സംസ്ഥാനത്തെ എല്ലാ സര്‍ക്കാര്‍/എയ്ഡഡ്/അണ്‍ എയ്ഡഡ്/ അംഗീകൃത സി.ബി.എസ്.ഇ, ഐ.സി.എസ്.ഇ സ്‌കൂളുകളില്‍ 1 മുതല്‍ 10 വരെ ക്ലാസുകളില്‍ പഠിക്കുന്ന ഒ.ഇ.സി വിഭാഗം വിദ്യാര്‍ത്ഥികള്‍ക്കുള്ള വിദ്യഭ്യാസാനുകൂല്യം ഇനി മുതല്‍ വിദ്യാര്‍ത്ഥികളുടെ അക്കൗണ്ടുകളിലേക്ക് നേരിട്ട് ട്രാന്‍സ്ഫര്‍ ചെയ്യും. ഒ.ഇ.സി വിദ്യാഭ്യാസാനുകൂല്യത്തിന് അര്‍ഹരായ വിദ്യാര്‍ത്ഥികള്‍  മെയ് 31നകം അവരവരുടെയും രക്ഷിതാവിന്റെയും പേരിലുള്ള ജോയിന്റ് ബാങ്ക് അക്കൗണ്ടുകള്‍ ആരംഭിക്കണം. നിലവില്‍ ബാങ്ക് അക്കൗണ്ടുകള്‍ ഉള്ള വിദ്യാര്‍ത്ഥികള്‍ ബാങ്കുമായി ബന്ധപ്പെട്ട് അവ ലൈവ് ആണെന്ന് ഉറപ്പാക്കണം.

ഇടുക്കി ഗവണ്‍മെന്റ് മെഡിക്കല്‍ കോളേജില്‍ 2019-20 അധ്യയന വര്‍ഷം എം.ബി.ബി.എസ് കോഴ്‌സ് തുടങ്ങുന്നതിനായി ജൂനിയര്‍ റസിഡന്റുമാരുടെ ഇന്റര്‍വ്യൂ മെയ് 22ന് രാവിലെ 10.30നും സീനിയര്‍ റസിഡന്റുമാരുടെ ഇന്റര്‍വ്യൂ മെയ് 23ന് രാവിലെ 10.30നും മെഡിക്കല്‍ കോളേജ് പ്രിന്‍സിപ്പാളിന്റെ ഓഫീസില്‍ നടത്തും. അര്‍ഹരായ ഉദ്യോഗാര്‍ത്ഥികള്‍ അസ്സല്‍ സര്‍ട്ടിഫിക്കറ്റുകള്‍ സഹിതം ഓഫീസില്‍ ഹാജരാകണം. വിശദവിവരങ്ങള്‍ക്ക് ഫോണ്‍ 04862 233076, 9995538397.

ആരോഗ്യ രക്ഷയ്ക്ക്  മാലിന്യ മുക്ത പരിസരം എന്ന ലക്ഷ്യത്തോടെ പെന്‍സില്‍ പരിശീലന പരിപാടിക്ക്  രാജകുമാരി പഞ്ചായത്തില്‍ തുടക്കമായി. ഹരിത കേരളം മിഷന്‍, കുടുംബശ്രീ മിഷന്‍,  ശുചിത്വ മിഷന്‍, ആരോഗ്യ വകുപ്പ്, കില, തദ്ദേശസ്വയംഭരണ സ്ഥാപനങ്ങള്‍ എന്നിവയുടെ സംയുക്താഭിമുഖ്യത്തിലാണ് അവധിക്കാല  ക്യാമ്പ്  പഞ്ചായത്ത് തലത്തില്‍ സംഘടിപ്പിക്കുന്നത്.   

ശുചീകരണ യജ്ഞത്തിന്റെ ഭാഗമായി അഞ്ചുരുളി വിനോദ സഞ്ചാര കേന്ദ്രവും പരിസരവുംവൃത്തിയാക്കി. കാഞ്ചിയാര്‍ ഗ്രാമ പഞ്ചായത്തിന്റെ നേതൃത്വത്തില്‍ നടന്ന ശുചീകരണ പ്രവര്‍ത്തനത്തില്‍ 250ഓളം പേര്‍ പങ്കാളികളായി. അഞ്ചുരുളി സന്ദര്‍ശിക്കാനെത്തുന്നവര്‍ നിക്ഷേപിക്കുന്ന പ്ലാസ്റ്റിക് കുപ്പികളും കവറുകളും അടക്കമുള്ള മാലിന്യങ്ങള്‍ പ്രവര്‍ത്തകര്‍ ശേഖരിച്ച് ജൈവ അജൈവ മാലിന്യങ്ങളായി തരം തിരിച്ച് സംസ്‌കരിക്കുകയും പ്ലാസ്റ്റിക് മാലിന്യങ്ങള്‍ റീസൈക്ലിംഗിന്  നല്കുവാനായി പ്രത്യേക ക്രമീകരണങ്ങള്‍ ഏര്‍പ്പെടുത്തുകയും ചെയ്തു. 

പ്രളയക്കെടുതികളെ തുടര്‍ന്ന് ജില്ലയിലെ അഞ്ചു താലൂക്കുകളിലായി മുഖ്യമന്ത്രിയുടെ ദുരിതാശ്വാസ നിധിയില്‍ നിന്ന് 6,09,94,613  കോടി രൂപ സ്വന്തമായി ഭൂമി വാങ്ങാന്‍ വിതരണം ചെയ്തു. വില്ലേജ് ഓഫീസുകളില്‍  ആകെ 117 അപേക്ഷകളാണ് ലഭിച്ചത്. 239 ആളുകള്‍ സ്വന്തമായി സ്ഥലം വാങ്ങുന്നതിന് സന്നദ്ധത അറിയിച്ചിരുന്നു. 130 ആളുകള്‍ സ്വന്തമായി ഭൂമി വാങ്ങുകയും 125 പേര്‍ക്ക് തുക അനുവദിച്ചു നല്‍കുകയും ചെയ്തു.