തൃശൂർ ജില്ലാ വനിതാ പ്രൊട്ടക്ഷൻ ഓഫീസിൽ കരാറടിസ്ഥാനത്തിൽ ക്ലാർക്ക് കം ഓഫീസ് അറ്റൻഡൻറിനെ നിയമിക്കുന്നതിന് അപേക്ഷ ക്ഷണിച്ചു. യോഗ്യത: പ്ലസ്ടു. ഗവ. അംഗീകൃത സ്ഥാപനത്തിൽനിന്നുള്ള ഡാറ്റ എൻട്രി സർട്ടിഫിക്കറ്റും വേർഡ് പ്രോസസിംഗ് പരിജ്ഞാനവും. മുൻപരിചയമുള്ളവർക്ക് മുൻഗണന.

പ്രായപരിധി: 18 വയസ്സ് മുതൽ 40 വയസ്സ് വരെ. പ്രതിമാസ ഓണറേറിയം: 10,000 രൂപ. അപേക്ഷ സ്വീകരിക്കുന്ന അവസാന തീയതി: മെയ് 18. അപേക്ഷാഫോമും കൂടുതൽ വിവരങ്ങളും ചെമ്പൂക്കാവിലെ ജില്ലാ വനിതാ പ്രൊട്ടക്ഷൻ ഓഫീസിൽ ലഭിക്കും. ഫോൺ: 8281999058.

യുവപ്രതിഭകളെ കണ്ടെത്തി പ്രോത്സാഹിപ്പിക്കുന്നതിനായുള്ള ആകാശവാണി അഖിലേന്ത്യാ സംഗീത മത്സരത്തിലേക്ക് അപേക്ഷിക്കാം. രണ്ട് ഘട്ടങ്ങളിലായാവും മത്സരങ്ങൾ നടത്തുക. ഒന്നാം ഘട്ടത്തിൽ പ്രാദേശിക നിലയങ്ങളിൽ പ്രാഥമിക മത്സരവും രണ്ടാം  ഘട്ടത്തിൽ ഇതിലെ വിജയികളെ പങ്കെടുപ്പിച്ചുകൊണ്ട് അവസാന മത്സരവും. ഹിന്ദുസ്ഥാനി സംഗീതം, കർണാടക സംഗീതം എന്നിവക്ക് യഥാക്രമം ഡൽഹി, ചെന്നൈ എന്നിവിടങ്ങളിലാവും അവസാന മത്സരം നടക്കുക.

തൃശൂർ പൂരദിവസമായ മെയ് 13ന് രാവിലെ ആറ് മണി മുതൽ 14ന് ഉച്ച തിരിഞ്ഞ് രണ്ട് മണി വരെ 32 മണിക്കൂർ തൃശൂർ കോർപറേഷൻ പരിധിയിൽ എല്ലാ തരത്തിലുള്ള മദ്യവും മറ്റ് ലഹരി വസ്തുക്കളും കൈവശം വെക്കുന്നതും ഉപയോഗിക്കുന്നതും വിൽക്കുന്നതും നിരോധിച്ച് ജില്ലാ കളക്ടർ ടി.വി. അനുപമ ഉത്തരവിട്ടു. പൂരം ദിവസങ്ങളിൽ നഗരത്തിലെത്തുന്ന സ്ത്രീകളും വൃദ്ധജനങ്ങളും കുട്ടികളും അടങ്ങുന്ന പൊതുജനങ്ങളുടെ സുരക്ഷയും സമാധാനവും ഉറപ്പുവരുത്തുന്നതിനാണിത്. ഈ ഉത്തരവ് നടപ്പിൽ വരുത്തുന്നുണ്ടെന്ന് പൊലീസ്, എക്‌സൈസ് വകുപ്പ് അധികൃതർ ഉറപ്പുവരുത്തേണ്ടതാണെന്നും വ്യക്തമാക്കി.

കേരള സർക്കാർ സ്ഥാപനമായ കെൽട്രോണിന്റെ വഴുതക്കാടുള്ള നോളജ് സെന്ററിൽ ഒരു വർഷം ദൈർഘ്യമുള്ള ലോജിസ്റ്റിക്‌സ് & സപ്ലൈചെയ്ൻ മാനേജ്‌മെന്റ് ഡിപ്ലോമ കോഴ്‌സിലേയ്ക്ക് പ്രവേശനത്തിന് അപേക്ഷ ക്ഷണിച്ചു. താൽപര്യമുള്ളവർ വിദ്യാഭ്യാസ യോഗ്യത തെളിയിക്കുന്ന രേഖകളുമായി തിരുവനന്തപുരം കെൽട്രോൺ നോളജ് സെന്ററിൽ നേരിട്ടെത്തി അപേക്ഷ സമർപ്പിക്കാം.ksg.keltron.in എന്ന വെബ്‌സൈറ്റിലും അപേക്ഷഫോം ലഭ്യമാണ്. അപേക്ഷ സമർപ്പിക്കേണ്ട അവസാന തീയതി മെയ് 30.

മഴക്കാല പൂർവ്വ ശുചീകരണത്തിന്റെ ഭാഗമായി തൃശൂർ നിയോജക മണ്ഡലത്തിലെ മുഴുവൻ പൊതു ഇടങ്ങളും സർക്കാർ ഓഫീസുകളും വിദ്യാലയങ്ങളും ശുചീകരിക്കുമെന്ന് നിയോജക മണ്ഡലം എംഎൽഎ കൂടിയായ കൃഷിവകുപ്പ് മന്ത്രി അഡ്വ. വി എസ് സുനിൽകുമാർ അറിയിച്ചു. ശുചീകരണ പ്രവർത്തനങ്ങൾക്കു മുന്നോടിയായി തൃശൂർ കോർപ്പറേഷൻ ഓഫീസിൽ മന്ത്രിയുടെ നേതൃത്വത്തിൽ മേയർ, ഡെപ്യൂട്ടി മേയർ, സ്ഥിരം സമിതി അധ്യക്ഷന്മാർ, കോർപ്പറേഷൻ കൗൺസിലർമാർ, വകുപ്പുതല ഉദ്യോഗസ്ഥർ എന്നിവരുടെ യോഗം ചേർന്നു. മെയ് 10, 11, 12 തിയതികളിലാണ് ശുചീകരണ പ്രവർത്തനം. ഡിവിഷൻ തലത്തിൽ കൗൺസിലർമാരുടെ നേതൃത്വത്തിൽ ചെയ്യേണ്ട ശുചീകരണ പ്രവർത്തനങ്ങളുടെ വിലയിരുത്തൽ നടത്തും.

തൃശൂർ പൂര ദിവസമായ മെയ് 13 ന് തൃശൂർ താലൂക്കിലെ എല്ലാ സർക്കാർ ഓഫീസുകൾക്കും വിദ്യാഭ്യാസ സ്ഥാപനങ്ങൾക്കും ജില്ലാ കളക്ടർ ടി വി അനുപമ അവധി പ്രഖ്യാപിച്ചു. മുൻ നിശ്ചയിച്ച പ്രകാരമുള്ള പൊതു പരീക്ഷകൾക്കും കേന്ദ്ര, സംസ്ഥാന, അർധ സർക്കാർ സ്ഥാപനങ്ങളിലേക്ക് നിയമനത്തിനായി നടത്തുന്ന പരീക്ഷകൾക്കും അവധി ബാധകമല്ല. 

തൃശൂർ പൂരത്തിനെത്തുന്നവർ ബാഗുകൾ പൂരപ്പറമ്പിലേക്ക് കൊണ്ടുവരുന്നതിന് കർശന നിയന്ത്രണമേർപ്പെടുത്തി. പൂരത്തിന് ശക്തമായ സുരക്ഷാ സംവിധാനങ്ങളും പൂരം കാണാനെത്തുന്നവർക്ക് മതിയായ സൗകര്യങ്ങളുമൊരുക്കും. പൂരദിവസത്തെ പ്രവർത്തനങ്ങൾക്കായി ജില്ലാ കളക്ടർ ടിവി അനുപമയുടെ അധ്യക്ഷതയിൽ ചേർന്ന ഉദ്യോഗസ്ഥതല യോഗത്തിലാണ് തീരുമാനം. എഡിഎം, ദുരന്തനിവാരണ ഡെപ്യൂട്ടി കളക്ടർ, ആർ ഡി ഒ, സിറ്റി പോലീസ് എന്നിവരുടെ നേതൃത്വത്തിൽ പൂരദിവസവും പിറ്റേന്നും കാര്യങ്ങൾ വിലയിരുത്തുകയും നിയന്ത്രിക്കുകയും ചെയ്യും. മെയ് 11 ന് സാമ്പിൾ വെടിക്കെട്ടു മുതൽ പൂരപ്പിറ്റേന്നത്തെ വെടിക്കെട്ടു വരെ കർശന നിയന്ത്രണത്തിൽ നടത്തും.

ടൂറിസം വകുപ്പിനു കീഴിലുള്ള തൃശൂർ ഗവ. ഫുഡ് ക്രാഫ്റ്റ് ഇൻസ്റ്റിറ്റ്യൂട്ടിൽ ഈ മാസം ആരംഭിക്കുന്ന 15 ദിവസത്തെ കുക്കറി പരിശീലന ക്ലാസ്സിന് അപേക്ഷിക്കാനുള്ള തിയതി മെയ് 13 വരെ നീട്ടി. താൽപര്യമുള്ളവർ പൂത്തോൾ വഞ്ചിക്കുളത്തിനടുത്തുള്ള ഗവ. ഫുഡ് ക്രാഫ്റ്റ് ഇൻസ്റ്റിറ്റ്യൂട്ടുമായി ബന്ധപ്പെടണം. ഫോൺ: 0487 2384253, 9847677549. 

മഴക്കാലപൂർവ ശുചീകരണം, പകർച്ചാവ്യാധി പ്രതിരോധം എന്നിവയുടെ ഭാഗമായി മെയ് 10, 11, 12 തീയതികളിൽ ജില്ലയിൽ നടത്തുന്ന ശുചീകരണ പ്രവർത്തനങ്ങളിൽ വിനോദ സഞ്ചാരവകുപ്പും ജില്ലാ ടൂറിസം പ്രൊമോഷൻ കൗൺസിലും സഹകരിക്കും.

തൃശൂർ ഭക്ഷ്യസുരക്ഷാ അസിസ്റ്റന്റ് കമീഷണറുടെ കാര്യാലയത്തിലേക്ക്, ക്വിക് റെസ്പോൺസ് ടീമിന്റെ സുഗമമായ പ്രവർത്തനത്തിന് 2019-20 കാലയളവിൽ കരാറടിസ്ഥാനത്തിൽ വാഹനം നൽകുന്നതിന് വാഹന ഉടമകളിൽനിന്ന് മുദ്രവെച്ച ദർഘാസുകൾ ക്ഷണിച്ചു. ദർഘാസ് സ്വീകരിക്കുന്ന അവസാന തീയതി: ജൂൺ 12 രാവിലെ 11 മണി.