പൊന്നാനി താലൂക്കില്‍ എടപ്പാള്‍ വില്ലേജില്‍ അറമുഖന്‍ ട/0 കോര്‍മന്‍ പെരുമ്പറമ്പ് എന്നയാളും സഹോദരി കുഞ്ഞി എന്ന തങ്കമാളുവും മരണപ്പെടുകയും ഇവര്‍ക്ക് അനന്തരാവകാശികള്‍ ഇല്ലാത്തതിനാലും ഇവരുടെ അധീനതയില്‍ എടപ്പാള്‍ അംശം റീ.സ 60/6ല്‍പ്പെട്ട 20.81 സെന്റ് ഭൂമി കേരള എസ്ചീറ്റ്‌സ് ആന്‍ഡ് ഫോര്‍ഫിച്ചേഴ്‌സ് ആക്ട് പ്രകാരം സര്‍ക്കാരിലേക്ക് കണ്ടുകെട്ടുന്നതായിരിക്കും.  ആക്ഷേപമുള്ളവര്‍ നോട്ടീസ് പരസ്യപ്പെടുത്തിയ തിയ്യതി മുതല്‍ 180 ദിവസത്തിനകം ജില്ലാ കലക്ടര്‍ക്ക് രേഖാമൂലം നല്‍കണം.

കയര്‍ ഭൂവസ്ത്ര വിതാനം ജില്ലാതല ഉദ്ഘാടനം ഡിസംബര്‍ 30ന് രാവിലെ 10.30ന് വട്ടംകുളം പഞ്ചായത്തിലെ 16-ാം വാര്‍ഡില്‍ തൈക്കാട് തോടിന് കയര്‍ ഭൂവസ്ത്ര വിതാനം നടത്തികൊണ്ട് തദ്ദേശ സ്വയംഭരണ വകുപ്പ് മന്ത്രി ഡോ. കെ.ടി ജലീല്‍ നിര്‍വ്വഹിക്കും. ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ അധ്യക്ഷത വഹിക്കും.  ജില്ലാ കലക്ടര്‍ അമിത് മീണ ,പൊന്നാനി കയര്‍ പ്രൊജക്ട് ഓഫീസര്‍ എ. അബ്ദുറഹിമാന്‍, വട്ടംകുളം ഗ്രാമ പഞ്ചായത്ത് ചെയര്‍പേഴ്‌സണ്‍ ഷീജ പാറക്കല്‍ തുടങ്ങിയവര്‍ പങ്കെടുക്കും.

ഫോറസ്റ്റ് സര്‍വെ ഓഫ് ഇന്ത്യയുടെ ബാംഗ്‌ളൂര്‍ മേഖല ഓഫിസ് ജില്ലയില്‍ ഗവേഷണ ആവശ്യത്തിനായി വ്യക്ഷങ്ങളുടെ കണക്കെടുപ്പ് നടത്തുന്നു. വനത്തിനകത്തും പുറത്തുമായി നടത്തുന്ന കണക്കെടുപ്പില്‍ വകുപ്പിലെ ജീവനക്കാരാണ് പങ്കെടുക്കുക. കണക്കെടുപ്പിന്റെ ഭാഗമായി മരങ്ങളുടെ അളവ് എടുക്കുക, മണ്ണ് സാമ്പിള്‍ ശേഖരിക്കുക, ഫോസിലുകള്‍ ശേഖരിക്കുക എന്നിവയും ഉണ്ടാകും. സര്‍വെ വിജയകരമായി നടത്തുന്നതിന് പൊതുജനങ്ങള്‍ സഹകരിക്കണമെന്ന് ജില്ലാ കലക്ടര്‍ അറിയിച്ചു.

കാവനൂരില്‍ 13 വയസുള്ള ഒരു വിദ്യാര്‍ത്ഥിക്ക് ഡിഫ്തീരിയ റിപ്പോര്‍ട്ട് ചെയ്തതായി ജില്ലാ മെഡിക്കല്‍ ഓഫിസര്‍ ഡോ.കെ.സക്കീന അറിയിച്ചു. വള്ളുവങ്ങാട് ദാറൂല്‍ ഇര്‍ഫാന്‍ ഇസ്ലാമിക് അക്കാദമിയില്‍ പഠിക്കുന്ന കുട്ടിയാണ്. ഇതുവരെ പ്രതിരോധ കുത്തിവവെപ്പുകളൊന്നും  എടുക്കാത്തകുട്ടിയാണന്ന് ആരോഗ്യ വകുപ്പ് അധീക്യതര്‍ അറിയിക്കുന്നു. പ്രതിരോധ കുത്തിവെപ്പ് എടുക്കുന്നതില്‍ കാര്യത്തില്‍ ജില്ല പിന്നോക്കമായ സഹചര്യത്തിലാണ് ഡിഫ്തീരിയ പോലുള്ള രോഗങ്ങള്‍ ജനങ്ങളെ ഭീതിയിലാഴ്ത്തിയിരിക്കുന്നത്.
ജില്ലയില്‍ 2017 ല്‍ ഡിഫ്തീരിയ ബാധിച്ച 30 കേസുകളും രണ്ട് മരണവും ഇതുവരെ റിപ്പോര്‍ട്ട് ചെയ്തിട്ടുണ്ട്.

ചട്ടിപ്പറമ്പ് ഇലെക്ട്രിക്കല്‍ സെക്ഷന്‍ പരിധിയില്‍ ഇന്ന് (ഡിസംബര്‍ 28) രാവിലെ 9 മുതല്‍ 5 വരെ ഈസ്റ്റ് കോഡൂര്‍ ,പറയരങ്ങാടി ,അറക്കല്‍പടി ,താണ്ണികല്‍ ,പന്തൊടി മില്‍ ,തൊഴുത്തുപിലാക്കല്‍ ,ആഷിയാന പൈപ്പ്‌സ് എന്നീ ട്രാന്‍സ്‌ഫോമറുകളിലെ വൈദ്യുതി മുടങ്ങുന്നതാണ് .

വള്ളുവനാട് ഫിലിം സൊസൈറ്റിയുടെ ആഭിമുഖ്യത്തില്‍ 29,30 തീയതികളില്‍ പെരിന്തല്‍മണ്ണ സവിത തീയ്യേറ്ററില്‍ ദ്വിദിന അഘ്യാപക ഫിലിം ഫെസ്റ്റിവല്‍ സംഘടിപ്പിക്കുന്നു. വിദ്യാര്‍ത്ഥികളുടെ പഠന രീതി ശാസ്ത്രവും മനശാസ്ത്രവും പെരുമാറ്റ വൈകല്യവും പഠനവിഷയമാകും .