തദ്ദേശ സ്വയം ഭരണ സ്ഥാപനങ്ങള്‍, കുടുംബശ്രീ  എന്നിവയുടെ സഹകരണത്തോടെ നടപ്പാക്കുന്ന വിശപ്പുരഹിത കേരളം പദ്ധതിയ്ക്ക് ഇന്ന് കോട്ടയം ജില്ലയില്‍ തുടക്കമാകും.  സര്‍ക്കാരിന്റെ 1000 ദിനാഘോഷത്തോടനുബന്ധിച്ച് ഇന്ന് (ഫെബ്രുവരി 20) കോട്ടയം നാഗമ്പടം മൈതാനിയില്‍ നടക്കുന്ന ചടങ്ങില്‍ ഭക്ഷ്യ സിവില്‍ സപ്ലൈസ് മന്ത്രി പി. തിലോത്തമന്‍ പദ്ധതി ഉദ്ഘാടനം ചെയ്യും. ഒരു നേരത്തെ എങ്കിലും ആഹാരം കഴിക്കാനില്ലാത്തവര്‍ ഉണ്ടാകരുത് എന്ന ലക്ഷ്യത്തോടെയാണ് പദ്ധതി നടപ്പാക്കുന്നത്.   

ഒളവണ്ണ പഞ്ചായത്തില്‍  സ്വീകരിച്ച അപേക്ഷകളില്‍ റേഷന്‍ കാര്‍ഡ്, സര്‍ട്ടിഫിക്കറ്റുകളുടെ വിതരണം ഫെബ്രുവരി 21, 22 തീയ്യതികളില്‍  രാവിലെ 10 മുതല്‍ മൂന്ന് വരെ  കോഴിക്കോട് താലൂക്ക് സപ്ലൈ ഓഫീസില്‍ നടക്കും.    അപേക്ഷ നമ്പര്‍ 13055 മുതല്‍ 13600 വരെ ഫെബ്രുവരി 21 നും 13601 മുതല്‍ 14164 വരെ 22 നും വിതരണം ചെയ്യും. അപേക്ഷകര്‍ അന്നേ ദിവസം ആധാര്‍ കാര്‍ഡ്, റേഷന്‍ കാര്‍ഡ്, എന്നിവ സഹിതം ഹാജരാവണം.   ഓണ്‍ലൈന്‍     അപേക്ഷകളും മറ്റു പഞ്ചായത്തുകളിലെ അപേക്ഷകളും അന്നേദിവസം പരിഗണിക്കുന്നതല്ലെന്ന് താലൂക്ക് സപ്ലൈ ഓഫീസര്‍ അറിയിച്ചു.

കൊയിലാണ്ടി നഗരസഭ ബഡ്സ് റിഹാബിലിറ്റേഷന്‍ സെന്ററിന് വേണ്ടി സജ്ജമാക്കിയ വാഹനത്തിന്റെ ഫ്ളാഗ് ഓഫ് നഗരസഭ ചെയര്‍മാന്‍ അഡ്വ.കെ. സത്യന്‍ ഉദ്ഘാടനം ചെയ്തു. വൈസ് ചെയര്‍മാന്‍ വി.കെ.പത്മിനി അധ്യക്ഷത വഹിച്ചു. ചടങ്ങില്‍ വിദ്യാഭ്യാസ സ്റ്റാന്റിങ് കമ്മിറ്റി ചെയര്‍മാന്‍ കെ.ഷിജു, കൗണ്‍സിലര്‍മാരായ ഗോകുല്‍ദാസ് എന്‍.കെ, പി.എം. ബിജു, ഷിബിന്‍ കണ്ടത്തനാരി, നഗരസഭ പ്രൊജക്ട് ഓഫീസര്‍  എം.കെ.പ്രസാദ് എന്നിവര്‍ സംസാരിച്ചു.

അഗ്‌സ്ത്യമുഴി പള്ളോട്ടിഹില്‍ സ്‌കൂളിന് സമീപം കോഴിശ്ശേരി ബില്‍ഡിങില്‍ പ്രവര്‍ത്തനമാരംഭിച്ച മുക്കം ഇ.എസ്.ഐ ഡിസ്‌പെന്‍സറിയുടെ ഉദ്ഘാടനം ജോര്‍ജ്. എം. തോമസ് എം.എല്‍.എ നിര്‍വഹിച്ചു. മുക്കം മുനിസിപ്പല്‍ ചെയര്‍മാന്‍ കുഞ്ഞന്‍ മാസ്റ്റര്‍ അധ്യക്ഷത വഹിച്ച ചടങ്ങില്‍ ഇ.എസ്.ഐ കോര്‍പ്പറേഷന്‍ റീജിയണല്‍ ഡയറക്ടര്‍ സി.വി. ജോസഫ്, ഇ.എസ്.ഐ കോര്‍പ്പറേഷന്‍ റീജിയണല്‍ ബോര്‍ഡ് മെമ്പര്‍ എം.എ. അബ്ദുറഹിമാന്‍, മുക്കം മുനിസിപ്പാലിറ്റി കൗണ്‍സിലര്‍ പ്രജിത പ്രദീപ് തുടങ്ങിയവര്‍ സംസാരിച്ചു. ഇന്‍ഷൂറന്‍സ് മെഡിക്കല്‍ സര്‍വീസ് ഡയറക്ടര്‍ ഡോ.ആര്‍. അജിത സ്വാഗതവും വി.കെ. സുധീര്‍ നന്ദിയും പറഞ്ഞു.