ടാറിംഗ് പ്രവര്‍ത്തികള്‍ നടക്കുന്നതിനാല്‍ വട്ടവിള ജംഗ്ഷന്‍ മുതല്‍ പിരായുംമൂട് ജംഗ്ഷന്‍ വരെയുള്ള പ്രദേശത്ത് ഫെബ്രുവരി 18 മുതല്‍ 28 വരെ ഗതാഗത നിയന്ത്രണമുണ്ടാകുമെന്ന് പൊതുമരാമത്ത് വകുപ്പ് അസിസ്റ്റന്റ് എഞ്ചിനീയര്‍ പ്രിമി എസ് അറിയിച്ചു. ഇതുവഴി പോകേണ്ട യാത്രക്കാര്‍ ഉദിയന്‍കുളങ്ങര-വട്ടവിള-വ്‌ളാത്താങ്കര വഴി പോകണമെന്നും അറിയിപ്പില്‍ പറയുന്നു.
(പി.ആര്‍.പി. 231/2019)

സുജലം സുഫലം കൃഷി മാര്‍ഗരേഖയുടെ മേഖലാ പരിശീലനം അതിയന്നൂര്‍ ബ്ലോക്ക് പഞ്ചായത്ത് ഹാളില്‍ സബ് കളക്ടര്‍ കെ. ഇമ്പശേഖര്‍ ഉദ്ഘാടനം ചെയ്തു.  കേരള ഇന്‍സ്റ്റിറ്റ്യൂട്ട് ഓഫ് ലോക്കല്‍ അഡ്മിനിസ്‌ട്രേഷന്റെയും ഹരിതകേരളം ജില്ലാ മിഷന്റെയും നേതൃത്വത്തിലാണ് പരിപാടി സംഘടിപ്പിച്ചത്.  
ഹരിതകേരളം മിഷനിലെ മൂന്നാമത്തെ ഉപദൗത്യമായ കൃഷി വികസനം 'സുജലം - സുഫലം' എന്ന പദ്ധതിയിലുള്‍പ്പെടുത്തിയാണ് നടപ്പാക്കുന്നത്.  ജൈവകൃഷി, നെല്‍കൃഷി, പച്ചക്കറി കൃഷി, മാലിന്യ സംസ്‌കരണം എന്നീ മേഖലകളിലാണ് വിവിധ പരിപാടികള്‍ സംഘടിപ്പിക്കുന്നത്.    

നെടുമങ്ങാട് ജില്ലാ ആശുപത്രിയിലെ താത്കാലിക നിയമനങ്ങള്‍ സംബന്ധിച്ച് ഉയര്‍ന്നിരിക്കുന്ന വിവാദം അടിസ്ഥാനരഹിതവും ഗൂഢലക്ഷ്യത്തോടെയുള്ളതുമാണെന്ന് ആശുപത്രി മാനേജ്‌മെന്റ് കമ്മിറ്റി. ആശുപത്രിയിലെ താത്കാലിക നിയമനങ്ങള്‍ നിയമപരവും വ്യവസ്ഥാപിത മാര്‍ഗത്തിലൂടെയുള്ളതുമാണെന്ന് എച്ച്.എം.സി. ചെയര്‍മാന്‍കൂടിയായ ജില്ലാ പഞ്ചായത്ത് പ്രസിഡന്റ് വി.കെ. മധു വാര്‍ത്താ സമ്മേളനത്തില്‍ പറഞ്ഞു.

** മികച്ച ജനപ്രതിനിധിക്കുള്ള പുരസ്‌കാരം ജില്ലാ പഞ്ചായത്ത് പ്രസിഡന്റ്
   വി.കെ. മധുവിന്
സംസ്ഥാനത്തെ ഏറ്റവും മികച്ച ജില്ലാ പഞ്ചായത്തിനുള്ള ഗ്രാമ സ്വരാജ് ട്രോഫി തിരുവനന്തപുരം ജില്ലാ പഞ്ചായത്തിന്. ഏറ്റവും മികച്ച ജനപ്രതിനിധിയായി തിരുവനന്തപുരം ജില്ലാ പഞ്ചായത്ത് പ്രസിഡന്റ് വി.കെ. മധു തെരഞ്ഞെടുക്കപ്പെട്ടു. തദ്ദേശ സ്വയംഭരണ മന്ത്രി എ.സി. മൊയ്തീനാണ് പുരസ്‌കാരങ്ങള്‍ പ്രഖ്യാപിച്ചത്.

വനിതാ വികസന കോര്‍പ്പറേഷന്‍ അന്താരാഷ്ട്ര വനിതാ ദിനാഘോഷത്തോടനുബന്ധിച്ച് 'സ്ത്രീയും സുരക്ഷയും' എന്ന വിഷയത്തില്‍ പോസ്റ്റര്‍ രചനാ മത്സരം സംഘടിപ്പിക്കുന്നു. 18 നും 35 നുമിടയില്‍ പ്രായമുള്ളവര്‍ക്ക് പങ്കെടുക്കാം. ഫെബ്രുവരി 24ന് മ്യൂസിയത്തുവെച്ചാണ് ജില്ലയിലെ മത്സരം. താത്പര്യമുള്ളവര്‍ക്ക് മത്സരവേദിയില്‍ ഉച്ചയ്ക്ക് 12 മുതല്‍ 1.30 വരെ സ്പോട്ട് രജിസ്ട്രേഷന്‍ ചെയ്യാം. കൂടുതല്‍ വിവരങ്ങള്‍ക്ക് 0471-2328257, 9496015006.
(പി.ആര്‍.പി. 246/2019)

കേരളത്തിന്റെ ടൂറിസം വ്യവസായത്തിന്റെ ഭാവി സാംസ്‌കാരിക വിനോദസഞ്ചാര രംഗത്താണെന്നു ടൂറിസം മന്ത്രി കടകംപള്ളി സുരേന്ദ്രന്‍. വിനോദസഞ്ചാര മേഖലയില്‍ സര്‍ക്കാര്‍ ആവിഷ്‌കരിക്കുന്ന പൈതൃക പദ്ധതികള്‍ ഇതു മുന്‍നിര്‍ത്തിയുള്ളതാണെന്നും മന്ത്രി പറഞ്ഞു. കേരള ഇന്‍സ്റ്റിറ്റ്യൂട്ട് ഓഫ് ടൂറിസം ആന്‍ഡ് ട്രാവല്‍ സ്റ്റഡീസിന്റെ (കിറ്റ്‌സ്) 30-ാം വാര്‍ഷികാഘോഷങ്ങളുടെ ഭാഗമായി സംഘടിപ്പിക്കുന്ന പ്രഭാഷണ പരമ്പര ഉദ്ഘാടനം ചെയ്യുകയായിരുന്നു അദ്ദേഹം.

കേന്ദ്രാവിഷ്‌കൃത പദ്ധതിയായ പ്രധാനമന്ത്രി ആവാസ് യോജന (ഗ്രാമീണ്‍) പദ്ധതിയിന്‍ കീഴില്‍ ഭവന നിര്‍മാണ ധനസഹായം ലഭിക്കുന്നതിന് വാസയോഗ്യമായ വീടില്ലാത്തതും കുറഞ്ഞത് രണ്ട് സെന്റ് സ്ഥലമെങ്കിലും വൈകശമുള്ളതുമായ കുടുംബങ്ങള്‍ക്ക് അപേക്ഷിക്കാം. എഴുതി തയാറാക്കിയ അപേക്ഷകള്‍ ആവശ്യമായ രേഖകള്‍ സഹിതം ഈ മാസം 25ന് മുമ്പ് അതത് ബ്ലോക്ക് ഡവലപ്‌മെന്റ് ഓഫീസര്‍ക്ക് നല്‍കണം. വനിതാ ഗുണഭോക്താവിന്റെ പേരിനാണ് അപേക്ഷിക്കേണ്ടത്. മുമ്പ് അപേക്ഷിച്ചവര്‍ വീണ്ടും അപേക്ഷിക്കേണ്ടതില്ല. 

                   (പിഎന്‍പി 613/19)