തിരുവനന്തപുരം ജില്ലാ പഞ്ചായത്ത് നടപ്പാക്കുന്ന സമ്പൂര്‍ണ കുടിവെള്ള പദ്ധതി ജലശ്രീ യുടെ ഭാഗമായി കുളങ്ങളുടെ നിര്‍മാണവും കിണര്‍ റീചാര്‍ജിംഗും ആരഭിച്ചു.  തൊഴിലുറപ്പ് പദ്ധതിയില്‍ ഉള്‍പ്പെടുത്തിയാണ് പ്രവൃത്തികള്‍ നടക്കുന്നത്.  

    ആറ്റിങ്ങല്‍ ഗവ. ഐ.റ്റി.ഐയില്‍ ഇന്‍സ്റ്റിറ്റ്യൂട്ട് മാനേജ്‌മെന്റ് കമ്മിറ്റിയും ബിം ലാബ്‌സ് എന്ന സ്ഥാപനവും സംയുക്തമായി തുടങ്ങുന്ന ഡിജിറ്റല്‍ പ്രോട്ടോ ടൈപ്പിംഗ് (ആട്ടോകാഡ് & സോളിഡ് വര്‍ക്‌സ്) എന്ന തൊഴിലധിഷ്ഠിത കോഴ്‌സിലേയ്ക്ക് അപേക്ഷിക്കാം.  മെക്കാനിക്കല്‍, ഓട്ടോ മൊബൈല്‍ അനുബന്ധ ട്രേഡുകളില്‍ ഐ.റ്റി.ഐ / ഡിപ്ലോമ / ബി.ടെക് യോഗ്യത അപേക്ഷകര്‍ക്കുണ്ടാകണം.  ഈ മാസം 30 ന് മുന്‍പായി അപേക്ഷിക്കേണ്ടതാണ്.  കൂടുതല്‍ വിവരങ്ങള്‍ക്ക് 0470 -2622391, 9744293003.  
(പി.ആര്‍.പി 1924/2017)
 

    തിരുവനന്തപുരം ജില്ലയിലെ പനവൂര്‍ ഗ്രാമപഞ്ചായത്തിന്റെ 2017 -18 വാര്‍ഷിക പദ്ധതിയിലുള്‍പ്പെടുത്തി നടപ്പാക്കുന്ന വയോ സൗഹൃദ ഗ്രാമം പദ്ധതിയുടെ ഭാഗമായുള്ള വയോജന സംഗമം ഇന്ന് (നവംബര്‍ 24) പനവൂരില്‍ നടക്കും.  സംസ്ഥാന ഭരണ പരിഷ്‌ക്കാര കമ്മിഷന്‍ ചെയര്‍മാന്‍ വി.എസ് അച്യുതാനന്ദന്‍ പരിപാടി ഉദ്ഘാടനം ചെയ്യും.  
    ഡി.കെ. മുരളി എം.എല്‍.എ യുടെ അധ്യക്ഷതയില്‍ നടക്കുന്ന ചടങ്ങില്‍ ജില്ലാ പഞ്ചായത്ത് പ്രസിഡന്റ് വി.കെ. മധു, വയോജനങ്ങള്‍ക്കുള്ള കട്ടില്‍ വിതരണം ചെയ്യും.  വിവിധ ജനപ്രതിനിധികളും പരിപാടിയില്‍ സംബന്ധിക്കും.  

രജിസ്‌ട്രേഷന്‍ പുതുക്കുന്നതിനായി 2017 സെപ്തംബര്‍, ഒക്‌ടോബര്‍ മാസങ്ങളില്‍ കൊയിലാണ്ടി ടൗണ്‍ എംപ്ലോയ്‌മെന്റ് എക്‌സ്‌ചേഞ്ചില്‍ രജിസ്‌ട്രേഷന്‍ കാര്‍ഡ് സമര്‍പ്പിച്ച് ഇനിയും പുതുക്കി തിരിച്ചുവാങ്ങാത്തവര്‍ അസ്സല്‍ സര്‍ട്ടിഫിക്കറ്റുകള്‍ സഹിതം നേരിേട്ടാ ദൂതന്‍ മുഖേനയോ നവംബര്‍ 28 നകം ഹാജരായി കാര്‍ഡ് കൈപ്പറ്റണം.

വി.കെ കൃഷ്ണമേനോന്‍ മ്യൂസിയത്തിന്റെ ആഭിമുഖ്യത്തില്‍ നടക്കുന്ന പൈതൃക വാരാഘോഷത്തിന്റെ ഭാഗമായി നവംബര്‍ 25 ന് രാവിലെ 11 ന് കോഴിക്കോടിന്റെ പൈതൃകം എന്ന വിഷയത്തില്‍ ഡോ.എം.ജി.എസ് നാരായണന്‍ സംസാരിക്കും. വൈകീട്ട് നാല് മണിക്ക് പൈതൃക പഠനം വ്യവഹാര രൂപങ്ങള്‍ എന്ന വിഷയം ഡോ.എം.ആര്‍.രാഘവ വാര്യരും, തിറ: പൈതൃകത്തിന്റെ വളരുന്ന വലക്കണ്ണികള്‍ എന്ന വിഷയം ഡോ.കെ.എം. ഭരതനും അവതരിപ്പിക്കും. വൈകീട്ട് ആറിന് തിറയാട്ടം അരങ്ങേറും.

കോഴിക്കോട് ഗവ. ഹോമിയോപ്പതിക് മെഡിക്കല്‍ കോളേജില്‍ സര്‍ജന്‍, ഗൈനക്കോളജിസ്റ്റ്, സോനോളജിസ്റ്റ് തസ്തികളിലേക്ക് താല്‍ക്കാലിക അടിസ്ഥാനത്തില്‍ ഗസ്റ്റ് ഫാക്കല്‍റ്റിമാരുടെ നിയമനം നടത്തുന്നു. താല്‍പര്യമുളളവര്‍ക്ക് കോളേജിന്റെ  www.ghmck.org  എന്ന വെബ് സൈറ്റില്‍ നിന്നും അപേക്ഷ ഫോം ഡൗണ്‍ ലോഡ് ചെയ്യാം. പൂരിപ്പിച്ച അപേക്ഷകള്‍ നവംബര്‍ 30 ന് വൈകുന്നേരം അഞ്ച് മണിക്ക് മുമ്പായി പ്രിന്‍സിപ്പല്‍, ഗവ. ഹോമിയോപ്പതിക് മെഡിക്കല്‍ കോളേജ്, കാരപ്പറമ്പ് പോസ്റ്റ്, കോഴിക്കോട് - 10 എ വിലാസത്തില്‍ ലഭിക്കണം.

  
കോഴിക്കോട് ജില്ലയിലെ വിദ്യാഭ്യാസ വകുപ്പില്‍ മ്യൂസിക് ടീച്ചര്‍ (ഹൈസ്‌ക്കൂള്‍, കാറ്റഗറി നമ്പര്‍ 530/2013), മ്യൂസിക് ടീച്ചര്‍ (യു.പി.എസ്, കാറ്റഗറി നമ്പര്‍ 239/ 2015) തസ്തികകളുടെ ചുരുക്കപ്പട്ടികയില്‍ ഉള്‍പ്പെട്ട് അഡ്മിറ്റ് ചെയ്യപ്പെട്ട ഉദ്യോഗാര്‍ഥികള്‍ക്ക് നവംബര്‍ 29, 30, ഡിസംബര്‍ ഒന്ന് തീയതികളില്‍ പി.എസ്.സി ജില്ലാ ഓഫീസില്‍ അഭിമുഖം നടക്കും. തപാല്‍ മുഖേന അറിയിപ്പ് കിട്ടാത്ത ഉദ്യോഗാര്‍ഥികള്‍ കോഴിക്കോട് പി.എസ്.സി ജില്ലാ ഓഫീസുമായി ബന്ധപ്പെടുക.

കോഴിക്കോട് ഗവ. മെഡിക്കല്‍ കോളജിലെ ജനറല്‍ മെഡിസിന്‍ വിഭാഗത്തില്‍ പ്രവര്‍ത്തിക്കുന്ന എ.ആര്‍.ടി ക്ലിനിക്കിലേക്ക് മെഡിക്കല്‍ ഓഫീസര്‍ തസ്തികയിലേക്ക് ഒരു വര്‍ഷത്തെ കരാര്‍ അടിസ്ഥാനത്തില്‍ നിയമനം നടത്തുന്നു. പ്രതിമാസ ശമ്പളം 36,000 രൂപ. എം.ബി.ബി.എസ്, നാക്കോ അംഗീകൃത കേന്ദ്രത്തില്‍ നിന്നുള്ള പരിശീലനം(ജനറല്‍ മെഡിസിന്‍ വിഷയത്തില്‍ എം.ഡി/ഡി.എന്‍.ബി ഉള്ളവര്‍ക്ക് മുന്‍ഗണന) എന്നിവയാണ് യോഗ്യത. യോഗ്യതയുള്ള ഉദ്യോഗാര്‍ഥികള്‍ സര്‍ട്ടിഫിക്കറ്റുകളുടെ അസ്സല്‍ സഹിതം നവംബര്‍ 30ന് രാവിലെ 11 മണിയ്ക്ക് പ്രിന്‍സിപ്പല്‍ മുമ്പാകെ അഭിമുഖത്തിന് ഹാജരാകണം. കൂടുതല്‍ വിവരങ്ങള്‍ക്ക് 0495 2350200.

ഡിസംബര്‍ 27,28,29 തീയ്യതികളില്‍ കോഴിക്കോട് നടക്കുന്ന സംസ്ഥാന തുടര്‍വിദ്യാഭ്യാസ കലോത്സവം പരിസ്ഥിതി സൗഹൃദമായ രീതിയില്‍ നടത്താന്‍ സംഘാടക സമിതി തീരുമാനിച്ചു. സംസ്ഥാന സാക്ഷരതാ മിഷന്‍ ഡയറക്ടര്‍ ഡോ. പി.എസ് ശ്രീകലയുടെ സാന്നിധ്യത്തില്‍ കോഴിക്കോട് ഇന്‍ഡോര്‍ സ്റ്റേഡിയത്തില്‍ ചേര്‍ന്ന യോഗത്തിലാണ് തീരുമാനം കൈക്കൊണ്ടത്. ജില്ലാ പഞ്ചായത്ത് പ്രസിഡണ്ട് ബാബു പറശ്ശേരി അദ്ധ്യക്ഷത വഹിച്ചു. കലോത്സവത്തിന്റെ പ്രചാരണം മുതല്‍ ഭക്ഷ്യശാലവരെയുളള എല്ലാ ഇടങ്ങളിലും പ്ലാസ്റ്റിക് മുക്തമാവും. ഭക്ഷണം നല്‍കുന്നതിന് സ്ലീല്‍ പാത്രങ്ങള്‍ ഉപയോഗിക്കും.

 കേരള കാര്‍ഷിക സര്‍വ്വകലാശാലയുടെ കീഴിലുളള പിലിക്കോട് പ്രാദേശിക കാര്‍ഷിക ഗവേഷണ കേന്ദ്രത്തിലെ ഒക്‌ടോബര്‍ മാസം വിളവെടുത്ത തേങ്ങകളും കൃഷിയിടത്തില്‍ നിന്നും ശേഖരിച്ച ചെറുതും മുളച്ചതുമായ തേങ്ങകളും ഉള്‍പ്പെടെ 9500 തേങ്ങകളും 400 ഗുണനിലവാരം കുറഞ്ഞ തേങ്ങകളും ദര്‍ഘാസ്/ലേല വ്യവസ്ഥകള്‍ക്ക് വിധേയമായി ലേലം ചെയതു വില്‍ക്കുന്നു.   ക്വട്ടേഷനുകള്‍ നവംബര്‍ 29 ന് വൈകിട്ട് 3 മണിക്ക് മുമ്പ് ഓഫീസില്‍ ലഭിക്കണം.  ദര്‍ഘാസ് സ്വികരിക്കുന്നതിന്റെ നിര്‍ദ്ദിഷ്ട സമയം കഴിഞ്ഞാല്‍ നാളികേരത്തിന്റെ പരസ്യ ലേലം നടത്തും.  ഫോണ്‍: 0467 2260632.
പി എന്‍ സി/4439/2017