മുണ്ടക്കൈ-ചൂരല്‍മല പ്രകൃതി ദുരന്തത്തില്‍ പുന്നപ്പുഴയില്‍ അടിഞ്ഞ ദുരന്താവശിഷ്ടങ്ങള്‍ നീക്കം ചെയ്യാന്‍ 195.55 കോടിയുടെ പ്രവൃത്തികള്‍ക്ക് അനുമതി. അവശിഷ്ടങ്ങള്‍ നീക്കം ചെയ്യുന്നതിലൂടെ നദിയുടെ ഒഴുക്ക് ശരിയായ രീതിയിലാക്കുക, നദീ തീരത്തേക്കുള്ള ഒഴുക്ക് നിയന്ത്രിക്കല്‍, നദിയുടെ പുനരുജ്ജീവനം, തീരത്തെ മണ്ണൊലിപ്പില്‍ നിന്നും സംരക്ഷിക്കല്‍, നദീ തീരം സംരക്ഷണം എന്നിവയാണ് ലക്ഷ്യമാക്കുന്നത്. ദുരന്തത്തില്‍ 5.7 ദശലക്ഷം ക്യുബിക് മീറ്റര്‍ അവശിഷ്ടങ്ങളാണ് പുന്നപ്പുഴയാറില്‍ അടിഞ്ഞത്. ഇതാണ് പുഴ ഗതി മാറി 8 കിലോമീറ്ററോളം ഒഴുകാനിടയാക്കിയത്.

മുണ്ടക്കൈ-ചൂരല്‍മല പുനരധിവാസ ടൗണ്‍ഷിപ്പിനായുള്ള അന്തിമ ഗുണഭോക്തൃ പട്ടികയില്‍ 402 ഗുണഭോക്താക്കള്‍. ടൗണ്‍ഷിപ്പിലേക്ക് അര്‍ഹരായവരുടെ രണ്ടാംഘട്ട 2 ബി അന്തിമ ലിസ്റ്റ് പ്രസിദ്ധീകരിച്ചതോടെ 73 ഗുണ ഭോക്താക്കളാണ് ലിസ്റ്റിലുള്‍പ്പെട്ടത്. കരട് 2 ബി പട്ടികയില്‍ ഉള്‍പ്പെട്ട  70 ഗുണഭോക്താക്കളും പട്ടിക സംബന്ധിച്ച  ആക്ഷേപങ്ങളുടെയും അപേക്ഷയുടെയും അടിസ്ഥാനത്തില്‍ കണ്ടെത്തിയ മൂന്ന് ഗുണഭോക്താക്കള്‍ ഉള്‍പ്പെടെ ആകെ 73 ഗുണഭോക്താക്കളുമാണ് പട്ടികയിലുള്‍പ്പെട്ടത്.

ശുചിത്വ-കാര്‍ഷിക മേഖലയ്ക്ക് ഊന്നല്‍ നല്‍കി ജില്ലാ പഞ്ചായത്ത് വൈസ് പ്രസിഡന്‍റ് ബീനാ പ്രഭ 2025-26 വര്‍ഷത്തെ ബജറ്റ് അവതരിപ്പിച്ചു. പ്രസിഡന്‍റ് ജോര്‍ജ് എബ്രഹാം അധ്യക്ഷനായി.

 മത്സ്യഫെഡ് 2025-26 വർഷത്തിൽ നടപ്പാക്കുന്ന മത്സ്യത്തൊഴിലാളി വ്യക്തിഗത അപകട ഇൻഷുറൻസ് പദ്ധതിയിൽ അംഗമാകാൻ അപേക്ഷിക്കാം. അപകടമരണത്തിനും അപകടം മൂലം സ്ഥിരമായ പൂർണ അംഗവൈകല്യം സംഭവിക്കുകയാണെങ്കിലും 10 ലക്ഷം രൂപ ഇൻഷുറൻസ് ആനുകൂല്യം ലഭിക്കും. അപകടത്തേത്തുടർന്ന് ആശുപത്രിയിൽ പ്രവേശിപ്പിച്ചാൽ ചികിത്സാച്ചെലവിനത്തിൽ പരമാവധി ഒരു ലക്ഷം രൂപ വരെ ലഭിക്കും.

വനിതാ ശിശു വികസന വകുപ്പ് ജില്ലാ ശിശു സംരക്ഷണ യൂണിറ്റിന്റെ നേതൃത്വത്തിൽ ജില്ലയിലെ പോക്‌സോ അതിജീവിതരായ കുട്ടികളുടെ സപ്പോർട്ട് പേഴ്‌സൺമാരായി പ്രവർത്തിക്കാൻ സന്നദ്ധപ്രവർത്തകരിൽനിന്ന് അപേക്ഷ ക്ഷണിച്ചു. യോഗ്യത: സോഷ്യൽ വർക്ക്, സോഷ്യോളജി, സൈക്കോളജി, ചൈൽഡ് ഡെവലെപ്‌മെൻറ് എന്നിവയിൽ ബിരുദാനന്തര ബിരുദം അല്ലെങ്കിൽ ബിരുദവും മൂന്ന് വർഷം കുട്ടികളുടെ വിദ്യാഭ്യാസം, വികസനം, സംരക്ഷണം എന്നീ മേഖലയിൽ  പ്രവൃത്തിപരിചയമോ വേണം.

സഹകരണ വകുപ്പിന് കീഴിലുള്ള സംസ്ഥാന സഹകരണ യൂണിയന്റെ തിരുവനന്തപുരത്തെ കേരള ഇൻസ്റ്റിറ്റ്യൂട്ട് ഓഫ് കോപറേറ്റീവ് മാനേജ്‌മെന്റിൽ( കിക്മ ) എം.ബി.എ ബാച്ചിലേക്കുള്ള പ്രവേശനത്തിനുള്ള അഭിമുഖം മാർച്ച് 22 ശനിയാഴ്ച രാവിലെ 10 മുതൽ കിക്മ കോളേജ് ക്യാമ്പസിൽ വച്ച് നടക്കും.

 കോട്ടയം സീനിയർ സൂപ്രണ്ട് ഓഫ് പോസ്റ്റ് ഓഫീസിനു കീഴിൽ കോട്ടയം ആർ.എം.എസ് -പുതുപ്പള്ളി-നാട്ടകം റൂട്ടിലേക്കും തിരിച്ചും തപാൽ ഉരുപ്പടികൾ കൈമാറ്റം ചെയ്യുന്നതിനായി കരാർ അടിസ്ഥാനത്തിൽ വാണിജ്യ വാഹനങ്ങൾ വാടകയ്ക്കെടുക്കുന്നതിന് ടെൻഡർ ക്ഷണിച്ചു. ടെൻഡറുകൾ സ്വീകരിക്കുന്ന അവസാന തീയതി ഏപ്രിൽ നാല്.വിശദവിവരത്തിന് ഫോൺ: 0481 2582970, 230166.
 

റീബിൽഡ് കേരളാ ഇനിഷ്യേറ്റീവ് ഫോർ റിസൽട്‌സ് പദ്ധതിയുടെ ഭാഗമായി നടത്തുന്ന പാലാ ക്ലസ്റ്റർതല മോക്ഡ്രില്ലുമായി ബന്ധപ്പെട്ട് ഏകോപനയോഗം ചേർന്നു. പാലാ നഗരസഭ ടൗൺ ഹാളിൽ നടന്ന  യോഗം നഗരസഭാ ചെയർമാൻ തോമസ് പീറ്റർ  ഉദ്ഘാടനം ചെയ്തു. പാലാ തഹസിൽദാർ ലിറ്റി മോൾ തോമസ് അധ്യക്ഷത വഹിച്ചു.
മേയ് ഏഴിന് രാവിലെ 11 മണിക്കു നഗരസഭാ ടൗൺ ഹാളിനു സമീപം മീനച്ചിലാറ്റിൽ വച്ച് ദുരന്തനിവാരണവുമായി ബന്ധപ്പെട്ട മോക് ഡ്രിൽ നടത്താൻ യോഗം തീരുമാനിച്ചു.  മേയ് ആറിന് രാവിലെ 11 മണിക്കു നഗരസഭടൗൺ ഹാളിൽ വച്ച് ടേബിൾടോപ്പ് യോഗം ചേരും.

 മാഞ്ഞൂർ ഗ്രാമപഞ്ചായത്ത് 2024-25 വർഷത്തെ ജനകീയാസൂത്രണ പദ്ധതിയിൽ ഉൾപ്പെടുത്തി നടപ്പാക്കുന്ന കറവപ്പശുക്കൾക്ക് കാലിത്തീറ്റ സബ്സിഡി പദ്ധതിക്ക് അപേക്ഷിച്ച എല്ലാം കർഷകരും 50 ശതമാനം തുക ഗുണഭോക്തൃ വിഹിതം അടച്ച്  മാർച്ച് 24ന് മുമ്പായി കാലിത്തീറ്റ മാഞ്ഞൂർ സംഘത്തിൽ നിന്ന് കൈപ്പറ്റണമെന്നു ക്ഷീരവികസന ഓഫീസർ അറിയിച്ചു.