ലോകസഭാ തെരഞ്ഞെടുപ്പില്‍ മുഴുവന്‍ വോട്ടര്‍മാരും സമ്മതിദാനാവകാശം വിനിയോഗിക്കണമെന്നും 'എന്റെ വോട്ട് എന്റെ അവകാശം'  എന്ന സന്ദേശം ഉയര്‍ത്തിപ്പിടിച്ചും തെരഞ്ഞെടുപ്പ് കമ്മിഷന്‍ സംഘടിപ്പിച്ച തീരദേശ വോട്ട് സന്ദേശ യാത്ര കാസര്‍കോട് നെല്ലിക്കുന്ന് കടപ്പുറത്ത് ജില്ലാ കളക്ടര്‍ ഡോ: ഡി സജിത് ബാബു  ഉദ്ഘാടനം ചെയ്തു. തീരദേശത്തെ കുതിര്‍ എന്ന സ്ഥലത്ത് നിന്ന് ശിങ്കാരിമേളത്തിന്റെ അകമ്പടിയോടെ പ്ലക്കാര്‍ഡുളേന്തി സ്ത്രീകളും കുട്ടികളുമായി  ആരംഭിച്ച യാത്ര നെല്ലിക്കുന്ന് ലൈറ്റ് ഹൗസിന് സമീപം അവസാനിച്ചു. സ്വീപ്പ് നോഡല്‍ ഓഫീസര്‍ മുഹമ്മദ് നൗഷാദ് യാത്രക്ക് നേതൃത്വം നല്‍കി.

ലോക്‌സഭാ തെരഞ്ഞെടുപ്പുമായി ബന്ധപ്പെട്ട് കാസര്‍കോട് ജില്ലയിലെ കണ്‍ട്രോള്‍ റൂം നിയന്ത്രിക്കുന്നത് വനിതകള്‍. തെരഞ്ഞെടുപ്പ് പെരുമാറ്റച്ചട്ട ലംഘനം ഉള്‍പ്പെടെയുള്ള പരാതികളുടെയും വോട്ടര്‍ ഹെല്‍പ്പ് ലൈനുകളുടെയും നിയന്ത്രണമാണ് ജൂനിയര്‍ സുപ്രണ്ടുമാരായ രണ്ടു വനിതകളുടെ നേതൃത്വത്തില്‍ നടക്കുന്നത്. സംസ്ഥാനത്ത് വനിതകള്‍ മാത്രം നിയന്ത്രിക്കുന്ന ഏക കണ്‍ട്രോള്‍ റൂമാണ് കാസര്‍കോട് കളക്ടറേറ്റിലേത്. ജൂനിയര്‍ സുപ്രണ്ടുമാരായ സി.ജി ശ്യാമള, ഇന്ദു എം ദാസ് എന്നിവരെ നോഡല്‍ ഓഫീസര്‍മാരായി ജില്ലാ വരണാധികാരിയായ ജില്ലാ കളക്ടറാണ് നിയമിച്ചത്. ക്ലര്‍ക്കുമാരായ ഷീജ.എ, നമിത എ, സജിത പി.എ എന്നിവരും ഇവര്‍ക്കൊപ്പം സജീവമാണ്. 

ലോക്‌സഭാ തെരഞ്ഞെടുപ്പ് പോളിങ്ങ് ഉദ്യോഗസ്ഥര്‍ക്കുള്ള പരിശീലനം  ഇന്നും(27) നാളെയുമായി (28) പെരിയ, തൃക്കരിപ്പൂര്‍ പോളിടെക്‌നിക്കില്‍  നടക്കും.ഇതുസംബന്ധിച്ച അറിയിപ്പും നിയമന ഉത്തരവുകളും ഉദ്യോഗസ്ഥര്‍ക്ക് വിതരണം ചെയ്തതായി ജില്ലാ കളക്ടര്‍ ഡോ.ഡി സജിത്ത് ബാബു അറിയിച്ചു. 

ലോക്‌സഭാ തെരഞ്ഞെടുപ്പില്‍ മാര്‍ച്ച് 28 മുതല്‍ ഏപ്രില്‍ 4 വരെ നാമനിര്‍ദ്ദേശ പത്രിക സമര്‍പ്പിക്കാം. രാവിലെ 11  മുതല്‍ ഉച്ചകഴിഞ്ഞ്  മൂന്ന് വരെയാണ് പത്രികാ സമര്‍പ്പണത്തിനുള്ള സമയം. നാമനിര്‍ദ്ദേശ പത്രികകള്‍ ജില്ലാ വരണാധികാരിക്കോ   അദ്ദേഹത്തിന്റെ അഭാവത്തില്‍ പ്രത്യേക  ചുമതല നല്‍കിയിട്ടുള്ള അസിസ്റ്റന്റ് റിട്ടേണിങ്ങ്  ഓഫീസര്‍ക്കോ സമര്‍പ്പിക്കാം. ഒരു സ്ഥാനാര്‍ത്ഥിക്ക് നാലുസെറ്റ് പത്രികകള്‍വരെ നല്‍കാം.

സംസ്ഥാന സഹകരണ യൂണിയൻ, കേരളയുടെ ആഭിമുഖ്യത്തിൽ നടത്തുന്ന ജെ.ഡി.സി. കോഴ്‌സിന്റെ പുതിയ സ്‌കീമും, പഴയ സ്‌കീമും ഫൈനൽ പരീക്ഷകൾ ഏപ്രിൽ 27 ന് ആരംഭിച്ച് മേയ് 10 ന് അവസാനിക്കും. ഹാൾ ടിക്കറ്റും ടൈംടേബിളും അതാത് കേന്ദ്രത്തിൽ നിന്നും ലഭിക്കും.

പി.എൻ.എക്സ്. 995/19

തിരുവനന്തപുരം ഗവ. ലോ കോളേജിലെ വാർഷിക പി.റ്റി.എ പൊതുയോഗം 28ന് രാവിലെ 10 ന് കോളേജിൽ ചേരും.  രക്ഷകർത്താക്കൾ പങ്കെടുക്കണമെന്ന് പ്രിൻസിപ്പാൾ അറിയിച്ചു.

പി.എൻ.എക്സ്. 994/19

പട്ടികജാതി/ പട്ടികവർഗ്ഗ വകുപ്പും ഐ.എച്ച്.ആർ.ഡിയുടെ കീഴിലുള്ള തിരുവനന്തപുരം മോഡൽ ഫിനിഷിങ് സ്‌കൂളും സംയുക്തമായി നടത്തുന്ന എൻജിനീയറിംഗ് പഠനം പൂർത്തിയാക്കാൻ കഴിയാത്ത പട്ടികജാതി/ പട്ടികവർഗ്ഗ വിദ്യാർത്ഥികൾക്കായി സൗജന്യ ബി-ടെക് ട്യൂഷൻ ക്ലാസുകൾ നടത്തുന്നു.  കൂടുതൽ വിവരങ്ങൾക്ക്: www.modelfinishingschool.org.   ഇ-മെയിൽ: mfsfaq@gmail.com.  വിലാസം: മോഡൽ ഫിനിഷിങ് സ്‌കൂൾ, കേരള സയൻസ് ആന്റ് ടെക്‌നോളജി മ്യൂസിയം ക്യാമ്പസ്, പി.എം.ജി, തിരുവനന്തപുരം. ഫോൺ: 0471-2307733, 9037373077, 9207133385.

ജനുവരി 30ന് അന്തിമ വോട്ടർ പട്ടിക പ്രസിദ്ധീകരിച്ച ശേഷം മാർച്ച് 25 വരെ പട്ടികയിൽ പേര് ചേർക്കാൻ ഏകദേശം 9 ലക്ഷം അപേക്ഷകൾ കൂടി ലഭിച്ചതായി മുഖ്യ തിരഞ്ഞെടുപ്പ് ഓഫീസർ ടിക്കാറാം മീണ അറിയിച്ചു. ഇതിൽ പുതിയ വോട്ടർമാർക്കൊപ്പം മണ്ഡലം മാറുന്നതിനുള്ള അപേക്ഷകളുമുണ്ട്. അപേക്ഷകൾ പരിശോധിച്ച് ഏപ്രിൽ നാലിനകം തീരുമാനമെടുക്കാൻ ജില്ലാ കളക്ടർമാർക്കും തഹസിൽദാർമാർക്കും മുഖ്യ തിരഞ്ഞെടുപ്പ് ഓഫീസർ നിർദ്ദേശം നൽകി.