സംസ്ഥാന പിന്നാക്ക വിഭാഗ വികസന കോര്‍പ്പറേഷന്‍ ഒബിസി വിഭാഗത്തില്‍പ്പെട്ട പ്രൊഫഷണലുകള്‍ക്ക് സ്റ്റാര്‍ട്ട് അപ് സംരംഭം ആരംഭിക്കുന്നതിനുള്ള വായ്പാ പദ്ധതിക്ക് ഈ മാസം 16 മുതല്‍ ഓണ്‍ലൈന്‍ രജിസ്ട്രേഷന്‍ നടത്താം. പിന്നാക്ക വിഭാഗ വികസന വകുപ്പിന്‍റെ സഹകരണത്തോടെയാണ് പദ്ധതി നടപ്പാക്കുന്നത്. 10 ലക്ഷം രൂപ വരെ വായ്പ അനുവദിക്കും. ഗ്രാമപ്രദേശത്ത് 98,000 രൂപ വരെയും നഗരപ്രദേശത്ത് 120000 രൂപ വരെയും വാര്‍ഷിക വരുമാനമുള്ളവര്‍ക്ക് അഞ്ച് ലക്ഷം രൂപ വരെ ആറ് ശതമാനം പലിശ നിരക്കിലും അതിനു മുകളില്‍ 10 ലക്ഷം രൂപ വരെ ഏഴ് ശതമാനം പലിശ നിരക്കിലും വായ്പ ലഭിക്കും. 84 മാസമാണ് തിരിച്ചടവ് കാലയളവ്.

ലഹരിക്കെതിരെ കായിക ലഹരി ക്യാംപയിന്റെ ഭാഗമായി എക്‌സൈസ് വകുപ്പ് ജില്ലാ കബഡി അസോസിയേഷനുമായി ചേര്‍ന്ന് 19 വയസില്‍ താഴെയുള്ള വിദ്യാര്‍ഥികള്‍ക്കായി സംഘടിപ്പിക്കുന്ന കബഡി മത്സരങ്ങള്‍ക്ക് ജില്ലയില്‍ തുടക്കമായി. കന്യാകുളങ്ങര പബ്ലിക് മാര്‍ക്കറ്റ് ഗ്രൗണ്ടില്‍ നടന്ന ജില്ലാ തല മത്സരങ്ങള്‍ ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്റ് ഡി മോഹനന്‍ ഉദ്ഘാടനം ചെയ്തു. പാറശ്ശാല, നെയ്യാറ്റിന്‍കര, കാട്ടാക്കട, ബാലരാമപുരം, നെടുമങ്ങാട്, പാലോട്, കിളിമാനൂര്‍, ആറ്റിങ്ങല്‍, വര്‍ക്കല, കണിയാപുരം, തിരുവനന്തപുരം സൗത്ത്, നോര്‍ത്ത് വിദ്യാഭ്യാസ ഉപജില്ലകളാണ് മത്സരത്തില്‍ മാറ്റുരയ്ക്കുന്നത്.

തിരുവനന്തപുരം ജില്ലാ സൈനികക്ഷേമ ഓഫീസില്‍ രജിസ്റ്റര്‍ ചെയ്തിട്ടുള്ള വിമുക്ത ഭടന്മാര്‍, സ്വകാര്യ സ്ഥാപനങ്ങളില്‍ വരുന്ന ഒഴിവുകളില്‍ ജോലി ചെയ്യാന്‍ താല്‍പ്പര്യം ഉണ്ടെങ്കില്‍ സൈനിക ക്ഷേമ ഓഫീസില്‍ വിവരങ്ങള്‍ നല്‍കണമെന്ന് ജില്ലാ സൈനിക ക്ഷേമ ഓഫീസര്‍ അറിയിച്ചു. സ്വകാര്യ സ്ഥാപനങ്ങളില്‍ നിന്ന് റിപ്പോര്‍ട്ട് ചെയ്യുന്ന ഒഴിവുകളിലേയ്ക്ക് പ്രതേ്യകം തയ്യാറാക്കിയ ലിസ്റ്റില്‍ നിന്നായിരിക്കും നിയമിക്കുന്നതെന്നും അറിയിപ്പില്‍ പറയുന്നു. (പി.ആര്‍.പി 1037/2018)

മകരസംക്രമ സന്ധ്യയില്‍ ശബരിമലയിലെ അയ്യപ്പ വിഗ്രഹത്തില്‍ ചാര്‍ത്താനുള്ള തിരുവാഭരണങ്ങള്‍ വഹിച്ചുകൊണ്ടുള്ള ഘോഷയാത്ര പന്തളം വലിയകോയിക്കല്‍ ക്ഷേത്രത്തില്‍ നിന്ന് പുറപ്പെട്ടു. ഇന്നലെ ഉച്ചയ്ക്ക് ഒരു മണിയോടെ കൃഷ്ണപരുന്ത് ആകാശത്ത് വട്ടമിട്ട് പറന്നതോടെയാണ് തിരുവാഭരണ ഘോഷയാത്ര പുറപ്പെട്ടത്. പരമ്പരാഗത കാനനപാതയിലൂടെ മൂന്നു ദിവസം കൊണ്ട് തിരുവാഭരണങ്ങള്‍ ശബരിമലയിലെത്തിക്കും. ജനുവരി 14 ഞായറാഴ്ചയാണ് മകരവിളക്ക്.

1939 സെപ്റ്റംബര്‍ മൂന്ന് മുതല്‍ 1946 ഏപ്രില്‍ 01 വരെയുള്ള കാലയളവില്‍ രണ്ടാം ലോക മഹായുദ്ധത്തില്‍ പങ്കെടുത്ത വിമുക്ത ഭടന്മാര്‍ക്കും അവരുടെ വിധവകള്‍ക്കും സംസ്ഥാന സര്‍ക്കാര്‍ നല്‍കി വന്നിരുന്ന പ്രതിമാസ ധനസഹായം 6000 രൂപയായി വര്‍ധിപ്പിച്ചിട്ടുണ്ട്. മറ്റ് പെന്‍ഷനുകള്‍ ലഭിക്കാത്തവരും ഇതുവരെ ഈ പെന്‍ഷന് അപേക്ഷിച്ചിട്ടില്ലാത്തവരുമായ രണ്ടാം ലോക മഹായുദ്ധത്തില്‍ പങ്കെടുത്ത വിമുക്തഭടന്മാരും അവരുടെ വിധവകളും തിരുവനന്തപുരം ജില്ലാ സൈനികക്ഷേമ ഓഫീസില്‍ എത്രയും വേഗം അപേക്ഷ സമര്‍പ്പിക്കണമെന്ന് ജില്ലാ സൈനിക ക്ഷേമ ഓഫീസര്‍ അറിയിച്ചു. (പി.ആര്‍.പി 1036/2018)

സംസ്ഥാന പിന്നാക്ക വിഭാഗ വികസന കോര്‍പ്പറേഷന്‍ ഒ.ബി.സി. വിഭാഗത്തില്‍പ്പെട്ട പ്രൊഫഷണലുകള്‍ക്ക് സ്റ്റാര്‍ട്ട് അപ് സംരംഭം തുടങ്ങാന്‍ പിന്നാക്ക വിഭാഗ വികസന വകുപ്പിന്റെ സഹകരണത്തോടെ നടപ്പാക്കുന്ന വായ്പാ പദ്ധതിയ്ക്കുള്ള ഓണ്‍ലൈന്‍ രജിസ്‌ട്രേഷന്‍ ഈ മാസം 16 ന് ആരംഭിക്കുമെന്ന് കോര്‍പ്പറേഷന്‍ മാനേജിംഗ് ഡയറക്ടര്‍ അറിയിച്ചു. പദ്ധതി പ്രകാരം പരമാവധി 10 ലക്ഷം രൂപ വരെ വായ്പയായി അനുവദിക്കും. ഗ്രാമപ്രദേശത്ത് 98,000 രൂപ വരെയും നഗരപ്രദേശത്ത് 1,20,000 രൂപ വരെയും വാര്‍ഷിക വരുമാനമുള്ളവര്‍ക്ക് 5 ലക്ഷം രൂപ വരെ 6% പലിശ നിരക്കിലും അതിനുമുകളില്‍ 10 ലക്ഷം രൂപവരെ 7% പലിശ നിരക്കിലുമാണ് നല്‍കുന്നത്.

ഓഖി ദുരിതബാധിതരെ സഹായിക്കാനായി മുഖ്യമന്ത്രിയുടെ ദുരിതാശ്വാസ നിധിയിലേയ്ക്ക്തിരുവനന്തപുരം നഗരസഭയിലെ ജീവനക്കാരും തൊഴിലാളികളും സംഭാവനചെയ്ത 11,91,722 രൂപ മേയര്‍ വി.കെ. പ്രശാന്ത്, മുഖ്യമന്ത്രി പിണറായി വിജയന് കൈമാറി. ഡെപ്യൂട്ടി മേയര്‍ രാഖി രവികുമാര്‍, സ്ഥിരംസമിതി അദ്ധ്യക്ഷന്മാരായ വഞ്ചിയൂര്‍ പി. ബാബു, സഫീറാബീഗം, ആര്‍. സതീഷ് കുമാര്‍, എസ്. ഉണ്ണികൃഷ്ണന്‍, ജീവനക്കാരുടെയും തൊഴിലാളികളുടെയും പ്രതിനിധികള്‍ തുടങ്ങിയവരും മേയര്‍ക്കൊപ്പമുണ്ടായിരുന്നു. (പി.ആര്‍.പി 1034/2018)

അന്യംനിന്നുപോകുന്ന മലയാളത്തിന്റെ തനിനാടന്‍ കലകളുടെ പുനരുജ്ജീവനവും പ്രോത്സാഹനവും ലക്ഷ്യം വച്ച് സംസ്ഥാന സര്‍ക്കാര്‍, വിനോദസഞ്ചാര വകുപ്പിന്റെ നേതൃത്വത്തില്‍ ജില്ലയുടെ വിവിധ സ്ഥലങ്ങളില്‍ നടത്തിയ ഉത്സവം 2018 സമാപിച്ചു. ജില്ലയിലെ കഴക്കൂട്ടം, ശംഖുംമുഖം, വര്‍ക്കല എന്നിവിടങ്ങളിലാണ് കഴിഞ്ഞ ഒരാഴ്ചക്കാലമായി വിവിധ നാടന്‍ കലാരൂപങ്ങള്‍ അരങ്ങേറിയത്.

തിരുവനന്തപുരം കളക്ടറേറ്റില്‍ സ്റ്റാഫ് വെല്‍ഫെയര്‍ ആന്റ് റിക്രിയേഷന്‍ ക്ലബിന്റെ കഴിഞ്ഞവര്‍ഷത്തെ സുവനീര്‍ സ്പര്‍ശം പ്രകാശനം ചെയ്തു. കളക്ടര്‍ ഡോ. കെ. വാസുകി ഉദ്ഘാടനം ചെയ്ത യോഗത്തില്‍ കവിയും നാടക രചയിതാവുമായ കാര്യവട്ടം ശ്രീകണ്ഠന്‍ നായര്‍, സബ് കളക്ടര്‍ ഡോ. ദിവ്യ. എസ്. അയ്യര്‍ക്ക് ആദ്യപ്രതി നല്‍കി സുവനീര്‍ പ്രകാശിപ്പിച്ചു. എ.ഡി.എം. ജോണ്‍ വി. സാമുവല്‍, മാനേജിംഗ് എഡിറ്റര്‍ ജി. പ്രദീപ് കുമാര്‍, ചീഫ് എഡിറ്റര്‍ ആര്‍.കെ. അനില്‍ കുമാര്‍, ഷിജിന്‍ എസ്.ആര്‍, രാജേഷ് എസ്, കളക്ടറേറ്റ് ജീവനക്കാര്‍ തുടങ്ങിയവര്‍ ചടങ്ങില്‍ സംബന്ധിച്ചു. (പി.ആര്‍.പി 1032/2018)

കേന്ദ്ര - കേരള സര്‍ക്കാരും ഭവന നിര്‍മാണ ബോര്‍ഡും സംയുക്തമായി പേരൂര്‍ക്കട എന്‍.സി.സി നഗറില്‍ പുതിയതായി നിര്‍മിച്ച വര്‍ക്കിംഗ് വിമന്‍സ് ഹോസ്റ്റല്‍ പ്രവര്‍ത്തനസജ്ജമായതായി എക്‌സിക്യൂട്ടീവ് എന്‍ജിനീയര്‍ അറിയിച്ചു. വനിതാ ഉദേ്യാഗസ്ഥര്‍ വിശദവിവരങ്ങള്‍ക്കായി എക്‌സിക്യൂട്ടീവ് എന്‍ജിനീയര്‍, പി. & സി ഡിവിഷന്‍ നമ്പര്‍, കെ.എസ്.എച്ച്.ബി, തിരുവനന്തപുരം എന്ന വിലാസത്തിലോ 0471 2536323, 2431535, 9446381873 നമ്പറുകളിലോ ബന്ധപ്പെടേണ്ടതാണ്. (പി.ആര്‍.പി 1031/2018)