ലോക്‌സഭാ തിരഞ്ഞെടുപ്പ് ബോധവല്‍ക്കരണം ലക്ഷ്യമിട്ട്  അതിഥി തൊഴിലാളികള്‍ക്കായി ഹിന്ദിയിലുള്ള ബോധവല്‍ക്കരണ ക്ലാസ് സംഘടിപ്പിച്ചു. പട്ടികജാതി വകുപ്പിലെ ഉദ്യോഗസ്ഥൻ എം ലിവിങ്സ്റ്റൻ  ക്ലാസ്സ്‌ നയിച്ചു.

കാൽപന്ത് കളിയിലെ ഇളം കുരുന്നുകളുടെ പാഠശാലയായ തൊടുപുഴ സോക്കർ സ്കൂൾ മൈതാനത്തെ  മണൽ തരികൾക്ക് ചൂടുപിടിച്ച നിമിഷങ്ങൾ. ലോക്‌സഭാ തിരഞ്ഞെടുപ്പ് ആവേശത്തിൽ  കളക്ടേഴ്സ് ഇലവനും ഇടുക്കി ജില്ലാ പോലീസ് ടീമും മാറ്റുരച്ചപ്പോൾ കാണികൾക്ക്  കളിയാവേശത്തിൻ്റെ ഉത്സവ ലഹരി. നാൽപത് മിനിട്ട് നീണ്ട കനത്ത പോരാട്ടത്തിൽ ഒന്നിനെതിരെ രണ്ട് ഗോളുകൾക്ക് ജില്ലാ പൊലീസ് ടീം കളക്ടേഴ്സ് ഇലവനെ പരാജയപ്പെടുത്തി.

ലോക്സഭാ തിരഞ്ഞെടുപ്പ് ബോധവല്‍ക്കരണം ലക്ഷ്യമിട്ട്  ഇടുക്കി സബ് കളക്ടര്‍ ഡോ. അരുണ്‍ എസ്. നായരുടെ നേതൃത്വത്തില്‍ അതിഥി തൊഴിലാളികള്‍ക്കായി ക്ലാസ്സ് സംഘടിപ്പിക്കുന്നു. ഇന്ന് (21) രാവിലെ 11 മണിക്ക് കരിങ്കുന്നത്തുള്ള ആതിര പ്ലൈവുഡ് എന്ന സ്ഥാപനത്തില്‍ വെച്ചാണ് പരിപാടി . തൊഴില്‍ വകുപ്പിന്റെ സഹകരണത്തോടെ സഘടിപ്പിക്കുന്ന പരിപാടിയില്‍ ജില്ലയിലെ എല്ലാ അതിഥി തൊഴിലാളികളുടെയും  പങ്കാളിത്തം ഉറപ്പുവരുത്തുകയാണ്  ലക്ഷ്യം. ഹിന്ദിയില്‍ ആയിരിക്കും ക്ലാസ്സ്. ഹരിത തിരഞ്ഞെടുപ്പ്, തിരഞ്ഞെടുപ്പ് എത്തിക്‌സ്  എന്നിവയാകും വിഷയങ്ങള്‍.

ഭിന്നശേഷിക്കാര്‍ക്കും 85ന് മുകളില്‍ പ്രായമുള്ള വയോജനങ്ങള്‍ക്കും വീട്ടില്‍ വോട്ട് ചെയ്യാന്‍ സൗകര്യമൊരുക്കുന്ന ഹോം വോട്ടിംഗിന്റെ ഒന്നാം ഘട്ടം ഇടുക്കി മണ്ഡലത്തില്‍  അവസാനിച്ചപ്പോള്‍ ആകെ വോട്ട് ചെയ്തവരുടെ എണ്ണം 6742 .  ആദ്യഘട്ടത്തില്‍ വോട്ട് ചെയ്യാന്‍ സാധിക്കാത്തവര്‍ക്ക് ഏപ്രില്‍ 25 വരെയുള്ള രണ്ടാം ഘട്ടത്തില്‍ വോട്ട് രേഖപ്പെടുത്താന്‍ അവസരം ലഭിക്കും.

ഇടുക്കി ജില്ലാ കളക്ടര്‍ ഷീബാ ജോര്‍ജ് തപാല്‍ വോട്ട് രേഖപ്പെടുത്തി.  കോട്ടയം ലോക് സഭാ മണ്ഡലത്തില്‍ ഉള്‍പ്പെടുന്ന പാലാ നിയോജകമണ്ഡലം മേലുകാവ്  38 ആം നമ്പര്‍ ബേക്കര്‍ കോളേജ് ബൂത്തിലെ 863 ആം വോട്ടറാണ് കളക്ടര്‍. കുയിലിമല സിവില്‍ സ്റ്റേഷനിലെ  സമ്പാദ്യഭവനില്‍ സജ്ജീകരിച്ച വോട്ടിങ്് ഫെസിലിറ്റേഷന്‍ സെന്ററിലാണ് കളക്ടര്‍ തപാല്‍ വോട്ട് നിര്‍വഹിച്ചത്. രാജ്യത്തിന്റെ പുരോഗതിക്കായി  ജില്ലയിലെ എല്ലാ വോട്ടര്‍മാരും സമ്മതിദാനാവകാശം നിര്‍വഹിക്കണമെന്ന് കളക്ടര്‍ അഭ്യര്‍ത്ഥിച്ചു.

തിരഞ്ഞെടുപ്പ് ബോധവൽക്കരണ പരിപാടിയായ സ്വീപിന്റെ ഭാഗമായി മലപ്പുറം ജില്ലാ ഭരണകൂടവും ജില്ലാ സ്പോർട്സ് കൗൺസിലും ചേര്‍ന്ന് സൗഹൃദ ഫുട്ബോൾ മത്സരം സംഘടിപ്പിച്ചു. എടപ്പാൾ ഗവൺമെൻ്റ് ഹൈസ്കൂൾ സ്റ്റേഡിയത്തിൽ നടന്ന മത്സരത്തിൽ സിവിൽ സർവീസ് മലപ്പുറവും ഇ.എസ്.എ.സി എടപ്പാൾ ടീമും മാറ്റുരച്ചു. മത്സരത്തിൽ എതിരില്ലാത്ത രണ്ട് ഗോളുകൾക്ക് സിവിൽ സർവീസ് ടീം ജേതാക്കളായി. സിവിൽ സർവീസ് ടീമിന് വേണ്ടി മുൻ സന്തോഷ് ട്രോഫി താരം രഞ്ജിത്താണ് ഇരു ഗോളുകളും നേടിയത്. മത്സരത്തിന് മുന്നോടിയായി തിരഞ്ഞെടുപ്പുമായി ബന്ധപ്പെട്ട പ്രതിജ്ഞ ജില്ലാ കളക്ടർ വി.ആർ വിനോദ് ചൊല്ലിക്കൊടുത്തു.

ലോക്‍സഭാ തിരഞ്ഞെടുപ്പിന്റെ ഭാഗമായി മാധ്യമപ്രവര്‍ത്തകര്‍ ഉള്‍പ്പടെയുള്ള അവശ്യ സര്‍വ്വീസ് വിഭാഗത്തില്‍ പെട്ട (എ.വി.ഇ.എസ്) ജീവനക്കാര്‍ക്ക് പോസ്റ്റല്‍ വോട്ട് രേഖപ്പെടുത്താന്‍  ഇന്നു (ഏപ്രില്‍ 22) കൂടി അവസരം.

പൂക്കോട്ടുംപാടം- മൈലാടി പാലം റോഡില്‍ നരിപൊയില്‍ മുതല്‍ കൂറ്റമ്പാറ വരെയുള്ള ഭാഗത്തും അഞ്ചാം മൈല്‍, മുക്കട്ട ജങ്ഷന്‍ എന്നിവിടങ്ങളിലും ടാറിങ് പ്രവൃത്തികള്‍ നടക്കുന്നതിനാല്‍ ഇന്ന് (ഏപ്രില്‍ 22) മുതല്‍ ബുധനാഴ്ച (ഏപ്രില്‍ 24) രാത്രി ഒമ്പതു മണി വരെ ഇതു വഴിയുള്ള ഗതാഗതത്തിന് നിയന്ത്രണം ഉണ്ടായിരിക്കുമെന്ന് കെ.ആര്‍.എഫ്.ബി- പി.എം.യു എക്സിക്യുട്ടീവ് എഞ്ചിനീയര്‍ അറിയിച്ചു.