കൊച്ചി: പട്ടികവര്‍ഗ വിഭാഗത്തില്‍പ്പെട്ട ആളുകള്‍ക്കെതിരെയുളള അതിക്രമങ്ങള്‍ തടയുന്നതിന്റെ ഭാഗമായി വീട്ടുജോലി, ഡ്രൈവര്‍, ഗാര്‍ഡ്, ഹെല്‍പ്പര്‍, ഗാര്‍ഡനര്‍, അറ്റന്‍ഡര്‍ തുടങ്ങിയ തസ്തികകളില്‍ പട്ടികവര്‍ഗവിഭാഗത്തില്‍പ്പെട്ട ആളുകളെക്കൊണ്ട് തൊഴില്‍ ചെയ്യിക്കുന്ന എല്ലാ തൊഴിലുടമകളും തൊഴിലാളികളുടെ ശമ്പളവും മറ്റ് ആനുകൂല്യങ്ങളും സംബന്ധിച്ച വിവരങ്ങള്‍ നല്‍കി ബന്ധപ്പെട്ട അസിസ്റ്റന്റ് ലേബര്‍ ഓഫീസുകളില്‍ നിര്‍ബന്ധമായും രജിസ്റ്റര്‍ ചെയ്യണം.

കൊച്ചി: കുളമ്പുരോഗ പ്രതിരോധ കുത്തിവെയ്പ്പ് പദ്ധതിക്കു വേണ്ടി ജില്ലയിലെ വിവിധ കേന്ദ്രങ്ങളില്‍ ഡിസംബര്‍ 28 മുതല്‍ 21 പ്രവൃത്തി ദിവസങ്ങളില്‍ അറ്റന്‍ഡറായി ദിവസവേതന അടിസ്ഥാനത്തില്‍ ജോലി ചെയ്യുവാന്‍, ശാരീരികക്ഷമതയും, മൃഗസംരക്ഷണ മേഖലയില്‍ മുന്‍പരിചയവുമുളള ആളുകളില്‍ നിന്നും അപേക്ഷ ക്ഷണിച്ചു. താത്പര്യമുളളവര്‍ ഡിസംബര്‍ 27-ന് രാവിലെ 10.30 ന് എറണാകുളം എ.ഡി.സി.പി ഓഫീസില്‍ വാക്-ഇന്‍-ഇന്റര്‍വ്യൂവിന് ആധാര്‍ കാര്‍ഡിന്റെ പകര്‍പ്പുമായി നേരിട്ട് ഹാജരാകണമെന്ന് ജില്ലാ മൃഗസംരക്ഷണഓഫീസര്‍ പറഞ്ഞു.

കൊച്ചി: ഡിസംബര്‍ 2015-ലെ വിജ്ഞാനപ്രകാരം അക്ഷയ ആരംഭിക്കുന്നതിനായി ഓണ്‍ലൈനായി അപേക്ഷ സമര്‍പ്പിച്ച ഉദ്യോഗാര്‍ഥികളില്‍ യോഗ്യരായവര്‍ക്കുളള ഓണ്‍ലൈന്‍ പരീക്ഷ ഡിസംബര്‍ 30-ന് കതൃക്കടവിലുളള കെല്‍ട്രോണ്‍ നോളഡ്ജ് സെന്ററില്‍ നടക്കും. ഉദ്യോഗാര്‍ഥികള്‍ക്ക് ഹാള്‍ ടിക്കറ്റുകള്‍ ഇ-മെയിലായി അയച്ചിട്ടുണ്ട്. കൂടുതല്‍ വിവരങ്ങള്‍ക്ക് അക്ഷയ ജില്ലാ ഓഫീസുമായി ബന്ധപ്പെടാം.
 

കൊച്ചി: സംസ്ഥാന കൈത്തറി വികസന കോര്‍പറേഷന്റെ എറണാകുളം കെ.പി.സി.സി ജംഗ്ഷനിലുളള ഹാന്‍വീവ് ഷോറൂമില്‍ ക്രിസ്തുമസ്- പുതുവത്സര ആഘോഷം പ്രമാണിച്ച് എല്ലാ തുണിത്തരങ്ങള്‍ക്കും 20 ശതമാനം റിബേറ്റ് നല്‍കി വില്‍പ്പന ആരംഭിച്ചു. ഈ കാലയളവില്‍ സര്‍ക്കാര്‍, അര്‍ദ്ധ സര്‍ക്കാര്‍, കമ്പനികള്‍, ബാങ്കുകള്‍ തുടങ്ങിയ സ്ഥാപനങ്ങളിലെ ജീവനക്കാര്‍ക്ക് തവണ വ്യവസ്ഥയില്‍ തുണിത്തരങ്ങള്‍ വാങ്ങുന്നതിനുളള സൗകര്യവും ഉണ്ടായിരിക്കും.
 

കൊച്ചി: ഭൂമി സര്‍വെ ചെയ്യുന്നതിനും അതിര്‍ത്തി തര്‍ക്കങ്ങള്‍ മില്ലീ മീറ്റര്‍ വ്യത്യാസം പോലും വരാതെ പരിഹരിക്കുന്നതിനും സാറ്റലൈറ്റ് സാങ്കേതിക വിദ്യയുടെ സഹായത്തോടെ പ്രവര്‍ത്തിക്കുന്ന ആധുനിക സര്‍വ്വേ ഉപകരണങ്ങളില്‍ സര്‍വ്വെ ജീവനക്കാര്‍ക്കുളള പരിശീലനത്തിന് കളക്ടറേറ്റില്‍ തുടക്കമായി.
ജില്ലയിലെ വിവിധ സര്‍വ്വെ ഓഫീസുകളില്‍ ജോലി ചെയ്തുവരുന്ന ഹെഡ് ഡ്രാഫ്റ്റ്മാന്‍, ഹെഡ് സര്‍വ്വെയര്‍, സര്‍വ്വെയര്‍, ഡ്രാഫ്റ്റ്മാന്‍ എന്നീ വിഭാഗങ്ങളില്‍പ്പെടുന്ന സര്‍വ്വെ ജീവനക്കാര്‍ക്കാണ് പരിശീലനം നല്‍കുന്നത്.

കൊച്ചി: കേരള ലേബര്‍ വെല്‍ഫെയര്‍ഫണ്ട് നിയമത്തിന്റെ പരിധിയില്‍ വരുന്ന ഫാക്ടറികള്‍, കോ-ഓപ്പറേറ്റീവ് സൊസൈറ്റികള്‍, ബാങ്കുകള്‍ തുടങ്ങി എല്ലാ സ്ഥാപനങ്ങളും ജനുവരി ഒന്നു മുതല്‍ 15 വരെയുളള ദിവസങ്ങളില്‍ എറണാകുളം ജില്ലാ ലേബര്‍ വെല്‍ഫെയര്‍ ഫണ്ട് ഓഫീസില്‍, അവരുടെ അംശദായം കൃത്യമായി ഒടുക്കേണ്ടതാണെന്ന് ലേബര്‍ വെല്‍ഫെയര്‍ ഫണ്ട് ഇന്‍സ്‌പെക്ടര്‍ അറിയിച്ചു.