ക്യാമ്പുകളില്‍ കഴിയുന്നവര്‍ ആധാര്‍ കാര്‍ഡ്, റേഷന്‍ കാര്‍ഡ് തുടങ്ങിയ രേഖകള്‍ സൂക്ഷിക്കണമെന്ന് ജില്ലാ കളക്ടര്‍ ഡോ. ബി. എസ് തിരുമേനി അറിയിച്ചു. റേഷന്‍ സാധനങ്ങളുടെ വിതരണം കാര്യക്ഷമമായി നടത്തുന്നതിന് ഇതാവശ്യമാണ്. തുരുത്തുകളില്‍ ഒറ്റപ്പെട്ടുപോയവരെ പരമാവധി ക്യാമ്പുകളില്‍ എത്തിച്ചിട്ടുണ്ട്. ക്യാമ്പുകളില്‍ ഭക്ഷണവും മരുന്നും മുടക്കം കൂടാതെ എത്തിക്കുന്നുണ്ട്. 

    പറളി ഗ്രാമപഞ്ചായത്തില്‍ സാക്ഷരതാമിഷന്‍റെ ആഭിമുഖ്യത്തില്‍ നടത്തുന്ന പത്താംതരം, പ്ലസ് വണ്‍ തുല്യതാ ക്ലാസുകളിലേക്ക്  തുല്യതാ പ്രവേശനത്തിനുള്ള രജിസ്ട്രേഷന്‍ ആരംഭിച്ചു. ഏഴാംക്ലാസ് പാസായി 17 വയസ്സ് പൂര്‍ത്തിയായവര്‍ക്ക് പത്താം തരത്തിലേയ്ക്കും 10 ാം ക്ലാസ് വിജയിച്ച 22 വയസ് പൂര്‍ത്തിയായവര്‍ക്ക് പ്ലസ് വണ്ണിലേക്കും അപേക്ഷിക്കാം. ഫോണ്‍: 9656174179, 9446976423.

ചിറ്റൂര്‍ താലൂക്കില്‍ ഗാസ് ഏജന്‍സി തലത്തിലുളള സോഷല്‍ മോണിറ്ററിങ് സമിതി ജൂലൈ 24 ന് രാവിലെ 10.30 ന് ചിറ്റൂര്‍ തത്തമംഗലം നഗരസഭ സമ്മേളന ഹാളില്‍  യോഗം ചേരും. യോഗത്തില്‍ ജനപ്രതിനിധികള്‍, പാചക വാതക വിതരണവുമായി ബന്ധപ്പെട്ട് പരാതികളുളളവര്‍ പങ്കെടുക്കണമെന്ന് താലൂക്ക് സപ്ലൈ ഓഫീസര്‍ അറിയിച്ചു.

    കേരള നിര്‍മാണ തൊഴിലാളി ക്ഷേമ ബോര്‍ഡിന്‍റെ ജില്ലയിലെ അംഗങ്ങളുടെ മക്കള്‍ക്ക് ധനസഹായത്തിന് ജൂലൈ 25 വരെ അപേക്ഷിക്കാമെന്ന് ജില്ലാ എക്സിക്യുട്ടീവ് ഓഫീല്‍ അറിയിച്ചു. പത്താം ക്ലാസ് പ്രവേശനം ലഭിച്ചവര്‍ക്കും പ്ലസ്ടു പഠനത്തിനുമാണ് ധനസഹായം.
    നിര്‍ദ്ദിഷ്ട ഫോമിലുളള അപേക്ഷ, ക്ഷേമനിധി ഐഡന്‍റിറ്റി കാര്‍ഡ്, പാസ് ബുക്ക്, അപേക്ഷകരായ അംഗത്തൊഴിലാളികളുടെ നാഷനലൈസ്ഡ്/ഷെഡ്യൂള്‍ഡ് ബാങ്ക് അക്കൗണ്ട് എന്നിവയുടെ പകര്‍പ്പ് സഹിതം ബോര്‍ഡിന്‍റെ ജില്ലാ ഓഫീസിലാണ് അപേക്ഷ നല്‍കേണ്ടത്.

    പാലക്കാട് ലോകസഭാമണ്ഡലത്തിനു കീഴിലെ പാലക്കാട്, ഒറ്റപ്പാലം, മണ്ണാര്‍ക്കാട്, പട്ടാമ്പി, തൃത്താല താലൂക്കുകളിലെ ഭിന്നശേഷിക്കാര്‍ക്ക് സഹായ ഉപകരണങ്ങള്‍ വിതരണം ചെയ്യുന്നു.  അര്‍ഹരായവര്‍ തൊട്ടടുത്തുളള ശിശുവികസന പദ്ധതി ഓഫീസില്‍ ആവശ്യമായ രേഖകള്‍ സഹിതം ജൂലൈ 30 നകം അപേക്ഷിക്കണമെന്ന് ജില്ലാ സാമൂഹിക നീതി ഓഫീസര്‍ അറിയിച്ചു.