ജില്ലയില്‍ ഉപതെരഞ്ഞെടുപ്പ് നടന്ന തദ്ദേശ സ്വയം ഭരണസ്ഥാപനങ്ങളില്‍ രണ്ട് സീറ്റുകള്‍ എല്‍.ഡി.എഫും രണ്ട് സീറ്റുകള്‍ യു.ഡി.എഫും നേടി. പൊന്നാനി നഗരസഭയിലെ അഴീക്കല്‍ വാര്‍ഡില്‍ മുസ്ലിം ലീഗിലെ ആത്തിക്ക് പറമ്പില്‍ എട്ട് വോട്ടുകളുടെ ഭൂരിപക്ഷത്തില്‍ വിജയിച്ചു. പോത്തുകല്ല് ഗ്രാമ പഞ്ചായത്തിലെ ഞെട്ടിക്കുളം വാര്‍ഡില്‍ സി.പി.ഐ (എം) സ്ഥാനാര്‍ഥി രജനി 88 വോട്ടുകളുടെ ഭൂരിപക്ഷത്തില്‍ വിജയിച്ചു. തിരുവാലി എ.കെ.ജി നഗര്‍ വാര്‍ഡില്‍ സിപിഐ(എം) സ്ഥാനാര്‍ഥി വി.കെ ബേബിയും എടയൂര്‍ തിണ്ടലം വാര്‍ഡില്‍ കോണ്‍ഗ്രസിലെ കെ.കെ മോഹനകൃഷ്ണനും വിജയിച്ചു.

ഫിഷറീസ് വകുപ്പിന് കീഴില്‍ ജില്ലയില്‍ മത്സ്യത്തൊഴിലാളികളുടെ ഭവന പുനരുദ്ധാരണം, ടോയലറ്റ് നിര്‍മ്മാണം, പുനര്‍വൈദ്യൂതീകരണം (രണ്ടാം ഘട്ടം) പദ്ധതികളുടെ കരട് അര്‍ഹതാ ഗുണഭോക്തൃ ലിസ്റ്റ് ജനുവരി 15ന് അതത് മത്സ്യഭവന്‍ ഓഫീസുകളില്‍ പ്രസിദ്ധീകരിക്കും. ലിസ്റ്റ് പരിശോധിച്ച് അപ്പീല്‍ നല്‍കുന്നതിനുളള അവസാന തിയ്യതി ജനുവരി 20 ഉച്ചയ്ക്ക് 12 വരെയാണ്. അതിനുശേഷം ലഭിക്കുന്ന അപ്പീല്‍ അപേക്ഷകള്‍ സ്വീകരിക്കുന്നതല്ലെന്ന് പൊന്നാനി ഫിഷറീസ് ഡെപ്യൂട്ടി ഡയറക്ടര്‍ അറിയിച്ചു.

സ്റ്റോണ്‍ ബ്രോക്കിങ് ക്രഷിങ്, കണ്‍സ്ട്രക്ഷന്‍ ഓര്‍ മെയിന്റനന്‍സ് ഓഫ് റോഡ്‌സ് ആന്‍ഡ് ബില്‍ഡിങ് ഓപ്പറേഷന്‍ മേഖലയിലെ തൊഴിലാളികളുടെ മിനിമം വേതനം പുതുക്കി നിശ്ചയിക്കുന്നതിനുള്ള മിനിമം വേതന ഉപദേശക സമിതിയുടെ തെളിവെടുപ്പ് യോഗം ജനുവരി 20ന് രാവിലെ 10ന് കോഴിക്കോട് വ്യാപാരി വ്യവസായി ഏകോപന സമിതി കോണ്‍ഫറന്‍സ് ഹാളില്‍ ചേരും. തെളിവെടുപ്പ് യോഗത്തില്‍ ജില്ലയിലെ ബന്ധപ്പെട്ട മേഖലയിലെ പ്രതിനിധികള്‍ പങ്കെടുക്കണമെന്ന് ജില്ലാ ലേബര്‍ ഓഫീസര്‍ (എന്‍ഫോഴ്‌സ്‌മെന്റ്) അറിയിച്ചു.

പൊന്നാനി സബ് രജിസ്ട്രാര്‍ ഓഫീസില്‍ ജനുവരി 11ന് നടത്താനിരുന്ന അണ്ടര്‍ വാല്യൂഷന്‍ അദാലത്ത് ജനുവരി 25 ലേക്ക് മാറ്റിയതായി ജില്ലാ രജിസ്ട്രാര്‍ (ഓഡിറ്റ്) അറിയിച്ചു.

സംസ്ഥാന വനിതാ കമ്മീഷന്‍ കലക്ടറേറ്റ് സമ്മേളന ഹാളില്‍ ജനുവരി 24ന് രാവിലെ 10.30 മുതല്‍ മെഗാ വനിതാ അദാലത്ത് സംഘടിപ്പിക്കുന്നു.

പാലക്കാട് വ്യാവസായിക ട്രൈബ്യൂണലും ഇന്‍ഷൂറന്‍സ് കോടതി ജഡ്ജിയും എംപ്ലോയീസ് കോമ്പന്‍സേഷന്‍ കമ്മീഷണറുമായ സാബു സെബാസ്റ്റ്യന്‍ ജനുവരി 19ന് തിരൂര്‍ ആര്‍.ഡി.ഒയുടെ കാര്യാലയത്തിലെ കോര്‍ട്ട് ഹാളില്‍ സിറ്റിങ് നടത്തും. സിറ്റിങില്‍ തൊഴില്‍ തര്‍ക്ക കേസുകളും ഇന്‍ഷൂറന്‍സ് കേസുകളും എംപ്ലോയീസ് കോമ്പന്‍സേഷന്‍ കേസുകളും വിചാരണ ചെയ്യും.

ജില്ലാ എംപ്ലോയ്‌മെന്റ് എക്‌സ്‌ചേഞ്ചിനു കീഴിലെ എംപ്ലോയബിലിറ്റി സെന്ററിലൂടെ വിവിധ സ്വകാര്യ സ്ഥാപനങ്ങളിലേക്ക് കസ്റ്റമര്‍ മാനേജര്‍മാരെ തിരഞ്ഞെടുക്കുന്നു. അപേക്ഷകര്‍ മലപ്പുറം ടൗണിന്റെ 15 കി.മീറ്ററിനുള്ളില്‍ താമസിക്കുന്നവരും ടൂവീലര്‍ ഡ്രൈവിങ് ലൈസന്‍സുള്ളവരുമായിരിക്കണം. ബിരുദധാരികള്‍ക്കും പ്ലസ്ടു വിജയിച്ചവര്‍ക്കും അപേക്ഷിക്കാം. താല്‍പര്യമുള്ളവര്‍ ജനുവരി 17ന് രാവിലെ 10ന് രേഖകളുടെ പകര്‍പ്പുമായി ജില്ലാ എംപ്ലോയബിലിറ്റി സെന്ററില്‍ എത്തണം. ഫോണ്‍ 0483 2734737.

മലപ്പുറം താലൂക്ക് ആശുപത്രിയില്‍ പൊളിച്ച പഴയ കെട്ടിടത്തിന്റെ ഉപയോഗപ്രദമായ സാധനങ്ങള്‍ വില്‍ക്കുന്നതിന് ടെണ്ടര്‍ ക്ഷണിച്ചു. ടെണ്ടര്‍ ജനുവരി 22ന് വൈകീട്ട് അഞ്ചിനകം ലഭിക്കണം.

ഏറനാട് താലൂക്ക് എടവണ്ണ വില്ലേജിലെ ബ്ലോക്ക് നമ്പര്‍ 73, റീ.സര്‍വെ 205/22ല്‍ 0.0020 ഹെക്ടര്‍, ബ്ലോക്ക് 73ല്‍ റീ സര്‍വ്വെ 205/23ല്‍ 0.0140 ഹെക്ടര്‍ സ്ഥലവും ജനുവരി 16ന് രാവിലെ 11ന് എടവണ്ണ വില്ലേജ് ഓഫീസ് പരിസരത്ത് പുനര്‍ലേലം ചെയ്യും.

ദേശീയ യുവജന ദിനത്തോടനുബന്ധിച്ച് കലക്‌ട്രേറ്റ് പരിസരത്ത് സ്‌പോട്‌സ് കൗണ്‍സില്‍, നെഹ്‌റു യുവകേന്ദ്ര, എന്‍.എസ്.എസ്, എന്‍.സി.സി തുടങ്ങിയ സംഘടനകളുടെ സഹകരണത്തോടെപരിപാടി സംഘടിപ്പിച്ചു. ജില്ലാ പഞ്ചായത്ത് മെമ്പര്‍ എം.ബി. ഫൈസല്‍ ഉദ്ഘാടനം ചെയ്തു. സംസ്ഥാന യുവജന ക്ഷേമ ബോര്‍ഡ് മെമ്പര്‍ ശരീഫ് പാലോളി അധ്യക്ഷത വഹിച്ചു. ജില്ലാ യൂത്ത് കോഡിനേറ്റര്‍ കെ.പി. നജ്മുദ്ദീന്‍, കെ.എസ്.വൈ.ഡബ്ല്യു.ബി ജില്ലാ പ്രോഗ്രാം ഓഫീസര്‍ രഞ്ജിത്ത് മാമ്പ്രത്ത്, നഗരസഭ കൗണ്‍സിലര്‍ സലീന ടീച്ചര്‍, ദേശീയ യൂത്ത് അവാര്‍ഡ് ജേതാവ് എന്‍. ബാബുരാജ് തുടങ്ങിയവര്‍ പങ്കെടുത്തു.