നാനാതരം ഭക്ഷണം പാകം ചെയ്യുന്നതില്‍ പരിശീലകനായി കുക്കിനെയും ട്രാവല്‍ കണ്‍സള്‍ട്ടന്റിനേയും കിറ്റ്‌സ് നിയമിക്കുന്നു. ഹോട്ടല്‍ മാനേജ്‌മെന്റ് ബിരുദമോ മൂന്നു വര്‍ഷ ഡിപ്ലോമയോ ഉള്ളവര്‍ക്ക് മള്‍ട്ടികുസൈന്‍ കുക്ക് പരിശീലക തസ്തികയിലേക്കുള്ള അഭിമുഖത്തില്‍ പങ്കെടുക്കാം. ടൂറിസത്തില്‍ ബിരുദാനന്തര ബിരുദമുള്ളവര്‍ക്ക് ട്രാവല്‍ കണ്‍സള്‍ട്ടന്റ് പരിശീലക തസ്തികയിലെ അഭിമുഖത്തിനെത്താം. ഇരു തസ്തികകളിലും രണ്ടു വര്‍ഷത്തെ  പ്രവൃത്തി പരിചയം അഭികാമ്യം. തലശേരി ലോഗന്‍സ് റോഡിലെ റാണി പ്ലാസയില്‍ 22 ന് രാവിലെ 11 ന് ഇരു തസ്തികകളിലേക്കും അഭിമുഖം നടക്കും.

കൈമനം സാങ്കേതിക പരീക്ഷാ കണ്‍ട്രോളറുടെ കാര്യാലയത്തില്‍ അപ്രന്റീസ് ട്രെയിനികളെ തെരെഞ്ഞെടുക്കുന്നതിന് 20 ന് രാവിലെ 11 ന് അഭിമുഖം നടത്തും. കമ്പ്യൂട്ടര്‍ എഞ്ചിനീയറിംഗ്, കമ്പ്യൂട്ടര്‍ ഹാര്‍ഡ് വെയര്‍ മെയിന്റനന്‍സ്, കമ്പ്യൂട്ടര്‍ ആപ്ലിക്കേഷന്‍ ആന്റ് ബിസിനസ് മാനേജ്‌മെന്റ്, ഇലക്ട്രോണിക്‌സ് എന്നിവയിലൊന്നില്‍ മൂന്ന് വര്‍ഷ ഡിപ്ലോമ പരീക്ഷകള്‍ പാസ്സായവര്‍ അസ്സല്‍ സര്‍ട്ടിഫിക്കറ്റ്, ബയോഡേറ്റ എന്നിവ സഹിതം നേരിട്ടെത്തണം.

പി.എന്‍.എക്‌സ്.4896/17

നന്തന്‍കോട് സ്വരാജ്ഭവനില്‍ പ്രവര്‍ത്തിക്കുന്ന ഇന്‍ഫര്‍മേഷന്‍ കേരള മിഷന്‍ ഹെഡ് ഓഫീസില്‍ ലാപ്‌ടോപ്പ് കമ്പ്യൂട്ടറുകള്‍ വാങ്ങുന്നതിന് ഇ-ടെന്‍ഡറുകള്‍ ക്ഷണിച്ചു. ഡിസംബര്‍ ആറിനകം ടെന്‍ഡര്‍ നല്‍കണം. വിശദവിവരങ്ങള്‍ www.infokerala.org  യില്‍ ലഭിക്കും.

പി.എന്‍.എക്‌സ്.4895/17

മത്സ്യഫെഡിന്റെ ഔട്ട് ബോര്‍ഡ് മോട്ടോര്‍ വര്‍ക്ക്‌ഷോപ്പുകളില്‍ സൗജന്യ പരിശീലനത്തിന് ഐ.ടി.ഐ/വൊക്കേഷണല്‍ ഹയര്‍ സെക്കന്‍ഡറി (ഫിഷറീസ്) യോഗ്യതയുള്ളവരില്‍ നിന്ന് അപേക്ഷ ക്ഷണിച്ചു. വിശദവിവരങ്ങള്‍ക്ക് മ www.matsyafed.in 

പി.എന്‍.എക്‌സ്.4894/17

തിരുവനന്തപുരം ജില്ലയിലെ ബ്ലോക്ക്, മുനിസിപ്പാലിറ്റി, കോര്‍പ്പറേഷന്‍ മേഖലകളിലെ പട്ടികജാതി വികസന ഓഫീസുകളില്‍ പട്ടികജാതി പ്രൊമോട്ടര്‍മാരെ നിയമിക്കുന്നു. പട്ടികജാതി വിഭാഗത്തില്‍പെട്ട യുവതി യുവാക്കള്‍ ജാതി, വയസ്സ്, വിദ്യാഭ്യാസ യോഗ്യത, സ്ഥിരമായി താമസിക്കുന്ന പഞ്ചായത്ത്/മുനിസിപ്പാലിറ്റി/കോര്‍പ്പറേഷന്‍ എന്നിവ തെളിയിക്കുന്ന സാക്ഷ്യപ്പെടുത്തിയ സര്‍ട്ടിഫിക്കറ്റുകള്‍ സഹിതം 30 ന് വൈകുന്നേരം അഞ്ചുമണിക്ക് മുമ്പ് തിരുവനന്തപുരം ജില്ലാ പട്ടികജാതി വികസന ഓഫീസര്‍ക്ക് അപേക്ഷ നല്‍കണം. ഗ്രാമപഞ്ചായത്തുകളില്‍ ഓരോന്നും മുനിസിപ്പാലിറ്റികളില്‍ മൂന്നും കോര്‍പ്പറേഷനുകളില്‍ അഞ്ച് വീതവുമാണ് പ്രമോട്ടര്‍മാരെ നിയമിക്കുന്നത്.

പ്രമുഖ പരിസ്ഥിതി പ്രവര്‍ത്തകയും തൃശൂരിലെ നദീ ഗവേഷണ കേന്ദ്രത്തിന്റെ ഡയറക്ടറുമായ ഡോ. എ. ലതയുടെ നിര്യാണത്തില്‍ ജലവിഭവ വകുപ്പുമന്ത്രി മാത്യു ടി തോമസ് അനുശോചനം രേഖപ്പെടുത്തി. പുഴയെ പഠിച്ച ഡോ.  ലതയുടെ ശൈലി കേരളത്തില്‍ ഇപ്പോള്‍ നടന്നു വരുന്ന നദീ പുനഃരുദ്ധാരണ പ്രവര്‍ത്തനങ്ങള്‍ക്ക് ഏറെ പ്രചോദനമായിട്ടുണ്ട്. ചാലക്കുടി റിവര്‍ ഡൈവര്‍ഷന്‍ പദ്ധതിയിലെ ജലവിനിയോഗത്തിലെ മാറ്റങ്ങളും കാര്‍ഷിക രീതികളും സംബന്ധിച്ച് ഡോ. ലതയുടെ നേതൃത്വത്തില്‍ നടന്ന പഠനവും ഏറെ ശ്രദ്ധേയവും ജനോപകാരപ്രദവുമായിരുന്നുവെന്നും മന്ത്രി അനുശോചന സന്ദേശത്തില്‍ പറഞ്ഞു.

പി.എന്‍.എക്‌സ്.4892/17

ശബരിമല സന്നിധാനം ശുചീകരിക്കുന്നതിനുള്ള പുണ്യം പൂങ്കാവനം പ്രവര്‍ത്തനത്തില്‍ റാപ്പിഡ് ആക്ഷന്‍ ഫോഴ്‌സ്(ആര്‍എഎഫ്) സേനാംഗങ്ങള്‍ പങ്കാളികളായി. സന്നിധാനത്ത് സേവനം അനുഷ്ഠിക്കുന്ന 105-ാം ബറ്റാലിയന്‍ അംഗങ്ങളാണ് ഡെപ്യുട്ടി കമാന്‍ഡന്റ് ജി. ദിനേശ്, അസിസ്റ്റന്റ് കമാന്‍ഡന്റ് ഇളങ്കോവന്‍ എന്നിവരുടെ നേതൃത്വത്തില്‍ ശുചീകരണ പ്രവര്‍ത്തനം നടത്തിയത്. അറുപത് ആര്‍എഎഫ് അംഗങ്ങള്‍ ശുചീകരണത്തില്‍ പങ്കെടുത്തു. പതിനെട്ടാം പടിക്കു താഴെയുള്ള സ്ഥലം, അരവണ കൗണ്ടര്‍, സന്നിധാനം, വലിയ നടപ്പന്തല്‍ എന്നിവിടങ്ങളിലെ മാലിന്യങ്ങള്‍ നീക്കി. 

ശബരിമല സന്നിധാനത്തെ പൊടി വെള്ളമൊഴിച്ച് നീക്കുന്ന ഫയര്‍ഫോഴ്‌സിന്റെ പ്രവര്‍ത്തനം ശ്രദ്ധേയമാകുന്നു. സന്നിധാനത്ത് ചേര്‍ന്ന വകുപ്പുകളുടെ അവലോകന യോഗത്തില്‍ പൊടി നീക്കം ചെയ്യുന്നതിന് നടപടി സ്വീകരിക്കണമെന്ന് ദേവസ്വം മന്ത്രി കടകംപള്ളി സുരേന്ദ്രന്‍ ഫയര്‍ഫോഴ്‌സിന് നിര്‍ദേശം നല്‍കിയിരുന്നു.

വിവിധ പോയിന്റുകളിലെ ഹൈഡ്രന്റുകളില്‍ നിന്നുള്ള ജലമാണ് ഹോസ് മുഖേന പൊടി നീക്കി കഴുകി വൃത്തിയാക്കുന്നതിന് ഫയര്‍ഫോഴ്‌സ് ഉപയോഗിക്കുന്നത്. സന്നിധാനത്തെ വലിയ നടപ്പന്തല്‍, ആഴിയുടെ പരിസരം, മാളികപ്പുറം, പാണ്ടിത്താവളം, വലിയ നടപ്പന്തലിനു സമീപം കെഎസ്ഇബി പരിസരം എന്നിവിടങ്ങളിലെ പൊടി ഇന്നലെ കഴുകി നീക്കം ചെയ്തു. 

കണ്ണമ്പ്ര ഗ്രാമപഞ്ചായത്തില്‍ 500 ഏക്കര്‍ സ്ഥലത്ത്  വ്യാവസായിക പാര്‍ക്കും അഞ്ചര ഏക്കര്‍ സ്ഥലത്ത്  ക്രാഫ്റ്റ് വില്ലേജും നിര്‍മിക്കുമെന്ന് പിന്നാക്കക്ഷേമ-നിയമ-സാംസ്കാരിക വകുപ്പ് മന്ത്രി എ. കെ. ബാലന്‍ പറഞ്ഞു. തരൂര്‍ നിയോജകമണ്ഡലത്തില്‍ അടുത്ത സാമ്പത്തികവര്‍ഷം ബജറ്റിലുള്‍പ്പെടുത്തി നടപ്പിലാക്കേണ്ട പദ്ധതികളെക്കുറിച്ച് ചര്‍ച്ച ചെയ്യുന്നതിന് പെരിങ്ങോട്ടുകുറിശ്ശി ഗ്രാമപഞ്ചായത്ത് ഹാളില്‍ ചേര്‍ന്ന ജനപ്രതിനിധി-ഉദ്യോഗസ്ഥസംഗമം ഉദ്ഘാടനം ചെയ്തു സംസാരിക്കുകയായിരുന്നു മന്ത്രി. രണ്ടായിരം കോടി ചെലവ് പ്രതീക്ഷിക്കുന്ന വ്യാവസായിക പാര്‍ക്കിനായുള്ള ഭൂമി ഏറ്റെടുക്കുന്നതിന് സര്‍വെ നടപടികള്‍ പുരോഗമിക്കുകയാണ്.

ഭാരതത്തിന്‍റെ പ്രഥമ പ്രധാനമന്ത്രി പണ്ഡിറ്റ് ജവഹര്‍ലാല്‍ നെഹ്റു ഉറച്ച മതനിരപേക്ഷവാദിയും ജീവിതത്തില്‍ ഉടനീളം അടിയുറച്ച ശാസ്ത്രചിന്തയും യുക്തി ബോധവും പുലര്‍ത്തിയിരുന്ന വ്യക്തിയുമായിരുന്നുവെന്ന് എം.ബി രാജേഷ് എം.പി പറഞ്ഞു.  നെഹ്റു യുവകേന്ദ്ര സ്ഥാപക ദിനാഘോഷം ജില്ലാ കലക്ടറേറ്റ് സമ്മേളന ഹാളില്‍ നിര്‍വഹിച്ച് സംസാരിക്കുകയായിരുന്നു അദ്ദേഹം. രാഷ്ട്രീയപരമായും പ്രത്യയശാസ്ത്രപരമായും താന്‍ എതിര്‍ക്കുന്ന ഒരു വ്യക്തിയാണ് ജവഹര്‍ലാല്‍ നെഹ്റുവെങ്കിലും  ഓര്‍മ്മിക്കപ്പെടേണ്ടതായി അദ്ദേഹത്തിന്‍റെ പ്രവര്‍ത്തനങ്ങള്‍ ഒട്ടേറെയുണ്ടെന്ന് എം.പി പറഞ്ഞു.