കർഷകർക്ക് കൂടുതൽ വരുമാനം നൽകുന്ന ചെണ്ടുമല്ലി ഉൾപ്പെടെയുള്ള പുഷ്പങ്ങളുടെ കൃഷി പ്രോത്സാഹിപ്പിക്കണമെന്ന് ധനകാര്യവകുപ്പ് മന്ത്രി കെ എൻ ബാലഗോപാൽ. വെട്ടിക്കവല ബ്ലോക്ക് പഞ്ചായത്ത് നടപ്പിലാക്കിയ ചെണ്ടുമല്ലിപൂ കൃഷിയുടെ വിളവെടുപ്പ് ഉദ്ഘാടനം നിർവഹിക്കുകയായിരുന്നു മന്ത്രി.

ബ്ലോക്ക്‌ പഞ്ചായത്ത്‌ പ്രദേശത്തെ 120 ഇടങ്ങളിൽ ചെണ്ടുമല്ലി കൃഷി നടത്തുകയാണ്. മറ്റ് പരമ്പരാഗത വിളകളോടൊപ്പം കർഷകർക്ക് കൂടുതൽ ആദായം ലഭിക്കുന്ന വിളകളും കൃഷി ചെയ്യാൻ പ്രത്യേക പദ്ധതികൾ തയ്യാറാക്കണം. ഓണത്തോട് അനുബന്ധിച്ച് കൂടുതൽ വിളവ് ലഭ്യമാകുമെന്നും മന്ത്രി കൂട്ടിച്ചേർത്തു.

എൽ ടി ലൈനിനു സമീപം ഉള്ള മരച്ചില്ലകൾ വെട്ടി മാറ്റുന്ന പ്രവൃത്തി ഉള്ളതിനാൽ ഹിറാ സ്റ്റോപ്പ് ട്രാൻസ്‌ഫോർമർ പരിധിയിൽ ആഗസ്റ്റ് 25 തിങ്കളാഴ്ച രാവിലെ എട്ട് മണി മുതൽ 11 മണി വരെയും, പാറേത്തുംചാൽ ട്രാൻസ്‌ഫോർമർ പരിധിയിൽ 11  മണി മുതൽ ഒരു മണി വരെയും പാറേത്തുംചാൽ കനാൽ ട്രാൻസ്ഫോർമർ പരിധിയിൽ 12.30 മണി മുതൽ മൂന്ന് മണി വരെയും
ഭാഗികമായി വൈദ്യുതി മുടങ്ങും.

കേരള - കർണാടക - ലക്ഷദ്വീപ് തീരങ്ങളിൽ മണിക്കൂറിൽ 40 മുതൽ 50 കിലോമീറ്റർ വരെയും ചില അവസരങ്ങളിൽ 60 കിലോമീറ്റർ വരെയും വേഗതയിൽ ശക്തമായ കാറ്റിനും മോശം കാലാവസ്ഥയ്ക്കും സാധ്യതയുള്ളതിനാൽ  ആഗസ്റ്റ് 26 ചൊവ്വാഴ്ച മുതൽ 28 വ്യാഴാഴ്ച വരെ മത്സ്യബന്ധനത്തിന് പോകാൻ പാടില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു

കണ്ണൂർ, ആറളം വന്യജീവി ഡിവിഷനുകളിലെ  മനുഷ്യ വന്യജീവി സംഘർഷം ഫലപ്രദമായി നേരിടുന്നതിന് നടപ്പാക്കുന്ന വിവിധ പദ്ധതികളുടെ ഉദ്ഘാടനം ആറളം വന്യജീവി സങ്കേതത്തിലെ വളയംചാലിൽ വനം, വന്യജീവി വകുപ്പ് മന്ത്രി  എ കെ ശശീന്ദ്രൻ  ആഗസ്റ്റ്  26 ന്  വൈകീട്ട് 4.30 ന് നിർവഹിക്കും. കണ്ണൂർ, ആറളം ഫോറസ്റ്റ് ഡിവിഷനുകളിലെ വിവിധ പദ്ധതികളുടെ  ഉദ്ഘാടനമാണ് നിർവഹിക്കുക. അഡ്വ. സണ്ണി ജോസഫ് എം എൽ എ അധ്യക്ഷനാവും.

സപ്ലൈകോ ഓണം ഫെയറിന്റെ സംസ്ഥാനതല ഉദ്ഘാടനം ആഗസ്റ്റ് 25ന് വൈകീട്ട് നാല് മണിക്ക് മുഖ്യമന്ത്രി പിണറായി വിജയൻ തിരുവനന്തപുരം കിഴക്കേകോട്ടയിൽ നിർവ്വഹിക്കും. ഭക്ഷ്യ-പൊതുവിതരണ വകുപ്പുമന്ത്രി ജി.ആർ.അനിൽ അധ്യക്ഷനാകും.

ജീവിത സായാഹ്നങ്ങളിലൂടെ കടന്നുപോകുന്നവരുടെ മാനസികോല്ലാസം ഉറപ്പാക്കാനും അവരെ ചേർത്തുപിടിക്കാനുമായി ചിറക്കൽ ഗ്രാമപഞ്ചായത്ത് 'തൂവൽ സ്പർശം' മെഗാവയോജന സംഗമം സംഘടിപ്പിച്ചു. 2025-26 വാർഷിക പദ്ധതിയിൽ ഉൾപ്പെടുത്തി സംഘടിപ്പിച്ച സംഗമം ഡോ. ജോൺ ബ്രിട്ടാസ് എംപി ഉദ്ഘാടനം ചെയ്തു. ജീവിതത്തിൽ ഒറ്റപ്പെട്ടുപോകാതെ വയോജനങ്ങളെ ചേർത്തുപിടിക്കുവാൻ ഉദ്ദേശിച്ചുള്ള മെഗാവയോജന സംഗമം പ്രശംസനാർഹവും മാതൃകാപരവുമാണെന്നും എം പി പറഞ്ഞു. പലവിധ പ്രയാസങ്ങൾ കൊണ്ട് ഒതുങ്ങിക്കഴിയാതെ ജീവിതത്തിലെ ഓരോഘട്ടവും ആസ്വദിക്കുവാൻ വയോജനങ്ങളെ പ്രാപ്തമാക്കുന്നതാണ് ഇത്തരം സംഗമങ്ങളെന്നും അദ്ദേഹം കൂട്ടിച്ചേർത്തു.

സപ്ലൈകോ സൂപ്പർ മാർക്കറ്റുകളിൽ ആഗസ്റ്റ് 24  ഞായറാഴ്ച കേര വെളിച്ചെണ്ണ ലിറ്ററിന്  445 രൂപ നിരക്കിൽ ലഭിക്കും. ഒരു ദിവസത്തേക്കുള്ള പ്രത്യേക വിലക്കുറവാണ് ഇത്. വെളിച്ചെണ്ണയ്ക്ക് അനിയന്ത്രിതമായി വില ഉയർന്ന സാഹചര്യത്തിൽ,  529 രൂപ വിലയുള്ള ഒരു ലിറ്റർ കേര വെളിച്ചെണ്ണ,  സപ്ലൈകോ വില്പനശാലകളിലൂടെ 457 രൂപയ്ക്ക് നൽകിയിരുന്നു. അതിലും12 കുറച്ചാണ് ഞായറാഴ്ച പ്രത്യേക ഓഫറിൽ നൽകുന്നത്.  സപ്ലൈകോ ശബരി ബ്രാൻഡിലെ വെളിച്ചെണ്ണ സബ്സിഡി നിരക്കിൽ 349 രൂപയ്ക്കും, സബ്സിഡി ഇതര നിരക്കിൽ 429 രൂപയ്ക്കും ഓഗസ്റ്റ് മുതൽ നൽകുന്നുണ്ട്.

ഉൾപ്രദേശങ്ങളിലും സബ്സിഡി  സാധനങ്ങളും  മറ്റ് ഉൽപ്പന്നങ്ങളും ഉൾപ്രദേശങ്ങളിൽ വരെ എത്തിക്കാൻ സപ്ലൈകോ സഞ്ചരിക്കുന്ന ഓണച്ചന്തകൾ ഇത്തവണ ഒരുക്കിയിട്ടുണ്ട്. ആഗസ്റ്റ് 25 മുതൽ സെപ്റ്റംബർ നാലുവരെ വിവിധ നിയോജകമണ്ഡലങ്ങളിലൂടെ ഈ ഓണച്ചന്തകൾ സഞ്ചരിക്കും.

കണ്ണൂര്‍ റവന്യൂ ജില്ലാ ടി.ടി.ഐ കലോത്സവത്തിൽ യൂണിറ്റി ഐടിഇ മട്ടന്നൂർ 100 പോയിന്റ് നേടി ജേതാക്കളായി. ഗവ. ഐ ടി ഇ മെൻ കണ്ണൂർ, മലനാട് ഐ ടി ഇ എന്നിവ 98 പോയിന്റ് വീതം നേടി  രണ്ടാം സ്ഥാനവും, ഡയറ്റ് കണ്ണൂർ, മാതമംഗലം ഗവ. ഐ ടി ഇ എന്നിവ 96 പോയിന്റ് വീതം  മൂന്നാം സ്ഥാനവും പങ്കിട്ടു.