‍പ്പിക്കണം. ഫോണ്‍: 0471 2560362, 63, 64, 65
                                          പി.എന്‍.എക്‌സ്.3046/18