ജില്ലയിൽ നാളെ (07 മാർച്ച്, ഞായർ) ജിമ്മി ജോർജ് സ്‌റ്റേഡിയത്തിൽ മാത്രമാകും കോവിഡ് വാക്‌സിനേഷൻ ഉണ്ടാവുകയെന്ന് ജില്ലാ കളക്ടർ ഡോ. നവ്‌ജ്യോത് ഖോസ അറിയിച്ചു. കോവിഡ് മുന്നണിപ്പോരാളികൾ, ആരോഗ്യ പ്രവർത്തകർ, പോളിങ് ഉദ്യോഗസ്ഥർ, 60 വയസിനു മുകളിൽ പ്രായമുള്ളവർ, 45നും  59നും ഇടയിൽ പ്രായമുള്ള അനുബന്ധ രോഗബാധിതർ എന്നിവർക്ക് ഇവിടെ വാക്‌സിനേഷനുണ്ടാകും. രാവിലെ ഒമ്പതു മുതൽ വൈകിട്ട് അഞ്ചു വരെയാണു ഡ്രൈവ് സംഘടിപ്പിക്കുന്നത്. തിങ്കളാഴ്ച സർക്കാർ സ്ഥാപനങ്ങളിലും സ്വകാര്യ ആശുപത്രികളിലും വാക്‌സിനേഷൻ ഉണ്ടായിരിക്കും.

തിരുവനന്തപുരത്ത് ഇന്ന് (06 മാർച്ച് 2021) 188 പേർക്കു കൂടി കോവിഡ് 19 സ്ഥിരീകരിച്ചു. 368 പേർ രോഗമുക്തരായി. നിലവിൽ 2,211 പേരാണു രോഗം സ്ഥിരീകരിച്ചു ചികിത്സയിൽ കഴിയുന്നത്. 

ഇന്നു രോഗം സ്ഥിരീകരിച്ചവരിൽ 126 പേർക്കു സമ്പർക്കത്തിലൂടെയാണു രോഗബാധയുണ്ടായത്. ഇതിൽ രണ്ടു പേർ ആരോഗ്യപ്രവർത്തകരാണ്. 

രോഗലക്ഷണങ്ങളെത്തുടർന്നു ജില്ലയിൽ 1,268 പേരെക്കൂടി നിരീക്ഷണത്തിലാക്കി. ഇവരടക്കം ആകെ 18,552 പേർ വീടുകളിലും 45 പേർ സ്ഥാപനങ്ങളിലും ക്വാറന്റൈനിൽ കഴിയുന്നുണ്ട്. ഇന്നലെവരെ നിരീക്ഷണത്തിലുണ്ടായിരുന്ന 1,917 പേർ രോഗലക്ഷണങ്ങളില്ലാതെ നിരീക്ഷണകാലം പൂർത്തിയാക്കി.

നിയമസഭാ തെരഞ്ഞെടുപ്പിന്റെ ഭാഗമായി ആറ്റിങ്ങൽ നിയോജക മണ്ഡലത്തിലെ രാഷ്ട്രീയ പാർട്ടികളുടെ യോഗം നാളെ (മാർച്ച് 08) ഉച്ചയ്ക്കു രണ്ടിനു ചിറയിൻകീഴ് ബ്ലോക്ക് പഞ്ചായത്ത് കോൺഫറൻസ് ഹാളിൽ ചേരുമെന്ന് വരണാധികാരി അറിയിച്ചു. മണ്ഡലത്തിന്റെ പരിധിയിൽ വരുന്ന എല്ലാ രാഷ്ട്രീയ കക്ഷികളുടേയും പ്രതിനിധികൾ യോഗത്തിൽ പങ്കെടുക്കണമെന്നും അറിയിപ്പിൽ പറയുന്നു.

നിയമസഭാ തെരഞ്ഞെടുപ്പിന്റെ വോട്ടെടുപ്പു ദിവസം പോളിങ് ബൂത്തിലെത്തി വോട്ട് രേഖപ്പെടുത്താൻ കഴിയാത്തവർക്കായി തെരഞ്ഞെടുപ്പ് കമ്മിഷൻ ഏർപ്പെടുത്തിയിരിക്കുന്ന പോസ്റ്റൽ വോട്ടിനുള്ള അപേക്ഷകൾ ഈ മാസം 17 വരെ സ്വീകരിക്കും. 80 വയസിനു മുകളിൽ പ്രായമുള്ളവർ, കോവിഡ് പോസിറ്റീവായും ക്വാറന്റൈനിലും കഴിയുന്നവർ, വികലാംഗരായ വോട്ടർമാർ എന്നിവർക്കും തെരഞ്ഞെടുപ്പ് കമ്മിഷൻ അവശ്യ സർവീസായി പ്രഖ്യാപിച്ചിട്ടുള്ള 16 വകുപ്പുകളിലെ ജീവനക്കാർക്കുമാണു പോസ്റ്റൽ വോട്ട് അനുവദിക്കുന്നത്.

പെരിന്തല്‍മണ്ണ ബ്ലോക്കിലെ കീഴാറ്റൂര്‍, മേലാറ്റൂര്‍, വെട്ടത്തൂര്‍, താഴെക്കോട്, അങ്ങാടിപ്പുറം, ആലിപറമ്പ്, ഏലംകുളം, പുലാമന്തോള്‍ എന്നീ പഞ്ചായത്തുകളില്‍ ജൈവകൃഷി ചെയ്തുകൊണ്ടിരിക്കുന്നവര്‍ക്കും ജൈവകൃഷിയില്‍ താത്പര്യമുള്ളവര്‍ക്കും ജൈവകൃഷി സര്‍ട്ടിഫിക്കറ്റ് ലഭിക്കുന്നതിനും വിവിധ ജൈവകൃഷി മാര്‍ഗങ്ങളെ സംബന്ധിച്ച് അറിവും പരിശീലനവും ലഭിക്കുന്നതിനും അപേക്ഷ ക്ഷണിച്ചു. അപേക്ഷകര്‍ക്ക് കുറഞ്ഞത് അഞ്ച് സെന്റ് സ്ഥലമെങ്കിലും സ്വന്തമായുണ്ടായിരിക്കണം. അപേക്ഷ സമര്‍പ്പിക്കാനുള്ള അവസാന തീയതി മാര്‍ച്ച് 10.

മീഡിയ ഇലവനെതിരെ കലക്ടറേറ്റ് ഇലവന് അഞ്ച് വിക്കറ്റ് വിജയം

പൊതു തെരഞ്ഞെടുപ്പില്‍ പരമാവധി വോട്ടര്‍മാരുടെ പങ്കാളിത്തം ഉറപ്പാക്കുന്നതിനായുള്ള വിവിധ പ്രചരണ പരിപാടികളുടെ ഭാഗമായി മലപ്പുറത്ത് നടന്ന സൗഹൃദ ക്രിക്കറ്റ് മത്സരം ആവേശമായി. ജില്ലയിലെ മാധ്യമ പ്രവര്‍ത്തകരുടെ മീഡിയ ഇലവനും കലക്ടറേറ്റ് ജീവനക്കാരുടെ കലക്ടറേറ്റ് ഇലവനും തമ്മില്‍ മലപ്പുറം എം.എസ്.പി എല്‍.പി. സ്‌കൂള്‍ മൈതാനത്തായിരുന്നു മത്സരം. 15 ഓവര്‍ മത്സരത്തില്‍ അസിസ്റ്റന്റ് കലക്ടര്‍ പി. വിഷ്ണുരാജ് നയിച്ച കലക്ടറേറ്റ് ഇലവന്‍ അഞ്ച് വിക്കറ്റിന് വിജയിച്ചു.

നേരിട്ടുള്ള സമ്പര്‍ക്കത്തിലൂടെ 275 പേര്‍ക്ക്
ഉറവിടമറിയാതെ 04 പേര്‍ക്ക്
രോഗബാധിതരായി ചികിത്സയില്‍ 2,460 പേര്‍
ആകെ നിരീക്ഷണത്തിലുള്ളത് 18,447 പേര്‍

മലപ്പുറം ജില്ലയില്‍ ഇന്ന് (മാര്‍ച്ച് ആറ്) 286 പേര്‍ക്ക് കോവിഡ് 19 സ്ഥിരീകരിച്ചതായി ജില്ലാ മെഡിക്കല്‍ ഓഫീസര്‍ ഡോ. കെ. സക്കീന അറിയിച്ചു. ഇതില്‍ 275 പേര്‍ക്ക് നേരിട്ടുള്ള സമ്പര്‍ക്കത്തിലൂടെയും നാല് പേര്‍ക്ക് ഉറവിടറിയാതെയുമാണ് രോഗബാധ. കൂടാതെ വിദേശ രാജ്യത്ത് നിന്നെത്തിയ രണ്ട് പേര്‍ക്കും ഇതര സംസ്ഥാനങ്ങളില്‍ നിന്നെത്തിയ അഞ്ച് പേര്‍ക്കും ഇന്ന് വൈറസ് ബാധ സ്ഥിരീകരിച്ചിട്ടുണ്ട്.

ബി.പി അങ്ങാടി -കുറ്റിപ്പുറം റോഡില്‍ ബി.പി അങ്ങാടി മുതല്‍ കൊടക്കല്‍   വരെ ഇന്ന് (മാര്‍ച്ച് ഏഴ്) മുതല്‍ നവീകരണ പ്രവൃത്തികള്‍ നടക്കുന്നതിനാല്‍ വാഹനഗതാഗതം  15 വരെ നിരോധിച്ചു.  വാഹനങ്ങള്‍ കൊടക്കല്‍- ആലത്തിയൂര്‍ റോഡ്   വഴി പോകണമെന്ന് എക്‌സിക്യൂട്ടീവ് എഞ്ചിനീയര്‍ അറിയിച്ചു.

തൃത്താല ഗവ. ആര്‍ട്‌സ് ആന്‍ഡ് സയന്‍സ് കോളജില്‍ എംഎസ്.സി മാത്തമാറ്റിക്‌സ് വിത്ത് ഡാറ്റ സയന്‍സില്‍ സീറ്റൊഴിവുണ്ട്. എസ്.സി വിഭാഗത്തില്‍ രണ്ട് ഒഴിവുകളും എസ്.ടി വിഭാഗത്തില്‍ ഒരു ഒഴിവുമാണുള്ളത്. ഇവരുടെ അഭാവത്തില്‍ ഒ.ഇ.സി, എസ്.ഇ.ബി.സി, ജനറല്‍ വിദ്യാര്‍ഥികളെയും പരിഗണിക്കും. താത്പര്യമുള്ളവര്‍ മാര്‍ച്ച് ഒന്‍പതിന് വൈകീട്ട് മൂന്നിനകം കോളജില്‍ അപേക്ഷ നല്‍കണം. കൂടുതല്‍ വിവരങ്ങള്‍ക്ക് ഫോണ്‍: 04662270335, 0466 2270353.

അന്താരാഷ്ട്ര വനിതാദിനത്തോടനുബന്ധിച്ച് ജില്ലാ വനിതാ ശിശു വികസന വകുപ്പിന്റെ  ആഭിമുഖ്യത്തില്‍ ജില്ലാതലത്തില്‍ വിവിധ പരിപാടികള്‍ സംഘടിപ്പിക്കുന്നു. യോഗങ്ങള്‍, സെമിനാറുകള്‍, വെബിനാറുകള്‍, പരേഡുകള്‍, സാഹസിക പരിപാടികള്‍, കലാപരിപാടികള്‍, സ്ത്രീകള്‍ക്ക് കരിയര്‍ ഗൈഡന്‍സ്, എംപ്ലോയ്‌മെന്റ് രജിസ്‌ട്രേഷന്‍ മേള തുടങ്ങി മാര്‍ച്ച്  25  വരെ നീളുന്ന വിവിധ പരിപാടികളാണ് സംഘടിപ്പിക്കുന്നത്. മാര്‍ച്ച് എട്ടിന് രാവിലെ 10ന് ജില്ലാ പ്ലാനിങ് ഹാളില്‍ ജില്ലാകലക്ടര്‍ കെ.ഗോപാലകൃഷ്ണന്‍ വനിതാദിനത്തോടനുബന്ധിച്ചുള്ള പരിപാടികള്‍ ഉദ്ഘാടനം ചെയ്യും. ജില്ലാ വനിതാ ശിശു വികസന ഓഫീസര്‍ എ.എ ഷറഫുദീന്‍ അധ്യക്ഷനാവും.