എസ്.എസ്.എല്‍.സി. ഫലപ്രഖ്യാപനത്തില്‍ ജില്ലയിലെ നാല് മോഡല്‍ റസിഡന്‍ഷ്യല്‍ സ്‌കൂളുകള്‍ക്കും 100 ശതമാനം വിജയം.  അട്ടപ്പാടി, മലമ്പുഴ, തൃത്താല,  പെരിങ്ങോട്ടുകുറുശ്ശി എന്നിവിടങ്ങളിലെ ഗവ. മോഡല്‍ റസിഡന്‍ഷ്യല്‍ സ്‌കൂളുകളില്‍ പരീക്ഷയെഴുതിയ 136 വിദ്യാര്‍ഥികളും വിജയിക്കുകയും എട്ടുപേര്‍ സമ്പൂര്‍ണ്ണ എ പ്ലസ് നേടുകയും ചെയ്തു. 

സംസ്ഥാന വ്യാപകമായി മെയ് 11,12 തിയ്യതികളില്‍ നടത്തുന്ന ശുചീകരണ യജ്ഞവുമായി ബന്ധപ്പെട്ട് പാലക്കാട് ജില്ലയില്‍ നടപ്പാക്കേണ്ട മഴക്കാല പൂര്‍വ്വ ശുചീകരണം, പകര്‍ച്ചവ്യാധി പ്രതിരോധം എന്നിവ സംബന്ധിച്ച് ഇന്ന് (മെയ് 10) രാവിലെ 10.30 ന് ജില്ലാ കലക്ടറുടെ ചേംബറില്‍ യോഗം ചേരും.

ജില്ലാ എംപ്ലോയ്‌മെന്റ് എക്‌സ്‌ചേഞ്ച് വൊക്കേഷണല്‍ ഗൈഡന്‍സ് യൂണിറ്റിന്റെ ആഭിമുഖ്യത്തില്‍ എസ്.എസ്.എല്‍.സി, പ്ലസ് ടു പഠനം പൂര്‍ത്തിയായവര്‍ക്ക് ഉന്നതവിദ്യാഭ്യാസം, തൊഴില്‍രംഗങ്ങള്‍ എന്നിവ സംബന്ധിച്ച് മാര്‍ഗനിര്‍ദ്ദേശങ്ങള്‍ നല്‍കുന്നതിന് സെമിനാര്‍ സംഘടിപ്പിക്കുന്നു. മെയ് 15ന് രാവിലെ 9.30ന് ഗവ.മോയന്‍ മോഡല്‍ ഗേള്‍സ് ഹയര്‍സെക്കന്ററി സ്‌കൂളില്‍ സംഘടിപ്പിക്കുന്ന സെമിനാര്‍ ജില്ലാ പഞ്ചായത്ത് വിദ്യാഭ്യാസ സ്റ്റാന്റിംഗ് കമ്മിറ്റി ചെയര്‍പേഴ്‌സണ്‍ ബിനുമോള്‍ ഉദ്ഘാടനം ചെയ്യും.

സംസ്ഥാന ലൈബ്രറി കൗണ്‍സില്‍ അംഗീകരിച്ചിട്ടുള്ള ജില്ലയിലെ ഗ്രന്ഥശാലകള്‍ക്ക് 88,70,055 രൂപയുടെ പുസ്തക ഗ്രാന്റ് വിതരണം ചെയ്തു. തുക ഉപയോഗിച്ച് ലൈബ്രറി കൗണ്‍സില്‍ നടത്തുന്ന പുസ്തകോല്‍സവത്തില്‍ നിന്നും ലൈബ്രറികള്‍ക്ക് പുസ്തകങ്ങള്‍ വാങ്ങാം. അല്ലെങ്കില്‍ 75 ശതമാനം തുകയ്ക്ക് പുസ്തകങ്ങള്‍ വാങ്ങുകയും 25 ശതമാനം തുകയ്ക്ക് ലൈബ്രറിയുടെ അറ്റകുറ്റ പണികള്‍ നടത്തുകയും ചെയ്യാം. തുക ലഭിച്ച് രണ്ട് മാസത്തിനകം നിര്‍ബന്ധമായും ചെലവഴിച്ചിരിക്കണം. 

സംസ്ഥാനത്ത് പ്രതീക്ഷിച്ച നിരക്കില്‍ വേനല്‍മഴ ലഭിക്കാത്തതിനാലും ചൂട് കുറയാത്തതിനാലും തുറസ്സായ സ്ഥലങ്ങളില്‍ ജോലിചെയ്യുന്ന തൊഴിലാളികളുടെ തൊഴില്‍ സമയം ക്രമീകരിച്ചുകൊണ്ടുള്ള ഉത്തരവ് മെയ് 20 വരെ നീട്ടിയതായി ജില്ലാ ലേബര്‍ ഓഫീസര്‍ (എന്‍ഫോഴ്സ്മെന്റ്) അറിയിച്ചു. സൂര്യഘാതം ഉണ്ടാകാനിടയുള്ള സാഹചര്യം കണക്കിലെടുത്ത് ഉച്ചയക്ക് 12 മുതല്‍ 3 വരെ തൊഴിലാളികള്‍ക്ക് വിശ്രമം നല്‍കണമെന്ന ഉത്തരവാണ് നീട്ടിയത്. തൊഴിലാളികളും തൊഴിലുടകമളും നിര്‍ദേശം കര്‍ശനമായി പാലിക്കണമെന്നും ഉത്തരവ് പാലിക്കാത്ത തൊഴിലുടമകള്‍ക്കെതിരെ നടപടി സ്വീകരിക്കുമെന്നും ജില്ലാ ലേബര്‍ ഓഫീസര്‍ അറിയിച്ചു.

റേഷന്‍ കാര്‍ഡ് ഉടമകള്‍ക്കുള്ള ഈ മാസത്തെ (മെയ്) ഭക്ഷ്യധാന്യ വിതരണത്തോടനുബന്ധിച്ച് എ.എ.വൈ വിഭാഗത്തില്‍പ്പെട്ടവര്‍ക്ക് കാര്‍ഡൊന്നിന് 30 കിലോ അരിയും, അഞ്ച് കിലോ ഗോതമ്പും സൗജന്യമായി ലഭിക്കും. കൂടാതെ ഒരു കിലോ പഞ്ചസാര 21 രൂപയ്ക്ക് ലഭിക്കും. 

കൊല്ലങ്കോട് ബ്ലോക്ക് പഞ്ചായത്തിനു കീഴിലുള്ള  ആണ്‍കുട്ടികളുടെ കൊല്ലങ്കോട്, പുതുനഗരം ഗവ. പ്രീമെട്രിക് ഹോസ്റ്റലുകളില്‍ താമസിച്ചു പഠിക്കുന്നതിന് അപേക്ഷിക്കാം. അഞ്ചുമുതല്‍ 10വരെ ക്ലാസ്സുകളിലെ പട്ടികജാതി വിഭാഗത്തിലെ വിദ്യാര്‍ത്ഥികളുടെ രക്ഷിതാക്കളാണ് അപേക്ഷിക്കേണ്ടത്. 10 ശതമാനം മറ്റു വിഭാഗത്തിന് സംവരണം ചെയ്തിട്ടുണ്ട്. പ്രവേശനം ലഭിക്കുന്ന വിദ്യാര്‍ത്ഥികള്‍ക്ക് താമസം, ഭക്ഷണം, ട്യൂഷന്‍, നോട്ട്ബുക്ക് എന്നിവ സൗജന്യമായിരിക്കും. അപേക്ഷ മെയ് 22ന് വൈകിട്ട് അഞ്ചിനകം കൊല്ലങ്കോട് ബ്ലോക്ക് പട്ടികജാതി വികസന ഓഫീസില്‍ സമര്‍പ്പിക്കണം. അപേക്ഷ ഫോമിനും കൂടുതല്‍ വിവരങ്ങള്‍ക്കും ഫോണ്‍: 8547630129