മഞ്ചേരി ഗവ. മെഡിക്കല്‍ കോളേജ് ആശുപത്രിയിലേക്ക് കാര്‍ഡിയാക് കത്തീറ്ററൈസേഷന്‍ ലാബിലേക്ക് ഉപയോഗിക്കേണ്ടി വരുന്ന വിവിധ തരം ആഞ്ജിയോ ഗ്രാഫിക്ക് ഷീത്തുകള്‍, കത്തീറ്ററുകള്‍, ബലൂണുകള്‍, സ്റ്റെന്റുകള്‍, പേസ്‌മേക്കറുകള്‍ മുതലായ കണ്‍സ്യൂമബിള്‍സ് വിതരണം ചെയ്യുന്നതിന് ഡി.സി.ജി.ഐ/സി.ഇ/ എഫ്.ഡി.എ ലൈസന്‍സുള്ള സ്ഥാപനങ്ങള്‍ / വിതരണക്കാര്‍ എന്നിവരില്‍ നിന്നും അപേക്ഷ ക്ഷണിച്ചു.  അപേക്ഷയില്‍ ഉല്‍പന്നങ്ങളുടെ വിലയും മറ്റു വിവരങ്ങളും ലൈസന്‍സിന്റെ പകര്‍പ്പും സമര്‍പ്പിക്കണം.  അപേക്ഷ ഫെബ്രുവരി 28ന് വൈകുന്നേരം അഞ്ചിനകം മെഡിക്കല്‍ കോളേജ് ആശുപത്രി സൂപ്രണ്ടിന്റെ ഓഫീസില്‍ ലഭിക്കണം. ഫോണ്‍ 0483 2762037.

ന്യൂനപക്ഷക്ഷേമ വകുപ്പിന്റെ ആഭിമുഖ്യത്തില്‍ ഭിന്നശേഷിക്കാരായ യുവതയ്ക്കായി വിവാഹപൂര്‍വ്വ കൗണ്‍സിലിങ്ങ് നടത്തുന്നു.  പരിപാടിയുടെ സംസ്ഥാനതല ഉദ്ഘാടനം കാലിക്കറ്റ് സര്‍വ്വകലാശാല ക്യാമ്പസിലെ ആര്യഭട്ട ഹാളില്‍ ഫെബ്രുവരി 20ന് ഉച്ചക്ക് 12ന് ഉന്നത വിദ്യാഭ്യാസ - ന്യൂനപക്ഷ വകുപ്പ് മന്ത്രി ഡോ. കെ.ടി ജലീല്‍ നിര്‍വ്വഹിക്കും.  ആദ്യമായാണ് സംസ്ഥാനത്ത് ഇത്തരത്തിലുള്ള പരിപാടി നടത്തുന്നത്.

തിരൂര്‍ താലൂക്കിലെ ശ്രീ വൈരംകോട് ഭഗവതി ക്ഷേത്രത്തിലെ തിയ്യാട്ടുത്സവം പ്രമാണിച്ച് ഫെബ്രുവരി 22ന് തിരൂര്‍ ഡി.ഇ.ഒ, തിരൂര്‍, കുറ്റിപ്പുറം എ.ഇ.ഒ എന്നിവരുടെ കീഴിലുള്ള തിരുനാവായ, കല്‍പ്പകഞ്ചേരി, ആതവനാട്, വളവനൂര്‍, തലക്കാട്, കുറ്റിപ്പുറം, മാറാക്കര, തൃപ്രങ്ങോട് എന്നീ  ഗ്രാമ പഞ്ചായത്തുകളിലെയും തിരൂര്‍ മുന്‍സിപ്പാലിറ്റിയിലെയും വിദ്യാഭ്യാസ സ്ഥാപനങ്ങള്‍ക്ക് ഒരു ദിവസവും സര്‍ക്കാര്‍ ഓഫീസുകള്‍ക്ക് ഉച്ചക്ക് ശേഷവും (അര ദിവസം) ജില്ലാ കലക്ടര്‍ പ്രദേശിക അവധി പ്രഖ്യാപിച്ചു.

മലപ്പുറം നഗരസഭക്ക് കീഴില്‍ വ്യവസായ സംരംഭകത്വ ക്ലബ് പ്രവര്‍ത്തനം തുടങ്ങി. ക്ലബിന്റെ ഉദ്ഘാടനവും വ്യവസായ ബോധവല്‍ക്കരണ സെമിനാറും നഗരസഭ ചെയര്‍പേഴ്‌സണ്‍ സി എച്ച് ജമീല ടീച്ചര്‍ ഉദ്ഘാടനീ ചെയ്തു. ക്ലബ്ബ് പ്രസിഡണ്ട് മറിയുമ്മ ശരീഫ് കോണോത്തൊടി അധ്യക്ഷത വഹിച്ചു. സെക്രട്ടരി ഹാരിസ് ആമിയന്‍ സ്വാഗതം പറഞ്ഞു.

സാക്ഷരതാ മിഷന്റെ ഇംഗ്ലീഷ് പഠന കോഴ്സിന് ജില്ലയില്‍ മികച്ച പ്രതികരണം. 920 പേരാണ് ഗുഡ് ഇംഗ്ലീഷ് രണ്ടാം ബാച്ചിന് ജില്ലയില്‍ ചേര്‍ന്നത്. സംസ്ഥാനത്ത് കൂടുതല്‍ പേര്‍ പഠിതാക്കളായ ജില്ലയാണ് മലപ്പുറം. രണ്ടാം ബാച്ചിലെ പഠിതാക്കളുടെ സംഗമം ഇന്നലെ കോട്ടക്കുന്ന് ഡിടിപിസി ഹാളില്‍ നടന്നു. പികെ കുഞ്ഞാലിക്കുട്ടി എംപി സംഗമം ഉദ്ഘാടനം ചെയ്തു. പാതി വഴിയില്‍ പഠനം അവസാനിപ്പിക്കേണ്ട വന്നവര്‍ക്ക് ഏറെ ഉപകാരപ്പെടുന്നതാണ് 'ഗുഡ് ഇംഗ്ലീഷ്' കോഴ്സെന്ന് എംപി അഭിപ്രായപ്പെട്ടു. പി ഉബൈദുള്ള എംഎല്‍എ അധ്യക്ഷത വഹിച്ചു.

മലപ്പുറം ഗേള്‍സ് സ്‌കൂളില്‍ പുതുതായി സ്ഥാപിച്ച അടല്‍ ടിങ്കറിങ് ലാബ് പി. കെ കുഞ്ഞാലിക്കുട്ടി എം.പി ഉദ്ഘാടനം ചെയ്തു.  ഇത്തരം സൗകര്യങ്ങള്‍ വരുന്നത് പൊതു വിദ്യാലയങ്ങള്‍ ശക്തി പ്രാപിപ്പിക്കുന്നതിന്റെ തെളിവാണെന്ന് അദ്ദേഹം പറഞ്ഞു. മലപ്പുറത്തെ കുട്ടികള്‍ക്ക് കൂടുതല്‍ ഉയരങ്ങളിലെത്താന്‍ ഇത്തരം പുതിയം സംവിധാനം ഉപകരിക്കുമെന്നും അദ്ദേഹം അഭിപ്രായപ്പെട്ടു. പി.ഉബൈദുള്ള    എം.എല്‍.എ അധ്യക്ഷത വഹിച്ചു.