ഫോക്കസ് ബ്ലോക്ക് സംസ്ഥാനതല ഉദ്ഘാടനവും ക്ഷീരവികസന വകുപ്പ് , ക്ഷീരകര്‍ഷക ക്ഷേമനിധി ബോര്‍ഡ് എന്നിവയുടെ വിവിധ അവാര്‍ഡുകളുടെ വിതരണവും ഇന്ന് (മാര്‍ച്ച് 14 ) തൊടുപുഴ റിവര്‍ വ്യൂ ഹാളില്‍ നടക്കും. ക്ഷീരവികസന, മൃഗസംരക്ഷണവകുപ്പ് മന്ത്രി ജെ. ചിഞ്ചുറാണി ഉദ്ഘാടനം നിര്‍വ്വഹിക്കും. ജലവിഭവവകുപ്പ് മന്ത്രി റോഷി അഗസ്റ്റിന്‍ അധ്യക്ഷത വഹിക്കും. 

കുറുവേലി അട്ടോളി ഇല്ലം വി.സി.ബി കം ബ്രിഡ്‌ജ്‌ - പ്രവൃത്തി ഉദ്ഘാടനം 
ടി ഐ മധുസൂദനൻ എംഎൽഎ നിർവ്വഹിച്ചു. കാങ്കോൽ - ആലപ്പടമ്പ് പഞ്ചായത്ത് പ്രസിഡൻ്റ്  എം വി സുനിൽകുമാർ അധ്യക്ഷനായി.  പഞ്ചായത്ത് അംഗം ബാബു കുര്യാക്കോസ്,പി ശശീധരൻ, വി വി ഭാസ്കരൻ,എൻ കെ രാജൻ, ടി എം സതീശൻ എന്നിവർ സംസാരിച്ചു. 
2023- 24 വർഷത്തെ സംസ്ഥാന ബജറ്റിൽ എംഎൽഎ യുടെ നിർദേശപ്രകാരം ഇതിനാവശ്യമായ ഒരു കോടി രൂപ നീക്കിവെച്ചിരിന്നു.
കേരള സർക്കാർ മൈനർ ഇറിഗേഷൻ വകുപ്പിനാണ് നിർവ്വഹണ ചുമതല.

പാപ്പിനിശ്ശേരിയിൽ നടപ്പിലാക്കിയ ഗതാഗത പരിഷ്കരണം വിജയകരമെന്ന് കെ.വി സുമേഷ് എം.എൽ.എയുടെ സാന്നിധ്യത്തിൽ ഗ്രാമപഞ്ചായത്ത് പ്രസിഡൻ്റ് എ.വി സുശീലയുടെ അധ്യക്ഷതയിൽ ചേർന്ന അവലോകന യോഗം വിലയിരുത്തി.   വളപട്ടണം പാലം- പഴയങ്ങാടി - പാപ്പിനിശ്ശേരി റോഡിലുണ്ടായിരുന്ന  ഗതാഗതകുരുക്ക് പൂർണമായും ഒഴിവാക്കാനായി.  

ജില്ലാ സപ്ലൈ ഓഫീസിന്റെ ആഭിമുഖ്യത്തില്‍ ഉപഭോക്ത്യ ബോധവത്കരണ പരിപാടികളുടെ ഭാഗമായി ജില്ലയിലെ ഹൈസ്‌കൂള്‍, ഹയര്‍സെക്കന്ററി  വിദ്യാര്‍ഥികള്‍ക്കായി ക്വിസ് മല്‍സരവും ബോധവത്കരണ ക്ലാസും നടത്തി. കതിരൂര്‍ ഗവ.ഹയര്‍ സെക്കന്ററി സ്‌കൂളില്‍ ഗ്രാമപഞ്ചായത്ത് വൈസ് പ്രസിഡന്റ് സനില പി രാജ് ഉദ്ഘാടനം ചെയ്തു. ക്വിസ് മല്‍സരത്തില്‍ കൂത്തുപറമ്പ് എച്ച് എസ് എസിലെ ഒമ്പതാം ക്ലാസ് വിദ്യാര്‍ഥിനി ഇ ശ്രീലക്ഷ്മി ഒന്നാമതെത്തി. ജി.എച്ച് എസ് എസ് പാട്യം പത്താം ക്ലാസ് വിദ്യാര്‍ഥി എ വേദിക രണ്ടാം സ്ഥാനവും മമ്പറം എച്ച് എസ് എസിലെ ടി അദ്വൈത് സുഷജ് മൂന്നാം സ്ഥാനവും കരസ്ഥമാക്കി. ജില്ലാ സപ്ലൈ ഓഫീസര്‍ ജി സുമ അധ്യക്ഷയായി.

ജില്ലയിൽ വിദ്യാഭ്യാസ വകുപ്പിൽ തയ്യൽ ടീച്ചർ (ഹൈസ്‌കൂൾ) ഫസ്റ്റ് എൻസിഎ-മുസ്ലിം (കാറ്റഗറി നമ്പർ -463/2023), ഫസ്റ്റ് എൻസിഎ-എസ്.സി (കാറ്റഗറി നമ്പർ-464/2023) തസ്തികകളുടെ തെരഞ്ഞെടുപ്പിനായി പ്രസിദ്ധീകരിച്ച ചുരുക്കപ്പട്ടികയിൽ ഉൾപ്പെടുകയും ഒറ്റത്തവണ പ്രമാണ പരിശോധന പൂർത്തിയാക്കുകയും ചെയ്തിട്ടുള്ള ഉദ്യോഗാർഥികളുടെ അഭിമുഖം മാർച്ച് 28 ന് പി.എസ്.സി കണ്ണൂർ ജില്ലാ ഓഫീസിൽ നടത്തും. ഇന്റർവ്യൂവിൽ ഉൾപ്പെട്ട ഉദ്യോഗാർഥികൾക്ക് പ്രൊഫൈൽ മെസേജ്, എസ്.എം.എസ് എന്നിവ അയച്ചിട്ടുണ്ട്.

കേരള സ്റ്റേറ്റ് റൂട്രോണിക്സ് സർട്ടിഫിക്കറ്റോടുകൂടി ഒരു വർഷം, ആറ് മാസം, മൂന്ന് മാസം ദൈർഘ്യമുള്ള ലോജിസ്റ്റിക്സ് ആന്റ് സപ്ലൈ ചെയിൻ മാനേജ്മെന്റ് കോഴ്‌സുകളിലേക്ക് അപേക്ഷ ക്ഷണിച്ചു. തിരുവനന്തപുരം, ആറ്റിങ്ങൽ എന്നിവിടങ്ങളിലെ അംഗീകൃത പഠന കേന്ദ്രങ്ങളിലാണ് റെഗുലർ, പാർടൈം ബാച്ചുകളിലായി ക്ലാസുകൾ നടത്തുക. എസ്.എസ്.എൽസി, പ്ലസ് ടു, ഡിഗ്രി യോഗ്യതയുള്ളവർക്ക് അപേക്ഷിക്കാം. ഫോൺ- 7994926081

2023 മാർച്ചിൽ നടന്ന എസ്.എസ്.എൽ.സി പരീക്ഷയിൽ മുഴുവൻ വിഷയങ്ങൾക്കും എ പ്ലസ് നേടിയ പൊതുവിദ്യാലയങ്ങളിൽ പഠിക്കുന്ന അധ്യാപകരുടെ മക്കൾക്കുള്ള സ്‌കോളർഷിപ്പ് തുക ഇനിയും കൈപ്പറ്റാത്തവർ മാർച്ച് 20നകം കൈപ്പറ്റണം. ആധാർ, എസ്.എസ്.എൽ.സി മാർക്ക് ലിസ്റ്റ് എന്നിവയുടെ പകർപ്പുമായി ജില്ലാ വിദ്യാഭ്യാസ ഓഫീസിൽ നിന്നുമാണ് തുക കൈപ്പറ്റേണ്ടത്. അല്ലാത്ത പക്ഷം ഇനിയൊരു അറിയിപ്പില്ലാതെ തുക തിരിച്ചടയ്ക്കുമെന്ന് ജില്ലാ വിദ്യാഭ്യാസ ഓഫീസർ അറിയിച്ചു.

നാഷണൽ സ്റ്റാറ്റിസ്റ്റിക്സ് ഓഫീസ് ഫീൽഡ് ഓപ്പറേഷൻസ് ഡിവിഷൻ കേരള നോർത്ത് റീജ്യണൽ ഓഫീസ് ദേശീയ സാമ്പിൾ സർവെയുടെ 75 വർഷങ്ങൾ എന്ന പേരിൽ വിവിധ പരിപാടികൾ സംഘടിപ്പിക്കുന്നു. പെരുവയൽ ഗ്രാമപഞ്ചായത്ത് സി എച്ച് മുഹമ്മദ് കോയ മെമ്മോറിയൽ ഹാളിൽ നടന്ന 'നാഷണൽ സാമ്പിൾ സർവ്വേ: ചരിത്രവും പ്രാധാന്യവും സർവ്വേ പ്രയോജനങ്ങളും' ക്യാമ്പയിനിൽ ആശാ പ്രവർത്തകർ ഉൾപ്പെടെ നൂറിലധികം പേർ പങ്കെടുത്തു. ക്യാമ്പയിനിന്റെ ഭാഗമായി വിവിധ അങ്കണവാടികളിലും മറ്റ് പൊതുസ്ഥലങ്ങളിലും വിവിധയിനം തൈകൾ നട്ടു. സാമ്പിൾ സർവെയെക്കുറിച്ചുള്ള ലഘുലേഖകളും വിതരണം ചെയ്തു. ആഘോഷപരിപാടികൾ ഒക്ടോബർ വരെ നീണ്ടുനിൽക്കും.

സംരംഭക മേഖലയിലും ഹരിതകർമ സേനയുടെ പ്രവർത്തനങ്ങൾ അടയാളപ്പെടുത്തുകയാണ് കണ്ണപുരം പഞ്ചായത്തിലെ സംരംഭക കൂട്ടായ്മ

പശ്ചാത്തല മേഖലയ്ക്ക് പ്രത്യേക പരിഗണന നൽകി ന്യൂ മാഹി ഗ്രാമപഞ്ചായത്തിന്റെ 2025-26 സാമ്പത്തിക വർഷത്തേക്കുള്ള വാർഷിക ബജറ്റ് വൈസ് പ്രസിഡന്റ് അർജുൻ പവിത്രൻ അവതരിപ്പിച്ചു. 41,31,190 രൂപ പ്രാരംഭ ബാക്കിയും 19,01,60,259 രൂപ വരവും 19,12,81,902 രൂപ ചെലവും 30,09,547 രൂപ നീക്കി ബാക്കിയും പ്രതീക്ഷിക്കുന്ന ബജറ്റാണ് അവതരിപ്പിച്ചത്. അടിസ്ഥാന സൗകര്യ വികസനത്തിനാണ് ബജറ്റ്  ഇത്തവണ ഊന്നൽ നൽകിയത്.