ലോക്സഭാ തെരഞ്ഞെടുപ്പിനോടനുബന്ധിച്ച് പരസ്യപ്രചാരണം അവസാനിക്കുന്ന ഇന്ന് (ഏപ്രില്‍ 21) വൈകീട്ട് ആറ് മുതല്‍ വോട്ടെടുപ്പ് കഴിയുന്നത് വരെ ജില്ലയില്‍ പൊതുപരിപാടികളോ റാലികളോ സംഘടിപ്പിക്കുന്നത് വിലക്കി ജില്ലാ കലക്ടര്‍ ഉത്തരവായി. ഇത് കര്‍ശനമായി പാലിക്കപ്പെടുന്നുണ്ടോ എന്ന് പരിശോധിക്കാന്‍ ജില്ലാ പൊലീസ് മേധാവിമാര്‍, ഫ്ളെയിങ് സ്‌ക്വാഡുകള്‍, സ്റ്റാറ്റിക് സര്‍വലന്‍സ് ടീമുകള്‍ എന്നിവര്‍ക്ക് കലക്ടര്‍ നിര്‍ദ്ദേശം നല്‍കി.

സമാധാനാന്തരീക്ഷം ഉറപ്പാക്കുന്നതിനായി ലോക്സഭാ തെരഞ്ഞെടുപ്പ് ദിവസമായ ഏപ്രില്‍ 23 ന് വൈകീട്ട് ആറ് മുതല്‍ 24 ന് രാത്രി 10 വരെ വടകര നഗരസഭ, ഒഞ്ചിയം, നാദാപുരം, പേരാമ്പ്ര, കുന്നുമ്മല്‍ ഗ്രാമപഞ്ചായത്തുകള്‍ എന്നിവിടങ്ങളില്‍ ക്രിമിനല്‍ നടപടി ചട്ടം 144 പ്രകാരം ജില്ലാ കലക്ടര്‍ സാംബശിവ റാവു നിരോധനാജ്ഞ പ്രഖ്യാപിച്ചു. ജനങ്ങള്‍ സംഘം ചേരുകയോ കൂട്ടംകൂടുകയോ ചെയ്യാന്‍ പാടില്ല.
 

കണ്ണൂര്‍ കെഎപി നാലാം ബറ്റാലിയനില്‍ ക്യാമ്പ് ഫോളോവര്‍ തസ്തികയില്‍ നിലവിലുള്ള ഒഴിവുകളിലേക്ക് ദിവസവേതനാടിസ്ഥാനത്തില്‍ നിയമനം നടത്തുന്നതിനായി ഏപ്രില്‍ 25 ന് രാവിലെ 11 മണി മുതല്‍ കെഎപി ബറ്റാലിയനില്‍ കൂടിക്കാഴ്ച നടത്തും.  കുക്ക്, ധോബി, ബാര്‍ബര്‍, വാട്ടര്‍ കാരിയര്‍ എന്നീ തസ്തികളിലാണ് നിയമനം.  മുന്‍പരിചയം ഉള്ള പുരുഷന്‍മാര്‍ രാവിലെ 10.30 ന് മാങ്ങാട്ടുപറമ്പ് കെഎപി നാലാം ബറ്റാലിയന്‍ ആസ്ഥാനത്ത് ആധാര്‍ കാര്‍ഡിന്റെ പകര്‍പ്പ് സഹിതം ഹാജരാകണം.

ലോക്സഭ തെരഞ്ഞെടുപ്പിന് മുന്നോടിയായി ജില്ലയിലെ സെക്ടര്‍/ സോണല്‍ മജിസ്ട്രേറ്റുമാര്‍ക്ക് പരിശീലനം നല്‍കി. ജില്ലാപഞ്ചായത്ത് കോണ്‍ഫറന്‍സ് ഹാളില്‍ നടന്ന പരിപാടിയില്‍ മുഴുവന്‍ മണ്ഡലങ്ങളിലേയും സെക്ടര്‍ മജിസ്ട്രേറ്റുമാരായി നിയോഗിക്കപ്പെട്ട ഉദ്യോഗസ്ഥര്‍ പങ്കെടുത്തു. തെരഞ്ഞെടുപ്പ് കമ്മീഷന്റെ സംസ്ഥാനതല മാസ്റ്റര്‍ ട്രെയിനര്‍ പി പ്രേംരാജ് ക്ലാസെടുത്തു. 

ലോക്സഭ തെരഞ്ഞെടുപ്പുമായി ബന്ധപ്പെട്ട് സ്ഥാനാര്‍ഥികളുടെ ചെലവ് രജസ്റ്ററുകളുടെ മൂന്നാം ഘട്ട പരിശോധന പൂര്‍ത്തിയായി. തെരഞ്ഞെടുപ്പ് ചെലവ് നിരീക്ഷകന്‍ മഹ്ഫൂസ് റഹ്മാന്റെ നേതൃത്വത്തിലാണ് മൂന്നാം തവണയും പരിശോധന നടന്നത്. സ്ഥാനാര്‍ഥികള്‍ തയ്യാറാക്കിയ ചെലവ് രജിസ്റ്റര്‍ ചെലവ് നിരീക്ഷണ ഉദ്യോഗസ്ഥര്‍ സൂക്ഷിക്കുന്ന ഷാഡോ രജിസ്റ്ററുമായി താരതമ്യപ്പെടുത്തുന്നതിനും പെരുത്തക്കേടുകളുണ്ടെങ്കില്‍ ബന്ധപ്പെട്ട സ്ഥാനാര്‍ഥികളെ അറിയിച്ച് ആവശ്യമായ നടപടികള്‍ സ്വീകരിക്കുന്നതിനുമാണ് പരിശോധന നടത്തിയത്.

വോട്ടര്‍മാര്‍ക്ക് യാതൊരു തടസവും കൂടാതെ അവരുടെ സമ്മതിദാനാവകാശം വിനിയോഗിക്കുന്നതിനുള്ള പൂര്‍ണ സ്വാതന്ത്ര്യം ഉറപ്പുവരുത്തുന്നതിനായി തെരഞ്ഞെടുപ്പ് ഡ്യൂട്ടിയിലുള്ള ഉദ്യോഗസ്ഥരുമായി മുഴുവന്‍ രാഷ്ട്രീയ പാര്‍ട്ടികളും സ്ഥാനാര്‍ഥികളും സഹകരിക്കണമെന്ന് തെഞ്ഞടുപ്പ് കമ്മീഷന്‍ നിര്‍ദ്ദേശിച്ചു. രാഷ്ട്രീയ പാര്‍ട്ടികള്‍ സമ്മതിദായകര്‍ക്ക് വിതരണം ചെയ്യുന്ന സ്ലിപ്പുകള്‍ വെള്ള കടലാസില്‍ ആയിരിക്കണം, അതില്‍ ഏതെങ്കിലും ചിഹ്നമോ സ്ഥാനാര്‍ഥിയുടെ പേരോ, കക്ഷിയുടെ പേരോ രേഖപ്പെടുത്തരുത്.

ഏപ്രില്‍ 23 ന് സംസ്ഥാനത്ത് നടക്കുന്ന ലോക്സഭ തെരഞ്ഞെടുപ്പില്‍ കള്ളവോട്ട് തടയാന്‍ ശക്തമായ നടപടികള്‍  സ്വീകരിച്ച് ജില്ലാ ഭരണകൂടം. ഇതിന്റെ ഭാഗമായി ജില്ലയിലെ 1857 പോളിംഗ് സ്റ്റേഷനുകളില്‍ 1841 ബൂത്തുകളിലും വെബ്കാസ്റ്റിംഗ് സംവിധാനം ഏര്‍പ്പെടുത്തിയിട്ടുണ്ട്. ബി എസ് എന്‍ എല്‍ കവറേജ് ഇല്ലാത്തത് മൂലം വെബ്കാസ്റ്റിംഗ് സാധിക്കാത്ത പോളിംഗ് സ്റ്റേഷനുകളില്‍ ലൈവ് വീഡിയോ കവറേജും സജ്ജീകരിക്കും. ക്രിറ്റിക്കല്‍ ബൂത്തുകളില്‍ വെബ്കാസ്റ്റിംഗിനൊപ്പം വീഡിയോ കവറേജും ഉണ്ടായിരിക്കുന്നതാണ്.