ലോക്‌സഭാ തെരഞ്ഞെടുപ്പിനോടനുബന്ധിച്ച് തെരഞ്ഞെടുപ്പ് ഡ്യൂട്ടികള്‍ക്ക് നിയോഗിക്കേണ്ട ഉദ്യോഗസ്ഥരുടെ ലിസ്റ്റ് യഥാസമയം നല്‍കുന്നതില്‍ വീഴ്ച വരുത്തിയതായി ശ്രദ്ധയില്‍പ്പെട്ട ദേവികുളം താലൂക്കിലെ 8 സ്ഥാപനമേലധികാരികള്‍ക്കെതിരെ ജനപ്രാതിനിധ്യ നിയമം അനുസരിച്ച് അച്ചടക്ക നടപടി ആരംഭിച്ചതായി ജില്ലാകലക്ടര്‍ എച്ച്. ദിനേശന്‍ അറിയിച്ചു. മറ്റ് താലൂക്കുകളില്‍ ലിസ്റ്റ് നല്‍കുന്നതില്‍ വീഴ്ചവരുത്തിയിട്ടുണ്ടെങ്കില്‍ അവര്‍ക്കെതിരെയും നടപടി ഉണ്ടാകുമെന്നും അദ്ദേഹം അറിയിച്ചു.

ലോക്‌സഭാ തെരഞ്ഞെടുപ്പിലെ 088 ദേവികുളം, 089 ഉടുമ്പന്‍ചോല, 090 തൊടുപുഴ, 091 ഇടുക്കി, 092 പീരുമേട് എന്നീ നിയോജകമണ്ഡലങ്ങളിലേക്ക് അനുവദിക്കേണ്ട ഇലക്‌ട്രോണിക് വോട്ടിംഗ് മെഷീന്‍,  വിവിപാറ്റ് എന്നിവയുടെ ഒന്നാം റാന്‍ഡമൈസേഷന്‍ മാര്‍ച്ച് 25 ഉച്ചക്ക് 2.30ന് ജില്ലാകലക്ടറുടെ ചേമ്പറില്‍ ജില്ലാ ഇലക്ഷന്‍ ഓഫീസറുടെ മേല്‍നോട്ടത്തില്‍  നടത്തും. അംഗീകൃത ദേശീയ /സംസ്ഥാന  രാഷ്ട്രീയപാര്‍ട്ടികളുടെ പ്രതിനിധികള്‍ പങ്കെടുക്കണമെന്ന് ജില്ലാ തെരഞ്ഞെടുപ്പ് ഓഫീസര്‍ അറിയിച്ചു.

തെരഞ്ഞെടുപ്പുമായി ബന്ധപ്പെട്ട പെയ്ഡ് ന്യൂസുകള്‍ കണ്ടെത്തി നടപടി സ്വീകരിക്കല്‍, മാധ്യമങ്ങള്‍ വഴി പ്രചരിപ്പിക്കുന്ന രാഷ്ട്രീയ പരസ്യം എന്നിവയ്ക്ക് അംഗീകാരം നല്‍കുന്നതിനുള്ള മീഡിയ സര്‍ട്ടിഫിക്കേഷന്‍ ആന്റ് മോണിറ്ററിംഗ് കമ്മിറ്റി (എം.സി.എം.സി) ജില്ലയില്‍ മാര്‍ച്ച് 25ന് ഉദ്ഘാടനം ചെയ്യും. ജില്ലാ ഇന്‍ഫര്‍മേഷന്‍ ഓഫീസില്‍ പ്രത്യേകം സജ്ജീകരിച്ചിട്ടുള്ള സെല്ലിന്റെ ഉദ്ഘാടനം  രാവിലെ 11ന് ജില്ലാ തെരഞ്ഞെടുപ്പ് ഓഫീസര്‍ ജില്ലാകലക്ടര്‍ എച്ച്. ദിനേശന്‍ നിര്‍വഹിക്കും. സമിതി അംഗങ്ങള്‍ തെരഞ്ഞെടുപ്പ്  ഉദ്യോഗസ്ഥര്‍ തുടങ്ങിയവര്‍ സംബന്ധിക്കും.

ലോക്സഭാ തെരഞ്ഞെടുപ്പിനോടനുബന്ധിച്ച് തിരുവനന്തപുരം പ്രസ്സ് ഇൻഫർമേഷൻ ബ്യൂറോ തയ്യാറാക്കിയ ''ലോകസഭാ തെരഞ്ഞെടുപ്പും  കേരളവും; 2014 ലേക്ക്ഒരുതിരിഞ്ഞു നോട്ടം'' എന്ന ഇ-ലഘു പുസ്തകം സംസ്ഥാന മുഖ്യതെരഞ്ഞെടുപ്പ് ഓഫീസർ  ടിക്കാറാം മീണ പ്രകാശനം ചെയ്തു. തിരുവനന്തപുരം പ്രസ്സ് ഇൻഫർമേഷൻ ബ്യൂറോ ഡെപ്യൂട്ടി ഡയറക്ടർ ഡോ. നീതുസോണ ആദ്യപ്രതി ഏറ്റുവാങ്ങി.

തെരഞ്ഞെടുപ്പിൽ ഹരിത ചട്ടം പാലിക്കുന്നതിന് സഹായിക്കുന്ന കൈപ്പുസ്തകം മുഖ്യ തിരഞ്ഞെടുപ്പ് ഓഫീസർ ടിക്കാറാം മീണ പ്രകാശനം ചെയ്തു. ഹരിത കേരളം മിഷനാണ് ഹരിതചട്ട പാലനം സംശയങ്ങളും മറുപടികളും എന്ന പുസ്തകം തയ്യാറാക്കിയത്.

കോഴിക്കോട് മോട്ടോര്‍ തൊഴിലാളി ക്ഷേമനിധി ബോര്‍ഡ് ജില്ലയിലെ മോട്ടോര്‍ തൊഴിലാളികള്‍ക്കായി രജിസ്ട്രേഷന്‍ ക്യാമ്പ് മാര്‍ച്ച് 25ന്  രാവിലെ 10 മുതല്‍ രണ്ട് വരെ പേരാമ്പ്ര ടാക്സി സ്റ്റാന്റില്‍ സംഘടിപ്പിക്കുന്നു. പുതുതായി അംഗത്വമെടുക്കാനും കുടിശ്ശിക അടക്കാനും സൗകര്യം ഉണ്ടായിരിക്കുമെന്ന് ജില്ലാ എക്സിക്യുട്ടീവ് ഓഫീസര്‍ അറിയിച്ചു.

വരള്‍ച്ച അതിരൂക്ഷമായ സാഹചര്യത്തില്‍ ജലസംരക്ഷണവും ജലമിതവ്യയവും എല്ലാ വീടുകളിലും നടപ്പാക്കുന്നതിനായി ഹരിതകേരളം മിഷന്‍ കുടുംബശ്രീയുമായി ചേര്‍ന്ന് സംഘടിപ്പിക്കുന്ന ജലമാണ് ജീവന്‍ കാമ്പയിന്‍ പ്രവര്‍ത്തനങ്ങള്‍ക്ക് തുടക്കമായി. പരിപാടിയുടെ ഭാഗമായി 2.75 ലക്ഷം അയല്‍ക്കൂട്ടങ്ങളില്‍ ജലമാണ് ജീവന്‍ അയല്‍ക്കൂട്ട ജലസഭ സംഘടിപ്പിക്കും. കാമ്പയിന്റെ ഭാഗമായി ഓരോ വീട്ടിലും കുടിവെള്ളത്തിന്റെയും മറ്റാവശ്യങ്ങള്‍ക്കുമുള്ള വെള്ളത്തിന്റെയും ഉപയോഗം കാര്യക്ഷമമാക്കുന്നതിനും കുറയ്ക്കുന്നതിനുമുള്ള പ്രവര്‍ത്തനങ്ങള്‍ നടന്നു വരികയാണ്. 

കോഴിക്കോട് സിവില്‍ സ്റ്റേഷനിലെ  എംപ്ലോയ്ബിലിറ്റി സെന്ററില്‍ മാര്‍ച്ച് 28  ന് രാവിലെ 10.30 മണിയ്ക്ക് ജില്ലയിലെ വിവിധ സ്വകാര്യ  സ്ഥാപനങ്ങളിലേക്ക്  സെയില്‍സ് കണ്‍സല്‍ട്ടന്റ്  (യോഗ്യത: പ്ലസ്ടു/ഡിഗ്രി/ഡിപ്ലോമ), സീനിയര്‍ സെയില്‍സ് കണ്‍സല്‍ട്ടന്റ്    (യോഗ്യത: പ്ലസ്ടു/ഡിഗ്രി/ഡിപ്ലോമ, ഒരു വര്‍ഷ തൊഴില്‍ പരിചയം), സെയില്‍സ് റിലേഷന്‍ഷിപ്പ് ഓഫീസര്‍ (യോഗ്യത: പ്ലസ് ടു/ഡിഗ്രി/ ഡിപ്ലോമ, രണ്ട് വര്‍ഷ തൊഴില്‍ പരിചയം), സ്റ്റോര്‍ മാനേജര്‍ (യോഗ്യത: എം.ബി.എ)   ഒഴിവുകളിലേക്ക്  കൂടിക്കാഴ്ച നടത്തും.      പ്രായപരിധി: 35 വയസ്സ്.