സംസ്ഥാനത്തെ സ്ത്രീകളുടെയും കുട്ടികളുടെയും ക്ഷേമം ഉറപ്പാക്കുന്നതിന് ഭരണപരിഷ്‌കാര കമ്മീഷന്‍ ഇടപെടുന്നു. ഇരുവിഭാഗങ്ങള്‍ക്കും നേരേ അതിക്രമങ്ങള്‍ വര്‍ദ്ധിച്ചുവരുന്ന സാഹചര്യത്തിലാണ് നടപടി. ഇതിന്റെ ഭാഗമായി പൊതുജനങ്ങള്‍, പൊതുപ്രവര്‍ത്തകര്‍, ഈ വിഷയത്തില്‍ താത്പര്യമുള്ള വ്യക്തികള്‍ എന്നിവരില്‍ നിന്ന് അഭിപ്രായങ്ങള്‍ തേടും. ഇതോടൊപ്പം വിവിധ സാമൂഹ്യക്ഷേമ നിയമങ്ങള്‍ സംബന്ധിച്ചും കമ്മീഷന്‍ പഠനം നടത്തുന്നുണ്ട്. മുതിര്‍ന്ന പൗരന്‍മാര്‍, ഭിന്നശേഷിക്കാര്‍, മാനസിക വെല്ലുവിളി നേരിടുന്നവര്‍, കുടിയേറ്റ തൊഴിലാളികള്‍ എന്നിവരുമായി ബന്ധപ്പെട്ട കാര്യങ്ങളും കമ്മീഷന്‍ പഠനവിഷയമാക്കും. 

     തിരുവനന്തപുരം ജില്ലാ പഞ്ചായത്തിന്റെ രണ്ടാം വാര്‍ഷികത്തിന്റെ ഭാഗമായി, നെടുമങ്ങാട് ജില്ലാ ആശുപത്രിയില്‍ നടപ്പാക്കിയ ആറ് പുതിയ വികസന പദ്ധതികള്‍ ഇന്ന് നവംബര്‍ 23) ഉദ്ഘാടനം ചെയ്യും.  വൈകുന്നേരം മൂന്ന് മണിക്ക് ആശുപത്രി അങ്കണത്തില്‍ ജില്ലാ പഞ്ചായത്ത് പ്രസിഡന്റ് വി.കെ. മധുവിന്റെ അധ്യക്ഷതയില്‍ നടക്കുന്ന ചടങ്ങില്‍ തദ്ദേശ സ്വയംഭരണ വകുപ്പ് മന്ത്രി കെ.റ്റി. ജലീല്‍ പദ്ധതികള്‍ നാടിനു സമര്‍പ്പിക്കും. 

     നിയമസഭയിലെ പരിസ്ഥിതി സംബന്ധിച്ച സമിതി നവംബര്‍ 23 രാവിലെ നിയമസഭയിലെ 5ഡി സമ്മേളന ഹാളില്‍ യോഗം ചേരും.  മൂക്കുന്നിമലയിലെ അനധികൃത ക്വാറി, ക്രഷര്‍ പ്രവര്‍ത്തനങ്ങള്‍ക്കെതിരെയും വെള്ളായണി കയലിന്റെ സംരക്ഷണ പ്രവര്‍ത്തനങ്ങള്‍ക്കായി സ്വീകരിക്കേണ്ട നടപടികള്‍ സംബന്ധിച്ചും സമിതിക്ക് ലഭിച്ചിട്ടുള്ള പരാതികളില്‍ ബന്ധപ്പെട്ട വകുപ്പുദേ്യാഗസ്ഥരില്‍ നിന്ന് തെളിവെടുക്കുന്നതിനാണ് യോഗം ചേരുന്നത്.  രാവിലെ 11 മണിക്ക് ചേരുന്ന യോഗത്തിനുശേഷം സമിതി ബന്ധപ്പെട്ട സ്ഥലങ്ങള്‍ സന്ദര്‍ശിക്കുകയും ചെയ്യും.
(പി.ആര്‍.പി 1919/2017)
 

    ക്യാമ്പയിന്‍ അവസാനിക്കാന്‍ രണ്ട് നാള്‍ ബാക്കി നില്‍ക്കെ ജില്ലയില്‍ ഒന്‍പത് മാസത്തിനും 15 വയസ്സിനുമിടയിലുള്ള 90 ശതമാനം കുട്ടികള്‍ക്കും എം ആര്‍ വാക്‌സിനേഷന്‍ നല്‍കാന്‍ കഴിഞ്ഞതായി സബ്കളക്ടര്‍ ഡോ ദിവ്യ എസ് അയ്യര്‍ അറിയിച്ചു.   ക്യാമ്പയിന്‍ അവസാനിക്കുന്ന നവംബര്‍ 25നകം ഈ ഗ്രൂപ്പില്‍ പെടുന്ന മുഴുവന്‍ കുട്ടികള്‍ക്കും വാക്‌സിന്‍ നല്‍കാനാവുമെന്ന് പ്രതീക്ഷിക്കുന്നതായും അതിന് എല്ലാ വിഭാഗം ജനങ്ങളുടെയും സഹായ സഹകരണങ്ങള്‍ അത്യന്താപേക്ഷിതമാണെന്നും അവര്‍ പറഞ്ഞു. സബ്കളക്ടറുടെ ചേമ്പറില്‍ ചേര്‍ന്ന വാക്‌സിനേഷന്‍ കര്‍മ്മസേനയുടെ അവലോകന യോഗത്തില്‍ സംസാരിക്കുകയായിരുന്നു അവര്‍. 

    തിരുവനന്തപുരം ജില്ലാ പഞ്ചായത്ത് നടപ്പാക്കുന്ന സമ്പൂര്‍ണ കുടിവെള്ള പദ്ധതി ജലശ്രീ യുടെ ഭാഗമായി കുളങ്ങളുടെ നിര്‍മാണവും കിണര്‍ റീചാര്‍ജിംഗും ആരഭിച്ചു.  തൊഴിലുറപ്പ് പദ്ധതിയില്‍ ഉള്‍പ്പെടുത്തിയാണ് പ്രവൃത്തികള്‍ നടക്കുന്നത്.  

    ആറ്റിങ്ങല്‍ ഗവ. ഐ.റ്റി.ഐയില്‍ ഇന്‍സ്റ്റിറ്റ്യൂട്ട് മാനേജ്‌മെന്റ് കമ്മിറ്റിയും ബിം ലാബ്‌സ് എന്ന സ്ഥാപനവും സംയുക്തമായി തുടങ്ങുന്ന ഡിജിറ്റല്‍ പ്രോട്ടോ ടൈപ്പിംഗ് (ആട്ടോകാഡ് & സോളിഡ് വര്‍ക്‌സ്) എന്ന തൊഴിലധിഷ്ഠിത കോഴ്‌സിലേയ്ക്ക് അപേക്ഷിക്കാം.  മെക്കാനിക്കല്‍, ഓട്ടോ മൊബൈല്‍ അനുബന്ധ ട്രേഡുകളില്‍ ഐ.റ്റി.ഐ / ഡിപ്ലോമ / ബി.ടെക് യോഗ്യത അപേക്ഷകര്‍ക്കുണ്ടാകണം.  ഈ മാസം 30 ന് മുന്‍പായി അപേക്ഷിക്കേണ്ടതാണ്.  കൂടുതല്‍ വിവരങ്ങള്‍ക്ക് 0470 -2622391, 9744293003.  
(പി.ആര്‍.പി 1924/2017)
 

    തിരുവനന്തപുരം ജില്ലയിലെ പനവൂര്‍ ഗ്രാമപഞ്ചായത്തിന്റെ 2017 -18 വാര്‍ഷിക പദ്ധതിയിലുള്‍പ്പെടുത്തി നടപ്പാക്കുന്ന വയോ സൗഹൃദ ഗ്രാമം പദ്ധതിയുടെ ഭാഗമായുള്ള വയോജന സംഗമം ഇന്ന് (നവംബര്‍ 24) പനവൂരില്‍ നടക്കും.  സംസ്ഥാന ഭരണ പരിഷ്‌ക്കാര കമ്മിഷന്‍ ചെയര്‍മാന്‍ വി.എസ് അച്യുതാനന്ദന്‍ പരിപാടി ഉദ്ഘാടനം ചെയ്യും.  
    ഡി.കെ. മുരളി എം.എല്‍.എ യുടെ അധ്യക്ഷതയില്‍ നടക്കുന്ന ചടങ്ങില്‍ ജില്ലാ പഞ്ചായത്ത് പ്രസിഡന്റ് വി.കെ. മധു, വയോജനങ്ങള്‍ക്കുള്ള കട്ടില്‍ വിതരണം ചെയ്യും.  വിവിധ ജനപ്രതിനിധികളും പരിപാടിയില്‍ സംബന്ധിക്കും.  

രജിസ്‌ട്രേഷന്‍ പുതുക്കുന്നതിനായി 2017 സെപ്തംബര്‍, ഒക്‌ടോബര്‍ മാസങ്ങളില്‍ കൊയിലാണ്ടി ടൗണ്‍ എംപ്ലോയ്‌മെന്റ് എക്‌സ്‌ചേഞ്ചില്‍ രജിസ്‌ട്രേഷന്‍ കാര്‍ഡ് സമര്‍പ്പിച്ച് ഇനിയും പുതുക്കി തിരിച്ചുവാങ്ങാത്തവര്‍ അസ്സല്‍ സര്‍ട്ടിഫിക്കറ്റുകള്‍ സഹിതം നേരിേട്ടാ ദൂതന്‍ മുഖേനയോ നവംബര്‍ 28 നകം ഹാജരായി കാര്‍ഡ് കൈപ്പറ്റണം.