1999 ജനുവരി ഒന്നു മുതല്‍ 2019 ഡിസംബര്‍ 31 വരെ വിവിധ കാരണങ്ങളാല്‍ മുടങ്ങിപ്പോയ
എംപ്ലോയ്മെന്റ് രജ്സ്ട്രേഷന്‍ പുതുക്കാന്‍ സാധിക്കാത്തവര്‍ക്ക്  അവരുടെ തനത് സീനിയോറിറ്റി നിലനിര്‍ത്തികൊണ്ട്  രജിസ്ട്രേഷന്‍ പുതുക്കുന്നതിന്  2021 ഫെബ്രുവരി 28 വരെ സമയം അനുവദിച്ച് ഉത്തരവായി.  ഉദ്യോഗാര്‍ഥികള്‍ക്ക്  മുടങ്ങിയ രജിസ്ട്രേഷന്‍ www.eemployment.kerala.gov.in  എന്ന വെബ് സൈറ്റില്‍ ഈ മാസം  മുതല്‍ ഫെബ്രുവരി 28 വരെ ഓണ്‍ലൈനായി  പുതുക്കാം.
 

   
 ശബരിമല പൂങ്കാവന പ്രദേശം മദ്യവിമുക്ത മേഖലയായി പ്രഖ്യാപിച്ച് സര്‍ക്കാര്‍ ഉത്തരവായതായി ഡെപ്യൂട്ടി എക്‌സൈസ് കമ്മീഷണര്‍  ബി. വേണുഗോപാലക്കുറുപ്പ് അറിയിച്ചു.  പെരുനാട്, കൊല്ലമുള വില്ലേജ് ഉള്‍പ്പെടുന്ന പ്രദേശങ്ങളില്‍ നവംബര്‍ 12 മുതല്‍ 2021 ജനുവരി 20 വരെയാണ് മദ്യവിമുക്ത മേഖലയായി പ്രഖ്യാപിച്ചിട്ടുളളത്. ശബരിമല, പമ്പ, നിലയ്ക്കല്‍ എന്നീ   താല്‍ക്കാലിക എക്‌സൈസ് റേഞ്ച് ഓഫീസുകള്‍ എക്‌സൈസ് സര്‍ക്കിള്‍ ഇന്‍സ്‌പെക്ടറുടെ നേതൃത്വത്തില്‍ പ്രവര്‍ത്തനം  ആരംഭിച്ചിട്ടുണ്ട്.

ദീപാവലി, ക്രിസ്മസ്, പുതുവത്സര ആഘോഷങ്ങളുടെ ഭാഗമായി ഗ്രീൻ ക്രാക്കേഴ്‌സിന്റെ വിൽപന മാത്രം അനുവദിച്ചുകൊണ്ട് സർക്കാർ ഉത്തരവിട്ടതായി ജില്ലാ കളക്ടർ അറിയിച്ചു. ദീപാവലി ആഘോഷങ്ങളുടെ ഭാഗമായി ഇവ ഉപയോഗിക്കുന്ന സമയം രാത്രി എട്ട് മുതൽ 10 മണി വരെയും ക്രിസ്മസ്, പുതുവത്സര ആഘോഷങ്ങളുടെ ഭാഗമായി രാത്രി 11.55 മുതൽ അർധരാത്രി 12.30 വരെയും ആയി നിയന്ത്രിച്ചിട്ടുണ്ട്. ദേശീയ ഹരിത ട്രൈബ്യൂണലിന്റെ നിർദേശ പ്രകാരം അന്തരീക്ഷവായു ഗുണനിലവാരം കുറവുള്ള നഗരങ്ങളിൽ ഗ്രീൻ ക്രാക്കേഴ്‌സിന് മാത്രമാണ് അനുമതിയുള്ളത്. 

Reply all

ജില്ലയിൽ കണ്ടെയ്ൻമെൻറ് സോണുകളിൽ ഉൾപ്പെടെ കോവിഡ് പെരുമാറ്റച്ചട്ടങ്ങൾ കർശനമായി പാലിക്കാനും അതീവ ജാഗ്രത പുലർത്താനും ജില്ലാ കളക്ടർ എസ്. ഷാനവാസ് കർശന നിർദേശം നൽകി. കണ്ടെയ്ൻമെൻറ് സോണുകളിൽ ആളുകൾ ഇടവഴികളിലൂടെ സംസ്ഥാനന്തര യാത്രകൾ നടത്തുന്നതായും കോവിഡ് പെരുമാറ്റച്ചട്ടങ്ങൾ പാലിക്കാതെ കൂട്ടം കൂടി പച്ചക്കറി, മത്സ്യം തുടങ്ങിയവ വിൽക്കുന്നതായും റിപ്പോർട്ട് ലഭിച്ചതിന്റെ അടിസ്ഥാനത്തിലാണിത്. ദീപാവലി ഉൾപ്പെടെയുള്ള ആഘോഷങ്ങളുടെ പശ്ചാത്തലത്തിൽ ജനങ്ങൾ കൂട്ടം കൂടാൻ സാധ്യതയുള്ളതിനാൽ സ്ഥിതി സങ്കീർണമാകാതിരിക്കാൻ കൂടിയാണ് നിർദേശം. 

തൃശൂർ ജില്ലയിൽ വെളളിയാഴ്ച (13/11/2020) 677 പേർക്ക് കൂടി കോവിഡ്-19 സ്ഥീരികരിച്ചു. 866 പേർ രോഗമുക്തരായി. ജില്ലയിൽ രോഗബാധിതരായി ചികിത്സയിൽ കഴിയുന്നവരുടെ എണ്ണം 8536 ആണ്. തൃശൂർ സ്വദേശികളായ 91 പേർ മറ്റു ജില്ലകളിൽ ചികിത്സയിൽ കഴിയുന്നു. ജില്ലയിൽ ഇതുവരെ കോവിഡ് സ്ഥീരികരിച്ചവരുടെ എണ്ണം 49,984 ആണ്. 41,073 പേരെയാണ് ആകെ രോഗമുക്തരായി ആശുപത്രിയിൽ നിന്നും ഡിസ്ചാർജ്ജ് ചെയ്തത്.
ജില്ലയിൽ വെളളിയാഴ്ച്ച സമ്പർക്കം വഴി 658 പേർക്കാണ് രോഗം സ്ഥീരികരിച്ചത്. കൂടാതെ 3 ആരോഗ്യ പ്രവർത്തകർക്കും സംസ്ഥാനത്തിന് പുറത്തുനിന്ന് എത്തിയ 7 പേർക്കും, രോഗ ഉറവിടം അറിയാത്ത 9 പേർക്കും രോഗബാധ ഉണ്ടായി.

*ചികിത്സയിലുള്ളവർ 77,390; 11 പുതിയ ഹോട്ട് സ്‌പോട്ടുകൾ
കേരളത്തിൽ വെള്ളിയാഴ്ച 5804 പേർക്ക് കോവിഡ്-19 സ്ഥിരീകരിച്ചു. കോഴിക്കോട് 799, എറണാകുളം 756, തൃശൂർ 677, മലപ്പുറം 588, കൊല്ലം 489, ആലപ്പുഴ 468, തിരുവനന്തപുരം 439, പാലക്കാട് 438, കോട്ടയം 347, കണ്ണൂർ 240, പത്തനംതിട്ട 189, ഇടുക്കി 187, വയനാട് 106, കാസർഗോഡ് 81 എന്നിങ്ങനേയാണ് ജില്ലകളിൽ രോഗബാധ സ്ഥിരീകരിച്ചത്.

മനുഷ്യത്വത്തിന്റെ പ്രകാശന വേളയാക്കി ദീപാവലിയെ  മാറ്റാൻ സാധിക്കട്ടെ എന്ന് മുഖ്യമന്ത്രി പിണറായി വിജയൻ ആശംസിച്ചു. നൻമയുടെ സന്ദേശമാണ് ദീപാവലിയുടേത്. എല്ലാ വിധത്തിലുമുള്ള വേർതിരിവുകൾക്കതീതമായി മതസാഹോദര്യവും സമത്വവും ജനാധിപത്യമൂല്യങ്ങളും ഉയർത്തിപ്പിടിച്ചു കൊണ്ട് ദീപാവലി ആഘോഷിക്കാം. എല്ലാവർക്കും ഹൃദയംഗമമായ ആശംസകൾ നേരുന്നതായി മുഖ്യമന്ത്രി പറഞ്ഞു.
പി.എൻ.എക്‌സ്.4013/2020

കോഴിക്കോട് ഇംഹാൻസിൽ പോസ്റ്റ് ബേസിക് ഡിപ്ലോമ ഇൻ സൈക്യാട്രിക് നഴ്‌സിംഗ് 2020-21 കോഴ്‌സിലേക്ക് അപേക്ഷ ക്ഷണിച്ചു. യോഗ്യത ജനറൽ നഴ്‌സിംഗ്/ബി.എസ്‌സി നഴ്‌സിംഗ്/പോസ്റ്റ് ബേസിക് ബി.എസ്‌സി നഴ്‌സിംഗ് ബിരുദം. അപേക്ഷിക്കേണ്ട അവസാന തീയതി നവംബർ 30. അപേക്ഷ ഫോം ഇംഹാൻസ് ഓഫീസിൽ നിന്ന് നേരിട്ടും www.imhans.ac.in എന്ന വെബ്‌സൈറ്റ് വഴിയും ലഭിക്കും. ഫോൺ: 9745156700, 9605770068.

തദ്ദേശ തിരഞ്ഞെടുപ്പിനോടനുബന്ധിച്ച് ബ്ലോക്ക് തല പരിശീലനം നൽകുന്ന ഉദ്യോഗസ്ഥർക്കുള്ള ഏകദിന പരിശീലനം കളക്ട്രേറ്റിലെ ജില്ലാ ആസൂത്രണ സമിതി ഹാളിൽ നടന്നു. ബൂത്ത് തലത്തിൽ സ്വീകരിക്കേണ്ട നടപടികൾ, വോട്ടിംഗ് യന്ത്രങ്ങളുടെ ക്രമീകരണങ്ങൾ, പോളിംഗ് ദിവസത്തെ മറ്റ് അനുബന്ധ പ്രവർത്തനങ്ങൾ തുടങ്ങിയവയാണ് ജില്ലാതല പരിശീലകർ ബ്ലോക്ക്തല പരിശീലകരെ പരിചയപ്പെടുത്തിയത്. ജില്ലയിലെ 16 ബ്ലോക്ക് പഞ്ചായത്തുകളിൽ നിന്നും 63 ഉദ്യോഗസ്ഥർ പരിശീലന പരിപാടിയിൽ പങ്കെടുത്തു.