കേരള മോട്ടോര്‍ തൊഴിലാളി ക്ഷേമനിധി ബോര്‍ഡ് അംഗങ്ങള്‍ക്ക് കുടിശ്ശിക ഒടുക്കുന്നതിനുള്ള കാലാവധി 2019 ജൂണ്‍ 30 വരെ നീട്ടിനല്‍കിയതായി ജില്ലാ എക്‌സിക്യൂട്ടീവ് ഓഫീസര്‍ അറിയിച്ചു. ക്ഷേമനിധി ബോര്‍ഡില്‍ അംഗങ്ങളായ തൊഴിലാളികള്‍ക്ക് എല്ലാത്തരം കുടിശ്ശികകളും ഒമ്പത് ശതമാനം പലിശ ഉള്‍പ്പെടെയാണ് ഒടുക്കാന്‍സാധിക്കുക. ഫോണ്‍: 0491 2547437.

പാലക്കാട് താലൂക്ക് കണ്ണാടി 2 വില്ലേജില്‍ 20192020 കാലയളവിലേയ്ക്കായി കൃഷിഭൂമികള്‍ ലേലം ചെയ്യുന്നു. ഒരേക്കര്‍ നാല് സെന്റ്, 18 സെന്റ്, രണ്ട് ഏക്കര്‍ 32 സെന്റ്, ഒരേക്കര്‍ 96 സെന്റ് എന്നിങ്ങനെ വിവിധ സര്‍വെ നമ്പരുകളിലുള്ള കൃഷിഭൂമികളാണ് ലേലം ചെയ്യുന്നത്. ഒരു സാമ്പത്തിക വര്‍ഷത്തേയ്ക്ക് കൃഷി ചെയ്ത് വിളവെടുക്കാനുള്ള അവകാശമാണ് ലഭിക്കുക. താത്പര്യമുള്ളവര്‍ മെയ് പത്തിന് രാവിലെ 11ന് കണ്ണാടി 2 വില്ലേജോഫീസില്‍ നടക്കുന്ന ലേലത്തില്‍ പങ്കെടുക്കണമെന്ന്് പാലക്കാട് തഹസില്‍ദാര്‍ (ഭൂരേഖ) അറിയിച്ചു. 

സംസ്ഥാനത്ത് ചിലയിടങ്ങളില്‍ വൈകുന്നേരങ്ങളില്‍ ഇടിയോടു കൂടിയ ശക്തമായ മഴയ്ക്കും ശക്തമായ കാറ്റിനും സാധ്യതയുള്ളതായി കാലാവസ്ഥാ നിരീക്ഷക കേന്ദ്രം അറിയിച്ചു.  പൊതുജനങ്ങള്‍ ഇടിമിന്നല്‍ ജാഗ്രതാ നിര്‍ദേശങ്ങള്‍ പാലിക്കണമെന്ന് കേരള സംസ്ഥാന അടിയന്തിരഘട്ട കാര്യനിര്‍വഹണ കേന്ദ്രവും കേരള സംസ്ഥാന ദുരന്ത നിവാരണ അതോറിറ്റിയും മുന്നറിയിപ്പ് നല്‍കിയിട്ടുണ്ട്

നഗരസഭയുടെ കീഴിലുള്ള മാലിന്യ സംസ്‌ക്കരണ കേന്ദ്രത്തില്‍ മികച്ച രീതിയിലുള്ള മാലിന്യ സംസ്‌ക്കരണം ഉറപ്പാക്കുന്നതിന് ജില്ലാ ശുചിത്വമിഷന്റെ ആഭിമുഖ്യത്തില്‍ നവീകരണ പ്രവര്‍ത്തനങ്ങള്‍ നടപ്പിലാക്കുമെന്ന് ശുചിത്വ മിഷന്‍ ജില്ലാ കോഡിനേറ്റര്‍ ബെനിലാ ബ്രൂണോ അറിയിച്ചു. കൊടുമ്പ് പഞ്ചായത്തില്‍ ആറ് ഏക്കറിലായി വ്യാപിച്ചുകിടക്കുന്ന മാലിന്യ സംഭരണ കേന്ദ്രത്തില്‍ മാലിന്യ ശേഖരണം പുനരാരംഭിക്കുമ്പോള്‍ ശാസ്ത്രീയമായി മാലിന്യ സംസ്‌ക്കരണം നടപ്പിലാക്കുന്നതിന് വിവിധ പദ്ധതികള്‍ ആവിഷ്‌ക്കരിച്ചിട്ടുണ്ട്. ഇത് സംബന്ധിച്ച് വിശദമായ റിപ്പോര്‍ട്ട് സംസ്ഥാന ശുചിത്വമിഷന് സമര്‍പ്പിക്കും.