രാജസ്ഥാനില്‍ ട്രെയിനിറങ്ങുമ്പോള്‍ രാഞ്ചോട്‌ലാല്‍ ഖാരാടിയയുടെ കാലുകളില്‍ പുതുപുത്തന്‍ ചെരുപ്പുണ്ടാവും. ഒപ്പം ഒന്നര വര്‍ഷം മുമ്പ് കാണാതായ ഭാര്യ റമീലാദേവിയും രണ്ടു വയസുകാരന്‍ മകന്‍ രവിയും. ഭാര്യയെയും മകനെയും രാഞ്ചോട്‌ലാല്‍ കൊലപ്പെടുത്തിയതാണെന്ന് ഗ്രാമമുഖ്യന്‍ ഉള്‍പ്പെടെയുള്ളവര്‍ കുറ്റപ്പെടുത്തിയപ്പോഴാണ് അവരെ കണ്ടെത്തിയിട്ടേ ചെരിപ്പിടൂയെന്ന് ശപഥമെടുത്തത്. കേരളത്തിന്റെ കരുതലില്‍ നിന്ന് ഭാര്യയെയും മകനെയും കണ്ടെത്തിയപ്പോള്‍ രാഞ്ചോട്‌ലാലിന്റെ കണ്ണുകള്‍ നിറഞ്ഞു. സ്‌നേഹത്തിന്റെ കരങ്ങളാല്‍ ഭാര്യയെയും മകനെയും പൊതിഞ്ഞു സൂക്ഷിച്ച കേരളത്തിന് നന്ദി പറഞ്ഞാണ് അവര്‍ മടങ്ങിയത്. 

ഇടുക്കി ജില്ലയില്‍ നീലക്കുറിഞ്ഞി ഉദ്യാനം സ്ഥാപിക്കുന്നതിന് 2006-ല്‍ പ്രാഥമിക വിജ്ഞാപനം പുറപ്പെടുവിച്ചതുമൂലം ജനങ്ങള്‍ക്കുളള ആശങ്ക ഒഴിവാക്കുന്നതിനും പ്രയാസങ്ങള്‍ പരിഹരിക്കുന്നതിനും അടിയന്തര നടപടി സ്വീകരിക്കാന്‍ മുഖ്യമന്ത്രി പിണറായി വിജയന്റെ അധ്യക്ഷതയില്‍ ചേര്‍ന്ന ഉന്നതതലയോഗം തീരുമാനിച്ചു.

വിദ്യാഭ്യാസ വകുപ്പിന്റെ നിയന്ത്രണത്തില്‍ കേരള മഹിള സമഖ്യ സൊസൈറ്റി മുഖേന കണ്ണൂര്‍ ജില്ലയിലുള്ള മഹിള ശിക്ഷണ്‍ കേന്ദ്രത്തിലേക്ക് വിവിധ തസ്തികകളിലേക്ക് ഡിസംബര്‍ ഒന്നിന് രാവിലെ 11 ന് വാക് ഇന്‍ ഇന്റര്‍വ്യൂ നടത്തും. ഇരിട്ടി ബ്ലോക്ക് ഓഫീസിന് സമീപമുള്ള കേരള മഹിള സമഖ്യ സൊസൈറ്റി ജില്ലാ ഓഫീസിലാണ് സ്ത്രീകള്‍ക്കുവേണ്ടിയുള്ള ഇന്റര്‍വ്യൂ. എസ്.സി/എസ്.ടി, ന്യൂനപക്ഷ വിഭാഗത്തില്‍പ്പെട്ടവര്‍ക്ക് മുന്‍ഗണന. ഒഴിവുകള്‍ : ഫൂള്‍ടൈം റസിഡന്‍ഷ്യല്‍ ടീച്ചര്‍ : വിദ്യാഭ്യാസ യോഗ്യത : ബിരുദം, ബി.എഡ്, പ്രായം : 25 വയസ്സിനും 40 വയസ്സിനും ഇടയ്ക്ക്, ഹോണറേറിയം : പ്രതിമാസം 11000/- രൂപ.

സംസ്ഥാനത്തെ സ്ത്രീകളുടെയും കുട്ടികളുടെയും ക്ഷേമം ഉറപ്പാക്കുന്നതിന് ഭരണപരിഷ്‌കാര കമ്മീഷന്‍ ഇടപെടുന്നു. ഇരുവിഭാഗങ്ങള്‍ക്കും നേരേ അതിക്രമങ്ങള്‍ വര്‍ദ്ധിച്ചുവരുന്ന സാഹചര്യത്തിലാണ് നടപടി. ഇതിന്റെ ഭാഗമായി പൊതുജനങ്ങള്‍, പൊതുപ്രവര്‍ത്തകര്‍, ഈ വിഷയത്തില്‍ താത്പര്യമുള്ള വ്യക്തികള്‍ എന്നിവരില്‍ നിന്ന് അഭിപ്രായങ്ങള്‍ തേടും. ഇതോടൊപ്പം വിവിധ സാമൂഹ്യക്ഷേമ നിയമങ്ങള്‍ സംബന്ധിച്ചും കമ്മീഷന്‍ പഠനം നടത്തുന്നുണ്ട്. മുതിര്‍ന്ന പൗരന്‍മാര്‍, ഭിന്നശേഷിക്കാര്‍, മാനസിക വെല്ലുവിളി നേരിടുന്നവര്‍, കുടിയേറ്റ തൊഴിലാളികള്‍ എന്നിവരുമായി ബന്ധപ്പെട്ട കാര്യങ്ങളും കമ്മീഷന്‍ പഠനവിഷയമാക്കും. 

     തിരുവനന്തപുരം ജില്ലാ പഞ്ചായത്തിന്റെ രണ്ടാം വാര്‍ഷികത്തിന്റെ ഭാഗമായി, നെടുമങ്ങാട് ജില്ലാ ആശുപത്രിയില്‍ നടപ്പാക്കിയ ആറ് പുതിയ വികസന പദ്ധതികള്‍ ഇന്ന് നവംബര്‍ 23) ഉദ്ഘാടനം ചെയ്യും.  വൈകുന്നേരം മൂന്ന് മണിക്ക് ആശുപത്രി അങ്കണത്തില്‍ ജില്ലാ പഞ്ചായത്ത് പ്രസിഡന്റ് വി.കെ. മധുവിന്റെ അധ്യക്ഷതയില്‍ നടക്കുന്ന ചടങ്ങില്‍ തദ്ദേശ സ്വയംഭരണ വകുപ്പ് മന്ത്രി കെ.റ്റി. ജലീല്‍ പദ്ധതികള്‍ നാടിനു സമര്‍പ്പിക്കും. 

     നിയമസഭയിലെ പരിസ്ഥിതി സംബന്ധിച്ച സമിതി നവംബര്‍ 23 രാവിലെ നിയമസഭയിലെ 5ഡി സമ്മേളന ഹാളില്‍ യോഗം ചേരും.  മൂക്കുന്നിമലയിലെ അനധികൃത ക്വാറി, ക്രഷര്‍ പ്രവര്‍ത്തനങ്ങള്‍ക്കെതിരെയും വെള്ളായണി കയലിന്റെ സംരക്ഷണ പ്രവര്‍ത്തനങ്ങള്‍ക്കായി സ്വീകരിക്കേണ്ട നടപടികള്‍ സംബന്ധിച്ചും സമിതിക്ക് ലഭിച്ചിട്ടുള്ള പരാതികളില്‍ ബന്ധപ്പെട്ട വകുപ്പുദേ്യാഗസ്ഥരില്‍ നിന്ന് തെളിവെടുക്കുന്നതിനാണ് യോഗം ചേരുന്നത്.  രാവിലെ 11 മണിക്ക് ചേരുന്ന യോഗത്തിനുശേഷം സമിതി ബന്ധപ്പെട്ട സ്ഥലങ്ങള്‍ സന്ദര്‍ശിക്കുകയും ചെയ്യും.
(പി.ആര്‍.പി 1919/2017)
 

    ക്യാമ്പയിന്‍ അവസാനിക്കാന്‍ രണ്ട് നാള്‍ ബാക്കി നില്‍ക്കെ ജില്ലയില്‍ ഒന്‍പത് മാസത്തിനും 15 വയസ്സിനുമിടയിലുള്ള 90 ശതമാനം കുട്ടികള്‍ക്കും എം ആര്‍ വാക്‌സിനേഷന്‍ നല്‍കാന്‍ കഴിഞ്ഞതായി സബ്കളക്ടര്‍ ഡോ ദിവ്യ എസ് അയ്യര്‍ അറിയിച്ചു.   ക്യാമ്പയിന്‍ അവസാനിക്കുന്ന നവംബര്‍ 25നകം ഈ ഗ്രൂപ്പില്‍ പെടുന്ന മുഴുവന്‍ കുട്ടികള്‍ക്കും വാക്‌സിന്‍ നല്‍കാനാവുമെന്ന് പ്രതീക്ഷിക്കുന്നതായും അതിന് എല്ലാ വിഭാഗം ജനങ്ങളുടെയും സഹായ സഹകരണങ്ങള്‍ അത്യന്താപേക്ഷിതമാണെന്നും അവര്‍ പറഞ്ഞു. സബ്കളക്ടറുടെ ചേമ്പറില്‍ ചേര്‍ന്ന വാക്‌സിനേഷന്‍ കര്‍മ്മസേനയുടെ അവലോകന യോഗത്തില്‍ സംസാരിക്കുകയായിരുന്നു അവര്‍.