ജില്ലാ ശുചിത്വ മിഷന്‍, ഹരിത കേരള മിഷന്‍, ധര്‍മ്മടം എ ആര്‍ ഒ എന്നിവയുടെ സംയുക്താഭിമുഖ്യത്തില്‍ ഹരിത തെരഞ്ഞെടുപ്പിന്റെ പ്രചരണാര്‍ഥം വിളംബര റാലി സംഘടിപ്പിച്ചു. 

വോട്ടിംഗ് മെഷീന്‍ വിവിപാറ്റ് പരിശീലനം ലൈബ്രറി കൗണ്‍സില്‍ അങ്കണത്തില്‍ നടന്നു. ഓരോ ആളും ചെയ്യുന്ന വോട്ട് താന്‍ ചെയ്ത സ്ഥാനാര്‍ത്ഥിക്ക് തന്നെയെന്ന് പ്രിന്റൗട്ടിന്റെ സഹായത്തോടെ ഉറപ്പ് വരുത്തുന്നതാണ് വി വി പാറ്റ് മെഷീന്‍. തെരഞ്ഞെടുപ്പ് കമ്മീഷന്‍ നേതൃത്വത്തില്‍ വിവിധ മണ്ഡലത്തില്‍ വോട്ടര്‍മാര്‍ക്ക് പരിശീലനം നല്‍കുന്നതിന്റെ ഭാഗമായി എത്തിയ പ്രചാരണ വാഹനം ജില്ലാ ലൈബ്രറി അങ്കണത്തില്‍ ലൈബ്രേറിയന്‍മാര്‍ക്കും കൗണ്‍സില്‍ ജീവനക്കാര്‍ക്കും മെഷീന്‍ പരിചയപ്പെടുത്തി. നിരവധി വായനക്കാരും പരിശീലനത്തില്‍ പങ്കാളികളായി. 

ലോക്‌സഭാ തെരഞ്ഞെടുപ്പ് പ്രചാരണത്തിന്റെ ഭാഗമായി അച്ചടിക്കുന്ന പോസ്റ്ററുകള്‍, ലഘുലേഖകള്‍, സ്റ്റിക്കറുകള്‍ തുടങ്ങിയവയില്‍ പ്രിന്ററുടെയും പ്രസാധകന്റെയും പേരും വിലാസവും ഇല്ലെങ്കില്‍ അവ നീക്കം ചെയ്യുമെന്ന് ജില്ലാ ഇലക്ഷന്‍ ഓഫീസര്‍ കൂടിയായ ജില്ലാ കലക്ടര്‍ അറിയിച്ചു. മാതൃകാപെരുമാറ്റച്ചട്ടത്തിന്റെ ഭാഗമായി ജനപ്രാതിനിധ്യ നിയമം 1952ലെ 127എ വകുപ്പുപ്രകാരമായിരിക്കും നടപടിയെന്നും ജില്ലാ കലക്ടര്‍ അറിയിച്ചു.

സംസ്ഥാനത്തെ വിവിധ ജില്ലകളിൽ നിന്ന് മഞ്ഞപ്പിത്തം, വയറിളക്കം, വയറുകടി എന്നിവ റിപ്പോർട്ട് ചെയ്ത സാഹചര്യത്തിൽ ജനങ്ങൾ ജാഗ്രത പുലർത്തണമെന്ന് ആരോഗ്യവകുപ്പ് ഡയറക്ടർ അറിയിച്ചു.  ജലക്ഷാമം മൂലം ടൈഫോയ്ഡ്, കോളറ എന്നിവയ്ക്കും സാധ്യതയുണ്ട്. 

കെൽട്രോൺ തൊഴിലധിഷ്ടിത കോഴ്‌സുകളായ കമ്പ്യൂട്ടർ ഹാർഡ്‌വെയർ ആന്റ് നെറ്റ്‌വർക്ക് മെയിന്റനൻസ് വിത്ത് ഇ-ഗാഡ്ജറ്റ് ടെക്‌നോളജീസ്, ഇലക്ട്രിക്കൽ വയർമാൻ ആന്റ് പ്ലംബർ, റഫ്രിജറേഷൻ ആന്റ് എയർകണ്ടീഷനിങ്, സി.സി.എൻ.എ., പ്രൊഫഷണൽ ഡിപ്ലോമ ഇൻ വെബ്ഡിസൈൻ ആന്റ് ഡെവലപ്‌മെന്റ് എന്നീ കോഴ്‌സുകളിലേക്ക് അപേക്ഷ ക്ഷണിച്ചു. കൂടുതൽ വിവരങ്ങൾക്ക് തിരുവനന്തപുരം സ്‌പെൻസർ ജംഗ്ഷനിലെ കെൽട്രോൺ നോളഡ്ജ് സെന്ററിലോ 0471-2337450, 0471-2320332 എന്നീ നമ്പറുകളിലോ ബന്ധപ്പെടുക.

പി.എൻ.എക്സ്. 990/19

പരപ്പ ബ്ലോക്കിലെ ഏഴാംമൈല്‍ എണ്ണപ്പാറ മെക്കാഡം റോഡിന്റെയും മൂന്നാംമൈല്‍ പറക്കളായി മെക്കാഡം റോഡിന്റെയും ടാറിംഗ് നടക്കുന്നതിനാല്‍ മാര്‍ച്ച് 28 മുതല്‍ ഇതു വഴിയുളള ഗതാഗതം താല്ക്കാലികമായി നിരോധിച്ചു. ഏഴാംമൈല്‍ എണ്ണപ്പാറ ഭാഗത്തേക്കുളള വാഹനങ്ങള്‍ക്ക് പഴയ ഏഴാംമൈല്‍ പോര്‍ക്കുളം കരിയം വഴി മുക്കുഴിക്ക് എത്താം. എണ്ണപ്പാറയില്‍ നിന്ന് പറക്കളായി ഭാഗത്തേക്കു പോകുന്ന വാഹനങ്ങള്‍ എണ്ണപ്പാറ കല്ല്‌വളപ്പ് അയ്യങ്കാവ് വഴി പറക്കളായിക്കു പോകണം. 

 സംസ്ഥാന സര്‍ക്കാരിന്റെ സാംസ്‌കാരികകാര്യ വകുപ്പിന്റെ കീഴിലുളള ആറന്മുള വാസ്തു വിദ്യാഗുരുകുലം ഉടന്‍ ആരംഭിക്കുന്ന എപ്പിഗ്രാഫി കോഴ്‌സിലേക്ക് അപേക്ഷ ക്ഷണിച്ചു.നാല് മാസമാണ് കോഴ്‌സ് കാലാവധി. അംഗീകൃത സര്‍വ്വകലാശാല ബിരുദം അല്ലെങ്കില്‍ ത്രിവത്സര പോളിടെക്‌നിക് ഡിപ്ലോമയാണ് യോഗ്യത. മാര്‍ച്ച് 31 നകം അപേക്ഷിക്കണം. ഫോണ്‍-0468 2319740, 9744857828. വെബ്‌സൈറ്റ്-www.vasthuvidyagurukulam.com 

 സംസ്ഥാന സര്‍ക്കാരിന്റെ സാംസ്‌കാരികകാര്യ വകുപ്പിന്റെ കീഴിലുളള ആറന്മുള വാസ്തു വിദ്യാഗുരുകുലം ഉടന്‍ ആരംഭിക്കുന്ന പാരമ്പര്യവാസ്തു വിദ്യ ഹ്രസ്വകാല കോഴ്‌സിലേക്ക് അപേക്ഷ ക്ഷണിച്ചു. നാലു മാസമാണു കോഴ്‌സ് കാലാവധി. സിവില്‍ അല്ലെങ്കില്‍ ആര്‍ക്കടെക്ച്ചറില്‍ നേടിയുള്ള പോളിടെക്‌നിക്ക് ഡിപ്ലോമ അല്ലെങ്കില്‍ ഐ.ടി.ഐ ഡ്രാഫ്റ്റ്മാന്‍, ഐ.ടി.ഐ ആര്‍ക്കിടെക്ച്ചറല്‍ അസിസ്റ്റന്റ്ഷിപ്പ്, കെ.ജി.സി  ഇ സിവില്‍ എന്നീ കോഴ്‌സുകള്‍ കഴിഞ്ഞവര്‍ക്ക് അപേക്ഷിക്കാം. അപേക്ഷ സ്വീകരിക്കുന്ന അവസാന തീയതി മാര്‍ച്ച് 31. ഫോണ്‍-0468 2319740, 9744857828. വെബ്‌സൈറ്റ്-www.vasthuvidyagurukulam.com

കാരുണ്യ ആരോഗ്യ സുരക്ഷ പദ്ധതി ജില്ലയില്‍ ഏപ്രിലില്‍ ആരംഭിക്കും.  അഞ്ചു ലക്ഷം രൂപയുടെ സൗജന്യ ചികിത്സയാണ് കാരുണ്യ ആരോഗ്യ സുരക്ഷ പദ്ധതി പ്രകാരം പ്രതിവര്‍ഷം ഒരോ കുടുംബത്തിനും ലഭിക്കുന്നത്.  നിലവില്‍ ജില്ലയില്‍ ആര്‍.എസ്.ബി.വൈ-ചിസ് പദ്ധതി (ആരോഗ്യ ഇന്‍ഷുറന്‍സ്) അംഗത്വമുളള 1,00,899 കുടുംബങ്ങളും സാമൂഹിക-സാമ്പത്തിക-ജാതി സെന്‍സസ് പ്രകാരമുളള കുടുംബങ്ങളും, ഉള്‍പ്പെടെയാണ് പുതിയ പദ്ധതിയില്‍ ഉള്‍പ്പെടുന്നത്. ഇത് പ്രകാരമാണ് കാരുണ്യ ആരോഗ്യ സുരക്ഷ പദ്ധതിയില്‍ കാര്‍ഡ് നല്‍കുന്നത്.  കുടുംബത്തിലെ ഓരോ അംഗത്തിനും പ്രത്യേകമായിട്ടാണ് കാര്‍ഡ് നല്‍കുന്നത്.