ലോക്‌സഭാ തെരഞ്ഞെടുപ്പ് പ്രവര്‍ത്തനങ്ങള്‍ ഏകോപിപ്പിക്കുന്നതിനും സുഗമമാക്കുന്നതിനും നാളിതുവരെയുള്ള പ്രവര്‍ത്തനങ്ങല്‍ വിലയിരുത്തുന്നതിനുമായി എ.ആര്‍.ഒ മാര്‍, ഇ.ആര്‍.ഒ മാര്‍, നോഡല്‍ ഓഫീസര്‍മാര്‍, ഇലക്ഷന്‍ ഡെപ്യൂട്ടി തഹസീല്‍ദാര്‍മാര്‍ എന്നിവരുടെ റിവ്യൂ മീറ്റിംഗ് ഇന്ന് (30.3.19) ഉച്ചകഴിഞ്ഞ് മൂന്ന് മണിക്ക് ജില്ലാകലക്ടറുടെ ചേമ്പറില്‍ ചേരും.  യോഗത്തില്‍ പോസ്റ്റല്‍ ബാലറ്റ്, ഇലക്ഷന്‍ ഡ്യൂട്ടി സര്‍ട്ടിഫിക്കറ്റ് (ഇ.ഡി.സി) എന്നിവ സംബന്ധിച്ച പരിശീലനവും ഉണ്ടായിരിക്കും.

ലോക്‌സഭാ തെരഞ്ഞെടുപ്പിന് എല്ലാ വോട്ടര്‍മാരെയും കൊണ്ട് വോട്ട് ചെയ്യിക്കുകയെന്ന ഉദ്ദേശത്തോടെ സംസ്ഥാന തെരഞ്ഞെടുപ്പ് കമ്മീഷന്റെ നിര്‍ദ്ദേശപ്രകാരം ജില്ലാകലക്ടറുടെ നേതൃത്വത്തില്‍ പ്രവര്‍ത്തിക്കുന്ന സ്വീപിന്റെ നേതൃത്വത്തില്‍ ഇന്ന് (30.3.19) വൈകിട്ട് അഞ്ചിന് തൊടുപുഴ മുന്‍സിപ്പല്‍ മൈതാനത്ത് ജനങ്ങള്‍ക്ക് വോട്ട് ചെയ്യുന്നതിനുള്ള സൗകര്യമൊരുക്കി വോട്ടുവണ്ടി എത്തും. തുടര്‍ന്ന് ജീവനക്കാരുടെ ഗാനമേളയും ഉണ്ടായിരിക്കും.  

തൊടുപുഴ നിയോജകമണ്ഡലത്തിലെ കോലാനിയില്‍ സ്വകാര്യ സ്ഥലത്ത് സ്ഥാപിച്ചിരുന്ന ഫ്‌ളക്‌സ് സംബന്ധിച്ചും ചുമരെഴുത്ത് സംബന്ധിച്ചും ഇലക്ഷന്‍ കമ്മീഷന്റെ വെബ്‌സൈറ്റായ സി- വിജിലില്‍ രജിസ്റ്റര്‍ ചെയ്ത പരാതിയില്‍ ആന്റി ഡീഫേയ്‌സ്‌മെന്റ് സ്‌ക്വാഡ് സ്ഥലപരിശോധന നടത്തി ചുമരെഴുത്ത് കരി ഓയില്‍ ഒഴിച്ചും ഫ്‌ളക്‌സ് നീക്കം ചെയ്തും പരാതി പരിഹരിച്ചു.

ലോക്‌സഭാ തിരഞ്ഞെടുപ്പ് പത്രികാസമര്‍പ്പണത്തിന്റെ രണ്ടാം ദിനത്തില്‍ ഇടുക്കി ലോക്‌സഭാ മണ്ഡലത്തില്‍ ഒരു നാമനിര്‍ദ്ദേശ പത്രിക കൂടി ലഭിച്ചു. സ്വതന്ത്ര സ്ഥാനാര്‍ത്ഥി റെജിമോന്‍ ജോസഫാണ് ജില്ലാ വരണാധികാരിയായ കലക്ടര്‍ എച്ച്. ദിനേശന്‍ മുമ്പാകെ  നാമനിര്‍ദ്ദേശ പത്രിക സമര്‍പ്പിച്ചത്. തുടര്‍ന്ന് സത്യപ്രസ്താവനയും നടത്തി. ഒരു സെറ്റ് പത്രികയാണ് സമര്‍പ്പിച്ചത്.  സ്ഥാനാര്‍ത്ഥി  കെട്ടി വയ്‌ക്കേണ്ട തുകയായ 25000 രൂപ പണമായി പത്രികയോടൊപ്പം നല്കി. സ്വതന്ത്ര സ്ഥാനാര്‍ത്ഥി ആയതിനാല്‍  പത്തു പേരാണ് പിന്‍താങ്ങിയിട്ടുള്ളത്.

2019 മെയില്‍ നടത്തുന്ന 109 മത് അഖിലേന്ത്യ അപ്രന്റിഷിപ്പ് ട്രേഡ് ടെസ്റ്റിന് അപേക്ഷ ക്ഷണിച്ചു. ആദ്യമായി പരീക്ഷ എഴുതുന്നവര്‍ക്ക് 105 രൂപയും വീണ്ടും എഴുതുന്നവര്‍ക്ക് 160 രൂപയാണ് പരീക്ഷാഫീസ്. പൂരിപ്പിച്ച അപേക്ഷ ഏപ്രില്‍ 12 വരെ  ആര്‍.ഐ സെന്ററുകളില്‍ സ്വീകരിക്കും ഏപ്രില്‍ 15വരെ പരിശീലനം പൂര്‍ത്തിയാക്കുന്നവര്‍ക്ക് അപേക്ഷ സമര്‍പ്പിക്കാം വിശദവിവരങ്ങള്‍ക്ക് കോഴിക്കോട് സെന്ററുമായി ബന്ധപ്പെടുക. ഫോണ്‍: 0495 2370. 

ലോക്‌സഭാ തെരഞ്ഞെടുപ്പ് മാതൃകാപെരുമാറ്റ ചട്ടം കര്‍ശനമായി പാലിക്കുന്നുണ്ടെന്ന് ഉറപ്പുവരുത്താന്‍ ജില്ലാതലത്തില്‍ രൂപീകരിച്ചിട്ടുള്ള ആന്റി ഡീഫേയ്‌സ്‌മെന്റ് സ്‌ക്വാഡ് തോപ്രാംകുടി, മുരിക്കാശ്ശേരി, കട്ടപ്പന, വാത്തിക്കുടി, വെണ്‍മണി, കഞ്ഞിക്കുഴി, ഇടുക്കി, തൊടുപുഴ എന്നീ സ്ഥലങ്ങളില്‍ പര്യടനം നടത്തി അനധികൃതമായി സ്ഥാപിച്ചിട്ടുള്ള 567 പോസ്റ്ററുകളും 33 ബാനറുകളും നീക്കം ചെയ്തു.

 കോഴിക്കോട് ജില്ലയിലെ എക്സൈസ് വകുപ്പില്‍ ഡ്രൈവര്‍ (നേരിട്ടുളള നിയമനം (കാറ്റഗറി നം. 659/17) തസ്തികയുടെ തെരഞ്ഞടുപ്പിനായി 2019 മാര്‍ച്ച് 20 ന്   ചുരുക്കപ്പട്ടികയുടെ  പകര്‍പ്പ്  പി.എസ്.സി പ്രസിദ്ധീകരിച്ചു. പകര്‍പ്പ്   ജില്ലാ ഇന്‍ഫര്‍മേഷന്‍ സെന്ററില്‍ പരിശോധനക്ക് ലഭിക്കും.

 കോഴിക്കോട് ജില്ലയിലെ ഭാരതീയ ചികിത്സാ വകുപ്പില്‍ ആയുര്‍വേദ തെറാപ്പിസ്റ്റ് (കാറ്റഗറി നം. 194/17) തസ്തികയുടെ തെരഞ്ഞടുപ്പിനായി 2019 മാര്‍ച്ച് 12 ന്   നിലവില്‍ വന്ന റാങ്ക് പട്ടികയുടെ പകര്‍പ്പ്  പി.എസ്.സി പ്രസിദ്ധീകരിച്ചു. ലിസ്റ്റ് ജില്ലാ ഇന്‍ഫര്‍മേഷന്‍ സെന്ററില്‍ പരിശോധനക്ക് ലഭിക്കും.