ജില്ലയിലെ വിദ്യാഭ്യാസ വകുപ്പില്‍ ഡിഡിഒ മാര്‍ക്കും ജിവനക്കാരുടെ എസ്എല്‍ഐ, ജിഐഎസ് പ്രീമിയം അടവ് വിശ്വാസ് ഓണ്‍ലൈന്‍ സോഫ്റ്റ്വെയറില്‍ ഉള്‍പ്പെടുത്തുന്നതിനായുള്ള ഏകദിന പരിശീലന ക്ലാസ് നടത്തും. ജില്ലാ ഇന്‍ഷൂറന്‍സ് ഓഫീസും ഐടി @ സ്‌കൂള്‍ പ്രോജക്ടും സംയുക്തമായാണ് പരിശീലനം സംഘടിപ്പിക്കുന്നത്. 

മൊബൈല്‍ ആപ്പ് നിര്‍മ്മിക്കാന്‍ ഇനി സ്‌കൂള്‍ കുട്ടികളും. ജില്ലയിലെ രണ്ടായിരത്തോളം 'ഹായ് സ്‌കൂള്‍ കുട്ടിക്കുട്ടം' അംഗങ്ങള്‍ക്കാണ് ക്രിസ്മസ് അവധിക്കാലത്ത് മൊബൈല്‍ ആപ്പ് നിര്‍മ്മാണവും പരിശീലിപ്പിക്കുന്നത്. കേരളാ ഇന്‍ഫ്രാസ്ട്രക്ചര്‍ ആന്റ് ടെക്നോളജി ഫോര്‍ എഡ്യൂക്കേഷന്‍ (കൈറ്റ്) നേതൃത്വം നല്‍കുന്ന പരിശീലനം ഈ മാസം 27 മുതല്‍ 30 വരെയാണ്. ഓണാവധിക്കാലത്ത് കുട്ടിക്കൂട്ടം അംഗങ്ങള്‍ക്കായി നടത്തിയ 'ഇ @ ഉത്സവ് 2017' ക്യാമ്പില്‍ പങ്കെടുത്ത കുട്ടികള്‍ക്ക് തുടര്‍ പരിശീലനത്തിന്റെ ഭാഗമായാണ് ഇത് സംഘടിപ്പിച്ചിട്ടുള്ളത്.

 മിഷന്‍ എ.ബി.സി.പദ്ധതി പ്രകാരം ജില്ലയില്‍ ഇതുവരെ  2244  നായ്ക്കളെ വന്ധ്യംകരിച്ചു. എ.ഡി.സി.പി ഓഫീസില്‍ ജില്ലാ പഞ്ചായത്ത് പ്രസിഡന്റ് എ.ജി.സി ബഷീറിന്റെ നേതൃത്വത്തില്‍ നടന്ന മോണിറ്ററിംഗ് കമ്മിറ്റി യോഗത്തിലാണ് ഇക്കാര്യം അറിയിച്ചത്.

  ജില്ലാ ഭരണകൂടത്തിന്റെ നേതൃത്വത്തില്‍ , നീലേശ്വരം റോട്ടറി ക്ലബ്ബിന്റെ  സഹകരണത്തോടെ  തേജസ്വിനി റേഡിയോ   പ്രക്ഷേപണം ആരംഭിക്കുന്നു.  ഈ മാസം 23 ന്  രാവിലെ 11 ന് നീലേശ്വരം റോട്ടറി ക്ലബ് ഹാളില്‍ തേജസ്വിനി ഇന്റര്‍നെറ്റ് റേഡിയോ സംവിധാനത്തിന്റെ ഉദ്ഘാടനം  റവന്യു ഭവന നിര്‍മ്മാണ വകുപ്പ് മന്ത്രി  ഇ. ചന്ദ്രശേഖരന്‍ നിര്‍വ്വഹിക്കും.   എം. രാജഗോപാലന്‍  എം.എല്‍.എ അദ്ധ്യക്ഷത വഹിക്കും.പി.കരുണാകരന്‍  എം.പി , എം.എല്‍.എമാരായ  പി.ബി അബ്ദുല്‍ റസാഖ്, എന്‍.എ. നെല്ലിക്കുന്ന്, .കെ. കുഞ്ഞിരാമന്‍ എന്നിവര്‍ സംസാരിക്കും. ജില്ലാ കളക്ടര്‍  ജീവന്‍ ബാബു.കെ പദ്ധതി വിശദീകരിക്കും.

വ്യാവസായിക പരിശീലന വകുപ്പിന്റെ ആഭിമുഖ്യത്തില്‍ കാസര്‍കോട് ഗവ. ഐ.ടി.ഐയില്‍ നടന്ന തൊഴില്‍മേളയില്‍ ജോലി തേടിയെത്തിയത് അറുന്നൂറോളം ഉദ്യോഗാര്‍ഥികള്‍. സംസ്ഥാനത്തിനകത്തും പുറത്തുനിന്നുമായി നാല്‍പതോളം തൊഴില്‍ദാതാക്കള്‍  പങ്കെടുത്ത മേളയില്‍ ഇരുന്നൂറോളം ട്രെയിനികള്‍ക്ക് പ്ലേസ്‌മെന്റ് മുഖേന ജോലി ലഭിക്കുന്നതിനുള്ള പ്രാഥമിക നടപടികള്‍ പൂര്‍ത്തിയായി. 

കാറഡുക്ക ബ്ലോക്ക് പഞ്ചായത്തിലെ ബേഡകം പട്ടികവര്‍ഗ സംവരണവാര്‍ഡിലേക്കുള്ള ഉപതിരഞ്ഞെടുപ്പ് 2018 ജനുവരി 11ന് വ്യാഴാഴ്ച നടത്തും.  നാമനിര്‍ദ്ദേശപത്രിക സമര്‍പ്പിക്കുന്നതിനുള്ള അവസാനതീയതി ഈ മാസം 23 ആണ്. പത്രികകളുടെ സൂക്ഷ്മ പരിശോധന 26ന് നടത്തും. 28വരെ  സ്ഥാനാര്‍ത്ഥിത്വം പിന്‍വലിക്കാം. ആവശ്യമെങ്കില്‍ 2018  ജനുവരി 11ന് രാവിലെ ഏഴ് മുതല്‍ വൈകുന്നേരം അഞ്ച് വരെ വോട്ടെടുപ്പ് നടക്കും. ജനുവരി 12ന്  രാവിലെ 10 മുതല്‍ വോട്ടെണ്ണും. തെരഞ്ഞെടുപ്പിനുള്ള. മാതൃകാ പെരുമാറ്റച്ചട്ടം നിലവില്‍ വന്നു. വരണാധികാരി സര്‍വേ ഡപ്യൂട്ടി ഡയറക്ടര്‍ എന്‍ കെ രാജന്‍  പത്രികകള്‍ സ്വീകരിച്ച്  തുടങ്ങി.
 

തലശ്ശേരി പൈതൃക ടൂറിസം പദ്ധതിയുടെ പ്രവൃത്തി ഉദ്ഘാടനം ഡിസംബര്‍ 21ന് വൈകീട്ട് 4 മണിക്ക് തലശ്ശേരി ഓവര്‍ബറീസ് ഫോളി പാര്‍ക്കില്‍ ടൂറിസം വകുപ്പ് മന്ത്രി കടകംപള്ളി സുരേന്ദ്രന്‍ നിര്‍വഹിക്കും. ചടങ്ങില്‍  അഡ്വ. എ.എന്‍ ഷംസീര്‍ എം എല്‍ എ അദ്ധ്യക്ഷത വഹിക്കും. എം.പിമാരായ മുല്ലപ്പള്ളി രാമചന്ദ്രന്‍, കെ.കെ രാഗേഷ്, പ്രഫ. റിച്ചാര്‍ഡ് ഹേ എന്നിവര്‍ മുഖ്യാതിഥികളാവും. ടൂറിസം ഡയറക്ടര്‍ പി ബാലകിരണ്‍, നഗരസഭാ ചെയര്‍മാന്‍ സി.കെ രമേശന്‍, ജില്ലാ കലകടര്‍ മീര്‍ മുഹമ്മദ് അലി, തുടങ്ങിയവര്‍ സംബന്ധിക്കും. 

സംസ്ഥാന കേരളോത്സവത്തിന്റെ കലാമത്സരങ്ങളുടെ ഉദ്ഘാടനം ഡിസംബര്‍ 21ന് വൈകീട്ട് പാലക്കാട്ട് കായിക യുവജനകാര്യ വകുപ്പ് മന്ത്രി എ സി മൊയ്തീന്‍ നിര്‍വഹിക്കും. കലാമത്സരങ്ങളുടെ രജിസ്‌ട്രേഷന്‍  21 ന് വൈകുന്നേരം 4 മണി മുതല്‍  പാലക്കാട് വിക്‌ടോറിയ കോളേജിന്റെ ഗ്രൗണ്ടില്‍ നടക്കും. 22ന് രാവിലെ 9 മണി മുതല്‍ മത്സരങ്ങള്‍ ആരംഭിക്കും.

ഇന്‍ഷുറന്‍സ് വകുപ്പിലെ എസ്എല്‍ഐ/ജിഐഎസ് പദ്ധതികളുടെ കംപ്യൂട്ടര്‍ വത്ക്കരണവുമായി ബന്ധപ്പെട്ട് വിദ്യാഭ്യാസ വകുപ്പിലെ ഡിഡിഒമാര്‍ക്ക് പരിശീലനം നല്‍കും.