കണ്ണഞ്ചേരിയില്‍ ഗോഡൗണില്‍ സൂക്ഷിച്ചിരുന്ന 20 ലോഡ്,958 ചാക്ക് മണല്‍ പിടികൂടി. നടത്തിപ്പുകാരനായ മണി എന്ന ആള്‍ക്കെതിരെ ജിയോളജി വകുപ്പുകള്‍ പ്രകാരം കേസ് രജിസ്റ്റര്‍ ചെയ്തു. ഡെപ്യൂട്ടി കലക്ടര്‍ പി.പി കൃഷ്ണന്‍കുട്ടി, ഭൂരേഖാ തഹസില്‍ദാര്‍ ഇ.അനിതാകുമാരി എന്നിവരടങ്ങിയ സംഘമാണ് മണല്‍ പിടിച്ചെടുത്തത്.

                ജില്ലാ സൈനിക ക്ഷേമ ഓഫീസില്‍ നിന്നും സാമ്പത്തിക സഹായം കൈപ്പറ്റുന്ന രണ്ടാം ലോകമഹായുദ്ധത്തില്‍ പങ്കെടുത്തവരും അവരുടെ വിധവകളും ലൈഫ് സര്‍ട്ടിഫിക്കറ്റ് ഡിസംബര്‍ 31 നകം നല്‍കണം.

    തപാല്‍ വകുപ്പ് സ്കൂള്‍ കുട്ടികള്‍ക്കായി നടത്തി വരുന്ന യു.പി.യു ഇന്‍റര്‍നാഷണല്‍ ലെറ്റര്‍ റൈറ്റിങ്ങ് മല്‍സരം  ജനുവരി ഏഴിന് നടത്തുവാന്‍ നിശ്ചയിച്ചിരിക്കുന്നു.  15 വയസ്സ് വരെ പ്രായമുളള വിദ്യാര്‍ത്ഥികള്‍ക്ക് പ്രസ്തുത മല്‍സരത്തില്‍ പങ്കെടുക്കാവുന്നതാണ്.    അപേക്ഷകള്‍ ലഭിക്കേണ്ട അവസാന തിയ്യതി ഡിസംബര്‍ 21 ആണ്.  താല്‍പ്പര്യമുളള വിദ്യാലയങ്ങള്‍ക്ക് അവരവരുടെ വിദ്യാലയത്തില്‍വെച്ച് മല്‍സരം നടത്തുവാനുളള സൗകര്യം ഒരുക്കുന്നതാണ്.  കൂടുതല്‍ വിവരങ്ങള്‍ക്കായി സീനിയര്‍ സൂപ്രണ്ട്, പാലക്കാട് പോസ്റ്റല്‍ ഡിവിഷനുമായി ബന്ധപ്പെടുക. ഫോണ്‍ - 04912544740, 2545850, 2548400.

    കുമരംപുത്തൂര്‍ ഗ്രാമപഞ്ചായത്തില്‍ നിന്ന് വിധവ പെന്‍ഷന്‍, വാര്‍ദ്ധക്യ കാല പെന്‍ഷന്‍ വാങ്ങുന്നവര്‍ ഡിസംബര്‍ 31 നകം വരുമാന സര്‍ട്ടിഫിക്കറ്റുകള്‍ നല്‍കണം.  വിധവ പെന്‍ഷന്‍ വാങ്ങുന്നവര്‍ പുനര്‍ വിവാഹം കഴിച്ചിട്ടില്ലെന്ന സ്വയം സാക്ഷ്യപത്രവും നല്‍കേണ്ടതുണ്ട്. കുമരംപുത്തൂര്‍ കൃഷിഭവന്‍ മുഖാന്തിരം കര്‍ഷക പെന്‍ഷന്‍ ലഭിക്കുന്നവര്‍ ഡിസംബര്‍  28നകം വരുമാന സര്‍ട്ടിഫിക്കറ്റ് നിര്‍ബന്ധമായും കൃഷിഭവനില്‍ ഹാജരാക്കണമെന്ന് കൃഷി ഓഫീസര്‍ അറിയിച്ചു.

    പാലക്കാട് ഗവണ്‍മെന്‍റ് മെഡിക്കല്‍ കോളേജില്‍ ലാബ് ടെക്നീഷ്യനെ  കരാര്‍ വ്യവസ്ഥയില്‍ നിയമിക്കുന്നു.  പ്ലസ് ടു സയന്‍സും ഡി.എം.എല്‍.ടി കോഴ്സും (പി.എസ്.സി അംഗീകൃതം) പാസ്സായ  രണ്ടു വര്‍ഷത്തെ പ്രവൃത്തി പരിചയമുളളവരാകണം അപേക്ഷകര്‍. പട്ടികജാതി, പട്ടികവര്‍ഗ്ഗ വിഭാഗക്കാരായ പാലക്കാട് ജില്ലക്കാര്‍ക്ക് മുന്‍ഗണന.  അപേക്ഷകള്‍ ഡിസംബര്‍ 23 ന് വൈകുന്നേരം 5 ന് മുമ്പ് ദി പ്രിന്‍സിപ്പാള്‍, ഗവ. മെഡിക്കല്‍ കോളേജ്, പാലക്കാട് 678013 എന്ന വിലാസത്തില്‍ ബയോഡാറ്റയും പ്രവൃത്തിപരിചയം സര്‍ട്ടിഫിക്കറ്റും സഹിതം മെഡിക്കല്‍ കോളേജ് ഓഫീസില്‍ ലഭ്യമാക്കണം. വിശദവിവരം ഓഫീസില്‍ നിന്നറിയാം. ഫോണ്‍- 0491-2000644

    ഷൊര്‍ണൂര്‍ ഐ.പി.ടി ആന്‍ഡ് ഗവ. പോളിടെക്നിക് കോളേജില്‍ കംപ്യൂട്ടര്‍-ഇലക്ട്രോണിക്സ് എഞ്ചിനീയറിങ്ങ് വിഭാഗത്തില്‍ ദിവസ വേതനാടിസ്ഥാനത്തില്‍ അധ്യാപകരെ നിയമിക്കുന്നു.   ബന്ധപ്പെട്ട വിഷയത്തില്‍ 60 ശതമാനത്തില്‍ കുറയാത്ത ബി.ടെക് ബിരുദവും, അധ്യാപക പ്രവര്‍ത്തിയില്‍ പരിചയം ഉളളവരായിരിക്കണം അപേക്ഷകര്‍. താല്‍പര്യമുളളവര്‍ പാസ്പോര്‍ട്ട് സൈസ് ഫോട്ടോയും അസ്സല്‍ സര്‍ട്ടിഫിക്കറ്റുകളും സ്വയം സാക്ഷ്യപ്പെടുത്തിയ പകര്‍പ്പുകളുമായി ജനുവരി മൂന്നിന് രാവിലെ 10 -ന് കോളേജ് ഓഫീസില്‍ എത്തണമെന്ന് പ്രിന്‍സിപ്പാള്‍ അറിയിച്ചു.