ലോക മലമ്പനി ദിനാചരണത്തിന്റെ ജില്ലാ തല ഉദ്ഘാടനം തൃശൂർ ടൗൺഹാളിൽ ജില്ലാ കളക്ടർ ടിവി അനുപമ നിർവഹിച്ചു. 'മലമ്പനി ഇല്ലാതാക്കാം, തുടക്കം എന്നിൽ നിന്ന്' എന്നതാണ് ഈ വർഷത്തെ മലമ്പനി ദിനത്തിന്റെ മുദ്രാവാക്യം. കൈപ്പറമ്പ്, മുണ്ടൂർ, മുക്കാട്ടുകര, കട്ടിലപൂവം, ഒല്ലൂക്കര, മാടക്കത്തറ എന്നിവയാണ് ജില്ലയിൽ മലമ്പനി സാധ്യതാ പട്ടികയിൽ ഉള്ള പ്രദേശങ്ങൾ. ദിനാചരണത്തിന്റെ ഭാഗമായി തേക്കിൻകാട് മൈതാനത്തു നിന്നും ടൗൺ ഹാളിലേക്ക് ബൈക്ക്, ഓട്ടോ റാലിയും സംഘടിപ്പിച്ചു. തൃശൂർ ജില്ലാ മെഡിക്കൽ ഓഫീസർ ഡോ. കെ ജെ റീന അധ്യക്ഷത വഹിച്ചു. ഗവ. മെഡിക്കൽ കോളേജ് പ്രിൻസിപ്പൽ ഡോ. എം എ ആൻഡ്രൂസ് മുഖ്യാതിഥിയായി.

മൊബൈൽ ഫോൺ ടവറുകളുടെ റേഡിയേഷൻ അളവ് ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) കാലാകാലങ്ങളിൽ പരിശോധിച്ച് പ്രദേശവാസികളുടെ ആരോഗ്യത്തിന് ഹാനികരമല്ലെന്ന് ഉറപ്പാക്കണമെന്ന് സംസ്ഥാന മനുഷ്യാവകാശ കമ്മീഷൻ. കുന്നംകുളം നഗരസഭയിലെ നാലാം വാർഡിൽ സ്ഥാപിച്ചിരുന്ന റിലയൻസ് ജിയോ ഇൻഫോകോം കമ്പനിയുടെ ടവറിൽ നിന്നുള്ള റേഡിയേഷൻ അളവ് പരിശോധിക്കാനാണ് കമ്മീഷൻ ജുഡീഷ്യൽ അംഗം പി മോഹനദാസ് തൃശൂർ ജില്ലാ കളക്ർക്ക് നിർദ്ദേശം നൽകിയത്.

സംസ്ഥാന സർക്കാർ സ്ഥാപനമായ കേരള മീഡിയ അക്കാദമിയുടെ ഇൻസ്റ്റിറ്റ്യൂട്ട് ഓഫ് കമ്യൂണിക്കേഷന്റെ ജേർണലിസം & കമ്യൂണിക്കേഷൻ, പബ്ലിക് റിലേഷൻസ് & അഡ്വർടൈസിങ്ങ്, ടിവി ജേർണലിസം എന്നീ പോസ്റ്റ് ഗ്രാഡ്വേറ്റ് ഡിപ്ലോമ കോഴ്‌സുകൾക്ക് അപേക്ഷ ക്ഷണിച്ചു. 

ജില്ലാ എംപ്ലോയ്‌മെൻറ് എക്‌സ്‌ചേഞ്ചിലെ വൊക്കേഷനൽ ഗൈഡൻസ് വിഭാഗം മത്സര പരീക്ഷകൾക്ക് തയാറെടുക്കുന്ന ബിരുദധാരികളായ ഉദ്യോഗാർഥികൾക്കായി 30 ദിവസത്തെ സൗജന്യ പരിശീലനം നൽകുന്നു. താൽപര്യമുള്ളവർ ജില്ലാ എംപ്ലോയ്‌മെൻറ് എക്‌സ്‌ചേഞ്ചിൽ നേരിട്ടെത്തി രജിസ്റ്റർ ചെയ്യുക. അവസാന തീയതി: മെയ് ആറ്. സ്‌ക്രീനിങ് ടെസ്റ്റ് ഉണ്ടാവും.

ബേട്ടി ബച്ചാവോ ബേട്ടി പഠാവോ പദ്ധതി നടപ്പിലാക്കുന്നതുമായി ബന്ധപ്പെട്ട ജില്ലാതല ടാസ്‌ക്‌ഫോഴ്‌സ് യോഗം മെയ് ഏഴിന് വൈകീട്ട് നാല് മണിക്ക്  ജില്ലാ കളക്ടറുടെ ചേംബറിൽ ചേരുമെന്ന് പ്രോഗ്രാം ഓഫീസർ അറിയിച്ചു. 

തൃശൂർ വാട്ടർ വർക്ക്‌സ് സബ് ഡിവിഷൻ ആപ്പീസിലെ വെള്ളക്കരം അടക്കുന്നതിനുള്ള കൗണ്ടർ സാങ്കേതിക കാരണങ്ങളാൽ നിലവിലുണ്ടായിരുന്ന രണ്ട് ഷിഫ്റ്റുകൾ (8-2 ,2-6) മാറ്റി സാധാരണ ഓഫീസ് സമയമായ 10 മണി മുതൽ 5 മണി വരെയായി മാറ്റിയതായി അസി.എക്‌സിക്യുട്ടീവ് എഞ്ചിനീയർ അറിയിച്ചു. വെള്ളക്കരം അടക്കാൻ നിലവിലുള്ള ഓൺലെൻ സൗകര്യം തുടർന്നും വിനിയോഗിക്കാമെന്നും അറിയിച്ചു. 

ദേശീയ പാതക്ക്  കുറുകെ കോൺക്രീറ്റ് ഡെക്റ്റും പൈപ്പുകളും സ്ഥാപിച്ച് ജില്ലയിൽ കുടിവെള്ളം ലഭ്യമാക്കാൻ നടപടിയെടുക്കണമെന്ന് സംസ്ഥാന മനുഷ്യാവകാശ കമ്മീഷൻ. ജല അതോറിറ്റി മാനേജിംഗ് ഡയറക്ടർക്കാണ് കമ്മീഷൻ ജുഡീഷ്യൽ അംഗം പി മോഹനദാസ് നിർദ്ദേശം നൽകിയത്. പീച്ചി അണക്കെട്ടിൽ നിന്നും തൃശൂരിലേക്ക് വരുന്ന പ്രധാന കുടിവെള്ള പൈപ്പ് പൊട്ടി കുടിവെള്ളം നഷ്ടപ്പെട്ട സാഹചര്യം ഇല്ലാതാക്കണമെന്ന് കമ്മീഷൻ ആവശ്യപ്പെട്ടു.

ജില്ലയിലെ മഴക്കാല പൂർവ ശുചീകരണ പ്രവർത്തനങ്ങൾ മെയ് 10, 11, 12 തീയതികളിലായി നടക്കുമെന്ന് തദേശസ്വയംഭരണ വകുപ്പ് മന്ത്രി എ.സി. മൊയ്തീൻ അറിയിച്ചു. ടൗൺഹാളിൽ ശുചീകരണ പ്രവർത്തനങ്ങൾ സംബന്ധിച്ച് വിവിധ വകുപ്പുകളുടെ യോഗത്തിൽ സംസാരിക്കുകയായിരുന്നു മന്ത്രി. കൃഷിവകുപ്പ് മന്ത്രി അഡ്വ. വി.എസ്. സുനിൽകുമാർ അധ്യക്ഷനായി. തദ്ദേശസ്വയംഭരണ സ്ഥാപനങ്ങളിലെ വാർഡ് തലത്തിലാണ് ശുചീകരണ പ്രവർത്തനങ്ങൾ നടപ്പിലാക്കുക. തദ്ദേശസ്വയംഭരണ വകുപ്പിന്റെയും ആരോഗ്യവകുപ്പിന്റെയും നേതൃത്വത്തിൽ വിവിധ വകുപ്പുകളെ എകോപിപ്പിച്ചാണ് ശുചീകരണ യജ്ഞം. ക്ലബുകൾ, സംഘടനകൾ, രാഷ്ട്രീയ പ്രസ്ഥാനങ്ങൾ തുടങ്ങിയവയുടെ സഹകരണത്തോടെ ബഹുജനപങ്കാളിത്തം ഉറപ്പുവരുത്തും.

മെയ് അഞ്ചിന് നടക്കുന്ന നീറ്റ് പരീക്ഷയ്ക്കായി മെയ് നാല് രാത്രി ഏഴ് മണി മുതൽ അഞ്ച് ഉച്ച രണ്ട് മണി വരെ തൃശൂർ റെയിൽവേ സ്‌റ്റേഷനിലും കെ.എസ്.ആർ.ടി.സി ബസ്‌സ്റ്റാൻറിലും ഹെൽപ് ഡെസ്‌ക് ഏർപ്പെടുത്തിയതായി ജില്ലാ കളക്ടർ അറിയിച്ചു. മെയ് അഞ്ചിന് ഉച്ച രണ്ട് മുതൽ വൈകീട്ട് അഞ്ച് വരെയാണ് പരീക്ഷ. ജില്ലയിൽ 18 സെൻററുകളിലായി 11343 വിദ്യാർഥികൾ പരീക്ഷയെഴുതും.

തൃശൂർ പൂരം വെടിക്കെട്ടിന് കൂടുതൽ ശക്തമായ സുരക്ഷാ സന്നാഹങ്ങൾ ഏർപ്പെടുത്താൻ കൃഷി വകുപ്പ് മന്ത്രി വി.എസ് സുനിൽകുമാറിന്റെ അധ്യക്ഷതയിൽ കളക്ടറേറ്റ് കോൺഫറൻസ് ഹാളിൽ ചേർന്ന ഉദ്യോഗസ്ഥരുടെയും ദേവസ്വം അധികൃതരുടെയും സംയുക്ത യോഗം തീരുമാനിച്ചു. സുരക്ഷാക്രമീകരണങ്ങൾ നല്ല നിലയിൽ ഏർപ്പെടുത്താനുള്ള ആസൂത്രണം യോഗത്തിൽ നടത്തി. സുരക്ഷ ശക്തമാക്കുന്നതിന്റെ ഭാഗമായി പൂരത്തിന് ബാഗുകളുമായി വരരുതെന്ന് പൊതുജനങ്ങൾക്ക് നിർദേശം നൽകുമെന്ന് മന്ത്രി അറിയിച്ചു. നഗരത്തിൽ സി.സി.ടി.വി ക്യാമറകൾ കൂടുതലായി സ്ഥാപിക്കും. സുഗമമായി വെടിക്കെട്ട് കാണാനുള്ള എല്ലാ സൗകര്യവും ഏർപ്പെടുത്താൻ യോഗം തീരുമാനിച്ചു.