ഇന്നു (ഡിസംബര്‍ 28) നടത്താനിരുന്ന ജില്ലാ സ്‌പോര്‍ട്ട്‌സ് കൗണ്‍സില്‍ വാര്‍ഷിക ജനറല്‍ ബോഡി യോഗം ജനുവരി 10 ലേക്ക് മാറ്റിയതായി സ്‌പോര്‍ട്ട്‌സ് കൗണ്‍സില്‍ സെക്രട്ടറി അറിയിച്ചു. ജനുവരി 10 ന് ഉച്ചയ്ക്ക് 3.30ന് കളക്ടറേറ്റ് കോണ്‍ഫറന്‍സ് ഹാളിലായിരിക്കും യോഗം .

ക്രിസ്തുമസ് - ശബരിമല മണ്ഡലകാല സീസണ്‍ പരിഗണിച്ച് ഡിസംബര്‍ മാസത്തെ അഞ്ച് കി.ഗ്രാം വീതം സ്‌പെഷ്യല്‍ ആട്ട കി.ഗ്രാമിന് 15 രൂപ നിരക്കില്‍ എല്ലാ കാര്‍ഡുടമകള്‍ക്കും റേഷന്‍ കട വഴി ലഭിക്കുമെന്ന് ജില്ലാ സപ്ലൈ ഓഫീസര്‍ അറിയിച്ചു.

ജില്ലാ കലക്ടര്‍ അമിത് മീണയുടെ നേതൃത്വത്തില്‍ നടക്കുന്ന കൊണ്ടോട്ടി താലൂക്ക് പൊതുജന പരാതി പരിഹാര അദാലത്ത് ജനുവരി 20ന് രാവിലെ ഒമ്പത് മുതല്‍ 12.30 വരെ നടക്കും. അദാലത്തിലേക്കുള്ള അപേക്ഷകളും പരാതികളും ജനുവരി നാലിന് വൈകുന്നേരം വരെ അക്ഷയ കേന്ദ്രങ്ങള്‍ മുഖേന സ്വീകരിക്കും. 

പകര്‍ച്ചവ്യാധി പ്രതിരോധ പ്രവര്‍ത്തനങ്ങള്‍ക്കായി ആരോഗ്യ ജാഗ്രത പരിപാടി നടത്തുന്നു.  ഡെങ്കിപ്പനി, എലിപ്പനി, മലമ്പനി, മഞ്ഞപ്പിത്തം, വയറിളക്ക രോഗങ്ങള്‍ എന്നിവ ക്രമാതീതമായി വര്‍ദ്ധിച്ചു വരുന്നതിനാല്‍ വരും കാലങ്ങളില്‍ ഇവയെ നിയന്ത്രിക്കുന്നതിനും മരണ നിരക്ക് കുറയ്ക്കുന്നതിനും ആരോഗ്യ ജാഗ്രത എന്ന ഊര്‍ജ്ജിത പകര്‍ച്ച വ്യാധി നിയന്ത്രണ പരിപാടി ആരോഗ്യ വകുപ്പ് സംഘടിപ്പിക്കുന്നു.  ബഹുജന പങ്കാളിത്തത്തോടു കൂടി കൊതുകിന്റെ ഉറവിട നശീകരണ പ്രവര്‍ത്തനങ്ങള്‍, വീടുകള്‍, പൊതുസ്ഥലങ്ങള്‍, വ്യാപാര സ്ഥാപനങ്ങള്‍, സര്‍ക്കാര്‍ ഓഫീസുകള്‍, തോട്ടങ്ങള്‍ എന്നിവിടങ്ങളില്‍ സമയബന്ധിതമായി നടപ്പാക്കുന്ന പദ്ധതിയാണിത്.

ജില്ലയില്‍ ഒരു വര്‍ഷം നീണ്ടു നില്‍ക്കുന്ന ഊര്‍ജ്ജിത പകര്‍ച്ചവ്യാധി പ്രതിരോധ പ്രവര്‍ത്തനങ്ങള്‍ക്ക് തുടങ്ങുന്നതിന്റെ ഭാഗമായി ജനുവരി ഒന്നിന് രാവിലെ 10ന് കലക്റ്ററുടെ ചേമ്പറില്‍ വിവിധ വകുപ്പ് തലവന്‍മാരുടെ കോ-ഓര്‍ഡിനേഷന്‍ കമ്മിറ്റി യോഗം ചേരും.  യോഗത്തില്‍ എല്ലാ വകുപ്പ് മേധാവികളും പങ്കെടുക്കണമെന്ന് ജില്ലാ കലക്ടര്‍ അറിയിച്ചു.

ഏറനാട് താലൂക്ക് വികസന സമിതി യോഗം ജനുവരി ആറിന് രാവിലെ 10.30ന് ഏറനാട് താലൂക്ക് ഓഫീസില്‍ ചേരും.

ജില്ലാ വികസന സമിതി യോഗം ഇന്ന് (ഡിസംബര്‍ 30) രാവിലെ 11 ന് കലക്‌ട്രേറ്റ് കോണ്‍ഫ്രന്‍സ് ഹാളില്‍ നടക്കും.

                    
പെരിന്തല്‍മണ്ണ ഗവ. പോളിടെക്‌നിക് കോളേജില്‍ അപ്രന്റീസ് ട്രെയിനികളെ നിയമിക്കും. താല്‍പര്യമുളള പരിസര പ്രദേശവാസികളായ എഞ്ചിനീയറിംഗ് ഡിപ്‌ളോമ / ഡിഗ്രി യോഗ്യതയുളളവര്‍ അസ്സല്‍ സര്‍ട്ടിഫിക്കറ്റുകള്‍ സഹിതം ജനുവരി 15 നകം പ്രിന്‍സിപ്പാള്‍ മുമ്പാകെ ഹാജരാകണം. ഡിപ്‌ളോമ യോഗ്യതയുളളവര്‍ക്ക് 3542രൂപയും ഡിഗ്രി  യോഗ്യതയുളളവര്‍ക്ക് 4984 രൂപയും പ്രതിമാസം സ്‌റ്റൈപ്പന്റ് ലഭിക്കും.

മഞ്ചേരി 66 കെ.വി.സബ്‌സ്റ്റേഷനില്‍ പണി നടക്കുന്നതിനാല്‍ ജനുവരി ഒന്ന് രാവിലെ ഏഴു മുതല്‍ വൈകിട്ട് ഏഴു വരെ  66 കെ.വി. മഞ്ചേരി, 66 കെ.വി നിലമ്പൂര്‍ , 66 കെ.വി എടക്കര  33  കെ.വി പൂക്കോട്ടുംപാടം എന്നീ സബ്‌സ്റ്റേഷനുകളില്‍ നിന്നുള്ള വൈദ്യുതി വിതരണം തടസ്സപ്പെടും.

    റിപ്പബ്ലിക് ദിനാഘോഷം വിപുലമായി ആഘോഷിക്കുന്നതിനെ കുറിച്ച് ചര്‍ച്ച ചെയ്യുന്നതിന് ജനുവരി നാലിന് രാവിലെ 11.30ന് കലക്റ്ററുടെ ചേമ്പറില്‍ യോഗം ചേരും.