ആലപ്പുഴ: ജില്ലയില്‍ ചെങ്കണ്ണ് രോഗം റിപ്പോര്‍ട്ട് ചെയ്യുന്നതിനാല്‍ പൊതുജനങ്ങള്‍ പ്രത്യേകം ശ്രദ്ധിക്കണമെന്ന് ജില്ല മെഡിക്കല്‍ ഓഫീസര്‍ ഡോ. ജമുന വര്‍ഗീസ് അറിയിച്ചു. ചെങ്കണ്ണ് വളരെ വേഗം പടരുന്ന രോഗമാണെങ്കിലും ശ്രദ്ധിച്ചാല്‍ തടയാന്‍ സാധിക്കും. ബാക്ടീരിയ, വൈറസ് എന്നിവ മൂലം ചെങ്കണ്ണ് ബാധിക്കാം. ചെങ്കണ്ണ് രോഗബാധ ശ്രദ്ധിക്കാതെയിരുന്നാല്‍ സങ്കീര്‍ണമാകാനും സാധ്യതയുണ്ട്. ചെങ്കണ്ണ് രോഗം ബാധിച്ചാല്‍ സ്വയം ചികിത്സ പാടില്ല. സര്‍ക്കാര്‍ ആശുപത്രികളില്‍ ചെങ്കണ്ണിനുള്ള ചികിത്സ ലഭ്യമാണ്.  

 എടവക ഗ്രാമപഞ്ചായത്ത് പെയിന്‍ ആന്റ് പാലിയേറ്റീവ് ക്ലിനിക്ക് കിടപ്പു രോഗികള്‍ക്കാവശ്യമായ ഉപകരണങ്ങള്‍ വിതരണം ചെയ്തു. ഗ്രാമപഞ്ചായത്ത് പ്രസിഡന്റ് എച്ച്.ബി പ്രദീപ് വിതരണോദ്ഘാടനം നിര്‍വഹിച്ചു. എടവക പെയിന്‍ ആന്റ് പാലിയേറ്റീവ് ക്ലിനിക്കില്‍ നടന്ന ചടങ്ങില്‍ ആരോഗ്യ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ ശിഹാബ് അയാത്ത് അധ്യക്ഷത വഹിച്ചു.

ആലപ്പുഴ: ഗവണ്‍മെന്റ് ടി.ഡി. മെഡിക്കല്‍ കോളജിലെ അനസ്‌തേഷ്യോളജി വിഭാഗത്തിലേക്ക് പിന്‍ ഇന്‍ഡക്സ് ടൈപ്പ് ഓക്‌സിജന്‍, നൈട്രസ് ഓക്‌സൈഡ് സിലിണ്ടറുകള്‍ എന്നിവ വാങ്ങുന്നതിന് ക്വട്ടേഷന്‍ ക്ഷണിച്ചു. ഓഗസ്റ്റ് 18-ന് ഉച്ചക്ക് 12 വരെ പ്രിന്‍സിപ്പാള്‍, ഗവ.ടി.ഡി. മെഡിക്കല്‍ കോളജ്, ആലപ്പുഴ- 688 005 എന്ന വിലാസത്തില്‍ ക്വട്ടേഷന്‍ നല്‍കാം. ഫോണ്‍: 0477 2282015.

ആലപ്പുഴ: ചെങ്ങന്നൂര്‍ സെന്‍ട്രല്‍ ഹാച്ചറി പരിശീലന കേന്ദ്രത്തിന്റെ ആഭിമുഖ്യത്തില്‍ കര്‍ഷകര്‍ക്കായി പരിശീലന പരിപാടി സംഘടിപ്പിക്കുന്നു. ഓഗസ്റ്റ് 10,11 തീയതികളില്‍ തീറ്റപുല്‍കൃഷി, 17,18 തീയതികളില്‍ ഇറച്ചിക്കോഴി വളര്‍ത്തല്‍, 16-ന് കാടവളര്‍ത്തല്‍  എന്നിവയിലാണ് പരിശീലനം. താത്പര്യമുള്ളവര്‍ മുന്‍കൂട്ടി പേര് രജിസ്റ്റര്‍ ചെയ്യണം. ഫോണ്‍: 0479-2452277.

സംസ്ഥാന കൈത്തറി വസ്ത്ര ഡയറക്ടറേറ്റിന്റേയും വയനാട് ജില്ലാ വ്യവസായ കേന്ദ്രത്തിന്റെയും ആഭിമുഖ്യത്തില്‍ ഓണത്തോടനുബന്ധിച്ച് ജില്ലയിലെ സര്‍ക്കാര്‍/അര്‍ദ്ധ സര്‍ക്കാര്‍ സ്ഥാപനങ്ങളിലെ ജീവനക്കാര്‍ക്കും കൈത്തറി തുണിത്തരങ്ങള്‍ വാങ്ങുന്നതിന് ആഗസ്റ്റ് 17 മുതല്‍ 22 വരെ ആറ്  ദിവസങ്ങളിലായി ജില്ലാ/താലൂക്ക് കേന്ദ്രങ്ങളില്‍ മൊബൈല്‍ കൈത്തറി വസ്ത്ര വിപണന മേള സംഘടിപ്പിക്കും. ആഗസ്റ്റ് 17 ന് രാവിലെ 9.30 ന് കളക്ട്രേറ്റ് പരിസരത്ത് ജില്ലാ പഞ്ചായത്ത് പ്രസിഡന്റ് സംഷാദ് മരയ്ക്കാര്‍ ഫ്ളാഗ് ഓഫ് ചെയ്യും. ജില്ലാ കളക്ടര്‍ ഡോ. രേണു രാജ് വിതരണോദ്ഘാടനം നിര്‍വഹിക്കും.

ആലപ്പുഴ: തദ്ദേശ സ്വയംഭരണ സ്ഥാപന ഉപതിരഞ്ഞെടുപ്പിനോടനുബന്ധിച്ച് തലവടി ഗ്രാമപഞ്ചായത്തിലെ വാര്‍ഡ് 13 (കോടമ്പനാടി)യില്‍ ഓഗസ്റ്റ് എട്ടിന് വൈകിട്ട് ആറു മുതല്‍ 10-ന് വൈകിട്ട് ആറു വരെയും വോട്ടെണ്ണല്‍ ദിനമായ 11-ന് എടത്വ സെന്റ് അലോഷ്യസ് കോളേജിന് രണ്ട് കിലോമീറ്റര്‍ ചുറ്റളവിലും സമ്പൂര്‍ണ്ണ മദ്യ നിരോധനം ഏര്‍പ്പെടുത്തി ജില്ലാ കളക്ടര്‍ ഉത്തരവായി. തുടര്‍ നടപടികള്‍ സ്വീകരിക്കുന്നതിന് ബന്ധപ്പെട്ട പോലീസ്, എക്‌സൈസ് ഉദ്യോഗസ്ഥരെ ചുമതലപ്പെടുത്തി.

 ജില്ലാ ശിശുക്ഷേമ സമിതിയുടെ ആഭിമുഖ്യത്തില്‍ മേപ്പാടി ഗവ. ഹയര്‍ സെക്കണ്ടറി സ്‌കൂളില്‍ ലഹരി വിരുദ്ധ ബോധവല്‍ക്കരണ ക്ലാസ് നടത്തി. ലഹരിക്കെതിരെ പടയണി ചേരാം എന്ന പരിപടിയുടെ ഭാഗമായാണ് ക്ലാസ്സ് സംഘടിപ്പിച്ചത്. ഫിലിപ്പ് മമ്പാട് ക്ലാസ്സെ് നയിച്ചു. പി.ടി.എ പ്രസിഡന്റ് പി.ടി മണ്‍സൂര്‍ ഉദ്ഘാടനം ചെയ്തു. ശിശുക്ഷേമ സമിതി ജില്ലാ സെക്രട്ടറി കെ. രാജന്‍ അധ്യക്ഷത വഹിച്ചു. ശിശുക്ഷേമ സമിതി ജോയിന്റ് സെക്രട്ടറി സി.കെ ഷംസുദീന്‍, എക്സിക്യൂട്ടീവ് അംഗങ്ങളായ പി.ആര്‍ ഗിരിനാഥന്‍, ഗീത രാജഗോപാലന്‍, ഹെഡ് മാസ്റ്റര്‍ എം.പി ദിലീപ് കുമാര്‍, പി.ടി.എ വൈസ് പ്രസിഡന്റ് ടി.

 പി.എസ്.സി എന്‍.സി.എ ഹിന്ദു നാടാര്‍ വിഭാഗത്തിനായി സംവരണം ചെയ്ത ജില്ലയിലെ വിദ്യാഭ്യാസ വകുപ്പില്‍ എല്‍.പി.എസ്.എ മലയാളം (കാറ്റഗറി.നം. 318/20) തസ്തികയ്ക്കായി ജനുവരി 18 ന് നിലവില്‍ വന്ന 29/2023/എസ്.എസ്.ഐ.ഐ.ഐ നമ്പര്‍ റാങ്ക് പട്ടിക ലിസ്റ്റിലെ ഏക ഉദ്യോഗാര്‍ത്ഥിയെ ഫെബ്രുവരി 8 ന് നിയമന ശിപാര്‍ശ ചെയ്തുകഴിഞ്ഞതിനാല്‍ നിലവിലില്ലാതായതായി പബ്ലിക് സര്‍വ്വീസ് കമ്മീഷന്‍ ജില്ലാ ഓഫീസര്‍ അറിയിച്ചു.

ആലപ്പുഴ: കുമ്പളം- തുറവൂര്‍ റെയില്‍വേ സ്റ്റേഷനുകള്‍ക്കിടയിലുള്ള ലെവല്‍ ക്രോസ് നമ്പര്‍ 13 (വെളുത്തുള്ളി കായല്‍ ഗേറ്റ്) ഓഗസ്റ്റ് പത്തിന് രാവിലെ എട്ടു മുതല്‍ 12-ന് വൈകിട്ട് ആറുവരെ  അറ്റകുറ്റപ്പണികള്‍ക്കായി അടച്ചിടും. വാഹനങ്ങള്‍ വാഴത്തോപ്പില്‍ ഗേറ്റ് (നമ്പര്‍ 12) വഴി പോകണം.

പനമരം സാമൂഹിക ആരോഗ്യ കേന്ദ്രത്തില്‍ താത്കാലികാടിസ്ഥാനത്തില്‍ ലാബ് അസിസ്റ്റന്റ് തസ്തികയില്‍ നിയമനം നടത്തുന്നു. വി.എച്ച്.എസി (എം.എല്‍.ടി) യോഗ്യതയുള്ള ഉദ്യോഗാര്‍ത്ഥികള്‍ യോഗ്യത സര്‍ട്ടിഫിക്കറ്റുകളുമായി ആഗസ്റ്റ് 14 ന് ഉച്ചയ്ക്ക് 2.30 ന് പനമരം ബ്ലോക്ക് പഞ്ചായത്ത് ഹാളില്‍ കൂടിക്കാഴ്ചക്ക് എത്തിച്ചേരണം.