പച്ചത്തേയിലയുടെ ഡിസംബര്‍ മാസത്തെ താങ്ങുവില 11.50 രൂപയായി നിശ്ചയിച്ചു.  എ.ഡി.എം. കെ.എം.രാജുവിന്റെ അധ്യക്ഷതയില്‍ കളക്ടറേറ്റില്‍ ചേര്‍ന്ന യോഗത്തിലാണ് തീരുമാനം.  എല്ലാ ഫാക്ടറികളും അതത് മാസത്തെ തേയില വിറ്റുവരവ് നിലവാരവും പച്ചത്തേയിലയ്ക്ക് നല്‍കുന്ന വിലയും നോട്ടീസ് ബോര്‍ഡില്‍ പ്രദര്‍ശിപ്പിക്കുകയും രജിസ്റ്റര്‍ സൂക്ഷിക്കുകയും വേണം.

എംപ്ലോയ്‌മെന്റ് എക്‌സ്‌ചേഞ്ച് മുഖാന്തിരം ആരോഗ്യവകുപ്പിലേക്ക് പാര്‍ട്ട്‌ടൈം സ്വീപ്പര്‍മാരെ തെരഞ്ഞെടുക്കുന്നതിലേക്ക് ജനുവരി മൂന്ന്, നാല്, അഞ്ച്, എട്ട്, ഒന്‍പത്, 16, 18 തീയതികളില്‍ കോട്ടയം ജനറല്‍ ആശുപത്രി എന്‍.എച്ച്.എം ഹാളില്‍ നടത്താനിരുന്ന ഇന്റര്‍വ്യൂ മാറ്റിവച്ചു. പുതുക്കിയ തീയതി പിന്നീട് അറിയിക്കുമെന്ന് ജില്ലാ മെഡിക്കല്‍ ഓഫീസര്‍ (ആരോഗ്യം) അറിയിച്ചു.    

ജില്ലയിലെ പ്രധാന വിനോദസഞ്ചാര കേന്ദ്രമായ ഇല്ലിക്കല്‍ കല്ലിലേയ്ക്ക് സുരക്ഷാക്രമീകരണത്തിന്റെ ഭാഗമായി ഡിസംബര്‍ 31ന് വൈകിട്ട് 5നു ശേഷം പ്രവേശനം നിരോധിച്ചു.

ഡിസംബര്‍ മാസത്തെ ജില്ലാ വികസന സമിതി യോഗം ഇന്ന് (ഡിസംബര്‍ 30) രാവിലെ 11 ന്  കളക്‌ട്രേറ്റ് കോണ്‍ഫറന്‍സ് ഹാളില്‍ ചേരും.