തദ്ദേശ സ്വയംഭരണ സ്ഥാപനങ്ങളിലേക്കുള്ള തെരെഞ്ഞെടുപ്പിൻ്റെ ഭാഗമായി 'സിംഗിൾ പോസ്റ്റ്  മെഷീൻ മോക്ക് പോൾ' നടത്തി. പുതിയറ പഴയ താലൂക്ക് ഓഫീസിന് സമീപത്ത് പ്രത്യേകം സജ്ജീകരിച്ച കേന്ദ്രത്തിലാണ് കോർപ്പറേഷൻ, മുനിസിപ്പാലിറ്റി ബൂത്തുകളിലേക്ക് ആവശ്യമായ സിംഗിൾ പോസ്റ്റ്  മെഷീനുകളുടെ മോക്ക് പോൾ നടത്തിയത്. ആകെയുള്ള 1000 കണ്‍ട്രോള്‍, ബാലറ്റ് യൂണിറ്റുകളുടെ രണ്ട് ശതമാനം മെഷീനുകളിലാണ് രാഷ്ട്രീയ പാര്‍ട്ടി പ്രതിനിധികളുടെ സാന്നിധ്യത്തിൽ മോക് പോൾ സംഘടിപ്പിച്ചത്. ഇതോടു കൂടി ജില്ലയിലെ തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിന് ആവശ്യമായ എല്ലാ മെഷീനുകളുടെയും ആദ്യഘട്ട പരിശോധന പൂർത്തിയായി.

നേരിട്ടുള്ള സമ്പര്‍ക്കത്തിലൂടെ 583 പേര്‍ക്ക് വൈറസ്ബാധ
27 പേര്‍ക്ക് ഉറവിടമറിയാതെ രോഗബാധ
രണ്ട് ആരോഗ്യ പ്രവര്‍ത്തകര്‍ക്കും വൈറസ്ബാധ
രോഗബാധിതരായി ചികിത്സയില്‍ 6,555 പേര്‍
ആകെ നിരീക്ഷണത്തിലുള്ളത് 71,285 പേര്‍

കുറുവ(കീരംകുണ്ട്) പാലത്തില്‍ നവീകരണ പ്രവര്‍ത്തനങ്ങള്‍ നടക്കുന്നതിനാല്‍ മലപ്പുറത്ത് നിന്ന് വെട്ടിച്ചിറ-കാടാമ്പുഴ-കൂട്ടിലങ്ങാടി-കീരംകുണ്ട് വഴിയിലൂടെയുള്ള വാഹനഗതാഗതം നവംബര്‍ 15 മുതല്‍ നിര്‍മാണം പൂര്‍ത്തിയാവുന്നതു വരെ നിരോധിച്ചു.  മലപ്പുറത്ത് നിന്ന് പടപറമ്പ് കാടാമ്പുഴ ഭാഗത്തേക്ക് പോകേണ്ട വാഹനങ്ങള്‍ വടക്കേമണ്ണ-ചട്ടിപ്പറമ്പ് അല്ലെങ്കില്‍ മക്കരപ്പറമ്പ് ചെറുകുളമ്പ വഴിയും പോകണമെന്ന് എക്‌സിക്യൂട്ടീവ് എഞ്ചിനീയര്‍ അറിയിച്ചു.

വേങ്ങര-കച്ചേരിപ്പടി -കക്കാടംപുറം റോഡില്‍  നവീകരണ പ്രവൃത്തികള്‍ നടക്കുന്നതിനാല്‍ നവംബര്‍ 16ന് രാവിലെ ആറ് മുതല്‍ നവംബര്‍ 25 വൈകീട്ട് ആറ് വരെ ഗതാഗതം നിരോധിച്ചു. വാഹനങ്ങള്‍ അച്ചനമ്പലം- വേങ്ങര വഴിയും, അച്ചനമ്പലം കൂരിയാട് വഴിയും പോകണമെന്ന് എക്‌സിക്യൂട്ടീവ് എഞ്ചിനീയര്‍ അറിയിച്ചു.

മങ്കട ജി.ഐ.എഫ്.ഡി. സെന്ററിലെ എഫ്.ഡി.ജി.ടി കോഴ്‌സ് 2020-21 അഡ്മിഷനിലേക്കായി തെരഞ്ഞെടുക്കപ്പെട്ടവര്‍ യോഗ്യത തെളിയിക്കുന്നതിനുളള അസ്സല്‍ രേഖകള്‍, സംവരണത്തിലൂടെ അഡ്മിഷന്‍ ലഭ്യമായവര്‍ അവ തെളിയിക്കുന്ന സര്‍ട്ടിഫിക്കറ്റുകള്‍, ടി.സി, സി.സി. തുടങ്ങിയവ സഹിതം നവംബര്‍ 16ന് രാവിലെ 10ന്  രക്ഷിതാവിനോടൊപ്പം പെരിന്തല്‍മണ്ണ ഗവ. പോളിടെക്‌നിക്ക് കോളജില്‍ ഹാജരായി  അഡ്മിഷന്‍ എടുക്കണം. അഡ്മിഷന്‍ സമയത്ത്  1,585 രൂപ അടയ്ക്കണം. ഫോണ്‍: 9562186497.

മലപ്പുറം ഗവ.കോളജില്‍  കെമിസ്ട്രി വിഭാഗത്തില്‍ അതിഥി അധ്യാപകരെ നിയമിക്കുന്നു. കോഴിക്കോട് കോളജ് വിദ്യാഭ്യാസ വകുപ്പ് ഡെപ്യൂട്ടി ഡയറക്ടര്‍ തയ്യാറാക്കിയ ലിസ്റ്റില്‍ ഉള്‍പ്പെട്ടിട്ടുള്ള ഉദ്യോഗാര്‍ഥികള്‍ക്ക് അഭിമുഖത്തില്‍ പങ്കെടുക്കാം. താത്പര്യമുള്ളവര്‍ നവംബര്‍ 17ന് രാവിലെ 10ന് അസ്സല്‍ സര്‍ട്ടിഫിക്കറ്റുകളും ബയോഡാറ്റയും സഹിതം പ്രിന്‍സിപ്പല്‍ മുമ്പാകെ ഹാജരാകണം.

മലപ്പുറം, പൊന്നാനി നഗരസഭകളിലെ വിശദനഗരാസൂത്രണ പദ്ധതികള്‍ പുതുക്കുന്നതിന്റെ ഭാഗമായി നവംബര്‍ 16  മുതല്‍ ജില്ലാ നഗരാസൂത്രണ കാര്യാലയത്തിലെ ഉദ്യോഗസ്ഥര്‍ പ്രദേശങ്ങള്‍ നേരിട്ട് സന്ദര്‍ശിച്ച് സര്‍വേ നടത്തും. പൊതുജനങ്ങള്‍ ആവശ്യമായ സഹകരണം നല്‍കണമെന്ന് ജില്ലാ ടൗണ്‍പ്ലാനര്‍ അറിയിച്ചു.

ജില്ലയില്‍ തെരെഞ്ഞെടുപ്പ് പ്രചാരണങ്ങളില്‍ കോവിഡ് നിയമാവലികള്‍ പൂര്‍ണമായും പാലിക്കണമെന്ന്  ജില്ലാ മെഡിക്കല്‍ ഓഫീസര്‍ ഡോ.കെ സക്കീന അറിയിച്ചു. കോവിഡ്  നിലനില്‍ക്കുന്ന സാഹചര്യത്തില്‍ തെരെഞ്ഞെടുപ്പുമായി ബന്ധപ്പെട്ട് പ്രവര്‍ത്തിക്കുന്ന സ്ഥാനാര്‍ത്ഥികളും രാഷ്ട്രീയ പ്രവര്‍ത്തകരും പൊതുജനങ്ങളും നിര്‍ദേശങ്ങള്‍ കര്‍ശനമായി പാലിക്കണം.

* കോവിഡ് പോസിറ്റീവായ രോഗികളോ ക്വാറന്റൈനില്‍ ഇരിക്കുന്ന വ്യക്തികളോ ഉള്ള വീടുകളില്‍ നേരിട്ട് പോകാതെ ഓണ്‍ലൈനായോ ഫോണ്‍ വഴിയോ വോട്ടഭ്യര്‍ത്ഥിക്കാം.

* അഞ്ച് പേരില്‍ കൂടുതല്‍ ആളുകള്‍ ഒരു വീട്ടില്‍ ഒരേ സമയം പ്രചാരണത്തിന് പങ്കെടുക്കരുത്.

തെരഞ്ഞെടുപ്പിന് മുന്നോടിയായി തദ്ദേശ സ്വയംഭരണ സ്ഥാപനത്തിലെ സെക്രട്ടറിമാര്‍ക്ക് പരിശീലന ക്ലാസ് നല്‍കി. എ.ഡി.എം എന്‍.എം  മെഹറലി, ഡി.ഡി. പി ഇ. രാജന്‍, അസിസ്റ്റന്റ് നോഡല്‍ ഓഫീസര്‍ ആസിഫ്, ജില്ലാ ഇന്‍ഫോര്‍മാറ്റിക് ഓഫീസര്‍ പ്രജീഷ് എന്നിവരുടെ നേതൃത്വത്തിലായിരുന്നു പരിശീലന ക്ലാസ്. ഈഡ്രോപ് സൈറ്റിനെ പരിചയപ്പെടുത്തിയതിനോടൊപ്പം തെരഞ്ഞെടുപ്പിന് നിയോഗിക്കുന്ന ഉദ്യോഗസ്ഥരുടെ വിവരങ്ങള്‍ ചേര്‍ക്കുന്നതിനുള്ള നിര്‍ദേശങ്ങളും സെക്രട്ടറിമാര്‍ക്ക് ക്ലാസില്‍  നല്‍കി.

തദ്ദേശ സ്വയംഭരണ തെരഞ്ഞെടുപ്പിന് മുന്നോടിയായി പോളിങ് ബൂത്തുകളിലേക്കാവശ്യമായ സ്റ്റേഷനറി സാധനങ്ങള്‍ കലക്ടറേറ്റിലെത്തി. തിരുവനന്തപുരത്ത് നിന്ന് രണ്ട് ലോറികളിലായിട്ടാണ് സാധനങ്ങള്‍ മലപ്പുറത്തെത്തിയത്.