സപ്ലൈകോ സൂപ്പർ മാർക്കറ്റുകളിൽ ആഗസ്റ്റ് 24  ഞായറാഴ്ച കേര വെളിച്ചെണ്ണ ലിറ്ററിന്  445 രൂപ നിരക്കിൽ ലഭിക്കും. ഒരു ദിവസത്തേക്കുള്ള പ്രത്യേക വിലക്കുറവാണ് ഇത്. വെളിച്ചെണ്ണയ്ക്ക് അനിയന്ത്രിതമായി വില ഉയർന്ന സാഹചര്യത്തിൽ,  529 രൂപ വിലയുള്ള ഒരു ലിറ്റർ കേര വെളിച്ചെണ്ണ,  സപ്ലൈകോ വില്പനശാലകളിലൂടെ 457 രൂപയ്ക്ക് നൽകിയിരുന്നു. അതിലും12 കുറച്ചാണ് ഞായറാഴ്ച പ്രത്യേക ഓഫറിൽ നൽകുന്നത്.  സപ്ലൈകോ ശബരി ബ്രാൻഡിലെ വെളിച്ചെണ്ണ സബ്സിഡി നിരക്കിൽ 349 രൂപയ്ക്കും, സബ്സിഡി ഇതര നിരക്കിൽ 429 രൂപയ്ക്കും ഓഗസ്റ്റ് മുതൽ നൽകുന്നുണ്ട്.

ഉൾപ്രദേശങ്ങളിലും സബ്സിഡി  സാധനങ്ങളും  മറ്റ് ഉൽപ്പന്നങ്ങളും ഉൾപ്രദേശങ്ങളിൽ വരെ എത്തിക്കാൻ സപ്ലൈകോ സഞ്ചരിക്കുന്ന ഓണച്ചന്തകൾ ഇത്തവണ ഒരുക്കിയിട്ടുണ്ട്. ആഗസ്റ്റ് 25 മുതൽ സെപ്റ്റംബർ നാലുവരെ വിവിധ നിയോജകമണ്ഡലങ്ങളിലൂടെ ഈ ഓണച്ചന്തകൾ സഞ്ചരിക്കും.

കണ്ണൂര്‍ റവന്യൂ ജില്ലാ ടി.ടി.ഐ കലോത്സവത്തിൽ യൂണിറ്റി ഐടിഇ മട്ടന്നൂർ 100 പോയിന്റ് നേടി ജേതാക്കളായി. ഗവ. ഐ ടി ഇ മെൻ കണ്ണൂർ, മലനാട് ഐ ടി ഇ എന്നിവ 98 പോയിന്റ് വീതം നേടി  രണ്ടാം സ്ഥാനവും, ഡയറ്റ് കണ്ണൂർ, മാതമംഗലം ഗവ. ഐ ടി ഇ എന്നിവ 96 പോയിന്റ് വീതം  മൂന്നാം സ്ഥാനവും പങ്കിട്ടു.

എന്‍ എ ബി എച്ച് അംഗീകാരം ലഭിച്ച ജില്ലയിലെ ആയുഷ് ഹെല്‍ത്ത് ആന്‍ഡ് വെല്‍നെസ് സ്ഥാപനങ്ങളിലെ ആയുഷ് ജീവനക്കാരെ  അനുമോദിച്ചു. രജിസ്‌ട്രേഷന്‍ വകുപ്പ് മന്ത്രി രാമചന്ദ്രന്‍ കടന്നപ്പള്ളി ഉദ്ഘാടനം ചെയ്തു. ജില്ലയിലെ ഗ്രാമപഞ്ചായത്ത് പ്രസിഡന്റുമാര്‍ കാണിച്ച ശുഷ്‌കാന്തിയും അര്‍പ്പണബോധവുമാണ് ഈ അംഗീകാരത്തിന് കാരണമെന്ന് മന്ത്രി പറഞ്ഞു. 
ജില്ലാപഞ്ചായത്ത് വിദ്യാഭ്യാസ സ്റ്റാന്റിംഗ് കമ്മിറ്റി ചെയര്‍പേഴ്‌സണ്‍ എം.വി ശ്രീജിനി അധ്യക്ഷയായി. അസി. കലക്ടര്‍ എഹ്‌തെദ മുഫസിര്‍ മുഖ്യാതിഥിയായി.

ദേശാടന പക്ഷികളുടെ പറുദീസയായ മുണ്ടേരി കടവിലെത്തുന്ന പക്ഷി നിരീക്ഷകർക്കും സഞ്ചാരികൾക്കും  സൗകര്യങ്ങൾ ഒരുക്കുന്ന ഇക്കോ ടൂറിസം പദ്ധതിയുടെ ഒന്നാം ഘട്ടത്തിന് തുടക്കമാവുന്നു.  സൗന്ദര്യവത്കരണം, ടോയ്ലെറ്റ് ബ്ലോക്ക് നിർമ്മാണം, മൊബൈൽ കൗണ്ടറുകൾ, ദിശാ സൂചിക ബോർഡുകൾ, ബേർഡ് ഡെൻ (പക്ഷികളെ കാണാനുള്ള മുറികൾ) പ്ലാൻ്റുകൾ, വാച്ച് ടവറുകൾ എന്നിവ ഉൾപ്പെടെ വിപുലമായ സൗകര്യങ്ങളാണ് ഒരുക്കുന്നത്. 

തൊഴിലന്വേഷകർക്ക് പുത്തൻ പ്രതീക്ഷകൾ തുറന്ന് ജില്ലാ എംപ്ലോയ്മെന്റ് എക്സ്ചേഞ്ചും എംപ്ലോയബിലിറ്റി സെന്ററും പാനൂർ ജ്യോതിസ് വിദ്യാഭ്യാസ പദ്ധതിയുടെ സഹകരണത്തോടെ സംഘടിപ്പിച്ച നിയുക്തി 2025 തൊഴിൽമേളയിൽ 68 പേർക്ക് നിയമനം ലഭിച്ചു. 547 പേർ പങ്കെടുത്ത മേളയിൽ 183 പേർ ചുരുക്കപ്പട്ടികയിലിടം നേടി.

കണ്ണൂർ ഗവ.എൻജിനീയറിംഗ് കോളേജിൽ മെൻസ്, ലേഡീസ് ഹോസ്റ്റലുകളിലെ അടുക്കളയിലേക്ക് ആവശ്യമായ പാത്രങ്ങൾ വിതരണം ചെയ്യുന്നതിന് ക്വട്ടേഷൻ ക്ഷണിച്ചു. ക്വട്ടേഷനുകൾ സെപ്റ്റംബർ ഒൻപതിന് രാവിലെ 11 മണിക്കകം ലഭിക്കണം. കൂടുതൽ വിവരങ്ങൾ www.gcek.ac.in വെബ്സൈറ്റിൽ ലഭിക്കും. ഫോൺ: 0497 2780225

കേരള ഇൻസ്റ്റിറ്റ്യൂട്ട് ഓഫ് കോ ഓപ്പറേറ്റീവ് മാനേജ്‌മെന്റിൽ എം.ബി.എ (ഫുൾടൈം) 2025-27 ബാച്ചിലേയ്ക്ക് ഒഴിവുളള സീറ്റുകളിലേക്കുള്ള അഭിമുഖം ആഗസ്റ്റ് 25 ന് രാവിലെ 10 മണി മുതൽ കാൾടെക്‌സ് ചേനോളി ജംഗ്ഷനിലെ സഹകരണ പരിശീലന കേന്ദ്രത്തിൽ നടക്കും. കേരള സർവകലാശാലയുടെയും എ ഐ സി ടിയുടെയും അംഗീകാരത്തോടെ നടത്തുന്ന ദ്വിവത്സര കോഴ്‌സിൽ ലോജിസ്റ്റിക്‌സ്, ബിസിനസ് അനലിറ്റിക്‌സ്, ഫിനാൻസ്, മാർക്കറ്റിംഗ്, ഹ്യൂമൻ റിസോഴ്‌സ് എന്നിവയിൽ സ്‌പെഷ്യലൈസേഷനുമുണ്ട്. സഹകരണ മേഖലയിൽ പ്രവർത്തിക്കുന്നവരുടെ ആശ്രിതർക്കും, ഫിഷറീസ് സ്‌കോളർഷിപ്പിന് അർഹതയുളള വിദ്യാർഥികൾക്കും പ്രത്യേക സീറ്റ് സംവരണമുണ്ട്.