കേരള നിര്‍മാണ തൊഴിലാളി ക്ഷേമ ബോര്‍ഡിന്‍റെ ജില്ലയിലെ അംഗങ്ങളുടെ മക്കള്‍ക്ക് ധനസഹായത്തിന് ജൂലൈ 25 വരെ അപേക്ഷിക്കാമെന്ന് ജില്ലാ എക്സിക്യുട്ടീവ് ഓഫീല്‍ അറിയിച്ചു. പത്താം ക്ലാസ് പ്രവേശനം ലഭിച്ചവര്‍ക്കും പ്ലസ്ടു പഠനത്തിനുമാണ് ധനസഹായം.
    നിര്‍ദ്ദിഷ്ട ഫോമിലുളള അപേക്ഷ, ക്ഷേമനിധി ഐഡന്‍റിറ്റി കാര്‍ഡ്, പാസ് ബുക്ക്, അപേക്ഷകരായ അംഗത്തൊഴിലാളികളുടെ നാഷനലൈസ്ഡ്/ഷെഡ്യൂള്‍ഡ് ബാങ്ക് അക്കൗണ്ട് എന്നിവയുടെ പകര്‍പ്പ് സഹിതം ബോര്‍ഡിന്‍റെ ജില്ലാ ഓഫീസിലാണ് അപേക്ഷ നല്‍കേണ്ടത്.

    പാലക്കാട് ലോകസഭാമണ്ഡലത്തിനു കീഴിലെ പാലക്കാട്, ഒറ്റപ്പാലം, മണ്ണാര്‍ക്കാട്, പട്ടാമ്പി, തൃത്താല താലൂക്കുകളിലെ ഭിന്നശേഷിക്കാര്‍ക്ക് സഹായ ഉപകരണങ്ങള്‍ വിതരണം ചെയ്യുന്നു.  അര്‍ഹരായവര്‍ തൊട്ടടുത്തുളള ശിശുവികസന പദ്ധതി ഓഫീസില്‍ ആവശ്യമായ രേഖകള്‍ സഹിതം ജൂലൈ 30 നകം അപേക്ഷിക്കണമെന്ന് ജില്ലാ സാമൂഹിക നീതി ഓഫീസര്‍ അറിയിച്ചു.

    സംസ്ഥാനത്തെ ഒന്നോ രണ്ടോ സ്ഥലങ്ങളില്‍ ജൂലൈ 19, 20, 21, 22 തിയതികളില്‍ ഏഴ് മുതല്‍ 11 സെന്‍റീമീറ്റര്‍ വരെ ശക്തവും 12 മുതല്‍ 20 സെന്‍റീമീറ്റര്‍ വരെ അതിശക്തവുമായ മഴയ്ക്ക് സാധ്യതയുളളതായി സംസ്ഥാന ദുരന്തനിവാരണ വിഭാഗം കണ്‍ട്രോള്‍ റൂം അറിയിച്ചു.

    സംസ്ഥാന വനിതാ കമ്മീഷന്‍ മെഗാ അദാലത്ത് ഇന്ന് (ജൂലൈ 19)  രാവിലെ 10.30 ന് ജില്ലാ പഞ്ചായത്ത് ഹാളില്‍ നടക്കും. കമ്മീഷന് നേരത്തെ ലഭിച്ച പരാതികളില്‍ തെളിവെടുക്കുന്നത് കൂടാതെ പുതിയ പരാതികളും  സ്വീകരിക്കും. 

    ഐ.ഐ.റ്റി ക്കായി പുതുശ്ശേരി വെസ്റ്റ് വില്ലേജില്‍ നിന്നും സ്ഥലമേറ്റെടുക്കുന്നതുമായി ബന്ധപ്പെട്ട വിയോജിപ്പുകള്‍ ഭൂവുടമകള്‍ 15 ദിവസത്തിനകം ലാന്‍ഡ് അക്വിസിഷന്‍ സ്പെഷല്‍ തഹസില്‍ദാര്‍ക്ക് നല്‍കണം.  നിലവില്‍ ഏറ്റെടുത്ത സ്ഥലത്തിന് തൊട്ടടുത്തായി സ്ഥിതി ചെയ്യുന്ന 44.35 ഏക്കറാണ് ഏറ്റെടുക്കാനുളളത്.

ആലപ്പുഴ: ജനങ്ങളുടെ പ്രശ്നങ്ങൾ മനസിലാക്കുന്നതിനും പരാതികൾ നേരിൽ കേട്ട് പരിഹാരം കാണുന്നതിനുമായി ആലപ്പുഴ ജില്ല കളക്ടർ  വില്ലേജിൽ ഒരു ദിനം എന്ന പേരിൽ പൊതുജന പരാതി പരിഹാര അദാലത്ത് നടത്തുന്നു. ചേർത്തല താലൂക്കിലെ ചേർത്തല വടക്ക്, ചേർത്തല തെക്ക്, കൊക്കോതമംഗലം, അർത്തുങ്കൽ, കഞ്ഞിക്കുഴി എന്നീ വില്ലേജുകളിലെ വില്ലേജിൽ ഒരു ദിനം പരിപാടി ജൂലൈ 21ന് ചേർത്തല എസ്.എൻ.എം.ജി.എച്ച്.എസ് ഓഡിറ്റോറിയത്തിൽ നടത്തും. അദാലത്തിൽ ജില്ലാ കളക്ടർ പരാതികൾ സ്വീകരിക്കുന്നതും നേരിട്ട് തീർപ്പ് കൽപ്പിക്കുന്നതുമാണ്.

ആലപ്പുഴ: അമ്പലപ്പുഴയിൽ തീരത്തടിഞ്ഞ ഡോക്കിൽ ഇന്ധനം ഇല്ലാത്തതിനാൽ മലിനീകരണത്തിനുള്ള സാധ്യതയില്ലെന്ന് ആലപ്പുഴ പോർട്ട് അധികൃതർ. ടഗ്ഗിനോടൊപ്പം ഡോക്ക് വലിച്ചു മാറ്റുന്നതിന് 40 ടൺ ശേഷിയുള്ള ഒരു ടഗ്ഗുകൂടി ലഭ്യമാക്കാനുള്ള ശ്രമം നടന്നുവരുന്നു. കേരള തീരത്ത് ശേഷി കുറഞ്ഞ ടഗ്ഗുകളാണ് ലഭ്യമായിട്ടുള്ളത്.  ടഗ്ഗുകളുടെയും വടത്തിന്റെയും ലഭ്യത ഉറപ്പാക്കിയതിനുശേഷം മാത്രമേ ഡോക്ക് കെട്ടിവലിക്കുന്നതിനുള്ള പദ്ധതി അംഗീകരിക്കാനാകൂവെന്ന് പോർട്ട് അധികൃതർ വ്യക്തമാക്കി.

കുട്ടനാട് ഉൾപ്പടെയുളള എല്ലാ താലൂക്കുകളിലും ആരംഭിച്ച എല്ലാ  ദുരിതാശ്വാസ   ക്യാമ്പുകളിലും ഡി.എം.ഒയുടെ നേതൃത്തിൽ  മെഡിക്കൽ ടീം  രോഗപ്രതിരോധ പ്രവർത്തനങ്ങൾ കാര്യക്ഷമമായി  നിർവ്വഹിക്കണമെന്ന് ജില്ലാകളക്ടർ നിർദ്ദേശം നൽകി.   ആരോഗ്യ കേന്ദ്രങ്ങളിൽ എത്താൻ  കഴിയാത്തവർക്കായി ഫ്‌ളോട്ടിങ്ങ് ഡിസ്‌പെൻസറികളുടെ സേവനം   ലഭ്യമാക്കാൻ   ഡി.എം.ഒയോട് നിർദ്ദേശിച്ചിട്ടുണ്ട്. 

ആലപ്പുഴ: മുൻ എസ്.ഐയുടെ പരാക്രമങ്ങൾക്ക് പരിഹാരം തേടി  ഒരു കൂട്ടം വനിതകൾ വനിതാ കമ്മീഷനിൽ. തെളിവുസഹിതം ഹാജരാക്കിയ പരാതി ബോധ്യപ്പെട്ട വനിതാ കമ്മീഷൻ മുൻ  എസ്.ഐയോട് ഹാജരാകാൻ പറഞ്ഞിരുന്നെങ്കിലും സിറ്റിങിൽ അദ്ദേഹം പങ്കെടുത്തില്ല. തുടർന്ന് അടുത്ത സിറ്റിങിൽ മുൻ എസ്.ഐയെ ഹാജരാക്കണമെന്ന് ജില്ലാ പോലീസ് മേധാവിയോട് കമ്മീഷൻ ആവശ്യപ്പെട്ടു.