താമരശ്ശേരി ചുരം റോഡില്‍ വികസന പ്രവൃത്തികള്‍ നടക്കുന്നതിനാല്‍ ഇന്ന് (മെയ് 14) മുതല്‍ മള്‍ട്ടി ആക്‌സില്‍ ട്രക്കുകള്‍ക്ക് നിരോധനം ഏര്‍പ്പെടുത്തി. കോഴിക്കോട്, മലപ്പുറം ഭാഗത്ത് നിന്ന് വരുന്ന  മള്‍ട്ടി ആക്‌സില്‍ ട്രക്കുകള്‍ ഇന്ന് മുതല്‍ രണ്ടാഴ്ചത്തേക്ക്  നാടുകാണി, കുറ്റ്യാടി വഴി യാത്ര ചെയ്യേണ്ടതാണെന്ന് കോഴിക്കോട് ജില്ലാ കലക്ടര്‍ സീറാം സാമ്പശിവ റാവുവിന്റെ  ചേമ്പറില്‍ ചേര്‍ന്ന യോഗത്തില്‍ തീരുമാനിച്ചു. യോഗത്തില്‍ കോഴിക്കോട് ആര്‍.ടി.ഒ  എ.കെ ശശികുമാര്‍, താമരശ്ശേരി ട്രാഫിക് എസ്.ഐ യു.രാജന്‍, എന്‍.എച്ച് എക്‌സിക്യുട്ടീവ് എഞ്ചിനീയര്‍ വിനയരാജ് എന്നിവര്‍ പങ്കെടുത്തു.

പത്താംക്ലാസ് പാസായ ബധിര വിദ്യാർത്ഥികൾക്ക് തിരുവനന്തപുരം ജഗതി സർക്കാർ ബധിര വിദ്യാലയത്തിൽ വി.എച്ച്.എസ്.ഇ വിഭാഗം അഡ്മിഷൻ ആരംഭിച്ചു. ബധിര വിദ്യാർത്ഥികൾക്ക് അനുയോജ്യമായതും തൊഴിൽസാധ്യതയുള്ളതുമായ പ്രിന്റിംഗ് ടെക്‌നോളജി, ഫാഷൻ ഡിസൈനിംഗ് എന്നീ കോഴ്‌സുകളാണ് ഇവിടെയുള്ളത്. വിദ്യാർത്ഥികൾക്ക് സൗജന്യ ഹോസ്റ്റൽ സൗകര്യവും ഭക്ഷണവും ലഭ്യമാണ്. ഫോൺ: 8281133823, 9605365269.

പി.എൻ.എക്സ്. 1316/19

റേഷൻ സംവിധാനത്തെക്കുറിച്ച് പൊതുജനങ്ങൾക്കുള്ള പരാതികൾ ഉടനടി പരിഹരിക്കാൻ പൊതുവിതരണ കമ്മീഷണറേറ്റിൽ കോൾ സെന്റർ ആരംഭിച്ചു. പൊതുവിതരണ രംഗത്തെ സംശയങ്ങൾ പരാതികൾ എന്നിവ പരിഹരിക്കുന്നതിന് 1967 എന്ന ട്രോൾ ഫ്രീ നമ്പറിൽ എല്ലാ പ്രവർത്തിദിവസങ്ങളിലും രാവിലെ പത്തു മണി മുതൽ വൈകിട്ട് അഞ്ച് മണി വരെ വിളിക്കാം. പൊതുജനങ്ങൾ ഈ സൗകര്യം പരമാവധി പ്രയോജനപ്പെടുത്തണമെന്ന് സിവിൽ സപ്ലൈസ് ഡയറക്ടർ അറിയിച്ചു.

പി.എൻ.എക്സ്. 1325/19

ദേശീയ ഭക്ഷ്യ ഭദ്രതാനിയമപ്രകാരം തയ്യാറാക്കിയ മുൻഗണനാ പട്ടിക കുറ്റമറ്റതാക്കുന്നതിന്റെ ഭാഗമായി അനർഹർക്കെതിരെ കർശന നടപടികൾ സ്വീകരിക്കണമെന്ന് സിവിൽ സപ്ലൈസ് കമ്മീഷണർ അറിയിച്ചു. വസ്തുതകൾ മറച്ചുവച്ച് മുൻഗണനാ പട്ടികയിൽ കടന്നുകൂടിയ അനർഹർക്കെതിരെ നിയമനടപടികൾ സ്വീകരിക്കുന്നതിനും അനർഹമായി ഉൾപ്പെട്ട കാലയളവിലെ റേഷൻ വിഹിതത്തിന്റെ കമ്പോളവില ഈടാക്കുന്നതിനും എല്ലാ ജില്ലാ സപ്ലൈ ഓഫീസർമാർക്കും/താലൂക്ക് സപ്ലൈ ഓഫീസർമാർക്കും നിർദ്ദേശം നൽകി.

തിരുവനന്തപുരം ബാർട്ടൺഹിൽ ഗവൺമെന്റ് എഞ്ചിനീയറിംഗ് കോളേജിൽ കണ്ടിന്യൂയിംഗ് എഡ്യൂക്കേഷൻ സെന്ററിന്റെ ആഭിമുഖ്യത്തിൽ ടോട്ടൽ സ്റ്റേഷൻ സർവേ കോഴ്‌സ് മെയ് 20 മുതൽ ജൂൺ 10 വരെ നടത്തുന്നു.  യോഗ്യത പത്താം ക്ലാസ് ജയം.  ഫീസ് 7080 രൂപ (6000 + ജി.എസ്.റ്റി).  പ്രവേശനം ആഗ്രഹിക്കുന്നവർ കോളേജിലെ സി.സി.ഇ ഓഫീസിൽ ഫീസടച്ച് സീറ്റ് ഉറപ്പാക്കണം.  ഫോൺ: 7012884675, 8547111246.

പി.എൻ.എക്സ്. 1323/19